༢༠༢༦/༧/༣ གཟའ་པ་སངས།
ཨ་རིའི་གཟའ་ཕུར་བུའི་ཉིན། བོད་མི་མིང་ལ་རང་བཙན་བློ་དགའ་ཞུས་པས། ཨ་རིའི་ནེའུ་ཡོག་གྲོང་ཁྱེར་དུ་ཡོད་པ། འཛམ་གླིང་མཉམ་འབྲེལ་རྒྱལ་ཚོགས་ཀྱི་ལས་ཁུངས་མདུན་དུ། ལག་ཏུ་བོད་ཀྱི་རྒྱལ་དར་ཞིག་བཟུང་ནས་རང་ལུས་མེར་བསྲེགས་བཏང་ཟིན་པའི་གནས་ཚུལ་ཐོན། རྗེས་སུ་སྨན་ཁང་དུ་བསྐྱལ་རྗེས་འདས་གྲོངས་སུ་ཕྱིན་ཟིན་པ་གཏན་འཁེལ། ས་གནས་བདེ་སྲུང་མི་སྣར་གནས་ཚུལ་འདིའི་ཐད། ཕྱི་དྲོའི་ཆུ་ཚོད་ 6:30 སྟེང་བརྡ་འབྱོར་ཟིན་པ་བཤད།
ནེའུ་ཡོག་ཆ་འཕྲིན་གསར་ཤོག་ལྟར་ན། ཁོང་གིས་རང་ལུས་མེར་བསྲེགས་མ་གནང་སྔོན། ཡིག་ཆ་ཞིག་གཏོར་ཟིན་པ་བཀོད། རྒྱལ་ཚོགས་ཀྱི་ལས་བྱེད་ཅིག་གིས། ཁོ་ཚོའི་ཚོགས་འདུ་ཞིག་གྲོལ་རྗེས་གནས་ཚུལ་འདི་བྱུང་ཟིན་པ་བཤད།{གསལ་བཤད། འདས་པོ་གང་ཉིད་སྒེར་གྱི་ལོ་རྒྱུས་འདི་གར་རེ་ཞིག་མ་རག་ཀྱང་། སྒེར་གྱི་ངོ་དེབ་སྟེང་བརྙན་ཞིག་བཞག་ཡོད་པ་དེའི་ནང་དུ། འདས་པོ་གང་ཉིད་ཀྱིས་གང་གསུངས་ཡོད་པའི་སྙིང་པོ་དག་འདིར་བཀོད་ཡོད་པ་ལགས།}
ཆུ་ཚོད་ 3 ཙམ་གྱི་སྔོན་དུ་འདས་པོ་རང་ཉིད་ཀྱི་ངོ་དེབ་སྟེང་དུ་བརྙན་ཞིག་བཞག་ཡོད་པའི་ནང་། ཁོང་གིས། རྒྱ་ནག་གུང་ཕྲན་གྱིས་བོད་མི་རིགས་རྩ་མེད་གཏོང་རྒྱུའི་ཆེད་དུ་ལས་འགུལ་སྤེལ་བཞིན་ཡོད་པ་རེད།བོད་ནང་ལ་བཞུགས་མཁན་བོད་མི་ཚོར་གང་ཡང་ཞུ་རྒྱུ་མེད། ལྷག་བསམ་རྣམ་དག་གིས། སོ་སོའི་སྐད་དང་ཡི་གེ ཆོས་དང་རིག་གཞུང་། མི་ཉམ་གོང་འཕེལ། ཉམ་པ་སླར་གསོ་གནང་རྒྱུར་ཧ་ལས་པ་རེད་འདུག དེ་ཡིན་པའི་རྒྱུ་མཚན་ལ་བརྟེན་ནས་ཞུ་རྒྱུ་གང་ཡང་མེད། ཐུགས་རྗེ་ཆེ་ཞེས་ཞུ་རྒྱུ་དང་གཞན་པ་བསམ་ཚུལ་གང་ཡང་ཞུ་རྒྱུ་མེད་ཅེས་ཞུས་པ་ཡིན།
