ཧྥ་རན་སིའི་སྲིད་འཛིན་མཱ་ཁི་རོན་གྱིས། ད་ལྟ་རཱ་ཤི་ཡས་སློབ་གྲྭ་དང་སྨན་ཁང་སོགས། སྤྱི་དམངས་ཀྱི་དགོས་མཁོ་དག་འཛུགས་སྐྲུན་བྱེད་ཀྱི་མེད་ཅེས་བཤད
བདུན་ཕྲག་སྔོན་མར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། ཕུ་ཀྲན་གྱི་སྐུ་ཚབ་སྒྲི་མེ་ཀྲི་རེ་ཝི་གཉིས་ཀྱིས་དམག་མཚམས་འཇོག་ཐབས་དང་འབྲེལ། ཡིག་ཆ་དོན་ཚན་ 28 ཅན་ཞིག་བཟོས་ཡོད་པ། ཕྱིར་མ་བཀྲམས་སྔོན་ཤོར་ཟིན་པ་ལྟར། དེའི་ནང་དུ་ཡུ་ཁུ་རན་གྱིས་ཅི་ཞིག་བློས་གཏོང་རྒྱུ་ཁོ་ན་ལས། རཱ་ཤི་ཡའི་ངོས་ནས་བློས་གཏོང་དགོས་པ་གང་ཡང་མེད་རྐྱེན། ཡུ་རོབ་དང་ཡུ་ཁུ་རན་གྱིས་གྲོས་མཐུན་འདི་ལ་ངོས་ལེན་མ་བྱས།
རཱ་ཤི་ཡའི་ངོས་ནས་གང་ཡང་བློས་གཏོང་མི་དགོས་པ་འདིའི་ཐད་སྒྲོ་ནལ་ཁྲི་རམ་ཕུ་ལ་སྐད་ཆ་དྲིས་པར། ཁོས། རཱ་ཤི་ཡའི་ངོས་ནས་བློས་བཏང་ཟིན་པ་ཆེ་ཤོས་ནི། དམག་འཁྲུག་མཚམས་འཇོག་རྒྱུ་དང་ཡུ་ཁུ་རན་གྱི་ས་ཆ་སྔར་ལས་ཆེ་བ་མི་ཟ་རྒྱུ་དེ་རེད། གཞན་ཕུ་ཀྲན་གྱིས་འབྱུང་འགྱུར་ཟླ་བ་ 2 ཀྱི་རིང་། ཡུ་ཁུ་རན་གྱི་རྡོན་པ་སི་ས་ཁུལ་ཧྲིལ་བོ་འཛིན་རྒྱུ་རེད་ཅེས་བཤད། དོན་དངོས་སུ་འདས་པའི་ལོ་ངོ་ 1 ཧྲིལ་བོའི་རིང་། རཱ་དམག་གིས་རྡོན་པ་སི་ས་ཁུལ་དུ། ས་སྤྱི་ལེ་གྲུ་གཞི་མ་2.900 ལས་འཛིན་མ་ཐུབ་པ་དང་། ད་དུང་ཡང་ས་སྤྱི་ལེ་གྲུ་གཞི་མ་ 6,200 འཛིན་རྒྱུ་ལྷག་ཡོད་པ་མ་ཟད། ལུ་ཧན་སི་ཀི་མངའ་སྡེ་ཕལ་ཆེར་ཧྲིལ་བོ་བཟུང་ཟིན་ནའང་། ད་དུང་ས་ཆ་སྤྱི་ལེ་གྲུ་གཞི་མ་ 100 ཡས་མས་ཤིག་འཛིན་མ་ཐུབ་པ་གསལ།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ། ཝེ་ཀྲི་ཀོ་ཧྥི་དང་རཱ་ཤི་ཡའི་སྲིད་འཛིན་ཕུ་ཀྲན་གྱི་ཕྱི་སྲིད་སློབ་སྟོན་པ་ཡུ་རེ་ཨུ་ཤ་ཁོ་ཝི་གཉིས་བར། ད་ལོའི་ཕྱི་ཟླ་ 10 ཚེས་ 14 ཉིན་ཁ་པར་བརྒྱུད་གསང་བའི་ངང་གླེང་མོལ་བྱས་པ་ཞིག་ཡིག་ཏུ་འཕབ་ཅིང་། བྷི་ལུམ་བྷར་གྷི་ཡིས་ཕྱིར་བཀྲམས་ཟིན་པ་ལྟར། ཡུ་རེ་ཨུ་ཤ་ཁོ་ཝི་ཡིས། སུ་ཞིག་གིས་ཀྱང་འདི་འདྲ་བྱ་མི་རུང་བ་ཞིག་རེད། འདི་ནི་ངོས་ལེན་ཐུབ་པ་ཞིག་མ་རེད། ཅེས་ཕྱིར་བཀྲམས་པའི་ཡིག་ཆ་འདི་ཁུངས་ལྡན་ཡིན་པ་ཁས་ཡོངས་སུ་བླངས། གོང་གི་གླེང་མོལ་འདིའི་ནང་དུ། ཕུ་ཀྲན་གྱིས་སྒྲོ་ནལ་ཁྲི་རམ་ཕུ་ལ་བསྟོད་པ་ཇི་ལྟར་བྱ་དགོས་པ་སོགས། ཝེ་ཀྲི་ཀོ་ཧྥི་ཡིས་རཱ་ཤི་ཡའི་མངོན་འདོད་འགྲུབ་རྒྱུར་ཐབས་བྱུས་ཀྱི་རོགས་བྱས་ཡོད་པ་གསལ་བོར་གྱུར།
