རྒྱ་གར་འཕྲོད་བསྟེན་ལྷན་ཁང་གིས། ཟླ་བ་སྔོན་མའི་མཇུག་ཏུ་རྒྱ་གར་གྱི་ནུབ་སྦང་གྷལ་མངའ་སྡེ་རུ། ནེ་པཱ་ནད་འབུ་(Nipah Virus)འགོས་པའི་མི་ 2 བྱུང་ཟིན་པ་བསྒྲགས།

ཉི་ཧོང་གཞུང་གིས་རང་གི་ཉ་བ་ཚོར་མཚོ་ཐོག་ཏུ་རྒྱ་ནག་གི་གྲུ་གཟིངས་དག་དང་གདོང་ཐུག་རྒྱག་རྒྱུར་འཛེམས་དགོས་ཞེས་ཉེན་བརྡ་བཏང་ཡོད་པའི་གནས་ཚུལ་ཐོན། 

ད་ལྟའི་ཝེ་ནེ་ཛོ་ལའི་བར་བརྒལ་སྲིད་འཛིན་གྱིས། ཁོ་ཚོས་རྒྱ་ནག་དང་རཱ་ཤི་ཡ། ཨེ་རན་བཅས་དང་འབྲེལ་བ་གཅོད་རྒྱུའི་ཐད་ནས། ཨ་རི་དང་མཉམ་འབྲེལ་བྱ་རྒྱུ་ཡིན་མིན་ཨ་རིའི་གསང་ལས་ཀྱིས་དོགས་པ་བྱེད་བཞིན་པ་བཤད།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ད་ལྟ་ཡང་བསྐྱར་ཨ་རིའི་གཏོར་རྒོལ་གྲུ་གཟིངས་རུ་ཁག་ཅིག་ཨེ་རན་གྱི་ཕྱོགས་སུ་འགྲོ་བཞིན་པ་བཤད། ཐོག་མར་གྲོས་མོལ་གྱི་ལམ་ནས་ཨེ་རན་གྱི་དཀའ་ངལ་འདི་སེལ་རྒྱུར་ཚོད་ལྟ་བྱ་རྒྱུ་ཡིན་པ་ཁོས་བཤད།

ད་ལྟ་བར་ཡུ་ཁུ་རན་གྱི་དམག་མི་གྲངས་ 100,000 ནས་ 140,000 བར་བསད་ཟིན་པ་རོབ་རྩིས་དང་། ཡུ་དམག་འབུམ་ 6 ཡས་མས་ཤིག་ཤི་རྨས་ཐེབས། དེ་བཞིན་རཱ་ཤི་ཡའི་དམག་མི་ 325,000 ཡས་མས་བསད་ཟིན་པ་དང་། ཁྱོན་དམག་མི་ས་ཡ་ 1.2 ཤི་རྨས་ཐེབས་ཟིན་པ་བཤད།

དེ་རིང་ཏེ་ཕྱི་ལོ་ 2027 ཟླ་ 1 ཚེས་ 27 ཉིན། རྒྱ་གར་དང་ཡུ་རོབ་མཉམ་འབྲེལ་བར་གཞི་རྒྱ་ཆེ་བའི་རང་དབང་ཚོང་འབྲེལ་གྲོས་མཐུན་བཞག ཡུ་རོབ་ནས་རྒྱ་གར་ལ་ནང་འདྲེན་བྱེད་བཞིན་པའི་ཚོང་ཟོག་བརྒྱ་ཆ་ 97% མ་ཟིན་ཙམ་གྱི་སྟེང་ནས་སྒོ་ཁྲལ་བསྙུང་རྒྱུ་ཐག་བཅད།

རྒྱ་གར་གྱིས་ཡུ་རོབ་ཀྱི་རླངས་འཁོར་དག་གི་སྟེང་ནས་སྒོ་ཁྲལ་བརྒྱ་ཆ་ 40% དེ་མ་ཐག་ཕྱིར་འཐེན་རྒྱུ་དང་། བརྒྱ་ཆ་ 10% རྗེས་སུ་ཕྱིར་འཐེན་རྒྱུ་ཡིན་པ་བཤད། འདིའི་ཁྲོད་མཇར་མན་དང་ཧྥ་རན་སིའི་རླངས་འཁོར་འགའ་ཚུད།

