ཞེ་ཅེན་ཕིན་གྱིས་སྒྲོ་ནལ་ཁྲི་རམ་ཕུ་ལ། ཐེ་ཝན་རྒྱ་ནག་ལ་ཕྱིར་ལོག་རྒྱུ་ནི། དམག་འཁྲུག་(འཁྲུག་ཆེན་གཉིས་པ)གི་རྗེས་ཀྱི་རྒྱལ་སྤྱིའི་སྒྲོམ་གཞིའི་ཆ་ཤས་འབྲལ་ཐབས་མེད་པ་ཞིག་རེད་ཅེས་བཤད་ཡོད་ཟེར།
ཁ་སང་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་དང་། རྒྱ་ནག་གི་སྲིད་འཛིན་ཞེ་ཅེན་ཕིན་གཉིས་ཀྱིས་ཁ་པར་བརྒྱུད་གླེང་མོལ་བྱས། དེའི་རྗེས་སྒྲོ་ནལ་ཁྲི་རམ་ཕུས། ང་དང་སྲིད་འཛིན་ཞེ་ཅེན་ཕིན་བར་ཁ་པར་བརྒྱུད་གླེང་མོལ་ཧ་ཅང་ཡག་པོ་བྱུང་། ང་གཉིས་ཀྱིས་ཡུ་ཁུ་རན་དང་རཱ་ཤི་ཡ། བཟི་སྨན་རྫས་ཧྥེན་ཀྲ་ནེལ། སྲན་དཀར་དང་ཞིང་ལས་ཐོན་རྫས་སོགས་ཀྱི་སྐོར་གླེང་མོལ་བྱས་ཟིན། ང་ཚོའི་ཞིང་པ་ཚོ་དང་འབྲེལ་ཐག་གཅོད་ཧ་ཅང་གལ་ཆེན་ཞིག་བྱུང་ཡོད་ལ། གནས་སྟངས་འདི་མུ་མཐུད་དུ་ཡག་ཏུ་འགྲོ་ངེས་རེད། རྒྱ་ནག་དང་ང་ཚོའི་འབྲེལ་བ་ནི་ཤིན་ཏུ་བརྟན་པོ་ཡིན་ཞེས་བྲིས།
ད་དུང་ཁོས། སྐབས་དེར་ལོ་རྗེས་མའི་ཕྱི་ཟླ་ 4 ནང་རང་ཉིད་རྒྱ་ནག་ཏུ་ཡོང་རྒྱུར་མགྲོན་འབོད་བྱས་ཟིན་པ་དང་། དེ་ཁས་བླངས་ཟིན་པ་དང་ལོ་རྗེས་མའི་མཇུག་ཅིག་ཏུ་ཞེ་ཅེན་ཕིན་ཡང་ཨ་རིར་ཡོང་རྒྱུ་བྱས་ཡོད་ཅེས་བྲིས། རྒྱ་ནག་གཞུང་འབྲེལ་གྱི་གསར་ཁང་དག་གིས། ཨ་རྒྱ་གཉིས་ཀྱིས། ཕན་ཚུན་གྱི་ཁེ་ཕན་དང་འདྲ་མཉམ་རྩ་དོན་གཞིར་བཞག་ནས། གོ་སྐབས་འདི་དམ་འཛིན་གྱིས་ལམ་ཀ་འགྲིག་ཕྱོགས་སུ་འགྲོ་དགོས་པ་བཤད། ད་དུང་ཐེངས་འདིར་ཞེ་ཅེན་ཕིན་གྱིས་སྒྲོ་ནལ་ཁྲི་རམ་ཕུ་ལ། ཐེ་ཝན་རྒྱ་ནག་ལ་ཕྱིར་ལོག་རྒྱུ་ནི། དམག་འཁྲུག་(འཁྲུག་ཆེན་གཉིས་པ)གི་རྗེས་ཀྱི་རྒྱལ་སྤྱིའི་སྒྲོམ་གཞིའི་ཆ་ཤས་འབྲལ་ཐབས་མེད་པ་ཞིག་རེད་ཅེས། བཤད་ཡོད་པའི་གནས་ཚུལ་ཐོན། ཡིན་ན་ཡང་། སྒྲོ་ནལ་ཁྲི་རམ་ཕུས་ཐེངས་འདིར་ཁོ་དང་། ཞེ་ཅེན་ཕིན་བར་ཐེ་ཝན་གྱི་སྐོར་གླེང་ཡོད་མེད་གང་ཡང་མ་བྲིས།
བདུན་ཕྲག་ 3 ཙམ་གྱི་གོང་དུ་སྒྲོ་ནལ་ཁྲི་རམ་ཕུ་དང་། ཞེ་ཅེན་ཕིན་གཉིས་ཐོག་མར་ལྷོ་ཀོ་རེ་ཡར་ཐུག་ཅིང་། སྐབས་དེར་ཕན་ཚུན་གྱི་ཚོང་འབྲེལ་གྲོས་མོལ་ཐད་ཐག་གཅོད་གལ་ཆེན་འགའ་བྱས། ཨ་རིས་རྒྱ་ནག་གི་སྟེང་བཀལ་བའི་སྒོ་ཁྲལ་དེ་བརྒྱ་ཆ་ 20% ལ་མར་བཅག་ཅིང་། རྒྱ་ནག་གིས་ཨ་རི་ནས་སྲན་དཀར་མང་བ་ཉོ་རྒྱུ་དང་། གཏེར་རྫས་རྩ་ཆེན་འཚོང་རྒྱུར་བཀག་འགོག་མི་བྱ་རྒྱུ་བྱས། ཡིན་ན་ཡང་། རྒྱལ་ཁབ་གཉིས་བར་གྱི་ཚོང་འབྲེལ་བསྐྱར་སྒྲིག་གི་གྲོས་མཐུན་སྔར་བཞིན་འཇོག་མ་ཐུབ། སྤྱིའི་ཆ་ནས་ཨ་རྒྱའི་འབྲེལ་བ་ཅུང་བརྟན་པོར་གྱུར་ནའང་། ཐེ་ཝན་གྱི་གནད་དོན་དང་འབྲེལ། ཉེ་དུས་ནས་ཞི་བདེ་རྒྱ་མཚོའི་ཁུལ་གྱི་ཨ་རིའི་མཐུན་གྲོགས་གཙོ་བོ་ཉི་ཧོང་དང་རྒྱ་ནག་བར་འབྲེལ་བ་སྡུག་ཏུ་ཕྱིན།