ཡུ་རོབ།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། རཱ་ཤི་ཡ་དང་ཡུ་ཁུ་རན། ཡུ་རོབ་བཅས་དང་ལྷན་གསང་བའི་ངང་གྲོས་མོལ་གྱིས།དམག་འཁྲུག་འདི་མཚམས་འཇོག་ཐབས་ཆེད་ཡིག་ཆ་དོན་ཚན་ 28 ཞིག་བཟོ་བཞིན་པའི་གནས་ཚུལ་ཐོན་ཟིན་པ་ལྟར། ད་ལྟ་འདིའི་སྐོར་གནས་ཚུལ་ཅུང་ཞིབ་ཕྲ་ཐོན།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། དམག་འཁྲུག་འདི་མཚམས་འཇོག་ཐབས་དང་འབྲེལ། ཡིག་ཆ་དོན་ཚན་ 28 ཅན་ཞིག་བཟོ་བཞིན་པ་དང་། འདིའི་ཆེད་རཱ་ཤི་ཡ་དང་ཡུ་ཁུ་རན། ཡུ་རོབ་རྒྱལ་ཁབ་དག་དང་ལྷན་གསང་བའི་ངང་གྲོས་མོལ་བྱེད་བཞིན་པ་བཤད།

གཟའ་ཉི་མའི་ཉིན། ཕོ་ལན་ཀྲི་ནས་ཡུ་ཁུ་རན་ལ་ནུབ་ཕྱོགས་ཀྱི་གོ་ལག་སྐྱེལ་སའི་མེ་འཁོར་ལྕགས་ལམ་ཞིག་ལ་གཏོར་རྒོལ་ཐེབས་ཟིན་པ་ལྟར། དེའི་རྒྱབ་ཏུ་རཱ་ཤི་ཡའི་གསང་ལས་ཡོད་པ་ཕོ་ལན་ཀྲི་གཞུང་གིས་བཤད།

མཇར་མན་བདེ་སྲུང་བློན་ཆེན་གྱིས། ནུབ་ཆིངས་དང་རཱ་ཤི་ཡ་ཐད་ཀར་གདོང་ཐུག་རྒྱག་རྒྱུའི་དམག་འཁྲུག་དེ། ཕྱི་ལོ་ 2029 ལོའི་སྔོན་དུ་འབྱུང་སྲིད་པ་བཤད། ཁོས། ང་ཚོས་ནམ་རྒྱུན་འདི་ཉིད་ཕྱི་ལོ་ 2029 ལོར་འབྱུང་སྲིད་པ་ཤོད་བཞིན་ཡོད་ཀྱང་། ད་ལྟ་ཕྱི་ལོ་ 2028 ལོར་འབྱུང་སྲིད་པ་ཤོད་མཁན་འདུག་ཅེས་བཤད།

བདུན་ཕྲག་འདིའི་ནང་ཡུ་ཁུ་རན་གྱི་རྒྱལ་ནང་དུ་ལྐོག་ཟའི་གནད་དོན་ཆེན་པོ་ཞིག་ཕྱིར་བཏོན་ཅིང་། དེའི་ཁྲོད་སྲིད་འཛིན་ཛེ་ལན་སི་ཀེ་རང་གི་ཐག་ཉེའི་ལས་བྱེད་དང་། ཁོ་ལ་རྒྱབ་སྐྱོར་བྱེད་མཁན་གྱི་ཚོང་པ་ཆེན་པོ་བཅས་ཚུད་པས། གནས་ཚུལ་འདིས་ཡུ་ཁུ་རན་གྱི་མི་དམངས་ཁྲོད་གྲགས་འགུལ་ཆེན་པོ་བཟོས། 

མཇར་མན་གྱི་གཞུང་འཛིན་མཉམ་འབྲེལ་ཆབ་སྲིད་ཚོགས་པས།མཇར་མན་གྱི་ད་ལྟའི་དམག་མིའི་གྲངས་ 180,000 ཡིན་པ་ལ། འབྱུང་འགྱུར་དམག་མིའི་གྲངས་དེ་ 260,000 ལ་ཡར་སྤར་རྒྱུ་དང་། སྒུག་ཐོའི་ནང་གི་དམག་ཞབས་གྲངས་དེ་འབུམ་ 2 ཡར་སྤར་རྒྱུར་གྲོས་མཐུན་ཟིན་པའི་གནས་ཚུལ་ཐོན།

