རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ། ཝེ་ཀྲི་ཀོ་ཧྥི་དང་རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ། སྒྲི་མེ་ཀྲི་རེ་ཝི་གཉིས་ཀྱིས་ཡིག་ཆ་དོན་ཚན་ 28 ཅན་ཞིག་བཟོས་ཤིང་། ཡིག་ཆ་དེ་གཞུང་འབྲེལ་ངང་ཕྱིར་མ་བསྟན་སྔོན་དུ་ཕྱིར་ཤོར་ཟིན་པས། ད་ལྟ་ང་ཚོས་ཡིག་ཆ་འདིའི་ནང་དོན་དག་གང་ཡིན་པ་གསལ་བོར་ཤེས་ཐུབ་པར་གྱུར་ཟིན།
རཱ་ཤི་ཡས་ཡུ་ཁུ་རན་ལ་བཙན་འཛུལ་གྱིས་བསླངས་པའི་དམག་འཁྲུག་འདི་མཚམས་འཇོག་ཐབས་དང་འབྲེལ། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ། ཝེ་ཀྲི་ཀོ་ཧྥི་དང་རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ། སྒྲི་མེ་ཀྲི་རེ་ཝི་གཉིས་ཀྱིས་ཡིག་ཆ་དོན་ཚན་ 28 ཅན་ཞིག་བཟོས་ཤིང་། ཡིག་ཆ་དེ་གཞུང་འབྲེལ་ངང་ཕྱིར་མ་བསྟན་སྔོན་དུ་ཕྱིར་ཤོར་ཟིན་པས། ད་ལྟ་ང་ཚོས་ཡིག་ཆ་འདིའི་ནང་དོན་དག་གང་ཡིན་པ་གསལ་བོར་ཤེས་ཐུབ་པར་གྱུར་ཟིན། ཡིག་ཆ་འདིའི་ནང་གི་དོན་ཚན་གཙོ་བོའམ།
ནང་དོན་གལ་ཆེ་ཤོས་དག་ནི་གཤམ་གསལ།
༡ ཡུ་ཁུ་རན་དེ་རང་བཙན་རྒྱལ་ཁབ་ཅིག་གི་ངོ་བོར་གནས་རྒྱུ་ཁག་ཐེག་དང་། ཡུ་ཁུ་རན་གྱི་འབྱུང་འགྱུར་བདེ་སྲུང་ཐད་ཨ་རིས་ཁག་ཐེག་བྱ་རྒྱུ། ཡིན་ན་ཡང་། ཡུ་ཁུ་རན་ནུབ་ཆིངས་ནང་ཞུགས་མི་ཆོག་པ་མ་ཟད། རྒྱལ་ཁབ་འདིའི་འབྱུང་འགྱུར་ནུབ་ཆིངས་ནང་འཛུལ་རྒྱུ་དེ་ཡིན་པར་བཤད་པའི་ཁོ་ཚོའི་རྩ་ཁྲིམས་ཀྱི་དོན་ཚན་དེ་མེད་པ་བཟོ་དགོས་པ། ཡུ་ཁུ་རན་ལ་སྔར་བཞིན་རྡུལ་མཚོན་ཡོད་མི་ཆོག་པ་མ་ཟད། ཐག་རིང་སྙོབས་པའི་འཕུར་མདའ་ཡོད་མི་ཆོག་པ་དང་། དམག་དཔུང་གི་གྲངས་ཀྱང་འབུམ་ 6 ལས་བརྒལ་མི་ཆོག་པ།
༢ ཁི་རཱ་མེ་ཡ་གླིང་ཕྲན་དང་རྡོ་ཉད་སི་ཀི་མངའ་སྡེ། ལུ་ཧན་སི་ཀི་མངའ་སྡེ་བཅས་གཞུང་འབྲེལ་མ་ཡིན་པའི་ངང་རཱ་ཤི་ཡའི་འོག་ཏུ་འཇོག་རྒྱུ་དང་། ད་ལྟ་རཱ་དམག་གིས་ཧྲིལ་བོ་འཛིན་མ་ཐུབ་པའི་རྡོ་ཉད་སི་ཀི་ས་ཁུལ་ནས། ཡུ་དམག་ཕྱིར་འཐེན་དགོས་པ། རྫ་པུ་རི་ཆི་མངའ་སྡེ་དང་ཁར་སོན་གཉིས་སུ་ད་ལྟའི་གཡུལ་སའི་ས་ཁྲ་ལྟར་འཇོག་རྒྱུ་ཡིན་པ་ལ། འདིར་དམག་དཔུང་མེད་པའི་ས་སྟོང་ཞིག་འཇོག་དགོས་པ་དང་། ས་སྟོང་དེ་རཱ་ཤི་ཡའི་འོག་ཏུ་འཇོག་རྒྱུ།
