ཨ་རིའི་ཁྲིམས་ལུགས་ལྟ་ཞིབ་དང་། ལག་བསྟར་ལྷན་ཁང་(DOJ)གིས། ནག་ཅན་ཨེབ་སི་ཀྲེན་དང་འབྲེལ་བའི་ཡིག་ཆ་དང་པར་མང་པོ་ཕྱིར་བཏོན། ད་དུང་ཡོང་རྒྱུའི་བདུན་ཕྲག་ 2 རིང་ཡིག་ཆ་གཞན་དག་ཀྱང་ཕྱིར་འདོན་རྒྱུ་ཡིན་པ་བསྒྲགས།
དུས་བཅད་ལྟར་ཁ་སང་ཨ་རིའི་ཁྲིམས་ལུགས་ལྟ་ཞིབ་དང་། ལག་བསྟར་ལྷན་ཁང་(DOJ)གིས། ནག་ཅན་ཨེབ་སི་ཀྲེན་དང་འབྲེལ་བའི་ཡིག་ཆ་དང་པར་མང་པོ་ཕྱིར་བཏོན། ད་དུང་ཡོང་རྒྱུའི་བདུན་ཕྲག་ 2 རིང་ཡིག་ཆ་གཞན་དག་ཀྱང་ཕྱིར་འདོན་རྒྱུ་ཡིན་པ་བསྒྲགས། དོན་དངོས་སུ་ཐེངས་འདིར་ཡིག་ཆ་ཚང་མ་ཕྱིར་འདོན་དགོས་པ་ཡིན། མི་རྣམས་ཀྱི་དོ་སྣང་བྱུང་ས་གཙོ་བོ་ཞིག་ནི། ཐེངས་འདིར་བཏོན་པའི་པར་དང་། ཡིག་ཆའི་ནང་དུ། སྒྲོ་ནལ་ཁྲི་རམ་ཕུ་དང་འབྲེལ་བའི་པར་དང་མིང་དེ་ཙམ་མེད་པ་དེ་གྱུར། སྒྲོ་ནལ་ཁྲི་རམ་ཕུ་དང་ནག་ཅན་ཨེབ་སི་ཀྲེན་གཉིས། ཕྱི་ལོ་ 1990 ནང་དང་ཕྱི་ལོ་ 2000 ནང་གི་སྟོད་དུ་གྲོགས་པོ་ཡིན་པ་དང་། ཕྱི་ལོ་ 2000 ལོའི་ནང་གི་དཀྱིལ་དུ་ཁོ་གཉིས་བར་འགལ་ཟླ་ཤོར་ཟིན་པ་སྒྲོ་ནལ་ཁྲི་རམ་ཕུ་རང་གིས་བཤད།
སྒྲོ་ནལ་ཁྲི་རམ་ཕུས། ཁོ་དང་ཨེབ་སི་ཀྲེན་གཉིས་ངོ་ཤེས་པ་ལས་ཨེབ་སི་ཀྲེན་གྱི་ནག་ཉེས་ཁྲོད། རང་ཉིད་ཚུད་མེད་པ་མ་ཟད་ཨེབ་སི་ཀྲེན་གྱི་ནག་ཉེས་སྐོར་གང་ཡང་མི་ཤེས་ཞེས་བཤད་ཟིན། གཞན་ཡང་ཐེངས་འདིར་བཀྲམས་པའི་འདྲ་པར་དག་གི་ནང་དུ། གཞས་པ་གྲགས་ཅན་མེ་ཀལ་རྗག་སོན་(Michael Jackson)གྱི་པར། སྲིད་འཛིན་ཟུར་བ་ཁི་ལིན་ཀྲོན་དང་། ཨེབ་སི་ཀྲེན་གྱི་དགའ་རོགས་གྷེ་སི་ལེ་གཉིས་མཉམ་དུ་ཆུ་རྫིང་ཞིག་གི་ནང་དུ་ཡོད་པ། གཞན་ངོ་གདོང་སྦས་ཟིན་པའི་བུ་མོ་ཞིག་དང་ལྷན་ཡོད་པ་བཅས་ཀྱི་པར་བཅས་ཐོན། ཁི་ལིན་ཀྲོན་གྱིས་ཀྱང་། ཨེབ་སི་ཀྲེན་གྱི་ལས་ཀའི་ཁྲོད་རང་ཉིད་ཚུད་མེད་པ་མ་ཟད། དེའི་སྐོར་ལ་གང་ཡང་མི་ཤེས་ཞེས་ཤོད་བཞིན་ཡོད།
གཞན་ཡང་ནག་ཅན་ཨེབ་སི་ཀྲེན་གྱིས་བེད་སྤྱོད་བྱས་ཟིན་པའི་བུ་མོ་དང་། འབྲེལ་ཡོད་མི་ 1,200 ཡི་མིང་དང་། ལུས་ལ་འཕུར་མཉེས་གཏོང་མཁན་བུ་མོ་ 254 ཡི་མིང་ཐོ་ཞིག་ཕྱིར་བཏོན་ཟིན་ནའང་། མིང་ཚང་མ་ནག་གསུབ་བཏང་ཟིན། དོན་དངོས་སུ་ཐེངས་འདིར་ཡིག་ཆ་མང་པོ་ཕྱིར་བཏོན་ཟིན་ནའང་། ཡིག་ཆ་མང་པོ་ཞིག་ཀློག་མི་ཐུབ་པ་བཟོས་ཟིན་པ་མ་ཟད། པར་མང་པོ་ཞིག་གསལ་བོ་མེད་པ་བཟོས་ཟིན་པས། མི་མང་པོ་འདིའི་ཐད་ཁོང་ཁྲོ་ཆེན་པོ་ལངས། ལྷག་པར་སྐབས་བབ་ཀྱི་གླེང་གཞི་གཙོ་བོ། སྒྲོ་ནལ་ཁྲི་རམ་ཕུ་དང་འབྲེལ་བའི་པར་དང་། ཡིག་ཆ་མང་པོ་ཕྱིར་བཏོན་རྒྱུའི་ཚབ་ཏུ། ཁི་ལིན་ཀྲོན་གྱི་མིང་དང་པར་བཏོན་ཅིང་། འདིའི་རྒྱབ་ཏུ་ཆབ་སྲིད་ཀྱི་གཡོ་ཐབས་ཤིག་ཡོད་པའི་སྐྱོན་བརྗོད་ཀྱང་བྱེད་མཁན་བྱུང་།