ཁ་སང་ཧྥ་རན་སིའི་མཚོ་སྲུང་དམག་མིས། ཡུ་རོབ་དང་ཨ་ཧྥེ་རི་ཀའི་བར་གྱི་ཡུལ་དབུས་རྒྱ་མཚོའི་ནང་དུ། རྒྱལ་སྤྱིའི་ཁྲོམ་རར་ལྐོག་ནས་རཱ་ཤི་ཡའི་རྡོ་སྣུམ་སྐྱེལ་མཁན་གྱི་གྲུ་གཟིངས། མིང་ལ་གྷི་རེན་ཆི་(Grinch)ཞེས་པ་བཟུང་།
ཁ་སང་ཧྥ་རན་སིའི་མཚོ་སྲུང་དམག་མིས། ཡུ་རོབ་དང་ཨ་ཧྥེ་རི་ཀའི་བར་གྱི་ཡུལ་དབུས་རྒྱ་མཚོའི་ནང་དུ། རྒྱལ་སྤྱིའི་ཁྲོམ་རར་ལྐོག་ནས་རཱ་ཤི་ཡའི་རྡོ་སྣུམ་སྐྱེལ་མཁན་གྱི་གྲུ་གཟིངས། མིང་ལ་གྷི་རེན་ཆི་(Grinch)ཞེས་པ་བཟུང་། ཡུ་ཁུ་རན་གྱི་སྲིད་འཛིན་ཛེ་ལན་སི་ཀེ་ཡིས། འདི་ནི་རཱ་ཤི་ཡའི་དམག་དོན་འགྲོ་གྲོན་གཅོད་པའི་ཐབས་ལམ་ཏག་ཏག་དེ་རེད་ཅེས་བྲིས། ད་ལྟ་གྲུ་གཟིངས་འདིའི་གནས་སྟེང་ཞིབ་ཕྲ་རེ་ཞིག་མི་གསལ།
ཧྥ་རན་སིའི་སྲིད་འཛིན་མཱ་ཁི་རོན་གྱིས། དེ་རིང་ཞོགས་པར་མཐུན་ཕྱོགས་ཚོ་དང་མཉམ་འབྲེལ་གྱིས་ཧྥ་རན་སིའི་མཚོ་དམག་གིས། རཱ་ཤི་ཡ་ནས་ཡོང་ཞིང་། རྒྱལ་སྤྱིའི་ཉེས་ཆད་འོག་ཡོད་པ་དོགས་གཞི་ཅན་གྱི་གྲུ་གཟིངས་ཤིག་བཟུང་ཟིན་ཅེས་བྲིས། ད་དུང་ཁོས། ཁྲིམས་དང་འགལ་བའི་ལས་ཀར་ང་ཚོས་བཟོད་པ་སྒོམ་རྒྱུ་མིན། ང་ཚོས་ད་ལྟ་གྲུ་གཟིངས་འདིར་ཞིབ་འཇུག་འགོ་བཙུགས་ཟིན་ཅེས་བསྒྲགས།
འདི་ནི་ཧྥ་རན་སིའི་དམག་དཔུང་གིས། རཱ་ཤི་ཡའི་རྡོ་སྣུམ་སྐྱེལ་མཁན་གྲིབ་གཟུགས་གྲུ་གཟིངས་ཤིག་བཟུང་བ་ཐོག་མ་དེ་གྱུར། ཉེ་དུས་ཨ་རིའི་དམག་དཔུང་གིས། རཱ་ཤི་ཡའི་དར་ཆ་བཙུགས་པའི་རྡོ་སྣུམ་སྐྱེལ་མཁན་གྲུ་གཟིངས་བཟུང་རྗེས། ཡུ་རོབ་ཀྱི་རྒྱལ་ཁབ་ཚོ་བློ་སྟོབས་ཆེ་རུ་ཕྱིན་ཅིང་།དབྱིན་ཇིའི་དམག་དཔུང་གིས་ཀྱང་རཱ་ཤི་ཡའི་གྲུ་གཟིངས་འཛིན་རྒྱུར་བསམ་བློ་གཏོང་བཞིན་པའི་གནས་ཚུལ་ཐོན། དབྱིན་ཇི་གཞུང་གིས། རཱ་ཤི་ཡའི་གྲིབ་གཟུགས་གྲུ་གཟིངས་གྲངས་ 544 ཡི་སྟེང་ཉེས་ཆད་བཀལ་ཟིན།