མདང་དགོང་རཱ་དམག་གིས། ཡུ་ཁུ་རན་གྱི་ས་ཁུལ་དག་ལ་སྒྲི་རོན་ 138 དང་། བྷ་ལི་སི་ཀྲི་ཁི་འཕུར་མདའ་ཞིག་བཅས་འཕངས་ནས་ཚུར་རྒོལ་བྱས། ཡུ་དམག་གིས་རཱ་དམག་གི་སྒྲི་རོན་ 102 བཀག་ཟིན་ནའང་།སྒྲི་རོན་གྲངས་ 36 གིས་ས་ཁུལ་ 10 ལ་གཏོར་རྒོལ་ཐེབས་ཟིན་པ་བཤད།

རྒྱ་ནག་གི་རྡོ་སྣུམ་ཐོན་སྐྲུན་ཁེ་གཉེར་ཆེ་ཤོས་གྲས་ཡན་ཅང་རྡོ་སྣུམ་(延长石油)གྱིས་ཀྱང་། ད་ལོའི་ཕྱི་ཟླ་ 12 དང་ལོ་རྗེས་མའི་ཕྱི་ཟླ་ 2 དཀྱིལ་བར་རཱ་ཤི་ཡའི་རྡོ་སྣུམ་ཉོ་རྒྱུ་སྙུང་འཆར་ཡོད་པ་དང་། དེ་བཞིན་རྒྱ་ནག་གཞུང་འབྲེལ་གྱི་རྡོ་སྣུམ་ཁེ་གཉེར་ཆེན་པོ། ཀྲུང་གོའི་རྡོ་སྣུམ་དང་རྫས་འགྱུར་(中国石化)ཞེས་པའི་ཡན་ལག་བཟོ་གྲྭ་ 2 ཟླ་བ་འདིའི་མཇུག་བར་དུ་སྒོ་བརྒྱབས་ཟིན་པ། རོའུ་ཀྲར་གསར་ཤོག་སྟེང་གནས་ཚུལ་བཀོད།

རཱ་དམག་གིས། ཡུ་ཁུ་རན་གྱི་རྡོ་ཉད་སི་ཀི་ས་ཁུལ་གྱི་ཕོ་ཁོ་རོ་ཝི་སི་ཀི་གྲོང་ཁྱེར་ཧྲིལ་བོ་འཕྲོག་ཆེད། མུ་མཐུད་དུ་འཐབ་བཞིན་པ་དང་ཁ་སང་སྨུག་པ་འཐིབ་ཡོད་པའི་གོ་སྐབས་དང་བསྟུན། རཱ་དམག་སྐོར་ཞིག་གིས་འཕྲུལ་ལྟ་དང་། རླངས་འཁོར་སོགས་བེད་སྤྱོད་ཀྱིས་ཕོ་ཁི་རོ་ཝི་སི་ཀི་གྲོང་ཁྱེར་གྱི་ལྷོ་ཕྱོགས་ནས་ནང་ལ་འཛུལ།

རཱ་དམག་ཡུ་ཁུ་རན་གྱི་རྡོ་ཉད་སི་ཀི་ས་ཁུལ་གྱི་ཕོ་ཁི་རོ་ཝི་སི་ཀི་གྲོང་ཁྱེར་གྱི་མཐར་སླེབས་ཟིན་པ་ལྟར། ད་ལྟ་རཱ་དམག་ 1,000 ཡས་མས་གྲོང་ཁྱེར་ནང་དུ་འཛུལ་ཟིན་པ་དང་། གྲོང་ཁྱེར་གྱི་ལྷོ་ཡི་ཆ་ཤས་དག་རཱ་དམག་གིས་བཟུང་ཟིན་པའི་གནས་ཚུལ་ཐོན། སྲང་ལམ་དང་ཁང་པའི་བར་ནས་འཐབ་འཁྲུག་རྒྱག་མི་དགོས་ཆེད། རཱ་དམག་གིས་གྲོང་ཁྱེར་གྱི་མཐར་སྐོར་ཐབས་བྱེད་བཞིན་པ་དང་། གྲོང་ཁྱེར་ནང་ནས་ཡུ་དམག་ཕྱིར་རང་བཞིན་གྱིས་འཐེན་དུ་འཇུག་རྒྱུའི་ཐབས་བྱུས་བཟུང་ཡོད་པ་གསལ།