བདུན་ཕྲག་སྔོན་མའི་གཟའ་སྤེན་པའི་ཉིན། ལྷོ་ཨ་མེ་རི་ཀའི་ཝེ་ནེ་ཛོ་ལ་རྒྱལ་ཁབ་ཀྱི་ཐག་ཉེར་ཡོད་པའི་ཨ་རིའི་དམག་དཔུང་གིས། ཁཱ་རེ་བྷེ་ཡན་མཚོའི་ནང་དུ། ཝེ་ནེ་ཛོ་ལའི་རྡོ་སྣུམ་སྐྱེལ་མཁན་གྲུ་གཟིངས་ཤིག་བཟུང་།
བདུན་ཕྲག་སྔོན་མའི་གཟའ་སྤེན་པའི་ཉིན། ལྷོ་ཨ་མེ་རི་ཀའི་ཝེ་ནེ་ཛོ་ལ་རྒྱལ་ཁབ་ཀྱི་ཐག་ཉེར་ཡོད་པའི་ཨ་རིའི་དམག་དཔུང་གིས། ཁཱ་རེ་བྷེ་ཡན་མཚོའི་ནང་དུ། ཝེ་ནེ་ཛོ་ལའི་རྡོ་སྣུམ་སྐྱེལ་མཁན་གྲུ་གཟིངས་ཤིག་བཟུང་། ཨེག་སོ་སི་ལྟར་ན་གྲུ་གཟིངས་འདི་ཨ་རིའི་ཉེས་ཆད་འོག་མེད་པ་བཤད།ཡིན་ན་ཡང་། དེའི་རྗེས་སུ་ཕོ་བྲང་དཀར་པོའི་གསལ་བཤད་ལྟར་ན། གྲུ་གཟིངས་འདི་ཉེས་ཆད་འོག་ཚུད་ཡོད་པ་བསྒྲགས།
གྲུ་གཟིངས་འདིའི་ནང་དུ་རྡོ་སྣུམ་ཧ་ཅང་ཕོན་ཆེན་ཡོད་པ་དང་། དེ་དག་རྒྱ་ནག་ཏུ་འདྲེན་བཞིན་པ། རོའུ་ཀྲར་གསར་ཤོག་གིས་གནས་ཚུལ་བཀོད།འདི་ནི་ཨ་རིའི་དམག་དཔུང་གིས། ཝེ་ནེ་ཛོ་ལ་དང་འབྲེལ་བའི་གྲུ་གཟིངས་བཟུང་པ་ཐེངས་གཉིས་པ་དེ་གྱུར།
དེ་བཞིན་ཁ་སང་གཟའ་ཉི་མའི་ཉིན་ཨ་རིའི་དམག་དཔུང་གིས། ཕྱོགས་འདིར་གྲུ་གཟིངས་གཞན་ཞིག་འཛིན་ཐབས་བྱས་པ་དང་། དམག་དཔུང་གིས་གྲུ་གཟིངས་དེར་འདུག་དགོས་པའི་ཉེན་བརྡ་བཏང་ཡང་། གྲུ་གཟིངས་དེ་མ་བསྡད་པར། མུ་མཐུད་དུ་རྒྱ་མཚོའི་ནང་དུ་བསྐྱོད་བཞིན་པ་དང་། ཨ་རིའི་དམག་དཔུང་གིས་རྗེས་འདེད་ཀྱིས་འཛིན་ཐབས་བྱེད་བཞིན་པའི་གནས་ཚུལ་ཐོན། ཨ་རིའི་གཞུང་གིས་གནས་ཚུལ་འདི་བདེན་མིན་ད་ལྟ་བར་གཏན་མ་འཁེལ།
རྒྱབ་ལྗོངས། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཝེ་ནེ་ཛོ་ལར་འགྲོ་མཁན་དང་ཝེ་ནེ་ཛོ་ལ་ནས་ཡོང་མཁན་གྱི་རྡོ་སྣུམ་སྐྱེལ་མཁན་གྲུ་གཟིངས། ཉེས་ཆད་འོག་ཚུད་ཟིན་པ་ཚང་མ་འགྲོ་རུ་མི་འཇུག་རྒྱུའི་བཀའ་བཏང་།ཨ་རི་ལྟར་ན་ཝེ་ནེ་ཛོ་ལའི་སྲིད་འཛིན་མཱ་རྡུ་རོ་གཞུང་གིས། རྡོ་སྣུམ་བཙོང་བ་ལས་ཐོབ་པའི་དངུལ་སྒོར་ལོག་སྤྱོད་ཀྱིས། ཉལ་ཐལ་བཟོ་སྐྲུན་དང་དབོར་འདྲེན་སོགས་ནག་ཉེས་ཀྱི་བྱ་སྒྲུབ་བཞིན་པ་བཤད།