གཞན་ཡང་སྐབས་དེར་ཨ་རིས་ཡུ་ཁུ་རན་ལ་ཀྲོ་མ་ཧོག་འཕུར་མདའ་གཏོང་ལ་ཉེ་བའི་མཚམས་ཡིན་པ་དང་། ཟླ་བ་དེའི་ཚེས་ 17 ཉིན་ལས་ཀ་འདིའི་ཆེད་ཛེ་ལན་སི་ཀེ་ཆེད་དུ་ཨ་རིའི་རྒྱལ་ས་ཝ་ཤིན་ཀྲོན་དུ་སླེབས། ཡིན་ནའང་ཛེ་ལན་སི་ཀེ་ལམ་སྐབས་སུ་ཡོད་དུས་ཏེ། ཚེས་ 16 ཉིན་ཕུ་ཀྲན་གྱིས་སྒྲོ་ནལ་ཁྲི་རམ་ཕུ་ལ་ཁ་པར་བཏང་ཞིང་། གྷ་ཛ་ས་ཁུལ་དུ་མེ་མཚམས་བཞག་ཐུབ་པར་བསྟོད་པ་དང་། འཚམས་འདྲི་ཞུ་ཞོར་ཡུ་ཁུ་རན་ལ་འཕུར་མདའ་འདི་གཏོང་མི་རུང་བ་བཤད་ཟིན།
ཚེས་ 17 ཉིན་སྒྲོ་ནལ་ཁྲི་རམ་ཕུ་དང་ཛེ་ལན་སི་ཀེ་གཉིས་ཐུག་སྐབས། སྒྲོ་ནལ་ཁྲི་རམ་ཕུས་ཡུ་ཁུ་རན་ལ་འཕུར་མདའ་མ་འཚོང་བའི་སྟེང་། སླར་ཡང་ཛེ་ལན་སི་ཀེའི་སྟེང་ཁ་རྡུང་བཏང་། ཕྱི་ལ་ཤོར་བའི་གསང་བའི་གླེང་མོལ་འདི་ལྟར་ན། ཛེ་ལན་སི་ཀེ་ཨ་རིར་མ་འབྱོར་སྔོན་ཕུ་ཀྲན་གྱིས་སྒྲོ་ནལ་ཁྲི་རམ་ཕུ་ལ་ཁ་པར་བཏང་ཞིང་། འཕུར་མདའ་དང་འབྲེལ་སྒྲོ་ནལ་ཁྲི་རམ་ཕུའི་བསམ་ཚུལ་ལ་འགྱུར་བ་བཏང་ཟིན་པ་དེ་ནི། རཱ་ཤི་ཡའི་གཞུང་གིས་ཝེ་ཀྲི་ཀོ་ཧྥི་ཡིས་སློབ་སྟོན་བྱས་པ་ལྟར་བསྒྲུབས་ཟིན་པ་ཞིག་ཡིན་པ་གསལ། ཕུ་ཀྲན་གྱིས་ཁ་པར་བཏང་བ་འདིས། སྐབས་དེར་ཛེ་ལན་སི་ཀེ་ཡིས་སྒྲོ་ནལ་ཁྲི་རམ་ཕུ་ལ་བཤད་པའི་སྐད་ཆ་ཚང་མ་ནུས་མེད་དུ་བཏང་ཟིན།
དམག་འཁྲུག་འགོ་བཙུགས་རྗེས་ནས། རྒྱལ་སྤྱིའི་ཉེས་ཆད་ཀྱི་རྐྱེན་པས་རཱ་ཤི་ཐོན་ཟོག་ཕྱིར་འཚོང་ལ་གནོད་པ་ཚབས་ཆེན་ཐེབས་ཤིང་། ད་ལྟ་རྒྱལ་ཁབ་ཀྱི་དཔལ་འབྱོར་ཡར་རྒྱས་སྒུལ་ཤུགས་གཙོ་བོ་དེ། རྒྱལ་ནང་གི་དམག་དོན་བཟོ་གྲྭ་དག་གྱུར་ཟིན་པ་ལྟར། ཧྥ་རན་སིའི་སྲིད་འཛིན་མཱ་ཁི་རོན་གྱིས། ད་ལྟ་རཱ་ཤི་ཡས་སློབ་གྲྭ་དང་སྨན་ཁང་སོགས། སྤྱི་དམངས་ཀྱི་དགོས་མཁོ་དག་འཛུགས་སྐྲུན་བྱེད་ཀྱི་མེད་ཅེས་བཤད། དེ་དང་ལྷན་ཧྥ་རན་སིའི་གཞུང་གིས། རཱ་ཤི་ཡའི་གསང་ཉུལ་བ་ཡིན་པའི་དོགས་གཞིའི་འོག་མི་ 4 བཟུང་ཟིན་པ་དང་། དེའི་ཁྲོད་ཡུ་ཁུ་རན་གྱི་མི་ཞིག་ཀྱང་ཡོད་པའི་གནས་ཚུལ་ཐོན།