༣ ནུབ་ཆིངས་ཀྱི་དམག་དཔུང་ཡུ་ཁུ་རན་དུ་འཛུལ་མི་ཆོག་པ་དང་། ནུབ་ཆིངས་ཀྱི་འཐབ་འཛིང་གནམ་གྲུ་དག་ཕོ་ལན་ཀྲིའི་རྒྱལ་ནང་དུ་འཇོག་རྒྱུ། ནུབ་ཆིངས་དང་རཱ་ཤི་ཡ། ཨ་རི་བཅས་ཀྱིས་བདེ་སྲུང་ཐད་གྲོས་མོལ་དང་། ཨ་རི་དང་རཱ་ཤི་ཡ་མཉམ་འབྲེལ་གྱི་ལས་དོན་ཚོགས་ཆུང་ཞིག་འཛུགས་རྒྱུ། རཱ་ཤི་ཡས་འབྱུང་འགྱུར་ཡུ་རོབ་རྒྱལ་ཁབ་གཞན་དག་དང་ཡུ་ཁུ་རན་ལ་ཚུར་རྒོལ་མི་བྱ་རྒྱུའི་ཁྲིམས་བཟོ་རྒྱུ།
༤ དམག་འཁྲུག་གིས་གཏོར་ཟིན་པའི་ཡུ་ཁུ་རན་གྱི་རྒྱུ་དངོས་དག་བསྐྱར་གསོའི་ཕྱིར། ཨ་རི་དང་ཡུ་རོབ་གཉིས་ཀྱིས་ཡུ་ཁུ་རན་དུ་མ་རྐང་ཆེན་པོ་འཇོག་རྒྱུ་དང་། ཚོང་ལས་འདིའི་ཁེ་ཕན་བརྒྱ་ཆ་ 50% ཨ་རི་ལ་ཐོབ་དགོས་པ། མ་རྐང་འདིའི་ཕྱིར་ཡུ་རོབ་ཀྱི་དངུལ་ཁང་དུ་བཀག་ཡོད་པའི་རཱ་ཤི་ཡའི་དངུལ་སྒོར་ནས། ཨ་སྒོར་ཐེར་འབུམ་ $100 གཏོང་རྒྱུ་དང་། ནུབ་ཕྱོགས་ཀྱི་དངུལ་ཁང་དུ་བཀག་ཡོད་པའི་རཱ་ཤི་ཡའི་དངུལ་སྒོར་གཞན་དག ཡུ་ཁུ་རན་གྱི་རྒྱུ་དངོས་བསྐྱར་གསོའི་ཕྱིར་རཱ་ཤི་ཡ་དང་། ཨ་རི་མཉམ་འབྲེལ་གྱིས་སྤེལ་རྒྱུའི་ལས་གཞིའི་ཁྲོད་གཏོང་རྒྱུ།
༥ རྒྱལ་སྤྱིའི་དངུལ་རྩའི་ཁྱབ་ཁོངས་སུ། རཱ་ཤི་ཡའི་སྟེང་བཀལ་བའི་ཉེས་ཆད་དག་རིམ་གྱིས་ཕྱིར་འཐེན་དང་། རཱ་ཤི་ཡ་སླར་ཡང་ཡར་ཐོན་རྒྱལ་ཁབ་ G8 ཀྱི་ནང་བསྐྱར་དུ་འཇུག་རྒྱུ། ཨ་རི་དང་རཱ་ཤི་ཡའི་བར་ཕུགས་བརྟན་པའི་དཔལ་འབྱོར་མཉམ་ལས་བྱ་རྒྱུ།
༦ རཱ་ཤི་ཡ་དང་ཡུ་ཁུ་རན་གཉིས་བར་བཟུང་དམག་དང་། མི་སེར་བཙོན་པ་སོགས་བརྗེ་རེས་ཆེན་པོ་ཞིག་བྱ་རྒྱུ་དང་། དེའི་ཁྲོད་བྱིས་པའང་ཚུད་རྒྱུ་ཡིན་པ། (རཱ་ཤི་ཡས་ཡུ་ཁུ་རན་གྱི་བྱིས་པ་མང་པོ་བཙན་འཁྲིད་བྱས་ཟིན།) དེ་བཞིན་སློབ་གསོའི་ཁྲོད་བཟོད་སྒོམ་སོགས་འཇོག་རྒྱུ་དང་། ནཱ་ཙེའི་ལྟ་བ་ངོས་ལེན་མི་བྱ་རྒྱུ། (རཱ་ཤི་ཡ་ལྟར་ན། ད་ལྟའི་ཡུ་ཁུ་རན་གྱི་གཞུང་ནི། ནཱ་ཙེའི་ལྟ་བ་ཡོད་མཁན་ཚོས་བཟུང་ཡོད་པ་དང་། དེའི་རྒྱུ་མཚན་དུ་ཡུ་ཁུ་རན་དུ་ཡོད་པའི་རཱ་ཤི་ཡའི་སྐད་ཤོད་མཁན་ཚོར་དབྱེ་འབྱེད་བྱེད་བཞིན་འདུག་ཅེས་ཤོད་ཀྱི་ཡོད།)
