ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ང་དང་བྱང་ཀོ་རེ་ཡའི་དབུ་ཁྲིད་ཀེམ་ཇོང་ཨུན་གཉིས་བར་འབྲེལ་བ་ཡག་པོ་ཡོད་པ་གཞིར་བྱས། ཨ་རི་དང་ལྷོ་ཀོ་རེ་ཡ་མཉམ་འབྲེལ་གྱི་དམག་སྦྱོང་ཁྲོད་ཨ་རི་ཞུགས་བཞིན་པ་ང་དགའ་བོ་མེད། དམག་སྦྱོང་འདི་ལ་འགྲོ་གྲོན་ཆེན་པོ་དང་རྒྱན་ལྡན་ལྟར་དེ་ཨ་རིས་གཏོང་བཞིན་པ་ཙམ་ཞིག་མ་ཡིན་པར། ང་རང་སྲིད་འཛིན་ཡིན་པའི་རིང་ལ་ཉེན་ཁ་མི་བཟོ་མཁན་གྱི་རྒྱལ་ཁབ་(བྱང་ཀོ་རེ་ཡ)ཅིག་ལ་མི་ལེགས་པའི་རྣམ་འགྱུར་བསྟན་པ་རེད། དེར་བརྟེན། དམག་སྦྱོང་འདི་ཕྱིར་འཐེན་རྒྱུའི་དུས་ཚོད་མེད་ཀྱང་། དམག་སྦྱོང་གི་ཚད་གཞི་སྙུང་དགོས་པ་བཀའ་བཏང་ཟིན་ཞེས་བསྒྲགས།
ད་དུང་ཁོས། ཉེ་དུས་ངས་ལྷོ་ཀོ་རེ་ཡའི་སྲིད་འཛིན་ལ། ཨེ་རན་འདུལ་རྒྱུའི་ཁྲོད་ཞུགས་འདོད་ཡོད་མེད་སྐད་ཆ་དྲིས་པར། ཞུགས་འདོད་མེད། ཐུགས་རྗེ་ཆེ་ཞེས་བཤད་སོང་ཞེས་བྲིས། ཨ་རི་དང་ལྷོ་ཀོ་རེ་ཡ་མཉམ་འབྲེལ་གྱི་དམག་སྦྱོང་ནི། དེ་རིང་ཚེས་ 17 ཉིན་ནས་འགོ་འཛུགས་བཞིན་པ་དང་། འབྱུང་འགྱུར་ཉིན་ 10 ཡི་རིང་བྱ་རྒྱུ། བདུན་ཕྲག་སྔོན་མར་ཨ་རིའི་དམག་སྤྱི་རྗོ་སེབ་ རྗ་རར་སྒྲི་(Joseph Jarrard)ཡིས། བྱང་ཀོ་རེ་ཡའི་དམག་དཔུང་གིས། རྡུལ་མཚོན་འཁྱེར་ནས་བྱང་ཨ་རིའི་སྐམ་སའི་སྟེང་སླེབ་ཐུབ་པ། གླིང་སྙོབས་བྷ་ལི་སི་ཀྲི་ཁི་འཕུར་མདའི་ཚོད་ལྟ་ལེགས་པར་གྲུབ་ཟིན་པའི་ཉེན་བརྡ་བཏང་།
དོན་དངོས་སུ་ཁྱིམ་བརྒྱུད་ཀྱིས་སྲིད་དབང་འཛིན་མཁན་ཀེམ་ཇོང་ཨུན་དང་། ལོ་ 4 རེའི་མཚམས་སུ་བརྗེ་འགྲོ་བའི་ཨ་རིའི་སྲིད་འཛིན་ཞིག་གི་བར་གྲོགས་པོའི་འབྲེལ་བ་ཞིག་སླེབས་ཐབས་མེད་ཀྱང་། སྒྲོ་ནལ་ཁྲི་རམ་ཕུའི་གློ་བུར་བའི་བྱེད་སྟངས་འདིས། ཐབས་བྱུས་ཀྱི་ཆ་ནས་ཞི་བདེ་རྒྱ་མཚོའི་བདེ་འཇགས་ལ། སྔོན་དཔག་མི་ཐུབ་པའི་ཉེན་ཁ་བཟོ་སྲིད་པ་ཤོད་མཁན་བྱུང་། ལྷོ་བྱང་ཀོ་རེ་ཡ་གཉིས་བར་ཕྱི་ལོ་ 1953 ལོར་མེ་མཚམས་བཞག་ཟིན་ནའང་། དམག་འཁྲུག་དངོས་ད་དུང་ཡང་མཚམས་འཇོག་ཐུབ་མེད་པས། ད་ལྟའང་ལྷོ་ཀོ་རེ་ཡར་ཨ་རིའི་དམག་མི་ 28,500 བསྡད་ཡོད།