སེ་རི་ཡའི་གཞུང་དམངས་ཀྱིས། གཟའ་ཟླ་བའི་ཉིན་སེ་རི་ཡའི་གྲོང་ཁྱེར་དག་ཏུ། རྒྱལ་ཁབ་འདིའི་སྒེར་གཅོད་པ་སྲིད་འཛིན། བྷ་ཤར་ཨ་ས་རྡིའི་ཁྱིམ་ཚང་གི་སྲིད་དབང་མཇུག་བསྡུས་ནས་ལོ་ 1 ཧྲིལ་བོ་འཁོར་བར་དྲན་གསོ་བྱས།
གཟའ་ཟླ་བའི་ཉིན་སེ་རི་ཡའི་གྲོང་ཁྱེར་དག་ཏུ། རྒྱལ་ཁབ་འདིའི་སྒེར་གཅོད་པ་སྲིད་འཛིན། བྷ་ཤར་ཨ་ས་རྡིའི་ཁྱིམ་ཚང་གི་སྲིད་དབང་མཇུག་བསྡུས་ནས་ལོ་ 1 ཧྲིལ་བོ་འཁོར་བར་དྲན་གསོ་བྱས།
གྱེན་ལོག་དམག་དཔུག་གི་དབུ་ཁྲིད་དང་ད་ལྟའི་སྲིད་འཛིན་ཨལ་ཤ་ར་ཡིས། ལོ་སྔོན་མ་ལྟར་དམག་ཆས་ཤིག་གྱོན་ནས་ཡུལ་དེར་ཡོད་པའི་ཁ་ཆེ་ལྷ་ཁང་གཙོ་བོའི་ནང་དུ་སླེབས། ཁོས་རྒྱབ་སྐྱོར་བ་ཚོར་གཏམ་བཤད་སྐབས། སེ་རི་ཡ་གསར་བ་ཞིག་སྐྲུན་ཆེད་ང་ཚོས་འཆར་གཞི་ཡོངས་སུ་བསྒྲིགས་ཟིན། སྐབས་འདི་ནི་མུན་ནག་ལས་ཐར་བའི་དུས་ཚོད་ཅིག་རེད་ཅེས་བཤད།
ད་དུང་ཁོས། དཀོན་མཆོག་གིས་མཁྱེན། ང་ཚོས་བྱང་ནས་ལྷོ་དང་།
ཤར་ནས་ནུབ་བར་གྱི་ས་ཁུལ་དག་ལ་འཛུགས་སྐྲུན་དང་། སྟོབས་དང་ལྡན་པའི་སེ་རི་ཡ་ཞིག་བསྐྲུན་རྒྱུ་ཡིན་ཞེས་བསྒྲགས། ཨ་ལེ་པོ་གྲོང་ཁྱེར་གྱི་མི་ཞིག་གིས། ད་ལྟ་ང་ཚོ་རང་གི་རྒྱལ་ཁབ་ལ་དགའ་རྒྱུའི་འགོ་འཛུགས་བཞིན་འདུག སྔོན་མ་ང་ཚོ་རྒྱལ་ཁབ་འདི་ནས་ཕྱི་ལ་ཐར་རྒྱུར་འབད་པ་བྱེད་ཀྱི་ཡོད་ཅེས་བཤད། ད་ལྟ་རྒྱལ་ཁབ་འདིའི་སྒེར་གཅོད་གཞུང་སྔོན་མ་མཇུག་བསྡུས་ཟིན་ནའང་། ཆབ་སྲིད་ཀྱི་གནས་སྟངས་སྔར་བཞིན་རེ་བ་དང་བཅས་བར་བརྒལ་གྱི་མཚམས་སུ་ལྷག་ཡོད།
ལོ་སྔོན་མའི་ཕྱི་ཟླ་ 12 འགོ་ནས་གཙོ་བོ་ཏུར་ཀེའི་རྒྱབ་སྐྱོར་འོག
སྔར་ཨལ་ཁཱ་རྡ་དང་འབྲེལ་བ་ཡོད་པའི་ཨལ་ཤ་ར་ཡིས་འགོ་འཁྲིད་པའི་ཁ་ཆེ་དྲག་དཔུང་ཞིག་གིས། སེ་རི་ཡའི་བྱང་ཕྱོགས་དང་ལྷོ་ཕྱོགས་ནས་གྱེན་ལོག་གིས། ཉིན་ 8 ཀྱི་རྗེས་ཏེ་ཚེས་ 8 ཉིན་འདས་པའི་ལོ་ངོ་ 50 ལས་མང་བའི་རིང་སེ་རི་ཡ་དབང་སྒྱུར་མཁན། བྷ་ཤར་ཨལ་ས་རྡི་ཁྱིམ་ཚང་གི་སྲིད་དབང་མཇུག་བསྡུས། བྷ་ཤར་ཨལ་ས་རྡི་དང་ཁོའི་ནང་མི་བཅས། རྒྱལ་ས་རྡ་མ་སི་ཀོ་སི་བཞག་ནས་རཱ་ཤི་ཡར་བྲོས། དུས་དེ་ནས་བཟུང་སེ་རི་ཡའི་གཞུང་དེ་ཨལ་ཤ་ར་ཡིས་བཟུང་།