༧ ད་ལྟ་རཱ་དམག་གིས་བཟུང་ཡོད་པ། ཡུ་ཁུ་རན་གྱི་རྫ་པུ་རི་ཆི་ས་ཁུལ་གྱི་ཉིང་རྡུལ་གློག་ཁང་དེ། རྒྱལ་སྤྱིའི་རྡུལ་ཕྲན་ཚོགས་པའི་ལྟ་ཞིབ་འོག་འཇོག་རྒྱུ་དང་། དེ་ནས་ཐོན་སྐྲུན་བྱེད་པའི་གློག་དེ་ཡུ་ཁུ་རན་དང་རཱ་ཤི་ཡ་གཉིས་ལ་བརྒྱ་ཆ་ 50% རེ་བྱས་ནས་བགོ་རྒྱུ། ཡུ་ཁུ་རན་གྱི་རླངས་རྫས་ཡོ་ཆས་དག་བསྐྱར་གསོའི་ཕྱིར་ཨ་རིའི་རོགས་བྱ་རྒྱུ།
༨ གྲོས་མཐུན་ལ་མིང་རྟགས་བཀོད་ནས་ཉི་མ་ 100 ཡི་རྗེས་སུ། ཡུ་ཁུ་རན་གྱི་ནང་སྲིད་ལས་དོན་དག་འགོ་གཟུག་རྒྱུ། (དེའི་དོན་ནི་ཡུ་ཁུ་རན་གྱི་སྲིད་འཛིན་འོས་བསྡུ་དང་། རྩ་ཁྲིམས་ལ་འགྱུར་བ་གཏོང་རྒྱུའི་ལས་ཀ་སོགས་འགོ་འཛུགས་དགོས་ཞེས་པའི་དོན།)
༩ གྲོས་མཐུན་འདི་ནི་ཁྲིམས་མཐུན་རང་བཞིན་ཅན་ཡིན་པ་དང་།
འདི་ཉིད་ལག་བསྟར་ལྟ་ཞིབ་ཆེད་ཞི་བདེའི་ལྷན་ཚོགས་ཤིག་འཛུགས་རྒྱུ་དང་། དེའི་འགོ་འཁྲིད་མཁན་དུ་སྲིད་འཛིན་སྒྲོ་ནལ་ཁྲི་རམ་ཕུ་རང་ཉིད་འདུག་རྒྱུ་བཅས་སོ།།
◾ ཡིག་ཆ་འདིའི་ནང་དོན་ཞིབ་ཕྲ་དག་ཡུ་ཁུ་རན་ལ་སྤྲད་ཟིན་པ་ལྟར། ད་ལྟ་རཱ་ཤི་ཡའི་ལག་ཏུའང་འབྱོར་སོང་། ཞེས་སྲིད་འཛིན་ཕུ་ཀྲན་གྱིས་བཤད། དེ་དང་ལྷན་རཱ་ཤི་ཡའི་སྲིད་འཛིན་ལས་ཁུངས་ཀྱི་མགྲིན་ཚབ་པ་པི་སི་ཀོ་ཝི་ཡིས། ད་ལྟ་གནད་དོན་འདིའི་ཐད་ཡུ་ཁུ་རན་ལ་འགན་གཙོ་བོ་ཡོད་པས། ཕྱིས་མ་དྲགས་སྔོན་ལ། ཡུ་ཁུ་རན་གྱིས་ངེས་པར་དུ་ཐག་གཅོད་ཅིག་བྱ་དགོས་པ་རེད་ཅེས་བཤད། དེ་དང་ལྷན་རོའུ་ཀྲར་གསར་ཤོག་སྟེང་གནས་ཚུལ་བཀོད་པ་ལྟར་ན། སྒྲོ་ནལ་ཁྲི་རམ་ཕུས་ཀྱང་། གལ་སྲིད་ཟླ་བ་འདིའི་ཚེས་ 27 ཉིན་ནམ། བདུན་ཕྲག་རྗེས་མའི་གཟའ་ཕུར་བུའི་ཉིན་བར། ཡུ་ཁུ་རན་གྱིས་ཡིག་ཆ་འདི་ཁས་མ་བླངས་ཚེ། ཨ་རིས་ཡུ་ཁུ་རན་ལ་གོ་ལག་མ་ཟད། དམག་དོན་གསང་བའི་གནས་ཚུལ་ཚུན་གཏོང་རྒྱུ་མཚམས་འཇོག་རྒྱུ་ཡིན་ཞེས་ཉེན་བརྡ་བཏང་ཟིན་པ་བཤད།
