གཟའ་ཟླ་བའི་ཉིན་རྒྱལ་ཚོགས་བདེ་འཇགས་ལྷན་ཚོགས་སུ། འབྱུང་འགྱུར་གྷ་ཛ་ས་ཁུལ་དུ་ཞི་བདེ་བསྐྲུན་རྒྱུ་དང་། དམག་འཁྲུག་གིས་གཏོར་ཟིན་པ་དག་བསྐྱར་གསོ་བྱ་རྒྱུ་དང་འབྲེལ། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས་བཏོན་པའི་ཡིག་ཆ་ཞིག་འགྲོ་ཐུབ་པར་གྱུར།
གཟའ་ཟླ་བའི་ཉིན་རྒྱལ་ཚོགས་བདེ་འཇགས་ལྷན་ཚོགས་སུ། འབྱུང་འགྱུར་གྷ་ཛ་ས་ཁུལ་དུ་ཞི་བདེ་བསྐྲུན་རྒྱུ་དང་། དམག་འཁྲུག་གིས་གཏོར་ཟིན་པ་དག་བསྐྱར་གསོ་བྱ་རྒྱུ་དང་འབྲེལ། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས་བཏོན་པའི་ཡིག་ཆ་ཞིག་འགྲོ་ཐུབ་པར་གྱུར། ལྷན་ཚོགས་འདིར་རྒྱལ་ཁབ་ 15 ཡོད་པ་ལ། རྒྱ་ནག་དང་རཱ་ཤི་ཡ་གཉིས་ཚོགས་འདུར་མ་ཞུགས་ཤིང་། ལྷག་མ་རྒྱལ་ཁབ་ 13 གྱིས་ཨ་རིའི་ཡིག་ཆ་འདིར་རྒྱབ་སྐྱོར་བྱས། འཆར་གཞི་ལྟར་ཕྱིན་ཚེ་ལོ་རྗེས་མའི་ཕྱི་ཟླ་ 1 ནས་དངོས་སུ་ལག་བསྟར་བྱ་རྒྱུ་ཡིན་པ་གསལ།
སྔར་སྒྲོ་ནལ་ཁྲི་རམ་ཕུ་སྲིད་གཞུང་གིས་བཏོན་པའི་ཡིག་ཆ་ལྟར། ཐེངས་འདིར་རྒྱལ་ཚོགས་སུ་ཕྱིན་པའི་ཡིག་ཆ་འདི་ལྟར་ན། གཙོ་བོ་གྷ་ཛ་ས་ཁུལ་དུ་བར་བརྒལ་སྲིས་གཞུང་ཞིག་འཛུགས་རྒྱུ་དང་། གཞུང་དེའི་སྒང་དུ། མིང་ལ་{ཞི་བདེའི་ལྷན་ཚོགས་}ཞེས་པ་འཛུགས་རྒྱུ། ཚོགས་པ་འདིས་བར་བརྒལ་གཞུང་གི་ལས་དོན་སོགས་ལ་ལྟ་ཞིབ་བྱ་རྒྱུ། དེ་བཞིན་རྒྱལ་སྤྱིའི་མཉམ་འབྲེལ་བདེ་སྲུང་དཔུང་སྡེ་ཞིག་གྷ་ཛ་ས་ཁུལ་དུ་འཇོག་རྒྱུ་དང་། ལས་ཀའི་དུས་ཡུན་ལོ་ 2 དང་དེའི་རིང་ཨེ་ཇིབ་དང་། ཨེ་ཛི་རལ་ལྷན་མཉམ་འབྲེལ་གྱིས། གྷ་ཛ་ས་ཁུལ་གྱི་བདེ་འཇགས་དང་བར་བརྒལ་གཞུང་གི་ལས་དོན་ཁྲོད་ལྟ་ཞིབ་བྱ་རྒྱུ།
