admin

མཁའ་དབྱིངས་སྐར་དཔྱད་རྒྱང་ཤེལ་(James Webb telescope)བརྒྱུད། སྐར་ཚོམ་ཞིག་མཐོང་ཟིན་པ་དང་། འདི་དག་ནི་གས་འཐོར་ཆེན་མོའི་རྗེས་སུ་ཐོག་མར་གྲུབ་པའི་སྐར་མ་དག་ཡིན་པ་ཚོད་དཔག་བྱེད།

མདང་དགོང་རཱ་དམག་གིས། ཡུ་ཁུ་རན་གྱི་ས་ཁུལ་དག་ལ་སྒྲི་རོན་ 138 དང་། བྷ་ལི་སི་ཀྲི་ཁི་འཕུར་མདའ་ཞིག་བཅས་འཕངས་ནས་ཚུར་རྒོལ་བྱས། ཡུ་དམག་གིས་རཱ་དམག་གི་སྒྲི་རོན་ 102 བཀག་ཟིན་ནའང་།སྒྲི་རོན་གྲངས་ 36 གིས་ས་ཁུལ་ 10 ལ་གཏོར་རྒོལ་ཐེབས་ཟིན་པ་བཤད།

ཉི་ཧོང་གི་བུད་མེད་ལོ་ན་ 32 ཅན་ཞིག་གིས། བཅོས་མའི་རིག་པའི་སྐད་བརྡའི་མ་ལག་(ChatGPT)བེད་སྤྱོད་ཀྱིས་མོ་རང་རང་གིས་བསྐྲུན་པའི་མི་ཞིག་དང་ལྷན་གཉེན་བསྒྲིགས་ཟིན་པ་བསྒྲགས།

ཨ་རིའི་མང་གཙོ་ཚོགས་པའི་འཐུས་མི་ཚོས། ནག་ཅན་ཨེབ་སི་ཀྲེན་དང་འབྲེལ་བའི་གསང་བའི་ཡིག་ཆ་ཤོག་གྲངས་ཁྲི་ 2 ལས་མང་བ་ཕྱིར་བཏོན།

འདས་པའི་ཉིན་ 43 རིང་ཨ་རིའི་གཞུང་སྒོ་བརྒྱབས་ཤིང་། ཁ་སང་གྲོས་ཚོགས་འོག་མར་འོས་བསྡུ་བརྒྱུད། ལོ་རྗེས་མའི་ཕྱི་ཟླ་ 1 ཚེས་ 30 བར་གཞུང་བསྐྱར་དུ་སྒོ་འབྱེད་རྒྱུ་བྱས།

རྒྱ་ནག་གི་རྡོ་སྣུམ་ཐོན་སྐྲུན་ཁེ་གཉེར་ཆེ་ཤོས་གྲས་ཡན་ཅང་རྡོ་སྣུམ་(延长石油)གྱིས་ཀྱང་། ད་ལོའི་ཕྱི་ཟླ་ 12 དང་ལོ་རྗེས་མའི་ཕྱི་ཟླ་ 2 དཀྱིལ་བར་རཱ་ཤི་ཡའི་རྡོ་སྣུམ་ཉོ་རྒྱུ་སྙུང་འཆར་ཡོད་པ་དང་། དེ་བཞིན་རྒྱ་ནག་གཞུང་འབྲེལ་གྱི་རྡོ་སྣུམ་ཁེ་གཉེར་ཆེན་པོ། ཀྲུང་གོའི་རྡོ་སྣུམ་དང་རྫས་འགྱུར་(中国石化)ཞེས་པའི་ཡན་ལག་བཟོ་གྲྭ་ 2 ཟླ་བ་འདིའི་མཇུག་བར་དུ་སྒོ་བརྒྱབས་ཟིན་པ། རོའུ་ཀྲར་གསར་ཤོག་སྟེང་གནས་ཚུལ་བཀོད།

དབྱིན་ཇིའི་སྦི་སྦི་སི་གསར་ཁང་ལྟར་ན། ད་ལོའི་ཕྱི་ཟླ་ 10 ཚེས་ 10 ཉིན་ནས་ཨེ་ཛི་རལ་དང་། ཧཱ་མ་སི་དྲག་དཔུང་བར་མེ་མཚམས་བཞག་ཟིན་ནའང་། དུས་དེ་ནས་ད་ལྟ་བར་ཨེ་ཛི་རལ་གྱི་དམག་དཔུང་གིས། གྷ་ཛ་ས་ཁུལ་གྱི་ཁང་བརྩེགས་གྲངས་ 1,500 ལས་མང་བ་གཏོར་ཟིན་པ། མཁའ་དབྱིངས་ནས་བླངས་པའི་པར་ལས་གསལ་བོར་གྱུར་ཟིན་པ་དང་། དོན་དངོས་སུ་གྲངས་ཀ་དེ་ལས་ཧ་ཅང་མང་བ་ཡིན་པ་བཤད།