ད་ལོར་རཱ་ཤི་ཡ་དང་རྒྱ་གར་བར་གྱི་ཚོང་འབྲེལ་རིན་ཐང་དེ། ཨ་སྒོར་ཐེར་འབུམ་ $68.7 ལ་འབུད་རྒྱུ་དང་། ཕྱི་ལོ་ 2030 བར་རྒྱལ་ཁབ་གཉིས་ཀྱི་ཚོང་འབྲེལ་རིན་ཐང་དེ། ཨ་སྒོར་ཐེར་འབུམ་ $100 འབུད་ཐུབ་པའི་དམིགས་ཡུལ་ཡོད་པ་བཤད།
སང་ཉིན་རཱ་ཤི་ཡའི་སྲིད་འཛིན་ཕུ་ཀྲན་རྒྱ་གར་དུ་འབྱོར་རྒྱུ་དང་། ཉིན་ 2 རིང་རྒྱ་གར་དུ་སྐོར་བསྐྱོད་བྱ་རྒྱུ། ཐེངས་འདིར་གཙོ་བོ་རྒྱ་གར་དང་རཱ་ཤི་ཡའི་བར་གྱི་ཚོགས་འདུ་ཐེངས་ཉེར་གསུམ་པའི་སྟེང་ཞུགས་རྒྱུ་དང་། རྒྱ་གར་དང་རཱ་ཤི་ཡའི་བར་ཚོང་ལས་བདེ་སྲུང་། ཉིང་རྡུལ་ལས་གཞི་སོགས་ཀྱི་སྐོར་གྲོས་མོལ་བྱ་རྒྱུ་ཡིན་པའི་གནས་ཚུལ་ཐོན།
རཱ་ཤི་ཡའི་སྲིད་འཛིན་ལས་ཁུངས་ཀྱི་མགྲིན་ཚབ་པ་པི་སི་ཀོ་ཝི་ཡིས། ད་ལོར་རཱ་ཤི་ཡ་དང་རྒྱ་གར་བར་གྱི་ཚོང་འབྲེལ་རིན་ཐང་དེ། ཨ་སྒོར་ཐེར་འབུམ་ $68.7 ལ་འབུད་རྒྱུ་དང་། ཕྱི་ལོ་ 2030 བར་རྒྱལ་ཁབ་གཉིས་ཀྱི་ཚོང་འབྲེལ་རིན་ཐང་དེ། ཨ་སྒོར་ཐེར་འབུམ་ $100 འབུད་ཐུབ་པའི་དམིགས་ཡུལ་ཡོད་པ་བཤད། དེ་བཞིན་རཱ་ཤི་ཡ་དང་རྒྱ་གར་བར་བཞག་པའི་བདེ་སྲུང་མཉམ་ལས་དང་འབྲེལ་བའི་ཆིངས་ཡིག་ཅིག་ལ། རཱ་ཤི་ཡའི་གྲོས་ཚོགས་ཀྱིས་ཆོག་མཆན་སྤྲད།
གྲོས་མཐུན་འདི་ལྟར་ན་དམག་སྦྱོང་གི་ཆེད་དང་།ཕན་ཚུན་གྱི་རྒྱལ་ནང་དུ་རང་བྱུང་གི་གནོད་འཚེ་སོགས་བྱུང་ཚེ་རོགས་སྐྱོར་ཆེད། ཕན་ཚུན་གྱི་རྒྱལ་ནང་ལ་དམག་མི་གཏོང་རེས་བྱ་ཆོག་པ་བཟོས་ཡོད་པ་བཤད། གཞན་ཡང་རཱ་ཤི་ཡའི་གཞུང་འབྲེལ་གསར་ཁང་ངམ། ཆབ་སྲིད་ཁྱབ་བསྒྲགས་ཆེད་སྤྱོད་ཀྱིན་པའི་གསར་ཁང་{དེ་རིང་གི་རཱ་ཤི་ཡ་(RT)}ཞེས་པའི་དབྱིན་སྐད་ཡན་ལག་ཅིག་ཟླ་བ་འདིའི་ཚེས་ 5 ནས་རྒྱ་གར་དུ་ཐད་གཏོང་འགོ་བཙུགས། གསར་ཁང་འདི་ཡུ་རོབ་དང་ཨ་རིས་བཀག་ཟིན།