ཡིན་ན་ཡང་། དུས་དེ་ནས་བཟུང་བྷ་ཤར་ཨ་ས་རྡི་ལ་རྒྱབ་སྐྱོར་བྱེད་མཁན་ཚོས་ངོ་རྒོལ་དང་། ལྷོ་ཕྱོགས་ཀྱི་ས་ཁུལ་སི་ཝེ་རྡ་(Sweida)
ཞེས། གྲངས་ཉུང་མི་རིགས་ཤིག་(Druze)གིས་གཙོ་བོར་བཟུང་བའི་ས་ཁུལ་ཞིག་གིས་རང་བཙན་དགོས་འདུན་འདོན་བཞིན་པ། མི་རིགས་འདི་ལ་ཨེ་ཛི་རལ་གྱིས་རྒྱབ་སྐྱོར་བྱེད་བཞིན་པ་སོགས་ཀྱི་རྙོག་ཟིང་རྒྱུན་མ་ཆད་ཅིང་དེའི་ཁྲོད། ད་ལྟ་བར་མི་བརྒྱ་ཕྲག་འགའ་བསད། དེ་བཞིན་བྱང་ཕྱོགས་ཀྱི་ས་ཁུལ་ཆེན་པོ་ཞིག ཁུར་རྡི་ཤི་མི་རིགས་ཀྱིས་བཟུང་ཡོད་པ་དང་། ཁོ་ཚོས་ཟུར་དུ་རང་སྐྱོང་ཐོབ་ཐབས་བྱེད་བཞིན་པ་གསལ།
འདས་པའི་ལོ་ངོ་མང་པོའི་རིང་གི་ནང་འཁྲུག་ཁྲོད། པགས་པ་ལྟར་གཏེད་ཟིན་པའི་རྒྱལ་ཁབ་འདིའི་ཆ་ཤས་མང་པོ་ཞིག་མི་རིགས་དང་།སྡེ་ཁག་འདྲ་མིན་གྱིས་ད་དུང་ཡང་བཅད་བཟུང་བྱེད་ཡོད་པ་བཤད།
ད་ལོའི་ཕྱི་ཟླ་ 3 ནང་བར་བརྒལ་གཞུང་གིས་གནས་སྐབས་ཀྱི་རྩ་ཁྲིམས་ཤིག་བཟོས་ཤིང་། ཁྲིམས་འདིའི་འོག་ནས་ད་ལྟའི་བར་བརྒལ་གཞུང་གིས། འབྱུང་འགྱུར་ལོ་ངོ་ 4 ཡི་ནང་རྩ་ཁྲིམས་གསར་བ་གཏན་འབེབས་དང་། སྒྲིག་གཞི་དང་སྡེ་ཁག་མང་པོ་གསར་འཛུགས་བྱ་ཐུབ་དགོས་པ་ཡིན་ལ། དེའི་རྗེས་སུ་ཚད་ལྡན་གྱི་འོས་བསྡུ་གསར་བ་བརྒྱུད་གཞུང་གསར་བ་འཛུགས་དགོས་པ་ཡིན།
ཨལ་ཤ་ར་སྲིད་སྟེགས་སུ་སླེབས་པ་དང་ཁོས། ཕྱི་སྲིད་ཀྱི་ཆ་ནས་སྔར་གྱི་བྷ་ཤར་ཨ་ས་རྡིའི་རྒྱབ་འཁེན་ས། རཱ་ཤི་ཡ་དང་ཨེ་རན་གཉིས་དང་འབྲེལ་ཐག་རིང་དུ་བཏང་ཞིང་། ཨ་རི་དང་ཨ་རབ་ཀྱི་ཁ་ཆེ་འབྱོར་ལྡན་རྒྱལ་ཁབ་ཚོ། ཏུར་ཀེ་བཅས་དང་ལྷན་འབྲེལ་ཐག་ཉེ་ཏུ་བཏང་། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། སེ་རི་ཡའི་སྲིད་འཛིན་གསར་བ་ནི་ཕོ་གསར་རྫིག་པོ་དང་། དགའ་ས་ཞིག་ཡིན་པ་བཤད་ཅིང་། སེ་རི་ཡར་གོ་སྐབས་ཤིག་སྤྲོད་རྒྱུ་ཡིན་ཞེས། སྔར་ཨ་རིས་རྒྱལ་ཁབ་འདིའི་སྟེང་བཀལ་བའི་ཉེས་ཆད་མང་པོ་ཕྱིར་འཐེན། ད་ལྟ་སེ་རི་ཡ་ནི་གོ་སྐབས་དང་ཉེན་ཁ་གཉིས་ཀྱི་མཚམས་སུ་ཡོད་པ་ངོས་འཛིན།