(སྒྲོ་ནལ་ཁྲི་རམ་ཕུའི་སྐོར་ལ་བཟོས་པའི་བརྙན་ཞིག་དང་འབྲེལ། སྦི་སྦི་སི་གསར་ཁང་གི་དབུ་འཛིན། ཀྲེམ་ སྒྲ་ཝེ་(Tim Davie)དང་། འཛིན་སྐྱོང་དབུ་ཁྲིད་གཉིས་ཀྱིས་ཁ་སང་གཟའ་ཉི་མའི་ཉིན་དགོངས་པ་ཞུས།)
དབྱིན་ཇིའི་སྦི་སྦི་སི་གསར་ཁང་གི་རྩོམ་སྒྲིག་སློབ་སྟོན་པ་ཟུར་བ། མའེ་ཀལ་ ཕི་རེ་སི་ཀོ་ཀྲི་(Michael Prescott)ཡིས་བྲིས་པའི་ནང་ཁུལ་ཡིག་ཆ་ཞིག ཀྲེ་ལེ་གྷི་ར་ཧྥི་གསར་ཤོག་གིས་ཕྱིར་བཀྲམས།ཡིག་ཆ་འདིའི་ནང་དུ་རྩོམ་སྒྲིག་སློབ་སྟོན་པ་ཟུར་བ་འདིས། སྒྲོ་ནལ་ཁྲི་རམ་ཕུའི་སྐོར་ལ་སྦི་སྦི་སི་གསར་ཁང་གིས་བཟོས་པ། དངོས་བྱུང་གློག་བརྙན་ཞིག་གི་ནང་དུ། ཕྱི་ལོ་ 2021 ཟླ་ 1 ཚེས་ 6 ཉིན་སྒྲོ་ནལ་ཁྲི་རམ་ཕུས་སྤེལ་བའི་གཏམ་བཤད་ཅིག་གཅོད་གཏུབ་ཀྱིས། འོས་བསྡུའི་མཇུག་འབྲས་དང་འབྲེལ། ལོ་དེར་བྱུང་བའི་ཨ་རིའི་རྒྱལ་སའི་དྲག་ཟིང་དེ་ནི། སྒྲོ་ནལ་ཁྲི་རམ་ཕུ་རང་གིས་ངན་སྐུལ་བྱས་ནས་བྱུང་བ་ལྟ་བུ་བཟོས་འདུག་པས། ཁོའི་སྐད་ཆ་གཅོད་གཏུབ་ཀྱིས་གནས་ཚུལ་འདི་འདྲ་བཟོས་པ་ནི། སྦི་སྦི་སི་གསར་ཁང་གི་ཚད་གཞི་དང་སྣང་བརྙན་ལ་གནོད་བསྐྱལ་བ། ཕྱོགས་སུ་ལྷུང་བ་ཞིག་ཡིན་ཚུལ་བྲིས་ཡོད་པ་གསལ།
སྦི་སྦི་སི་གསར་ཁང་གིས་བཟོས་པའི་དངོས་བྱུང་གློག་བརྙན་(Trump: A second Chance?)འདི་ནི། ཕྱི་ལོ་ 2024 ཟླ་ 10 ནང་ཕྱིར་བཀྲམས་ཟིན་པ་ཞིག་དང་། དེའི་ནང་དུ་སྒྲོ་ནལ་ཁྲི་རམ་ཕུས་རང་གི་རྒྱབ་སྐྱོར་བ་ཚོར་བཤད་པའི་སྐད་ཆའི་ཆ་ཤས། ང་ཚོ་ཀཱ་པེ་ཀྲོལ་(Capital ཨ་རིའི་རྒྱལ་སའི་ལས་ཁུངས་གཙོ་བོ་དག་ཡོད་ས།)ལ་འགྲོ ང་ཡང་ཁྱེད་ཚོ་མཉམ་དུ་དེར་ཡོང་རྒྱུ་ཡིན། ཞེས་པ་ལྟ་བུའི་ཚིག་གཏུབ་ནས་ཆེད་དུ་བཀོད་ཅིང་། ཞི་བའི་ངང་ངོ་རྒོལ་བྱ་དགོས་ཚུལ་བཤད་པ་སོགས་ཆེད་དུ་མ་བཀོད་པ་བཤད། གནས་ཚུལ་འདི་དང་འབྲེལ་སྦི་སྦི་སི་གསར་ཁང་གི་དབུ་འཛིན། ཀྲེམ་ སྒྲ་ཝེ་(Tim Davie)དང་། འཛིན་སྐྱོང་དབུ་ཁྲིད་གཉིས་ཀྱིས་ཁ་སང་གཟའ་ཉི་མའི་ཉིན་དགོངས་པ་ཞུས། གནས་ཚུལ་འདི་ཧ་ཅང་ཆེན་པོ་གྱུར་ཅིང་། སྙན་གྲགས་ཆེ་ཞིང་ལོ་རྒྱུས་རིང་པའི་གསར་ཁང་འདིར་སྤྱིའི་ཆ་ནས་གནོད་པ་ཆེན་པོ་ཞིག་ཏུ་གྱུར།