ཉེ་དུས་ཉི་ཧོང་གྲོས་ཚོགས་སུ་ཉི་ཧོང་གི་སྲིད་བློན་གྱིས། གལ་སྲིད་རྒྱ་ནག་གིས་ཐེ་ཝན་ལ་ཚུར་རྒོལ་བྱས་ཚེ། དེ་ནི་ཉི་ཧོང་རྒྱལ་ཁབ་ཀྱི་ཆགས་འཇིག་ལ་ཐུག་པའི་ཉེན་ཁ་ཞིག་དང་། དེས་ཉི་ཧོང་གིས་དམག་དཔུང་བཀོལ་དགོས་བཟོ་སྲིད་ཅེས་བཤད་རྐྱེན། སྤྱང་ཀི་དཔའ་བོ་རུ་འབོད་པའི་རྒྱ་ནག་གི་ལས་བྱེད། ཚིག་རྩུབ་སྤྱོད་མཁན་དག་གིས་ཉི་ཧོང་དང་ཉི་ཧོང་གི་སྲིད་བློན་གྱི་སྟེང་ཁ་རྡུང་དྲག་པོ་གཏོང་འགོ་བཙུགས་ཟིན་པ་ལྟར། ཁ་སང་རྒྱ་ནག་ཕྱི་སྲིད་བློན་ཆེན་ཝང་ཡེ་རང་གིས་ཐོག་མར་ཁ་གྲགས།
འདི་ནི་རྒྱ་ནག་གི་ཆེས་མཐོའི་དཔོན་རིགས་ཤིག་གིས་འདིའི་ཐད་སྐད་ཆ་དངོས་སུ་བཤད་པ་ཐོག་མ་དེ་གྱུར།ཁོས། ཉི་ཧོང་གི་དབུ་ཁྲིད་ཚོས་ཐེ་ཝན་དང་འབྲེལ་མངོན་གསལ་དུ་བརྡ་ནོར་བ་བཏང་བ་ནི་ཧ་ལས་བ་ཞིག་རེད་ཅེས་བཤད། ད་དུང་ཁོས། ཉི་ཧོང་བརྒལ་མི་རུང་བའི་ཐིགས་དེའི་སྟེང་དུ་རྒལ་བཞིན་འདུག་ཅེས་ཟེར། དེ་དང་ལྷན་ཉི་ཧོང་གི་བདེ་སྲུང་བློན་ཆེན་གྱིས། ཐེ་ཝན་ནས་སྤྱི་ལེ་ 112 ཡས་མས་ཀྱི་མཚམས་སུ་ཡོད་པ། ཡཱ་ན་གྷུ་ནེ་ཞེས་པའི་མཚོ་གླིང་སྟེང་། སྙོབས་ཚད་འབྲིང་ཅན་གྱི་འཕུར་མདའི་མ་ལག་ཅིག་འཇོག་རྒྱུ་ཡིན་པ་བསྒྲགས་ཤིང་། འདི་ནི་འགོག་སྲུང་ཁོ་ནའི་ཆེད་ཡིན་ཞེས་མནན་བཤད་བྱས།
ཉེ་དུས་ནས་ཉི་ཧོང་ལ་རྒྱ་ནག་གི་ཡུལ་སྐོར་བ་སོགས་འགྲོ་མི་རུང་བ། རྒྱ་ནག་གཞུང་གིས་ཉེན་བརྡ་བཏང་རྐྱེན་དེས་ཉི་ཧོང་གི་ཡུལ་སྐོར་ཁེ་གཉེར་ལ་གནོད་པ་ཚབས་ཆེན་ཐེབས། ཉི་ཧོང་གིས་རྒྱ་ནག་ལ་སྐུ་ཚབ་བཏང་ཞིང་། གནས་ཚུལ་ཞི་འཇམ་དུ་གཏོང་རྒྱུར་འབད་པ་བྱས། ཡིན་ན་ཡང་། རྒྱ་ནག་གིས་ཉི་ཧོང་གི་སྲིད་བློན་གྱི་སྟེང་ཚིག་རྩུབ་སྤྱོད་རྒྱུ་མཚམས་མ་བཞག