རྒྱ་ནག་གི་ཆེས་མཐོའི་དམག་སྤྱི་ཀྲང་ཡོ་ཤ་(张又侠)ཡིས། རྡུལ་མཚོན་ལས་གཞི་དང་འབྲེལ་བའི་ཆེས་མཐོའི་གསང་གནས་ཨ་རིར་སྤྲོད་བཞིན་པ་དང་། དེའི་བདེན་དཔང་ཡིན་ཞེས། རྒྱ་ནག་རྒྱལ་ཡོངས་ཉིང་རྡུལ་ཚོགས་པའི་(中核集团)སྤྱི་ཁྱབ་སྟངས་འཛིན་པ་ཟུར་བས་ཡིག་ཆ་སོགས་སྤྲད་ཡོད་པ་བཤད།
བདུན་ཕྲག་སྔོན་མའི་གཟའ་སྤེན་པའི་ཉིན། རྒྱ་ནག་བདེ་སྲུང་ལྷན་ཁང་གིས། རྒྱ་ནག་གི་ཆེས་མཐོའི་དམག་སྤྱི་ཀྲང་ཡོ་ཤ་(张又侠)ལ་ཞིབ་འཇུག་འགོ་བཙུགས་ཟིན་པ་བསྒྲགས་ཤིང་། དོགས་ཡོད་ནག་ཉེས་ནི་{ཁྲིམས་དང་ཀུན་སྤྱོད་ལ་འགལ་བའི་ལས་ཚབས་ཆེན་བརྩམས་}ཟིན་ཡོད་མེད་དེ་ཡིན་པར་བཤད་པ་ལས། ཞིབ་ཕྲའི་གནས་ཚུལ་ཕྱིར་མ་བསྒྲགས་ཤིང་། དེ་དང་ལྷན་རྒྱ་ནག་དབུས་དམག་དོན་ལྷན་ཁང་གི་དམག་སྤྱི་ཆེན་མོ། ལེའུ་ཀྲེན་ལི(刘振立)ཡང་ཞིབ་འཇུག་འོག་བཞག་ཟིན་པའི་གནས་ཚུལ་ཐོན།
མདང་དགོང་ཝོལ་ སི་ཀྲི་རི་ཀྲི་གསར་དེབ་ཀྱིས། གནས་ཚུལ་དངོས་ལ་རྒྱུས་མངའ་ཡོད་པའི་མིའི་སྐད་ཆ་ལུང་འདྲེན་གྱིས་གནས་ཚུལ་བཀོད་པ་ལྟར་ན། ཁོ་ལ་འཛུགས་བཞིན་པའི་ནག་ཉེས་དག་གི་ཁྲོད། ༡ རྒྱ་ནག་གི་རྡུལ་མཚོན་ལས་གཞི་དང་འབྲེལ་བའི་ཆེས་མཐོའི་གསང་གནས་ཨ་རིར་སྤྲོད་བཞིན་པ་དང་། ༢ ལས་བྱེད་ཀྱི་གནས་རིམ་སྤར་ཆེད་ལྐོག་རྔན་བླངས་པ་སོགས་ཚུད་ཡོད་པ་བཤད། དམག་སྤྱི་འདིས་ཨ་རི་ལ་རྒྱ་ནག་གི་རྡུལ་མཚོན་གསང་གནས་སྤྲོད་བཞིན་པའི་བདེན་དཔང་ཡིན་ཞེས། རྒྱ་ནག་རྒྱལ་ཡོངས་ཉིང་རྡུལ་ཚོགས་པའི་(中核集团)སྤྱི་ཁྱབ་སྟངས་འཛིན་པ་ཟུར་བ། ཀུ་ཅུན་ཞེས་པས་བདེན་དཔང་འགའ་སྤྲད་ཡོད་པ། གནས་ཚུལ་དངོས་ལ་རྒྱུས་མངའ་ཡོད་མཁན་གྱིས་བཤད།
ད་དུང་དམག་སྤྱི་འདིས་རྒྱ་ནག་དབུས་ཆེས་མཐོའི་དམག་དོན་ལྷན་ཁང་གི་ནང་དུ། རང་གི་མཐའ་འཁོར་དུ་དམག་དཔོན་གྱི་ཤོག་ཁག་ཅིག་སྒྲིག་བཞིན་པ་དང་། དམག་དོན་ལས་བྱེད་དག་གི་བར་འགལ་ཟླའི་ས་བོན་འདེབས་བཞིན་འདུག་ཅེས་ཞིབ་འཇུག་བྱེད་བཞིན་པ་བཤད། འདི་དང་འབྲེལ་རྒྱ་ནག་གི་ཆེས་མཐོའི་དཔོན་རིགས་ཁྲོད་ཀྱི་འགལ་ཟླ་རྣོ་ངར་ཅན་དུ་གྱུར་ཅིང་། སྡུག་ས་ནས་དམག་དཔུང་འདིའི་ཁྲོད་ཚུད་སྲིད་པར། རྒྱ་ནག་གི་ཆེས་མཐོའི་ཆབ་སྲིད་དབུ་ཁྲིད་ཚོས་འཇིགས་སྣང་བྱེད་བཞིན་པ་དང་། འདི་ནི་རྒྱ་ནག་དམར་ཤོག་རྒྱལ་ཁབ་ཀྱི་ལོ་རྒྱུས་ཁྲོད་ཛ་དྲག་ཆེ་ཤོས་ཀྱི་གནས་ཚུལ་ཞིག་ལ་ངོས་འཛིན་བཞིན་པ་བཤད།
ཞིབ་བཤེར་འོག་བཞག་ཟིན་པའི་དམག་སྤྱི་ཀྲང་ཡོ་ཤ་ཞེས་པ་འདི་ནི། ཆབ་སྲིད་ཀྱི་ཆ་ནས་ཞེ་ཅེན་ཕིན་དང་ཐག་ཉེ་ཞིང་། ཕྱིའི་མཐོང་ཚུལ་ལ་དམག་སྤྱི་འདི་ནི་ཞེ་ཅེན་ཕིན་གྱི་ཆེས་ཡིད་ཆེས་བྱེད་ས་ཞིག་ལ་ངོས་འཛིན་བཞིན་ཡོད་པ་གསལ། ཐེ་ཝན་གཞུང་གིས། རྒྱུན་ལྡན་མ་ཡིན་པའི་རྒྱ་ནག་གི་དམག་དོན་ཁྲོད་ཀྱི་འགྱུར་བ་འདི་ལ་ཐག་ཉེ་ནས་ལྟ་ཞིབ་བྱེད་བཞིན་ཡོད་ཅེས་བཤད། དམག་འཁྲུག་དངོས་ཀྱི་ཉམས་མྱོང་ཡོད་མཁན་ཉུང་ངུ་ཞིག་ལས་མེད་ཅིང་། དེའི་ཁྲོད་ཀྱི་གཅིག་ཡིན་པའི་ཆེས་མཐོའི་དམག་སྤྱི་འདི་གློ་བུར་དུ་མེད་པ་བཟོས་པ་འདིས། རྒྱ་ནག་གི་དམག་དཔུང་དེང་རབས་ཅན་དུ་སྒྱུར་རྒྱུའི་འགྲོས་ལ། སྡུག་ཕྱོགས་ནས་ཤུགས་རྐྱེན་ཐེབས་རྒྱུ་ཡིན་པ་ཆེད་མཁས་པས་བཤད།