admin

ད་ལོའི་སྟོན་ཀར་ཨེ་རན་དུ་ཆར་བ་ཡག་པོ་མ་བབས་རྐྱེན་ཐན་པ་ཚབས་ཆེན་བྱུང་ཟིན་པ་དང་། ལྷག་པར་དུ་རྒྱལ་ས་ཐེ་རན་དང་དེའི་ཉེ་འཁོར་དུ་སྟོན་ཀར་ཐན་པ་ཆེན་པོ་བྱུང་བས། རྒྱལ་སའི་མི་དག་གནས་སྤོ་དགོས་སྲིད་པ་བཤད།

བྷང་ལ་རྡི་ཤིའི་དམིགས་བསལ་ཁྲིམས་ཁང་ཞིག་གིས། སྲིད་བློན་ཟུར་བ་ལྕམ་ཤེ་ཁི་ ཧཱ་སེ་ན་ལ་སྲོག་ཁྲིམས་བཅད། ནག་ཉེས་གཙོ་བོ་ཞིག་ནི་ལོ་སྔོན་མར་གཞུང་ལ་ངོ་རྒོལ་བྱེད་མཁན་ཚོར་དྲག་གནོན་བྱས་པ་དེ་བགྲངས། 

མཇར་མན་བདེ་སྲུང་བློན་ཆེན་གྱིས། ནུབ་ཆིངས་དང་རཱ་ཤི་ཡ་ཐད་ཀར་གདོང་ཐུག་རྒྱག་རྒྱུའི་དམག་འཁྲུག་དེ། ཕྱི་ལོ་ 2029 ལོའི་སྔོན་དུ་འབྱུང་སྲིད་པ་བཤད། ཁོས། ང་ཚོས་ནམ་རྒྱུན་འདི་ཉིད་ཕྱི་ལོ་ 2029 ལོར་འབྱུང་སྲིད་པ་ཤོད་བཞིན་ཡོད་ཀྱང་། ད་ལྟ་ཕྱི་ལོ་ 2028 ལོར་འབྱུང་སྲིད་པ་ཤོད་མཁན་འདུག་ཅེས་བཤད།

རྒྱ་ནག་གི་དཔལ་འབྱོར་སྙན་ཐོ་གསར་བ་ཕྱིར་ཐོན་པ་ལྟར་ན། ད་ལོའི་ཕྱི་ཟླ་ 10 ནང་རྒྱ་ནག་གི་བཟོ་གྲྭ་དག་གིས་བཟོས་པའི་ཐོན་རྫས་ཚད་དང་། ཐོན་ཟོག་དང་ཞབས་ཞུ་ཁྲོམ་རར་བཙོང་བའི་ཚད་དེ་སླར་ཡང་འདས་པའི་ལོ་ 1 རིང་གི་ཚད་གཞི་དམའ་ཤོས་དེར་ལྷུང་།

གྲོས་འཐུས་བུད་མེད་ཀྲེ་ལོར་གྷི་རེ་ནེ་(Taylor Greene)ཡིས། ད་ལྟ་བར་ངས་སྲིད་འཛིན་སྒྲོ་ནལ་ཁྲི་རམ་ཕུ་ལ་རྒྱབ་སྐྱོར་བྱས་པ་ཡིན། ཡིན་ན་ཡང་། ད་ལྟ་ཡིག་ཆ་ཚང་མ་ཕྱིར་འདོན་དགོས་པའི་ཐད་ནས་ངའི་ལངས་ཕྱོགས་ལ་འགྱུར་བ་མེད་ཅེས་བཤད། སྒྲོ་ནལ་ཁྲི་རམ་ཕུས་མོ་ལ། རྒྱལ་ཁབ་ལ་ངོ་ལོག་མཁན་གྱི་མིང་འཆལ་བཏགས། 

ཨ་རིའི་རྒྱལ་སྲིད་ལྷན་ཁང་གིས། ཝེ་ནེ་ཛོ་ལ་རྒྱལ་ཁབ་ཀྱི་ཆེས་མཐོའི་ལས་བྱེད་དང་། དམག་དཔོན་བཅས་ཚུད་ཡོད་པར་བཤད་པའི་ནགས་ཚོགས་མ་ལག་(Cartel de los Soles)ཞེས་པ། ཕྱི་རྒྱལ་གྱི་དྲག་སྤྱོད་སྒྲིག་འཛུགས་ཀྱི་མིང་ཐོའི་ནང་འཇུག་རྒྱུ་ཡིན་པ་བསྒྲགས།

བདུན་ཕྲག་འདིའི་ནང་ཡུ་ཁུ་རན་གྱི་རྒྱལ་ནང་དུ་ལྐོག་ཟའི་གནད་དོན་ཆེན་པོ་ཞིག་ཕྱིར་བཏོན་ཅིང་། དེའི་ཁྲོད་སྲིད་འཛིན་ཛེ་ལན་སི་ཀེ་རང་གི་ཐག་ཉེའི་ལས་བྱེད་དང་། ཁོ་ལ་རྒྱབ་སྐྱོར་བྱེད་མཁན་གྱི་ཚོང་པ་ཆེན་པོ་བཅས་ཚུད་པས། གནས་ཚུལ་འདིས་ཡུ་ཁུ་རན་གྱི་མི་དམངས་ཁྲོད་གྲགས་འགུལ་ཆེན་པོ་བཟོས།