གཞན་ཡང་སྒྲོ་ནལ་ཁྲི་རམ་ཕུས། ཡུ་ཁུ་རན་གྱིས་རང་གི་ས་ཆ་འཆོར་བཞིན་འདུག ད་ལྟ་ཕུས་ཀྲན་ལ་དམག་འཁྲུག་མུ་མཐུད་དུ་རྒྱག་འདོད་མི་ནི་འདུག ངས་མགྱོགས་པོར་རཱ་ཤི་ཡའི་སྟེང་དཔལ་འབྱོར་ཉེས་ཆད་ལྗིད་མོ་ཞིག་དགལ་རྒྱུ་ཡིན་ལ། སྔར་བཀལ་ཟིན་པའི་ཉེས་ཆད་དག་ཀྱང་ཕྱིར་འཐེན་རྒྱུ་མིན། ཛེ་ལན་སི་ཀེ་ང་ཚོའི་འཆར་གཞི་འདི་ལ་དགའ་དགོས་པ་རེད། ཁོ་ལ་ཕྱིར་རྩོད་པ་རྒྱག་རྒྱུའི་རྒྱབ་རྟེན་(Card)མི་འདུག་ཅེས།
ཇི་ལྟར་གོ་བ་ལེན་དགོས་པའང་མི་ཤེས་པའི་སྐད་ཆ་ཞིག་བཤད་ཀྱང་།སྙིང་པོ་ནི་ཡུ་ཁུ་རན་གྱིས་འདོད་ཀྱང་མ་འདོད་ཀྱང་ཁས་ལེན་དགོས་ཞེས་པ་དེ་རེད། དེ་བཞིན་དབྱིན་ཇིའི་གསར་ཁང་(The Sun)སྟེང་གནས་ཚུལ་བཀོད་པ་ལྟར་ན། གལ་སྲིད་ཛེ་ལན་སི་ཀེ་ཡིས་ཡིག་ཆ་འདི་ཁས་མ་བླངས་ཚེ། ཨ་རིས་ཡུ་རོབ་ལའང་གོ་ལག་འཚོང་རྒྱུ་མིན་ཞེས་ཉེན་བརྡ་བཏང་ཟིན་པ་བཤད།
◾ འདིའི་རྗེས་སུ་ཕུ་ཀྲན་གྱིས་གཏམ་བཤད་ཅིག་སྤེལ། ཁོས། དོན་ཚན་ 28 ཅན་གྱི་ཡིག་ཆ་འདི་ང་ཚོའི་ལག་ཏུ་འབྱོར་སོང་། རཱ་ཤི་ཡའི་ངོས་ནས་བསྟུན་ཤེས་ཀྱི་རྣམ་འགྱུར་བསྟན་པ་ཡིན། ཡིག་ཆ་འདིའི་ནང་དོན་ཞིབ་ཕྲའི་ཐད། ད་ལྟ་བར་ཡོངས་གྲགས་སུ་གླེང་མོལ་བྱས་མེད། དེ་བཞིན་རཱ་ཤི་ཡ་དང་ལྷན་ཡང་འདིའི་སྐོར་ཞིབ་ཕྲ་གྲོས་མོལ་བྱས་མེད། དམིགས་བསལ་དམག་དོན་བྱ་འགུལ་(དམག་འཁྲུག)གྱི་དམིགས་ཡུལ་དག་དྲག་པོའི་ལམ་ནས་སྒྲུབ་བཞིན་ཡོད། ཡིན་ན་ཡང་། ཞི་བའི་ལམ་ནས་འགྲུབ་རྒྱུར་རཱ་ཤི་ཡར་གྲ་སྒྲིག་ཡོད། རཱ་ཤི་ཡའི་ངོས་ནས་ཡིག་ཆ་འདིའི་ཐད་གྲོས་བསྡུར་བྱ་རྒྱུར་གྲ་སྒྲིག་ཡོད། ཡིན་ན་ཡང་། ནང་དོན་ཞིབ་ཕྲའི་ཐད་གླེང་མོལ་བྱ་དགོས་པ་རེད་ཅེས་བཤད།
