གཟའ་ཟླ་བའི་ཉིན་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། དབྱིན་ཇིའི་སྦི་སྦི་སི་གསར་ཁང་ཁྲིམས་ལ་གཏུག་ཅིང་། ཁོ་ཁྲིམས་ཐོག་ནས་རྒྱལ་ཚེ། གུན་གསབ་ཨ་སྒོར་ཐེར་འབུམ་ $10 སྤྲོད་དགོས་པ་བཤད།
གཟའ་ཟླ་བའི་ཉིན་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། དབྱིན་ཇིའི་སྦི་སྦི་སི་གསར་ཁང་ཁྲིམས་ལ་གཏུག གྱོད་དོན་དེ་རིགས་གཉིས་སུ་བཀར་བ་དང་། གལ་སྲིད་གསར་ཁང་འདི་ཁྲིམས་ཐོག་ནས་ཕམ་ཚེ། གྱོད་དོན་རེ་རེ་ལ་གུན་གསབ་ཨ་སྒོར་ཐེར་འབུམ་ $5 རེ་བཅས། ཁྱོན་ཁོ་ལ་གུན་གསབ་ཨ་སྒོར་ཐེར་འབུམ་ $10 སྤྲོད་དགོས་ཞེས་བྲིས་ཡོད་པ་གསལ།
རྒྱབ་ལྗོངས་ནི། ལོ་སྔོན་མ་སྟེ་ཨ་རིའི་སྲིད་འཛིན་འོས་བསྡུའི་སྔོན་ཏག་ཏག་ལ། སྦི་སྦི་སི་གསར་ཁང་གིས་བཟོས་པའི་བརྙན་ཞིག་ཕྱིར་བཀྲམས། དེའི་ནང་དུ་ཕྱི་ལོ་ 2021 ཟླ་ 1 ཚེས་ 6 ཉིན་སྒྲོ་ནལ་ཁྲི་རམ་ཕུས་རང་གི་རྒྱབ་སྐྱོར་བ་ཚོར་གཏམ་བཤད་བྱས་པ་ཞིག་བཀོད། ཁོའི་སྐད་ཆ་གཏུབ་ནས་སྒྲིག་སྦྱོར་བྱས་པ་བརྒྱུད། ཁོས་རང་གི་རྒྱབ་སྐྱོར་བ་ཚོར་དྲག་ཟིང་སློང་དགོས་པའི་སྐུལ་མ་གཏོང་བཞིན་པ་ལྟ་བུ་ཞིག་བཟོས།
ཉེ་དུས་སྦི་སྦི་སི་གསར་ཁང་གི་ལས་བྱེད་ཚོའི་ནང་ཁུལ་གྱི་ཡིག་ཆ་ཞིག་ཕྱིར་ཤོར་ཅིང་། དེའི་ནང་དུ་གསར་ཁང་འདིའི་སློབ་སྟོན་པ་ཞིག་གིས། སྦི་སྦི་སིའི་བྱེད་སྟངས་འདི་ལ། སྲིད་དོན་ཕྱོགས་ལྷུང་གི་ཆ་ཡོད་པའི་བློ་ཚབས་ཀྱི་སྐད་ཆ་ཞིག་ཡོད་པ་གསལ། སྒྲོ་ནལ་ཁྲི་རམ་ཕུས་སྐད་ཆ་འདི་གཞི་རྩར་བཟུང་ནས་གསར་ཁང་ཁྲིམས་ལ་གཏུག སྦི་སྦི་སི་གསར་ཁང་གིས་ཁོ་ལ་དགོངས་དག་ཀྱང་ཞུས་ཟིན།