ཟླ་བ་འདིའི་ཚེས་ 3 ཉིན་ཝེ་ནེ་ཛོ་ལའི་སྲིད་འཛིན་མཱ་རྡུ་རོ་འཛིན་སྐབས། ཨ་རིའི་དམག་དཔུང་གིས་གསང་བའི་མཚོན་ཆ་ཞིག་བེད་སྤྱོད་བྱས་ཟིན་པའི་གནས་ཚུལ་སྔར་ནས་ཐོན་ཟིན་པ་ལྟར། སྲིད་འཛིན་སྒྲོ་ནལ་ཁྲི་རམ་ཕུས་ཐོག་མར་ནེའུ་ཡོག་ཆ་འཕྲིན་ལ་འདིའི་སྐོར་བཤད།

བདུན་ཕྲག་སྔོན་མར་ཨ་རིའི་རྒྱལ་སྲུང་ཐབས་བྱུས་ཡིག་ཆ་གསར་བ་ཕྱིར་བཏོན་པའི་ནང་དུ། ཨ་རིས་ལྷོ་ཀོ་རེ་ཡའི་བདེ་སྲུང་ལ་རོགས་སྐྱོར་བྱ་རྒྱུ་དེ་ཚད་ཅན་དུ་བཟོ་རྒྱུ་ཡིན་པ་ཐག་བཅད་ཟིན་པ་གསལ།

ཨེ་རན་གྱི་ངོ་རྒོལ་ཁྲོད་མི་ 30,000 བསད་ཟིན་པ་བཤད་ཅིང་། གཙོ་བོ་ཟླ་བ་འདིའི་ཚེས་ 8 དང་ཚེས་ 9 གཉིས་ལ་དམར་གསོད་ཆེན་པོ་ཞིག་བྱས་ཟིན་པ་བཤད། སྐབས་དེར་རྒྱལ་ནང་དུ་དྲྭ་རྒྱ་བཀག་ཟིན་པས། ད་དུང་ཡང་གནས་ཚུལ་མང་པོ་ཞིག་ཕྱིར་ཐོན་མེད།

བདུན་ཕྲག་སྔོན་མར་རཱ་ཤི་ཡ་དང་ཡུ་ཁུ་རན། ཨ་རི་བཅས་ཀྱི་སྐུ་ཚབ་དག་ཨ་རབ་རྒྱལ་ཕྲན་མཉམ་འབྲེལ་གྱི་རྒྱལ་ས། ཨ་བྷུ་རྡ་བྷེ་རུ་ཐོག་མར་འཛོམས་ཤིང་། ཁོ་ཚོའི་བར་ཉིན་ 2 རིང་སྐད་ཆ་བཤད། བདུན་ཕྲག་རྗེས་མར་ཁོ་ཚོ་བསྐྱར་དུ་འཛོམས་རྒྱུ་བྱས་ཡོད་པ་གསལ།

རྒྱ་ནག་གི་ཆེས་མཐོའི་དམག་སྤྱི་ཀྲང་ཡོ་ཤ་(张又侠)ཡིས། རྡུལ་མཚོན་ལས་གཞི་དང་འབྲེལ་བའི་ཆེས་མཐོའི་གསང་གནས་ཨ་རིར་སྤྲོད་བཞིན་པ་དང་། དེའི་བདེན་དཔང་ཡིན་ཞེས། རྒྱ་ནག་རྒྱལ་ཡོངས་ཉིང་རྡུལ་ཚོགས་པའི་(中核集团)སྤྱི་ཁྱབ་སྟངས་འཛིན་པ་ཟུར་བས་ཡིག་ཆ་སོགས་སྤྲད་ཡོད་པ་བཤད།