གལ་སྲིད་ཝེ་ནེ་ཛོ་ལའི་སྲིད་འཛིན་མཱ་རྡུ་རོ་སྲིད་སྟེགས་ནས་མ་བབས་ཚེ། ཨ་རིས་དྲག་ཤུགས་བཀོལ་ནས། ཁོ་སྲིད་སྟེགས་ནས་གཡུག་རྒྱུར་གྲ་སྒྲིག་བྱས་པའི་བརྡ་བཏང་ཟིན་པ་བཤད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། གནམ་གྲུ་ཚང་མ་དང་ཉལ་ཐ་འཚོང་མཁན་ཚང་མ། མི་ལྐོག་འདྲེན་དང་ལྐོག་འཚོང་མཁན་ཚང་མས། ད་ལྟ་ནས་ཝེ་ནེ་ཛོ་ལའི་མཁའ་དབྱིངས་སྒོ་བརྒྱབས་ཟིན་པ་ངོས་འཛིན་བྱ་རོགས་ཞེས་བཤད། སྒྲོ་ནལ་ཁྲི་རམ་ཕུས་ཉེན་བརྡ་འདི་བཏང་རྗེས། ཝེ་ནེ་ཛོ་ལ་རྒྱལ་ཁབ་ཀྱི་མཁའ་དབྱིངས་སུ་གནམ་གྲུ་འཕུར་མཁན་མེད་པར་གྱུར་ཅིང་། ཝེ་ནེ་ཛོ་ལའི་གཞུང་དང་ཀུ་པ་རྒྱལ་ཁབ་གཉིས་ཀྱིས། སྒྲོ་ནལ་ཁྲི་རམ་ཕུའི་སྐད་ཆ་འདིར་སྐྱོན་བརྗོད་བྱས་ཤིང་། འདི་ནི་རྒྱལ་ཁབ་རང་བཙན་པ་ཞིག་གི་མངའ་ཁོངས་བདག་དབང་ལ་རྡོག་རོལ་དང་། ས་ཁུལ་སྤྱིའི་བརྟན་ལྷིང་ལ་གནོད་པ་བསྐྱལ་བ་ཞིག་ཡིན་པ་བཤད།
ཝོལ་ སི་ཀྲི་རི་ཀྲི་གསར་དེབ་ལྟར་ན། གལ་སྲིད་ཝེ་ནེ་ཛོ་ལའི་སྲིད་འཛིན་མཱ་རྡུ་རོ་སྲིད་སྟེགས་ནས་མ་བབས་ཚེ། ཨ་རིས་དྲག་ཤུགས་བཀོལ་ནས། ཁོ་སྲིད་སྟེགས་ནས་གཡུག་རྒྱུར་གྲ་སྒྲིག་བྱས་པའི་བརྡ་བཏང་ཟིན་པ་བཤད། དེ་དང་ལྷན་ཝེ་ནེ་ཛོ་ལའི་དམག་དཔུང་དང་། སྲིད་འཛིན་མ་རྡུ་རོ་ཡི་རྒྱབ་སྐྱོར་བ་ཚོས། ཨ་རིའི་དམག་དཔུང་དང་ཐད་ཀར་གདོང་ཐུག་རྒྱག་མི་ཐུབ་པས། རོའུ་ཀྲར་གསར་ཤོག་ལྟར་ན། ཁོ་ཚོས་འཇབ་དམག་རྒྱག་ཐབས་སོགས་སྦྱོང་བརྡར་བྱེད་བཞིན་པ་བཤད། དེ་དང་ལྷན་ཝེ་ནེ་ཛོ་ལའི་གསང་བའི་ལས་ཁུངས་དང་། དམག་མི་ཚོས་རྒྱལ་སར་རྙོག་ཟིང་བསླངས་ནས། མི་སེམས་ལ་འཇིགས་སྣང་སྐུལ་རྒྱུར་གསང་བའི་ཐབས་བྱུས་འཐེན་བཞིན་པའི་གནས་ཚུལ་ཐོན།
གཞན་ཡང་བདུན་ཕྲག་སྔོན་མར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཝེ་ནེ་ཛོ་ལའི་སྲིད་འཛིན་དང་ལྷན་ཁ་པར་བརྒྱུད་གླེང་མོལ་བྱས་ཟིན་པ་གཏན་འཁེལ། གལ་སྲིད་མཱ་རྡུ་རོ་སྲིད་སྟེགས་ནས་དང་བླང་གིས་བབས་ཚེ། ཁོ་དང་ཁོའི་བཟའ་ཟླ། བུ་བཅས་བདེ་འཇགས་ངང་དེ་མ་ཐག་འགྲོ་རུ་འཇུག་ཆོག་ཅེས་ཨ་རིས་བཤད་པར། སྲིད་འཛིན་མཱ་རྡུ་རོ་ཡིས་དེ་ཁས་མ་བླངས་པས་གྲོས་མོལ་ལམ་དུ་མ་སོང་བ་བཤད། ཨ་རིའི་གྲོས་ཚོགས་གོང་མའི་མང་གཙོ་ཚོགས་པའི་འཐུས་མི། ཅེག་ཁི་ཤུ་མར་གྱིས། སྒྲོ་ནལ་ཁྲི་རམ་ཕུའི་བྱེད་སྟངས་འདིས། སླར་ཡང་ཨ་རི་འགྲོ་གྲོན་ཆེ་བའི་དམག་འཁྲུག་ཅིག་དང་་ཁ་ཐག་ཉེ་རུ་གཏོང་བཞིན་འདུག་ཅེས་བཤད།
ད་དུང་ཁོས། དམག་འཁྲུག་རྒྱག་རྒྱུར་གསལ་བསྒྲགས་བྱས་པའི་དབང་ཆ་དེ་གྲོས་ཚོགས་ཁོ་ནར་ཡོད་པ་ལས། སྲིད་འཛིན་ལ་མེད་པ་རྩ་ཁྲིམས་སུ་བཀོད་ཡོད། ད་ལྟ་བར་གྲོས་ཚོགས་ཀྱིས་ཨ་རིས་ཝེ་ནེ་ཛོ་ལ་དང་ལྷན་དམག་འཁྲུག་རྒྱག་རྒྱུའི་ཆོག་མཆན་སྤྲད་མེད། མི་རྒྱུ་གཉིས་ཀྱི་འགྲོ་གྲོན་ཆེ་བའི་དམག་འཁྲུག་རྫོགས་རྒྱུ་མེད་པ་དེ་དག་ལ་ཨ་རི་བ་རྣམས་ཡིད་ཐང་ཆད་ཡོད། འདི་ནི་ཨ་རི་དང་པོ་འཇོག་པའི་སྲིད་བྱུས་ཤིག་མ་རེད། ད་ལྟ་སྤྱི་མཐུན་ཚོགས་པ་དང་། མང་གཙོ་ཚོགས་པའི་འཐུས་མི་ཚོས་མཐུན་སྒྲིལ་གྱིས། དམག་འཁྲུག་རྒྱག་རྒྱུའི་དབང་ཆ་དེ་ཕྱིར་མི་དམངས་ལ་སྤྲོད་དགོས་པ་རེད་ཅེས་བཤད།
ཨ་རིའི་དམག་དཔུང་དང་གྲུ་གཟིངས་མང་པོ་ཝེ་ནེ་ཛོ་ལའི་ཐག་ཉེ་དང་། ཁཱ་རེ་བྷེ་ཡན་མཚོ་རྒྱུད་དུ་སྤུངས་ཟིན་ཅིང་། ད་ལྟ་བར་ནག་ཚོགས་ཀྱི་ཡིན་པར་བཤད་པའི་གྲུ་གཟིངས་མང་པོ་གཏོར་ཅིང་། དེའི་ཁྲོད་མི་ 80 ཡས་མས་བསད་ཟིན་པ་ཚོད་རྩིས་བྱས། ཝ་ཤིན་ཀྲོན་གསར་ཤོག་གིས་གནས་ཚུལ་བཀོད་པ་ལྟར་ན། ད་ལོའི་ཕྱི་ཟླ་ 9 ཚེས་ 2 ཉིན་ཨ་རིའི་དམག་དཔུང་གིས་གྲུ་གཟིངས་ཤིག་ལ་གཏོར་རྒོལ་སྐབས་གསོན་པོ་གཉིས་ལྷག་ཡོད་པ་ལ། དམག་འཁྲུག་ལྷན་ཁང་གི་དྲུང་ཆེ་ཕེ་ཀྲི་ཧག་སེ་ཐི་ཡིས། {ཚང་མ་སོད་ཅིག་}ཅེས་བཀའ་བཏང་རྐྱེན་ཚང་མ་བསད་ཟིན་པའི་གནས་ཚུལ་ཐོན་ཅིང་། ད་ལྟ་གནས་ཚུལ་འདི་ཆེ་རུ་ཕྱིན། ཨ་རིའི་གྲོས་ཚོགས་འཐུས་མི་ཚོས་ཀྱང་འདིའི་ཐད་དོགས་འདྲི་བྱེད་འགོ་བཙུགས་ཤིང་། འདི་ལ་འགྲེལ་བཤད་ཁ་གསལ་དགོས་པ་བཤད། འདིའི་ཁྲོད་སྤྱི་མཐུན་ཚོགས་པའི་འཐུས་མི་ཚོའང་ཚུད།