◾ ཨ་རིས་ཡིག་ཆ་འདི་ཡུ་ཁུ་རན་ལ་སྤྲད་རྗེས། ཛེ་ལན་སི་ཀེ་ཡིས་ཡིག་ཆ་འདི་ཁས་ལེན་མིན་ཐད་དམིགས་བསལ་སྐད་ཆ་གང་ཡང་མ་བཤད་པར། ཨ་རི་ལྷན་ལྷག་བསམ་བཟང་པོས་མཉམ་ལས་བྱ་འདོད་ཡོད་ཅེས་བཤད། དོན་དངོས་སུ་ཁོས་དེ་མ་ཐག་མཇར་མན་དང་དབྱིན་ཇིའི་སྲིད་བློན། ཧྥ་རན་སིའི་སྲིད་འཛིན་སོགས་ལ་ཁ་པར་བརྒྱུད་གླེང་མོལ་གྱིས། ཡིག་ཆའི་ནང་དོན་ཐད་ཁོ་ཚོས་གྲོས་བསྡུར་བྱས་ཟིན་པ་གསལ། ཡིན་ན་ཡང་། སྐད་ཆ་ཅི་ཞིག་བྱུང་ཡོད་མེད་ཐད་ཕྱིར་མ་བསྒྲགས་ཀྱང་། སྐབས་འདིར་བྷི་ལུམ་བྷར་གྷི་སྟེང་། ཡུ་རོབ་དང་ཡུ་ཁུ་རན་གྱིས། ཨ་རི་དང་རཱ་ཤི་ཡའི་ཡིག་ཆ་འདི་ཁས་མ་བླངས་པའི་གནས་ཚུལ་དེ་བཀོད། སྙིང་པོ་ནི།སྐད་ཆ་ཅི་ཞིག་བཤད་ཀྱང་ད་ལྟའི་གཡུལ་སའི་ས་ཁྲ་ལྟར་བཤད་དགོས་པ་དང་། གྲོས་མོལ་ཅི་ཞིག་བྱས་ཀྱང་། ཡུ་ཁུ་རན་དེའི་ཁྲོད་ངེས་པར་དུ་ཚུད་དགོས་ཞེས་པ་དེ་རེད།
མདང་དགོང་གཞི་ནས་ཛེ་ལན་སི་ཀེ་ཡིས། བརྙན་ལམ་བརྒྱུད་སྐད་ཆ་ཐོག་མ་དེ་བཤད་ཅིང་། ཁོའི་སྐད་ཆའི་སྙིང་པོ་ནི། ང་ཚོས་ཕྱི་ལོ་ 2022 ཟླ་ 2 ཚེས་ 24 ཉིན་(ཐོག་མར་བཙན་འཛུལ་ཉིན།)ཡུ་ཁུ་རན་ལ་བསླུས་མེད་པ་ལྟར། ད་ལྟ་ང་ཚོས་ཡུ་ཁུ་རན་ལ་བསླུ་མི་སྲིད། མི་དམངས་ང་དང་ལྷན་ཡོད་པ་ངས་ཤེས་ཀྱི་ཡོད་ཅེས་བཤད། ད་དུང་ཁོས། གཅིག་བྱས་ན་ཡུ་ཁུ་རན་གྱིས་གདམ་ཀ་ཧ་ཅང་ཁག་པོ་ཞིག་ལ་གདོང་གཏོད་དགོས་འགྱུར་རྒྱུ་རེད། དེ་ནི་རང་གི་ཆེ་མཐོང་འཆོར་དུ་འཇུག་རྒྱུ་ཡིན་ནམ། ཡང་ན་ང་ཚོའི་མཐུན་གྲོགས་གལ་ཆེན་ཞིག་(ཨ་རི།)འཆོར་དུ་འཇུག་རྒྱུ་ཡིན་ཞེས་པ་དེ་རེད། འདི་ནི་ང་ཚོའི་ལོ་རྒྱུས་ཀྱི་དུམ་མཚམས་ཁག་ཤོས་ཤིག་རེད། ཅེས་བཤད།
ད་དུང་ཁོས། རང་དབང་དང་ཆེ་མཐོང་། དྲང་བདེན་མེད་པའི་མི་ཚེ་ཞིག་དང་ལྷན། ང་ཚོའི་སྟེང་ལ་ཚུར་རྒོལ་ཐེངས་གཉིས་ལ་བྱེད་མཁན་(རཱ་ཤི་ཡ།)ཞིག་ལ་ཡིད་ཆེས་དགོས་པ་རེད། བདུན་ཕྲག་རྗེས་མ་ནི་དཀའ་ལས་ཁག་པོ་ཞིག་ཏུ་འགྱུར་རྒྱུ་དང་། གནས་ཚུལ་མང་པོ་འབྱུང་ངེས་རེད། ཁྱེད་ཚོ་(ཡུ་ཁུ་རན་གྱི་མི་དམངས།)ནི་འཚར་ལོངས་བྱུང་ཟིན་པ་དང་། གནས་ཚུལ་ཧ་གོ་མཁན་གྱི་མི་རེད། བདུན་ཕྲག་རྗེས་མར་ང་ཚོའི་སྟེང་གནོན་ཤུགས་མང་པོ་བསླེབ་རྒྱུ་དང་། དགྲ་བོ་གཉིད་ཁུག་གི་མེད།(བྲེལ་བ་ལངས་ཡོད་པའི་དོན།) ང་ཚོ་ནི་རྣོ་ལྕགས་ཡིན། རྣོ་ལྕགས་ལས་ཀྱང་སྲ་བ་ཡིན།