ད་ང་ཚོའི་བཙན་བྱོལ་ནང་དུ་སྡོད་མཁན་ཚོར་ཞུ་རྒྱུ་ཞིག་ལ། མི་རིགས་ཤིག་གི་འཐབ་བརྩོད་ཆེད་ཞི་བདེ་དང་། གང་ཡང་བྱ་མི་དགོས་པའི་ཐོག་ནས་རག་གི་མ་རེད། དེར་བརྟེན་བཙན་བྱོལ་ནང་དུ་སྡོད་མཁན་ཚོས་ཤུགས་མང་ཙམ་རྒྱག་དགོས་འདུག་ཅེས་ཞུ་རྒྱུ་ཡིན། ང་ཚོའི་མང་གཙོ་འདི་སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག འཕགས་པ་སྤྱན་རས་གཟིགས་ཀྱིས། མང་གཙོ་ཚད་ལྡན་གནང་བ་དེ་དཔེ་མི་སྲིད་པའི་བཀའ་དྲིན་ཆེན་པོ་རེད། མི་རྒྱུ་གཉིས་ཀྱི་འགྲོ་སོང་གང་ཡང་གཏོང་མི་དགོས་པའི་ཐོག་ནས། མང་གཙོ་མར་གནང་ཡང་ང་ཚོས་མི་དགོས་ཞེས་ཡར་ཕུལ་པ་རེད།
ཡིན་ན་ཡང་། སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས། མང་གཙོ་ཚད་ལྡན་ཞིག་གནང་བཞག་ཡོད་པ་རེད།མང་གཙོ་གནང་བ་དེ་ནང་ལོགས་ལ་ནང་འཛིང་འགོད་རྒྱུའི་ཆེད་དུ་མ་རེད། དེ་བོད་མི་རིགས་ཀྱི་ཆེད་དུ། བོད་རྒྱལ་ཁབ་ཀྱི་ཆེད་དུ་ཡར་རྒྱས་ཤིག་འགྲོ་ཐུབ་ན། ལྷག་པར་དུ་ྋརྒྱལ་བ་རིན་པོ་ཆེས་སྔོན་མ་ག་རེ་གསུངས་ཡོད་པ་རེད། ཕྱི་རྒྱལ་ཡུ་རོབ་ལ་སྡོད་མཁན་ཡིན་ན། ཨ་རི་ལ་སྡོད་མཁན་ཡིན་ན། ཁང་པ་ཞིག་དང་རླངས་འཁོར་ཞིག་ཡོད་ན། ད་ང་འགྲིག་སོང་དྲན་ནས་བསྡད་པ་ཡིན་ན། ཞབས་འདྲེན་རེད་ད། ཁྱེད་ཚོ་ཚང་མ་བོད་མི་རིགས་ཀྱི་མགྲིན་ཚབ་ཡིན་ད། དེ་ཡིན་དུས་བོད་མི་རིགས་ཀྱི་ཆེད་དུ་ལས་ཀ་ལས་དགོས་པ་རེད། བོད་མི་རིགས་ཀྱི་ཆེད་དུ་དཀའ་ལས་རྒྱག་དགོས་པ་གསུངས་བཞག་ཡོད་པ་རེད།
དེ་ལས་ལྷག་ྋརྒྱལ་བ་རིན་པོ་ཆེས་གསུང་ཐུབ་ཀྱི་མ་རེད།གང་ཡིན་ཟེར་ན། སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གིས། མི་རིགས་དཀར་ནག་མེད་པར། འཛམ་གླིང་འདིར་ཡོངས་སུ་རྫོགས་པ། ཆོས་ལུགས་ཡོངས་སུ་རྫོགས་པ། མི་རིགས་ཡོངས་སུ་རྫོགས་པ་རྡོག་རྩ་གཅིག་སྒྲིལ་བྱ་རྒྱུ་དང་། འཛམ་གླིང་ཞི་བདེ་གནས་རྒྱུའི་ཆེད་དུ་ཕྱག་ལས་གནང་བསྡད་པའི་སངས་རྒྱས་ཤིག་རེད། ང་ཚོ་སངས་རྒྱས་མ་རེད། ང་ཚོ་སེམས་ཅན་རེད། ནང་འཛིང་འགོད་དགོས་ན་ཧ་ལས་པ་འདུག་ག་ཅེས་གསུངས། དེ་བཞིན་འདས་པོ་ཁོང་གིས། རྒྱ་ནག་གུང་ཕྲན་གྱིས་མདོ་སྟོད་མདོ་སྨད། དབུས་གཙང་ཞེས་དབྱེ་བ་བཀར་མེད་པར་བཙབ་ཡོད་པ་རེད།
