ཕུ་ཀྲན་རྒྱ་གར་དུ་ཡོང་སྐབས། རཱ་ཤི་ཡས་རྒྱ་གར་ལ་དེང་རབས་འཐབ་འཛིང་གནམ་གྲུ་ Su-57 དང་། ཆེས་ཡར་ཐོན་གྱི་གནམ་སྲུང་མ་ལག་ S-500 འཚོང་རྒྱུའི་སྐོར་གླེང་རྒྱུ་ཡིན་པ། བྷི་ལུམ་བྷར་གྷི་སྟེང་གནས་ཚུལ་བཀོད།
ཟླ་བ་འདིའི་ཚེས་ 4 དང་ཚེས་ 5 ལ་རཱ་ཤི་ཡའི་སྲིད་འཛིན་ཕུ་ཀྲན། རྒྱ་གར་དུ་ཡོང་རྒྱུ་ཡིན་པ་ལྟར། སྐབས་དེར་རྒྱ་གར་དང་རཱ་ཤི་ཡའི་བར་གྲོས་མོལ་ཁྲོད། རཱ་ཤི་ཡས་རྒྱ་གར་ལ་དེང་རབས་འཐབ་འཛིང་གནམ་གྲུ་ Su-57 དང་། ཆེས་ཡར་ཐོན་གྱི་གནམ་སྲུང་མ་ལག་ S-500 འཚོང་རྒྱུའི་སྐོར་གླེང་རྒྱུ་ཡིན་པ། བྷི་ལུམ་བྷར་གྷི་སྟེང་གནས་ཚུལ་བཀོད།
རྒྱ་གར་དང་རཱ་ཤི་ཡ། རྒྱ་ནག་གསུམ་གྱི་འབྲེལ་བ་ནི་ཐབས་བྱུས་དགོས་མཁོའི་སྟེང་ལ་ཤུགས་ཆེན་གཞིར་བཞག་ཡོད་པ་ལ། རྒྱ་གར་དང་རཱ་ཤི་ཡ་གཉིས་ཀྱིས། རྒྱ་ནག་དང་ལྷན་ཡོད་པའི་རང་གི་འབྲེལ་བ་ཆ་སྙོམས་བཟོ་ཆེད་ཕན་ཚུན་བེད་སྤྱོད་བྱེད་བཞིན་པ་ཆེད་མཁས་པས་འདོད།
དམག་འཁྲུག་གི་རྐྱེན་པས་རཱ་ཤི་ཡའི་དཔལ་འབྱོར་དང་། རང་བྱུང་ཐོན་ཁུངས་ཕྱིར་འཚོང་གི་ཐད་ནས་རྒྱ་ནག་ལ་བརྟེན་ཚབས་ཧ་ཅང་ཆེ་བ་གང་ཞིག་ལ། དོན་དངོས་སུ་རྒྱ་ནག་དང་རཱ་ཤི་ཡ་གཉིས་བར་དམག་དོན་གྱི་ཐད་ནས་ཡིད་ཆེས་ཆོག་པའི་འབྲེལ་བ་གཏིང་ཟབ་ཅིག་ཀྱང་མེད།
དེ་བཞིན་རྒྱ་གར་གྱིས་ཀྱང་རང་གི་ཁྲོམ་རའི་དགོས་མཁོ་དང་། ནུབ་ཕྱོགས་ཀྱི་དཔལ་འབྱོར་གནོན་ཤུགས་ལ་གདོང་ལེན་ཆེད། རྒྱ་ནག་དང་ལྷན་འཚོང་འབྲེལ་ཡར་རྒྱས་གཏོང་རྒྱུ་ནི་ཟློག་ཏུ་མེད་པ་གང་ཞིག་ལ། འཕགས་བོད་ས་མཚམས་དང་འབྲེལ་བའི་རྩོད་རྙོག་དག་སྔར་བཞིན།པགས་པའི་འོག་གི་རྣག་ཁྲག་ལྟར་ཕྱིར་རྡོལ་མེད་པས། རྒྱ་ནག་དང་ལྷན་ཡོད་པའི་རང་གི་འབྲེལ་བ་ཆ་སྙོམས་བཟོ་ཆེད། རཱ་ཤི་ཡ་དང་ཨ་རི་ལྷན་གང་ཐུབ་ཀྱིས་འབྲེག་ཐག་ཉེ་བོ་བྱེད་བཞིན་པ་གསལ།