ཁོ་ཚོས་(རཱ་ཤི་ཡ་དང་ཨ་རི།)ངའི་ལན་ལ་སྒུག་ཡོད་པ་རེད། ཡིན་ན་ཡང་། ངས་ཕྱི་ལོ་ 2019 ཟླ་ 5 ཚེས་ 20 ཉིན་(ཁོ་སྲིད་འཛིན་དུ་ལངས་དུས།)ལན་བཏབ་ཟིན་པ་ཡིན། ཡུ་ཁུ་རན་གྱི་རང་བཙན་དང་མངའ་ཁོངས་བདག་དབང་སྲུང་སྐྱོབ་བྱ་རྒྱུ་དམ་བཅས་ཟིན་པ་ཡིན་ཞེས་བཤད། ཛེ་ལན་སི་ཀེ་ཡིས། ཨ་རི་དང་རཱ་ཤི་ཡས་བཏོན་པའི་ཡིག་ཆ་འདི་ཁས་ལེན་རྒྱུ་མིན་ཞེས་ཐད་ཀར་མ་བཤད་ཀྱང་། ནང་དོན་ལ་ཁས་ལེན་རྒྱུ་མིན་ཞེས་བཤད་ཟིན་པ་ལྟ་བུ་གྱུར། དེ་བཞིན་ཁོས། སྒྲོ་ནལ་ཁྲི་རམ་ཕུས་དམར་གསོད་ཆེན་པོ་འདི་མཚམས་འཇོག་འདོད་ཡོད་པར་གུས་ཞབས་ཡོད། དོན་དངོས་དང་མཐུན་པའི་གྲོས་འཆར་ཞིག་ཡིན་ན། ང་ཚོས་དགའ་བསུ་ཞུ་རྒྱུ་ཡིན་ཞེས་བཤད།
▶️ དོན་དངོས་གལ་ཆེན་འགའ་དང་དབྱེ་ཞིབ་པ་ཚོའི་སྐད་ཆ།
གོང་གི་ཡིག་ཆ་འདིའི་ནང་དོན་གཙོ་བོ་དག་ནི། དོན་དངོས་སུ་ཕུ་ཀྲན་གྱིས་ད་ལྟ་བར་འདོན་བཞིན་པའི་དགོས་འདུན་གཙོ་བོ་དག་རེད། ད་ལྟ་ཁོའི་དགོས་འདུན་ལ་ཨ་རིས་རྒྱབ་སྐྱོར་བྱེད་བཞིན་པས། དོན་དངོས་སུ་ཁོ་ལ་མཚོན་ན། འདི་ནི་རྨི་ལམ་ཞིག་མངོན་གྱུར་འབྱུང་བཞིན་པ་ལྟ་བུ་གྱུར་ཅིང་། ཁོ་ལ་འདི་ལས་ལྷག་ཅིག་ཐོབ་རྒྱུ་ཁག་པོ་ཡིན་པ་གསལ་བོ་ཡིན་པ་བཤད་ཅིང་། ལྷག་པར་ནུབ་ཕྱོགས་ཀྱི་དངུལ་ཁང་དག་ཏུ་བཀག་ཡོད་པའི་དངུལ་སྒོར་དག་ནི། མ་གཞི་ནས་རཱ་ཤི་ཡའི་ལག་ཏུ་མེད་པར་གཞན་གྱི་ལག་ཏུ་ཤོར་ཟིན་པ་ཞིག་ཡིན་པས། དེ་བེད་སྤྱོད་ཀྱིས་ཡུ་ཁུ་རན་ལ་གུན་གསབ་ཅིག་སྤྲོད་དགོས་ན། ཁོ་ལ་དེ་ལས་ལྷག་པའི་ལམ་ཀ་ལས་སླ་བོ་གཞན་ཞིག་མེད་པར་གྱུར་ཟིན་པ་ཡིན།