དེར་བརྟེན་ང་ཚོ་ཚང་མ་བོད་པ་རེད། བོད་རྒྱལ་ཁབ་ཀྱི་ཆེད་དུ་ལས་ཀ་ལས་དགོས་རེད། བོད་མི་རིགས་ཀྱི་ཆེད་དུ་ལས་ཀ་ལས་དགོས་རེད་ཅེས་དང་། ད་ལྟ་ང་ཚོར་འགྲོ་བ་མིའི་ཐོབ་ཐང་མི་འདུག སྨྲ་བརྗོད་རང་དབང་མི་འདུག སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་གི་སྐུ་པར་བཤམ་རྒྱུའི་རང་དབང་མི་འདུག་ཅེས་ལབ་ན། རང་དབང་ཡོངས་སུ་རྫོགས་པ་དེ་ཅིའི་ཕྱིར་མེད་པ་རེད་དམ་ཞེས་ན། རང་བཙན་ཤོར་བའི་རྒྱུ་མཚན་ལ་བརྟེན་ནས་མེད་པ་ཆགས་པ་རེད།
རྒྱུ་མཚན་དེ་ཡིན་དུས་ང་ཚོ་ཚང་མས་ཉི་མ་དེ་རིང་ནས་བཟུང་། བོད་གཞུང་ཡིན་ན་རེད། སྤྱི་འཐུས་གྲོས་ཚོགས་ཡིན་ན་རེད། བོད་མི་མང་ཡིན་ན་རེད། ཚང་མས་རྡོག་རྩ་གཅིག་ཏུ་བསྒྲིལ་ནས། བོད་རྒྱལ་ཁབ་དང་མི་རིགས་འདི་ཡི་ཆེད་དུ་ཕྱག་ལས་གནང་རྒྱུ་དང་། རྡོག་རྩ་གཅིག་སྒྲིལ་བྱ་རྒྱུ་དེ་དཔེ་མི་སྲིད་པའི་གལ་ཆེན་པོ་རེད། རྒྱུ་མཚན་དེ་ལ་བརྟེན་ནས་བཙན་བྱོལ་དུ་ཡོད་པའི་བོད་པ་ཚོས། ཆོལ་ཁ་དང་ཆོས་ལུགས་ཀྱི་བརྩད་མ་བརྒྱབ་པར། རྡོག་རྩ་གཅིག་ཏུ་བསྒྲིལ་ནས་བོད་རང་བཙན་གྱི་ཆེད་དུ་ལས་འགུལ་སྤེལ་རྒྱུ་དང་། བོད་རང་བཙན་གྱི་ཆེད་དུ་ཕྱག་ལས་གནང་རོགས། ཞེས་བཙན་བྱོལ་ནང་ལ་ཡོད་པའི་བོད་པ་ཚོར་ལག་གཉིས་ཐལ་མོ་སྦྱར་ནས་ཞུ་རྒྱུ་ཡིན།
གཉིས་པའི་ཆ་ལ། དེ་རིང་གལ་སྲིད་ངས་ལས་འགུལ་དེ་འདྲའི་ཤུགས་ཆེན་པོ་ཞིག་སྤེལ་བ་ཡིན་ན། སྤེལ་བའི་རྒྱུ་མཚན་དེ་ལ་བརྟེན་ནས་ང་ཚོའི་རིག་གཞུང་དེ་ཚོ། དཔེར་ན། སང་ཉིན་གནང་ཉིན་སྤྱི་ནོར་ྋགོང་ས་སྐྱབས་མགོན་ཆེན་པོ་མཆོག་དགུང་ལོ་དགུ་བཅུ་གོ་གཅིག་ལ་ཕེབས་པའི་སྐུའི་འཁྲུངས་སྐར་དུས་ཆེན་ཆགས་ཡོང་གི་ཡོད་པ་རེད། དེ་བཞིན་གཞས་དང་ཞབས་བྲོ་ལ་སོགས་པ། དེ་ཚོ་རིག་གཞུང་སྲུང་སྐྱོབ་དང་འཕྲོད་བསྟེན་རེད། དེ་བཞིན་གཞོན་སྐྱེས་ཚོར་རིག་གཞུང་དཔེ་མི་སྲིད་པའི་ཕན་ཐོགས་ཆེན་པོ་ཡོང་གི་ཡོད་རེད། དེར་བརྟེན་དེ་ཚོ་རྩ་བ་ཉིད་ནས་བཀག་ན་འགྲིག་གི་མ་རེད།གལ་སྲིད་ངས་ལས་འགུལ་ཞིག་སྤེལ་བ་ཡིན་ན། དེའི་རྐྱེན་བྱས་ནས་ྋགོང་ས་སྐྱབས་མགོན་ཆེན་པོ་མཆོག་གི་སྐུའི་འཁྲུངས་སྐར་དུས་ཆེན་ལ་སོགས་པ་ལྷོད་གཡེང་བཏང་ན་རྩ་བ་ནས་འགྲིག་གི་མ་རེད། ྋགོང་ས་མཆོག་གི་འཁྲུངས་སྐར་དེ་ཡག་པོ་ཞིག་དང་གྲ་རྒྱས་པོ་གཏོང་ཐུབ་པ། དེ་བཞིན་གཞས་ཞབས་བྲོ་འཁྲབ་མཁན་དེ་ཚོ་ཚང་མས་གཞས་ཞབས་བྲོ་ཁྲབ་དགོས་རེད། དེ་འགོག་དགོས་མ་རེད། མྱ་ངན་བྱེད་དགོས་མ་རེད། ག་རེ་བྱེད་དགོས་རེད་ཟེར་ན། དེ་འཁྲབ་པའི་ཞོར་ལ་སོ་སོ་བོད་པ་ཡིན་པའི་རྒྱུ་མཚན་ལ་བརྟེན་ནས། བོད་མི་རིགས་འདི་ཡི་ཆེད་དུ། བོད་རྒྱལ་ཁབ་འདི་ཡི་ཆེད་དུ་ག་རེ་བྱ་རྒྱུ་འདུག་དེར་བསམ་བློ་གཏོང་དགོས་པ་གལ་ཆེན་པོ་རེད།
དེ་ཡིན་དུས་མ་འོངས་པ་ལ་སྐུ་མཁྱེན། ཐུགས་རྗེ་གཟིགས་དེ་ཤུགས་ཆེ་གནང་རོགས་གནང་ཞེས་ངས་འབོད་སྐུལ་དེ་ཞུས་པ་ཡིན། གང་ཡིན་ཞུས་ན་གལ་སྲིད་ངས་ལས་འགུལ་ཞེ་སྣང་ཅན་ཞིག་སྤེལ་བ་ཡིན་ན། དེ་ནི་ང་ལ་ཟ་རྒྱུ་མ་རག ང་ལ་གྱོན་རྒྱུ་མ་རག ང་སྡུག་བསྔལ་བྱས་ནས་མ་རེད། ངས་རྒྱལ་ཁབ་འདིའི་ཆེད་དུ་སྤེལ་གྱི་ཡོད་པ་རེད། བོད་རྒྱལ་ཁབ་ཀྱི་ཆེད་དུ་སྤེལ་གྱི་ཡོད་པ་རེད། བོད་རྒྱལ་ཁབ་འདིའི་ཆེད་དུ་སྤེལ་བཞིན་ཡོད་དུས།བོད་རྒྱལ་ཁབ་འདི་ལ་གང་ཡོད་པ་དེ་ཚང་མ་མུ་མཐུད་དུ་བྱ་དགོས་པ་རེད་ཅེས་གསུངས།
དེ་བཞིན་མྱ་ངན་གྱི་མིང་ཐོག་ནས་དེ་དག་མཚམས་འཇོག་མི་རུང་བ་དང་། མྱ་ངན་ཞུས་ན་ངས་རེ་བ་ཞུས་པ་ལྟར་གྱི་མཇུག་ལ་འགྲོ་དགོས་པ་རེད། ང་ཚོར་མེད་ས་ཡོངས་སུ་རྫོགས་པ་ག་རེ་བྱས་ནས་བྱུང་བ་རེད། རང་བཙན་མེད་པའི་རྒྱུ་མཚན། རང་བཙན་ཤོར་བའི་རྒྱུ་མཚན་ལ་བརྟེན་ནས་བྱུང་བ་རེད། ང་ཚོར་རང་བཙན་རག་པ་ཡིན་ན། ང་ཚོར་ཚང་མ་ཡོད་པ་རེད། དེར་བརྟེན་རང་བཙན་གྱི་ཆེད་དུ་ཚང་མས་དཀའ་ལས་རྒྱག་དགོས་པ་རེད་ཅེས་དང་། ཚང་མས་མུ་མཐུད་ནས་དཀའ་ལས་རྒྱག་རོགས་གནང་ཞུ་རྒྱུ་ཡིན། བོད་རང་བཙན་རྒྱལ་ལོ་ཞེས་གསུངས།གོང་དུ་ཁོང་གིས་གང་གསུངས་པ་ཡིག་ཐོག་ཏུ་འཕབ་ཡོད་པ་འདི་ཉིད།