ཁ་སང་སྒྲོ་ནལ་ཁྲི་རམ་ཕུས། གསེར་གྱི་མཚོ་གྲུ་སྡེ་ཁག་(Golden Fleet)ཅེས་པ་ཞིག་འཛུགས་རྒྱུ་དང་། གྲུ་གཟིངས་འདི་དག་ལ་ཁྲི་རམ་ཕུའི་རིམ་པ་(Trump-class)ཞེས། ཁོ་རང་གི་མིང་འདོགས་རྒྱུ་ཡིན་པ་བསྒྲགས།
དམག་མི་དང་དམག་གྲུའི་གྲངས་འབོར་གྱི་ཆ་ནས་ད་ལྟ་རྒྱ་ནག་གི་མཚོ་དམག་ནི། འཛམ་གླིང་གི་མཚོ་དམག་ཆེ་ཤོས་སུ་ངོས་འཛིན་བཞིན་པ་ལྟར། སྒྲོ་ནལ་ཁྲི་རམ་ཕུས་འོས་བསྡུའི་སྐབས་ནས་འདི་ལ་སེམས་ཁྲལ་གྱི་རྣམ་འགྱུར་ཤུགས་ཆེན་བསྟན་ཡོད་པ་དང་། ཁོ་སྲིད་སྟེགས་སུ་སླེབས་རྗེས་ཨ་རིས་སྔར་ནས་དོར་ཟིན་པའི་གྲུ་གཟིངས་བཟོ་རྒྱུའི་ནུས་པ་བསྐྱར་གསོ་བྱ་རྒྱུའི་ལས་གཞི་མང་པོ་འགོ་བཙུགས།
ཁ་སང་སྒྲོ་ནལ་ཁྲི་རམ་ཕུས། གསེར་གྱི་མཚོ་གྲུ་སྡེ་ཁག་(Golden Fleet)ཅེས་པ་ཞིག་འཛུགས་རྒྱུ་དང་། གྲུ་གཟིངས་འདི་དག་ལ་ཁྲི་རམ་ཕུའི་རིམ་པ་(Trump-class)ཞེས། ཁོ་རང་གི་མིང་འདོགས་རྒྱུ་ཡིན་པ་བསྒྲགས། ད་ལྟ་བར་གྲུ་གཟིངས་འདི་དག་གི་ཆེད་གཏོང་རྒྱུའི་འགྲོ་གྲོན་དང་། གྲུ་གཟིངས་བཟོ་ཡུལ་དང་འཇོག་ས། གྲུ་གཟིངས་དག་གི་འཆར་འགོ་སོགས་ཞིབ་ཕྲ་ཕྱིར་མ་བསྒྲགས།
མཚོ་དམག་སྡེ་ཁག་འདི་ནི་གྲུ་གཟིངས་ 25 ཡས་མས་ཀྱིས་གྲུབ་རྒྱུ་དང་། ཐོག་མར་གྲུ་གཟིངས་ 2 བཟོས་ནས་ལས་གཞི་འདི་འགོ་གཟུག་རྒྱུ་ཡིན་པ་བསྒྲགས། ཨ་རིའི་གྲུ་གཟིངས་ཆེན་པོ་དག་ལ། བྱས་རྗེས་ཅན་གྱི་སྲིད་འཛིན་ཟུར་བ་དང་མི་སྣ་གལ་ཆེན་ཚོའི་མིང་འདོགས་སྲོལ་ཡོད་ནའང་། ལས་ཐོག་སྲིད་འཛིན་ཞིག་གིས་རང་གི་མིང་གྲུ་གཟིངས་ལ་འདོགས་པ་ནི་ཧ་ཅང་དཀོན་པ་བཤད།
འཛམ་གླིང་འཁྲུག་ཆེན་གཉིས་པའི་སྐབས་ཏེ། ཕྱི་ལོ་ 1941 ནས་ཕྱི་ལོ་ 1945 བར། ཨ་རིས་ཡུ་རོབ་ལ་གོ་ལག་དང་དམག་དཔུང་ཕོན་ཆེན་རྒྱ་མཚོ་བརྒྱུད་གཏོང་དགོས་པ་དང་། ཞི་བདེ་རྒྱ་མཚོའི་ནང་དུ་ཉི་ཧོང་གོང་མའི་དམག་དཔུང་དང་འཐབ་ཆེད། གྲུ་གཟིངས་སྟོང་ཕྲག་ 5 ཡས་མས་བཟོས་ཤིང་། སྐབས་དེར་དགོས་མཁོའི་དབང་གིས་ཕལ་ཆེར་ཉིན་ 5 ཡི་ནང་སྐྱེལ་འདྲེན་གྲུ་གཟིངས་རེ་བཟོ་ཐུབ་པ་བཤད།
དམག་འཁྲུག་མཚམས་བཞག་པ་དང་། ཨ་རིའི་གྲུ་གཟིངས་བཟོ་གྲྭ་མང་པོ་སྒོ་བརྒྱབས་ཤིང་། ལས་རིགས་འདི་རེ་ཞིག་བདག་མེད་ཏུ་ལྷག་པ་ལྟ་བུ་གྱུར་བས། རྒྱ་ནག་གིས་གོ་སྐབས་འདི་བཟུང་ནས་གྲུ་གཟིངས་ཕོན་བཟོས་ཤིང་། ད་ལྟ་སྐྱེལ་འདྲེན་གྲུ་གཟིངས་མ་ཟད་དམག་གྲུ་བཟོ་ཚད་དང་། ལས་མིའི་གྲངས་གསུམ་གྱི་སྟེང་ནས་འཛམ་གླིང་གི་གྲུ་གཟིངས་བཟོ་མཁན་ཆེ་ཤོས་དེ་རྒྱ་ནག་གྱུར།