དེའི་སྟེང་ཡུ་རོབ་ཀྱི་དངུལ་ཁང་དག་ཏུ་བཀག་ཡོད་པའི་རཱ་ཤི་ཡའི་དངུལ་སྒོར་འདི་དག ཡུ་རོབ་རྒྱལ་ཁབ་ཚོས་བེད་སྤྱོད་ཀྱིས་ཡུ་ཁུ་རན་ལ་རོགས་སྐྱོར་ཆེད་གཏོང་རྒྱུར་གྲོས་མོལ་བྱེད་བཞིན་ཡོད། ཡིན་ན་ཡང་། ད་ལྟ་དངུལ་སྒོར་འདི་ཨ་རིས། འཆར་གཞི་ཡིག་ཆ་འདིའི་ནང་དུ་བཞག་ཟིན་པས། ཡུ་རོབ་ཀྱིས་དངུལ་སྒོར་འདི་རང་འདོད་ལྟར་བེད་སྤྱོད་བྱ་རྒྱུ་སྔར་ལས་ཁག་ཏུ་ཕྱིན་ཟིན་པ་ཡིན་ལ། འདི་ནི་ཕུ་ཀྲན་ལ་ཞོར་ནས་ཐོབ་པའི་ལེགས་སྐྱེ་ཞིག་ཏུ་གྱུར། ཡུ་རོབ་ཀྱི་དབུ་ཁྲིད་ཚོའང་འདིའི་ཐད་ཁོང་ཁྲོ་ལངས་བཞིན་པའི་གནས་ཚུལ་ཐོན་ཅིང་། སྒྲོ་ནལ་ཁྲི་རམ་ཕུའི་སྐུ་ཚབ། ཝེ་ཀྲི་ཀོ་ཧྥི་སེམས་ཁམས་སྨན་པ་ཞིག་གི་འགྲམ་དུ་འགྲོ་དགོས་འདུག་ཅེས། ཡུ་རོབ་ཀྱི་ཆབ་སྲིད་པ་ཞིག་གིས་བཤད།
ཡིག་ཆ་འདི་ནི་ཨ་རི་དང་རཱ་ཤི་ཡ་མཉམ་འབྲེལ་གྱིས་བཟོས་པ་ཞིག་ཡིན་པས། གོང་དུ་ཕུ་ཀྲན་གྱིས། ཡིག་ཆ་འདི་ད་ལྟ་གཞི་ནས་ཁོ་ཚོའི་ལག་ཏུ་འབྱོར་ཟིན་ཚུལ་དང་། ཞིབ་ཕྲའི་ཐད་གྲོས་མོལ་བྱ་དགོས་ཚུལ་བཤད་པ་ནི། ཡུ་རོབ་དང་ཡུ་ཁུ་རན་གྱིས་ཡིག་ཆ་འདི་ཁས་མི་ལེན་པ་སྔོན་དཔག་གིས། མུ་མཐུད་དུ་ཆབ་སྲིད་ཀྱི་རྩེད་མོ་གཞན་ཞིག་ལ་གྲ་སྒྲིག་བྱེད་བཞིན་པ་ལས་གཞན་ཞིག་མ་མཐོང་། གོང་ཞུས་ལྟར་ཡིག་ཆ་འདི་བཟོ་མཁན་ནི། ཕུ་ཀྲན་གྱི་སྐུ་ཚབ་སྒྲི་མེ་ཀྲི་རེ་ཝི་(Kirill Dmitriev)དང་། སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་གཉིས་ཡིན་པ་གསལ་བོར་གྱུར་ཟིན། དེ་གསང་བ་བྱས་ཟིན་པའི་སྟེང་ཡིག་ཆ་འདིའང་ཕྱིར་ཤོར་ཟིན་པ་དང་། ཞིབ་ཕྲ་ཨེག་སོ་སི་སྟེང་ཐོག་མར་བཀོད་པ་ཞིག་ལས། དང་བླང་གིས་ཕྱིར་བཀྲམས་པ་ཞིག་མ་རེད།
ཡིག་ཆ་འདིའི་ནང་དོན་ལ། འཛམ་གླིང་མ་ཟད་ཝ་ཤིན་ཀྲོན་གྱི་ལས་བྱེད་དང་། གྲོས་འཐུས་དག་ཀྱང་ཧ་ལས་སུ་བཅུག་ཅིང་། འདི་ནི་མགོ་བཏགས་པ་ཞིག་རེད་ཅེས་ཤོད་མཁན་བྱུང་། དེ་མ་ཟད་སྒྲོ་ནལ་ཁྲི་རམ་ཕུའི་སྐད་ཚབ། དམག་སྤྱི་ཟུར་བ་ཁེ་ཐི་ཁེ་ལོག་ཀྱང་ཡིག་ཆ་འདི་བཟོ་རྒྱུའི་བརྒྱུད་རིམ་ཁྲོད་ཞུགས་སུ་མ་བཅུག་པ། རོའུ་ཀྲར་གསར་ཤོག་གིས་དེ་རིང་གནས་ཚུལ་བཀོད། ད་དུང་གནས་ཚུལ་གཞན་ཞིག་ཡོད་པ་ནི། ཡིག་ཆ་འདི་དབྱིན་ཡིག་སྒང་ལ་ཡོད་པ་ལ། འདིའི་ནང་དོན་སྐོར་ཞིག་རཱ་ཤི་ཡའི་ཡི་གེ་ནས་དབྱིན་ཡིག་ལ་ཐད་ཀར་བསྒྱུར་ཟིན་པའི་རྣམ་པ་ཡོད་པ། དབྱིན་ཇིའི་གྷའེ་ཀྲན་གསར་ཤོག་སྟེང་གནས་ཚུལ་བཀོད་ཅིང་། སྐད་ཆ་ཤོད་སྟངས་འགའ་ནི། དབྱིན་ཡིག་གི་རང་བཞིན་གྱི་སྐད་ཆ་ཤོད་སྟངས་དང་མི་མཐུན་པར། དེ་ནི་རཱ་ཤི་ཡའི་ཐ་སྙད་ལས་ཐད་ཀར་བསྒྱུར་ཡིན་པ་དཔེ་མཚོན་དང་བཅས་གསལ་བོར་བསྟན།
གནས་ཚུལ་འདིས་ཡིག་ཆ་འདི་བཟོ་བར་དོན་དངོས་སུ། ཕུ་ཀྲན་གྱིས་ཤུགས་རྐྱེན་ཚད་གང་འདྲ་ཞིག་སྤྲད་ཡོད་པ་ཞོར་དུ་གསལ་བོར་བཟོས་ཟིན་པ་ཞིག་ཏུ་གྱུར། ལྷག་པར་ཡིག་ཆ་འདི་ཡུ་ཁུ་རན་གྱི་དམག་མིར་གཡུལ་སར་དཀའ་ངལ་འཕྲད་བཞིན་པའི་སྟེང་། ཛེ་ལན་སི་ཀེའི་མཐའ་འཁོར་དུ་ལྐོག་ཟའི་གནད་དོན་འབྱུང་བཞིན་པའི་མཚམས་འདི་དང་ཏག་ཏག་སྐབས་འཁེལ། ལྷག་པར་ཟླ་བ་འགའི་སྔོན་ནས་རཱ་དམག་གིས་ཤི་རྨས་ཚབས་ཆེན་དང་བཅས། ཡུ་ཁུ་རན་གྱི་ཕོ་ཁི་རོ་ཝི་སི་ཀི་གྲོང་ཁྱེར་དང་། ཀུ་པན་སི་ཀི་གྲོང་བརྡལ་གཉིས་འཕྲོག་ཐབས་བྱས་ཤིང་། བདེན་དཔང་མེད་ཀྱང་ཕུ་ཀྲན་གྱིས། རཱ་དམག་གིས་ཡུ་དམག་ཁྲི་ 1 ལས་མང་བའི་མཐའ་བསྐོར་ཟིན་ལ། ད་ལྟ་ཁོ་ཚོའི་འཆི་གསོན་རཱ་དམག་གི་ལག་ཏུ་ཡོད་པ་བསྒྲགས། ཁ་སང་ཁོས་སླར་ཡང་རཱ་དམག་གིས་ཀུ་པན་སི་ཀི་གྲོང་བརྡལ་ཧྲིལ་བོ་ཕྱི་ཟླ་ 11 ཚེས་ 4 ཉིན་འཕྲོག་ཟིན་ཅེས་བཤད།
ཡིན་ན་ཡང་། གྲོང་ཁྱེར་དང་གྲོང་བརྡལ་འདི་ཧྲིལ་བོ་རཱ་དམག་གིས་འཕྲོག་ཟིན་པ། མཐའ་ན་རཱ་ཤི་ཡ་རང་གིས་བཀྲམས་པའི་གཡུལ་སའི་ས་ཁྲ་ནས་ཀྱང་མཐོང་མི་ཐུབ་ལ། ཡུ་ཁུ་རན་གྱིས་ཀྱང་ད་ལྟ་བར་འདི་གཉིས་རཱ་དམག་ལ་ཤོར་ཟིན་པ་ཁས་མ་བླངས། དེ་བཞིན་འདས་པའི་ཉིན་འགའི་ནང་རཱ་དམག་གིས། ཡུ་ཁུ་རན་གྱི་གྲོང་ཁྱེར་དག་ལ་མཚམས་རེར། ཉིན་རེར་སྒྲི་རོན་ 400 དང་། འཕུར་མདའ་ 30 ལས་མང་བ་འཕངས་ནས་དྲག་རྒོལ་བྱས་ཤིང་། འདི་ནི་མི་སེར་དག་བློ་ཞུམ་དུ་འཇུག་རྒྱུའི་ཐབས་བྱུས་ཤིག་ཡིན་པ་ཤོད་མཁན་བྱུང་། དབྱེ་ཞིབ་པ་འགས། སྙིང་པོ་ནི་ད་ལྟའི་ཡིག་ཆ་འདི་བཟོ་བའི་བརྒྱུད་རིམ་དང་། གོང་གི་གནས་ཚུལ་གཉིས་སྐྱ་སྦྲེལ་ནས་ཡོང་ཡོད་པ་འདོད།