ལྷག་པར་གྷ་ཛ་ས་ཁུལ་དུ་གཏོར་ཟིན་པ་དག་བསྐྱར་གསོའི་མ་དངུལ་དེ། རྒྱལ་སྤྱིའི་དངུལ་ཁང་གིས་རྒྱབ་སྐྱོར་འོག་ཐེབས་རྩ་ཞིག་འཛུགས་རྒྱུ་དང་། ཐེབས་རྩ་དེ་བརྒྱུད་ནས་གཏོང་རྒྱུ་བྱས་ཡོད་པ་ཡིག་ཆ་འདིའི་ནང་དུ་བཀོད་ཡོད་པ་གསལ། དེ་བཞིན་གྷ་ཛ་ས་ཁུལ་གྱི་མི་སེར་ལ་བཟའ་ཆས་དང་། སྨན་སོགས་ཀྱི་རོགས་སྐྱོར་རྣམས་རྒྱལ་ཚོགས་དང་། རྒྱ་གྲམ་དམར་པོའི་ཚོགས་པ་སོགས་བརྒྱུད་ནས་གཏོང་རྒྱུ་དང་། དེ་དག་ལ་ལྟ་ཞིབ་བྱེད་མཁན་ནི་ཡོང་རྒྱུའི་བར་བརྒལ་གཞུང་དེ་འགྱུར་རྒྱུ་ཡིན་པ་གསལ།
ད་དུང་ཡིག་ཆ་དེའི་ནང་དུ། པཱ་ལི་སི་ཐན་རྒྱལ་ཁབ་འཛུགས་རྒྱུའི་ཐད། ད་ལྟའི་པཱ་ལི་སི་ཐན་གྱི་གཞུང་ལ་བཅོས་སྒྱུར་གྲུབ་རྗེས་དང་། གྷ་ཛ་ས་ཁུལ་གྱི་འཛུགས་སྐྲུན་འགོ་བཙུགས་རྗེས། གཞི་ནས་འདིའི་ཐད་སྐད་ཆ་བཤད་རྒྱུ་སྲིད་ཚུལ་བཀོད་ཡོད་པ་ལས། རྒྱལ་ཁབ་གཉིས་ཀྱི་ཐབས་ལམ་(Two state solution)ལག་བསྟར་བྱ་རྒྱུ་སོགས་ཀྱི་སྐོར་གང་ཡང་བཀོད་མེད་པ་གསལ། {རྒྱལ་ཁབ་གཉིས་ཀྱི་ཐབས་ལམ་}ཞེས་པ་ནི། ཨེ་ཛི་རལ་དང་པཱ་ལི་སི་ཐན་གཉིས་ལ་རྒྱལ་ཁབ་རེ་རེ་འཛུགས་སུ་བཅུག་པ་བརྒྱུད། དཀའ་ངལ་འདི་སེལ་རྒྱུ་ཞེས་པ་དེ་རེད།
ཡིན་ན་ཡང་། ད་ལྟ་གྷ་ཛ་ས་ཁུལ་དུ་ཡོད་པའི་ཧཱ་མ་སི་དྲག་དཔུང་གིས་ཡིག་ཆ་འདི་ཁས་ལེན་རྒྱུ་མིན་པ་བསྒྲགས། ཧཱ་མ་སི་དྲག་དཔུང་གིས། གྷ་ཛ་ས་ཁུལ་དུ་ཕྱི་རྒྱལ་གྱི་དམག་མི་བཞག་ཅེས་པ་ནི། ས་ཁུལ་འདིའི་དབང་ཆ་པཱ་ལི་སི་ཐན་གྱི་མིའི་ལག་ནས་བླངས་རྗེས། གཞན་ཞིག་ལ་སྤྲོད་རྒྱུའི་དོན་ཡིན་པས། འདི་ནི་ང་ཚོའི་མི་དམངས་ཀྱི་ཁེ་ཕན་དང་མཐུན་གྱི་མི་འདུག་ཅེས་བཤད། ད་དུང་ཁོ་ཚོས། རྒྱལ་སྤྱིའི་བདེ་སྲུང་དཔུང་སྡེ་འདིས། (ཧཱ་མ་སིའི་)ལག་ནས་གོ་ལག་ལེན་རྒྱུ་དེ་ཡིན་པས། ཁོ་ཚོས་ཨེ་ཛི་རལ་གྱི་ཕྱིར་ལས་ཀ་བྱེད་བཞིན་པ་ལས། འདི་ནི་བར་གནས་ཀྱི་དཔུང་སྡེ་ཞིག་མ་རེད་ཅེས་བཤད།