རྒྱ་གར་གྱི་ན་གཞོན་ཞིག་གིས་བཙུགས་པ། ཀོ་ཀི་རོ་ཆི་ཆབ་སྲིད་ཚོགས་པའི་ངོ་རྒོལ་ལས་འགུལ་དེ། ཉིན་ 37 གྱི་རིང་སྤེལ་མཐར་ཟླ་བ་སྔོན་མའི་ཚེས་ 25 ཉིན་མཇུག་བསྡུས་ཟིན་པ་ལྟར། ཀོ་ཀི་རོ་ཆི་འཛུགས་མཁན། ན་གཞོན་ཨ་བྷི་ཇེ་ཀྲི་ཡིས་རྒྱལ་ས་ལྡི་ལིར་ངོ་རྒོལ་གཉིས་པ་དེ་མགྱོགས་པོར་འགོ་གཟུག་རྒྱུ་ཡིན་པ་བཤད། ཁོས། མི་མང་པོས་ང་ལ་ངོ་རྒོལ་རིམ་པ་གཉིས་པ་དེ་ག་དུས་འགོ་གཟུག་རྒྱུ་རེད་ཅེས་་སྐད་ཆ་འདྲི་བཞིན་འདུག དེ་ནི་མགྱོགས་པོར་འགོ་གཟུག་རྒྱུ་རེད་ཅེས་བཤད།
ད་དུང་ཁོ་ལྟར་ན། རྒྱལ་ས་ལྡི་ལིར་ཁོ་ཚོས་ཚོགས་ཁང་ཞིག་གཡོར་ཐབས་བྱེད་བཞིན་ནའང་། གཞན་གྱིས་ཚོགས་ཁང་གཡོར་གྱི་མི་འདུག་ཅེས་བཤད། ཁོས། ཁང་པ་གཡོར་མཁན་ཚོས་ཁོ་ཚོར་སྒང་ནས་ཚུར་གནོན་ཤུགས་སྤྲོད་ཀྱི་འདུག་ཅེས་ཤོད་བཞིན་པ་བཤད། ད་དུང་ཁོས། འདི་དག་ཚང་མའི་རྒྱབ་ཏུ་བྷི་ཇི་པི་ཆབ་སྲིད་ཚོགས་པ་ཡོད་པ་དང་། ཁོ་ཚོ་རྒྱ་གར་གྱི་ན་གཞོན་ཚོར་སྐྲག་གི་ཡོད་པ་ནི། ཁོ་ཚོའི་སྐད་ཆ་དང་རྣམ་འགྱུར་གྱིས་གསལ་བོར་སྟོན་གྱི་འདུག གལ་སྲིད་ཁོ་ཚོས་བྱེད་སྟངས་ཐབས་སྡུག་འདི་འདྲ་ཞིག་གིས་ང་ཚོར་འཇིགས་སྣང་སྐུལ་ཐུབ་པར་འདོད་ཀྱི་ཡོད་ན། དེ་ནི་ཁོ་ཚོས་ནོར་འཁྲུལ་ཚབས་ཆེན་ཞིག་བཟོ་བཞིན་པ་རེད་ཅེས་བཤད།