དཀྱིལ་ཤར།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ད་ལྟ་ཡང་བསྐྱར་ཨ་རིའི་གཏོར་རྒོལ་གྲུ་གཟིངས་རུ་ཁག་ཅིག་ཨེ་རན་གྱི་ཕྱོགས་སུ་འགྲོ་བཞིན་པ་བཤད། ཐོག་མར་གྲོས་མོལ་གྱི་ལམ་ནས་ཨེ་རན་གྱི་དཀའ་ངལ་འདི་སེལ་རྒྱུར་ཚོད་ལྟ་བྱ་རྒྱུ་ཡིན་པ་ཁོས་བཤད།

ཨེ་རན་གྱི་ངོ་རྒོལ་ཁྲོད་མི་ 30,000 བསད་ཟིན་པ་བཤད་ཅིང་། གཙོ་བོ་ཟླ་བ་འདིའི་ཚེས་ 8 དང་ཚེས་ 9 གཉིས་ལ་དམར་གསོད་ཆེན་པོ་ཞིག་བྱས་ཟིན་པ་བཤད། སྐབས་དེར་རྒྱལ་ནང་དུ་དྲྭ་རྒྱ་བཀག་ཟིན་པས། ད་དུང་ཡང་གནས་ཚུལ་མང་པོ་ཞིག་ཕྱིར་ཐོན་མེད།

སུད་སིར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་བུ་མོའི་ཁྱོ་ག་དང་། ཁོའི་དམིགས་བསལ་སྐུ་ཚབ་ཁུ་ཤི་ནེ་ཡིས། འབྱུང་འགྱུར་གྷ་ཛ་ས་ཁུལ་དུ་འཛུགས་སྐྲུན་བྱེད་ཕྱོགས་དང་འབྲེལ་བའི་འཆར་གཞི་ཞིག་ཕྱིར་བསྒྲགས།

ཨེ་རན་གྱི་ངོ་རྒོལ་ཁྲོད་རྐྱེན་འདས་སུ་ཕྱིན་ཟིན་པ་དག་གི་ནང་མི་ཚོས་བཤད་པ་ལྟར་ན། ཨེ་རན་གཞུང་གིས་ཁྱིམ་བདག་ལ་ཕུང་པོ་ཕྱིར་སྤྲོད་དགོས་ན་སྒོར་མོ་འཁྱེར་ཤོག གཞན་ཕུང་པོ་ཕྱིར་སྤྲོད་རྒྱུ་མིན་ཞེས་ཤོད་བཞིན་པའི་གནས་ཚུལ་བཀོད།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་དམིགས་བསལ་སྐུ་ཚབ་ཝེ་ཀྲི་ཀོ་ཧྥི་ཡིས། ད་ལྟ་གྷ་ཛ་ས་ཁུལ་གྱི་དམག་འཁྲུག་ལ་མེ་མཚམས་བཞག་པའི་ལས་ཀ་རིམ་པ་གཉིས་པ་དེ་འགོ་བཙུགས་ཟིན་ཅེས་བསྒྲགས་ཟིན་པ་ལྟར། སྒྲོ་ནལ་ཁྲི་རམ་ཕུས་ཀྱང་། ད་ལྟ་གྷ་ས་ཁུལ་གྱི་བར་བརྒལ་འཛིན་སྐྱོང་ལ་ལྟ་ཞིབ་བྱེད་མཁན། {ཞི་བདེ་ཚོགས་ཆུང་}ཞེས་པ་བཙུགས་ཟིན་པ་དང་། འདིའི་ཁྲོད་མི་སྣ་གང་དག་ཚུད་ཡོད་པའི་མིང་ཐོ་མགྱོགས་པོར་ཕྱིར་བསྒྲག་རྒྱུ་ཡིན་པ་བཤད།

གཟའ་མིག་དམར་གྱི་ཞོགས་པར་ཨེ་རན་གྱི་གནད་དོན་ཐད། ཨ་རིའི་སྲིད་འཛིན་རྒན་གཞོན་གཉིས་མཉམ་ཞུགས་ཀྱིས། ནང་ཁུལ་ཆེས་མཐོའི་བདེ་སྲུང་ཚོགས་འདུ་ཞིག་ཚོགས་ཟིན་པ་གསལ།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཨེ་རན་གྱི་རྒྱལ་གཅེས་པ་ཚོ། མུ་མཐུད་དུ་ངོ་རྒོལ་བྱོས། སྒྲིག་འཛུགས་དག་འཛིན་རོགས། བརྙས་བཅོས་བྱེད་མཁན་དང་ལག་དམར་ཚོའི་མིང་ཐོ་མཉར་རོགས། ཁོ་ཚོས་འདི་ལ་སྐྱིན་ཚབ་སྤྲོད་ངེས་ཡིན། རོགས་རམ་ཡོང་བཞིན་ཡོད་ཅེས་བྲིས།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཨེ་རན་གཞུང་གིས་ངོ་རྒོལ་བ་དག་ལ་དྲག་གནོན་བྱས་པའི་ཉེས་ཆད་དུ། ཨེ་རན་དང་ཚོང་འབྲེལ་ཡོད་པའི་རྒྱལ་ཁབ་ཚང་མའི་སྟེང་། སྒོ་ཁྲལ་བརྒྱ་ཆ་ 25% དགལ་རྒྱུ་ཐག་བཅད་ཟིན་པ་བསྒྲགས།

ད་ལྟ་བར་ཨེ་རན་གྱི་ངོ་རྒོལ་གྱི་ཁྲོད་ཉུང་མཐར། ངོ་རྒོལ་བ་ 490 དང་བདེ་སྲུང་མི་སྣ་ 48 བསད་ཟིན་པ་གསལ་བོར་གྱུར་ཟིན་པ་བསྒྲགས། ད་དུང་མི་ 10,600 ལས་མང་བ་བཟུང་ཟིན་པའི་གནས་ཚུལ་ཐོན།

ཨ་རིར་ཡོད་པའི་ཨེ་རན་གྱི་རྒྱལ་སྲས་ཀྱིས། གཟའ་སྤེན་པ་དང་གཟའ་ཉི་མའི་ཕྱི་དྲོའི་ཆུ་ཚོད་ 6 པའི་སྟེང་། མི་དམངས་དག་སྲང་ལམ་དུ་ཐོན་ནས་ངོ་རྒོལ་བྱ་དགོས་པ་དང་། ད་ལྟ་ནི་ཕྱི་ལ་ཐོན་རྒྱུ་ཙམ་ཞིག་མ་ཡིན་པར། གྲོང་ཁྱེར་དག་གི་ལྟེ་བ་འཛིན་དགོས་པ་བཤད།