ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཨེ་རན་གཞུང་གིས་ངོ་རྒོལ་བ་དག་ལ་དྲག་གནོན་བྱས་པའི་ཉེས་ཆད་དུ། ཨེ་རན་དང་ཚོང་འབྲེལ་ཡོད་པའི་རྒྱལ་ཁབ་ཚང་མའི་སྟེང་། སྒོ་ཁྲལ་བརྒྱ་ཆ་ 25% དགལ་རྒྱུ་ཐག་བཅད་ཟིན་པ་བསྒྲགས།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཨེ་རན་གཞུང་གིས་ངོ་རྒོལ་བ་དག་ལ་དྲག་གནོན་བྱས་པའི་ཉེས་ཆད་དུ། ཨེ་རན་དང་ཚོང་འབྲེལ་ཡོད་པའི་རྒྱལ་ཁབ་ཚང་མའི་སྟེང་། སྒོ་ཁྲལ་བརྒྱ་ཆ་ 25% དགལ་རྒྱུ་ཐག་བཅད་ཟིན་པ་བསྒྲགས། ཨེ་རན་དུ་ཡོད་པའི་ཨ་རིའི་མི་སེར་དག་ཕྱི་ལ་ཐོན་དགོས་པ་དང་། ཐོན་མ་ཐུབ་ཀྱང་བདེ་འཇགས་ཡིན་སའི་གནས་ལ་འགྲོ་དགོས་པ་ཨ་རིས་ཉེན་བརྡ་བཏང་།
ཨ་རིའི་ལས་བྱེད་ཅིག་གིས་དཀྱིལ་ཤར་གྱི་དབྱིན་སྐད་གསར་ཁང་ཨལ་ཇེ་ཛེ་ར་ལ། དཀྱིལ་ཤར་དུ་ཡོད་པའི་ཨ་རིའི་དམག་དཔུང་གིས། ཛ་དྲག་བྱ་འགུལ་ཅི་ཞིག་སྤེལ་དགོས་ཀྱང་། སྤེལ་རྒྱུར་གྲ་སྒྲིག་གྲུབ་ཟིན་པ་བཤད།ཨེག་སོ་སི་ལྟར་ན། སྒྲོ་ནལ་ཁྲི་རམ་ཕུ་ཨེ་རན་གཞུང་གིས་ངོ་རྒོལ་བ་གསོད་བཞིན་པའི་ཉེས་ཆད་དུ། ཨེ་རན་གྱི་སྟེང་གཏོར་རྒོལ་བྱ་རྒྱུའི་ཕྱོགས་སུ་འགྲོ་བཞིན་པ་བཤད།
ཕོ་བྲང་དཀར་པོའི་མགྲིན་ཚབ་པས། གཏོར་རྒོལ་བྱ་རྒྱུ་དེ་ཅོག་ཙེའི་སྟེང་དུ་ཡོད་པའི་གདམ་ཀ་ཞིག་ཡིན་ནའང་། ཕྱི་འབྲེལ་གྱི་ལམ་ནས་དཀའ་ངལ་སེལ་རྒྱུ་དང་པོ་འཇོག་གི་ཡོད་ཅེས་བཤད། སྒྲོ་ནལ་ཁྲི་རམ་ཕུས། ཨེ་རན་གྱིས་ཚུར་འབྲེལ་བ་བྱེད་ཀྱི་འདུག་ཅེས་བཤད་ཟིན་པ་ལྟར། གཟའ་ཉི་མའི་ཉིན་ཨེ་རན་ཕྱི་སྲིད་བློན་ཆེན་གྱིས། སྒྲོ་ནལ་ཁྲི་རམ་ཕུའི་དཀྱིལ་ཤར་སྐུ་ཚབ་ཝེ་ཀྲི་ཀོ་ཧྥི་ལ་འབྲེལ་བ་བྱས་ཡོད་པ་གསལ།