🔘 ད་ལྟ་སྤྱིར་རྒྱལ་སྤྱིའི་ཁྲོམ་རར་རྡོ་སྣུམ་གྱི་རིན་གོང་འཕར་བཞིན་མེད་པའི་སྟེང་། ཡུ་ཁུ་རན་གྱིས་རཱ་ཤི་ཡའི་རྡོ་སྣུམ་བཟོ་གྲྭ་དང་མཛོད་ཁང་དག་ལ་གཏོར་རྒོལ་ཐེངས་མང་བྱེད་བཞིན་པ། མཚོ་ནག་དང་བྷོལ་ཀྲི་ཁི་མཚོའི་ནང་དུ་འགྲོ་མཁན་གྲུ་གཟིངས་དག་ལའང་བདེ་འཇགས་མེད་པ། དེའི་སྟེང་ཨ་རིའི་ཉེས་ཆད་ལ་འཇིགས་ནས། རཱ་ཤི་ཡའི་རྡོ་སྣུམ་ཉོ་མཁན་ཆེ་ཤོས་རྒྱ་གར་གྱིས་ཀྱང་རཱ་ཤི་ཡའི་རྡོ་སྣུམ་ཉོ་ཚད་སྙུང་བཞིན་པ་དང་།དཀྱིལ་ཤར་གྱི་ཁ་ཆེ་རྒྱལ་ཁབ་དག་ནས་རྡོ་སྣུམ་ཉོ་ཚད་ཡར་སྤར་བཞིན་པས། ཟླ་བ་སྔོན་མའི་ནང་རྒྱ་གར་གྱིས་རཱ་ཤི་ཡའི་རྡོ་སྣུམ་ཉོ་ཚད་དེ།
འདས་པའི་ལོ་ངོ་ 2 རིང་གི་ཚད་གཞི་དམའ་ཤོས་དེ་གྱུར།
གྲིབ་གཟུགས་གྲུ་གཟིངས་ཞེས་པ་ནི། རྒྱལ་ཁབ་གཞན་གྱི་ནང་དུ་ཐོ་འགོད་བྱས་རྗེས། ཉེས་ཆད་འོག་ཚུད་པའི་རྒྱལ་ཁབ་གཞན་གང་རུང་ཞིག་གི་ཚོང་ཟོག་རྒྱ་མཚོའི་སྟེང་ལྐོག་འདྲེན་བྱེད་མཁན་གྱི་གྲུ་གཟིངས་དག་ལ་གོ་ཞིང་།དམག་འཁྲུག་འགོ་བཙུགས་རྗེས་རྡོ་སྣུམ་སྐྱེལ་མཁན་གྱི་རཱ་ཤི་ཡའི་གྲུ་གཟིངས་དག་ནུབ་ཕྱོགས་ཀྱི་ཉེས་ཆད་འོག་ཚུད་པས། རཱ་ཤི་ཡའི་གཞུང་སྒེར་གཉིས་ཀྱིས་གྲིབ་གཟུགས་གྲུ་གཟིངས་མང་པོ་བེད་སྤྱོད་བྱེད་འགོ་བཙུགས། དཔེར་ན། ཧྥ་རན་སིས་བཟུང་ཟིན་པའི་གྲུ་གཟིངས་འདི། ཨ་ཧྥེ་རི་ཀའི་མཚོ་གླིང་རྒྱལ་ཁབ་ཆུང་ངུ། ཀོ་མོ་རོ་སི་(Comoros)ཡི་འོག་ཏུ་ཐོ་འགོད་བྱས་ཡོད་པ་གསལ།