དཀྱིལ་ཤར།

ཨེ་རན་གྱིས་རྗོར་གདན་དུ་གཏོར་རྒོལ་ཁྲོད་ཨ་རིའི་དམག་མི་ ༢ བསད་ཟིན་པའི་གནས་ཚུལ་ཐོན་ཅིང་། ད་ལྟ་དཀྱིལ་ཤར་ཡོངས་ལ་དམག་འཁྲུག་གིས་ཁྱབ་རྒྱུའི་ཉེན་ཁ་ཆེ་རུ་ཕྱིན།

ཁ་སང་ཨེ་རན་གྱིས། ཧོར་མུ་ཛི་མཚོ་འགག་དང་དེའི་ཐག་ཉེར། གྲུ་གཟིངས་ 2 (ད་ལྟ་གནས་ཚུལ་ཐོན་པ་ལྟར་ན། གྲུ་གཟིངས་ 3 ཡང་ཟེར།)སྟེང་གཏོར་རྒོལ་བྱས་ཟིན་པ། ཨ་རིའི་ལས་བྱེད་ཚོས་བཤད་ཅིང་། དེའི་ལན་དུ་མདང་དགོང་ཨ་རིའི་དམག་དཔུང་གིས། ཨེ་རན་ལྷོ་ཕྱོགས་བྷན་རྡར་ཨ་བྷ་སི་སོགས་སུ་ཡོད་པ། ཨེ་རན་གྱི་དམག་དོན་བསྟི་གནས་དང་། གོ་ལག་སོགས་དམིགས་འབེན་གྲངས་ 80 ཡི་སྟེང་གཏོར་རྒོལ་བྱས་ཟིན་པ་བསྒྲགས།

ཨ་རིའི་ནོར་སྲིད་དྲུང་ཆེ་སི་ཀོ་ཀྲི་ལ་གྲོས་ཚོགས་ཀྱིས་འདྲི་ཞིབ་སྐབས་སུ། ཁོས། ད་ལྟ་ཨེ་རན་གྱི་མཐོ་རིམ་མི་སྣ་ཚོས་རང་གི་དངུལ་སྒོར་ཕྱི་རྒྱལ་ལ་སྤོར་བཞིན་པ་ང་ཚོས་མཐོང་གི་འདུག་ཅེས་བཤད།

ཨེ་རན་གཞུང་གིས་ངོ་རྒོལ་བ་ཚོར་དྲག་གནོན་ཡ་ང་བ་ཞིག་བྱས་ཟིན་པ་ལྟར། ཡུ་རོབ་མཉམ་འབྲེལ་གྱི་རྒྱལ་ཁབ་ 27 གྱིས། ཨེ་རན་གྱི་ཁ་ཆེ་གསར་བརྗེ་དམག་དཔུང་དེ་དྲག་སྤྱོད་དམག་སྡེ་ཞིག་ཏུ་ངོས་བཟུང་། 

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ད་ལྟ་ཡང་བསྐྱར་ཨ་རིའི་གཏོར་རྒོལ་གྲུ་གཟིངས་རུ་ཁག་ཅིག་ཨེ་རན་གྱི་ཕྱོགས་སུ་འགྲོ་བཞིན་པ་བཤད། ཐོག་མར་གྲོས་མོལ་གྱི་ལམ་ནས་ཨེ་རན་གྱི་དཀའ་ངལ་འདི་སེལ་རྒྱུར་ཚོད་ལྟ་བྱ་རྒྱུ་ཡིན་པ་ཁོས་བཤད།

ཨེ་རན་གྱི་ངོ་རྒོལ་ཁྲོད་མི་ 30,000 བསད་ཟིན་པ་བཤད་ཅིང་། གཙོ་བོ་ཟླ་བ་འདིའི་ཚེས་ 8 དང་ཚེས་ 9 གཉིས་ལ་དམར་གསོད་ཆེན་པོ་ཞིག་བྱས་ཟིན་པ་བཤད། སྐབས་དེར་རྒྱལ་ནང་དུ་དྲྭ་རྒྱ་བཀག་ཟིན་པས། ད་དུང་ཡང་གནས་ཚུལ་མང་པོ་ཞིག་ཕྱིར་ཐོན་མེད།

སུད་སིར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་བུ་མོའི་ཁྱོ་ག་དང་། ཁོའི་དམིགས་བསལ་སྐུ་ཚབ་ཁུ་ཤི་ནེ་ཡིས། འབྱུང་འགྱུར་གྷ་ཛ་ས་ཁུལ་དུ་འཛུགས་སྐྲུན་བྱེད་ཕྱོགས་དང་འབྲེལ་བའི་འཆར་གཞི་ཞིག་ཕྱིར་བསྒྲགས།

ཨེ་རན་གྱི་ངོ་རྒོལ་ཁྲོད་རྐྱེན་འདས་སུ་ཕྱིན་ཟིན་པ་དག་གི་ནང་མི་ཚོས་བཤད་པ་ལྟར་ན། ཨེ་རན་གཞུང་གིས་ཁྱིམ་བདག་ལ་ཕུང་པོ་ཕྱིར་སྤྲོད་དགོས་ན་སྒོར་མོ་འཁྱེར་ཤོག གཞན་ཕུང་པོ་ཕྱིར་སྤྲོད་རྒྱུ་མིན་ཞེས་ཤོད་བཞིན་པའི་གནས་ཚུལ་བཀོད།

ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་དམིགས་བསལ་སྐུ་ཚབ་ཝེ་ཀྲི་ཀོ་ཧྥི་ཡིས། ད་ལྟ་གྷ་ཛ་ས་ཁུལ་གྱི་དམག་འཁྲུག་ལ་མེ་མཚམས་བཞག་པའི་ལས་ཀ་རིམ་པ་གཉིས་པ་དེ་འགོ་བཙུགས་ཟིན་ཅེས་བསྒྲགས་ཟིན་པ་ལྟར། སྒྲོ་ནལ་ཁྲི་རམ་ཕུས་ཀྱང་། ད་ལྟ་གྷ་ས་ཁུལ་གྱི་བར་བརྒལ་འཛིན་སྐྱོང་ལ་ལྟ་ཞིབ་བྱེད་མཁན། {ཞི་བདེ་ཚོགས་ཆུང་}ཞེས་པ་བཙུགས་ཟིན་པ་དང་། འདིའི་ཁྲོད་མི་སྣ་གང་དག་ཚུད་ཡོད་པའི་མིང་ཐོ་མགྱོགས་པོར་ཕྱིར་བསྒྲག་རྒྱུ་ཡིན་པ་བཤད།

གཟའ་མིག་དམར་གྱི་ཞོགས་པར་ཨེ་རན་གྱི་གནད་དོན་ཐད། ཨ་རིའི་སྲིད་འཛིན་རྒན་གཞོན་གཉིས་མཉམ་ཞུགས་ཀྱིས། ནང་ཁུལ་ཆེས་མཐོའི་བདེ་སྲུང་ཚོགས་འདུ་ཞིག་ཚོགས་ཟིན་པ་གསལ།