ད་ལོའི་ཕྱི་ཟླ་ 1 ནས་ཕྱི་ཟླ་ 9 བར་རཱ་ཤི་ཡའི་རྡོ་སྣུམ་དང་རླངས་རྫས་ཁེ་གཉེར་ཆེ་ཤོས་གཉིས་པ། རོ་སི་ནེ་ཧྥི་ཀྲི་(Rosneft)ཡི་ཚོང་ཁེ་བརྒྱ་ཆ་ 70% མར་ཆག་ཟིན་པ། རོའུ་ཀྲར་གསར་ཤོག་གིས་གནས་ཚུལ་བཀོད།
•. རཱ་དམག་གིས། ཡུ་ཁུ་རན་གྱི་རྫ་པུ་རི་ཆི་ས་ཁུལ་དུ་ཡུ་དམག་གི་འགོག་སྲུང་ས་དོང་གཙོ་བོ་གཏོར་ཟིན་པ་བཤད་ཀྱང་། ད་ལྟ་བར་སྐད་ཆ་དེ་བདེན་པ་ཡིན་པའི་རྟགས་མ་ཐོན་ལ། དེ་བཞིན་རྡོ་ཉད་སི་ཀི་ས་ཁུལ་དུའང་ཡུ་དམག་གིས་མུ་མཐུད་དུ། ཕོ་ཁི་རོ་ཝི་སི་ཀི་གྲོང་ཁྱེར་གྱི་ཆ་ཤས་ཤིག་དང་། མེར་ནེ་གྷི་ར་ཀྲི་གྲོང་བརྡལ་གྱི་ཆ་ཤས་ཆེན་པོ་ཞིག་བཟུང་ནས་བསྡད་ཡོད་པ་དང་། རཱ་དམག་གི་ཚུར་རྒོལ་རེ་ཞིག་དལ་དུ་ཕྱིན། ཡུ་དམག་གིས། སྒྲི་ནེ་པུར་ས་ཁུལ་གྱི་གྲོང་གསེབ་ཨི་ཝ་ནེ་ཝི་ཀ་(Ivanivka)ཞེས་པ་ཕྱིར་འཕྲོག་ཅིང་། དེའི་ཁྲོད་རཱ་དམག་སྐོར་ཞིག་གསོན་བཟུང་ཡང་བྱས།
•. ཡུ་དམག་གིས། ཀ་སི་པེན་མཚོའི་རྡོ་སྣུམ་ལྕགས་སྦུག་ལ་སྒྲི་རོན་གྱིས་གཏོར་རྒོལ་བྱས། རྡོ་སྣུམ་ལྕགས་སྦུག་རིང་པོ་(Caspian Pipeline)འདི་ནི། ཁཱ་ཛི་ཀི་སི་ཐན་ནས་མཚོ་ནག་གི་རྒྱུད་ཀྱི་རཱ་ཤི་ཡའི་རྡོ་སྣུམ་གྲུ་ཁ་ཆེན་མོ། ནོ་ལོ་རོ་སེ་སི་ཀེ་ལ་འཐེན་ཡོད་པ་ཞིག་དང་། འདི་ནི་འཛམ་གླིང་གི་རྡོ་སྣུམ་ལྕགས་སྦུག་རིང་ཤོས་ཤིག་དང་། རྒྱལ་སྤྱིའི་རྡོ་སྣུམ་བརྒྱ་ཆ་ 1% འདི་ནས་ཡོང་བཞིན་པ་གསལ། དེ་མ་ཟད་ཁཱ་ཛ་ཀི་སི་ཐན་གྱིས་རྡོ་སྣུམ་ཕྱིར་འཚོང་བཞིན་པའི་བརྒྱ་ཆ་ཕལ་ཆེ་བ་འདི་ནས་ཡོང་བཞིན་པ་བཤད།
•. གཏོར་རྒོལ་འདིའི་རྗེས་སུ། ཁཱ་ཛ་ཀི་སི་ཐན་གྱིས་ཁོ་ཚོས་ལྕགས་སྦུག་འདི་བཞག་ནས། བརྒྱུད་ལམ་གཞན་པ་ཞིག་བརྒྱུད་རྡོ་སྣུམ་གཏོང་རྒྱུ་ཡིན་པ་བསྒྲགས། ད་དུང་ཁོ་ཚོས་ཡུ་ཁུ་རན་ལ་སྐྱོན་བརྗོད་བྱས། རྡོ་སྣུམ་ལྕགས་སྦུག་འདི་ནས། རཱ་ཤི་ཡ་མ་ཟད་ཡུ་རོབ་ལའང་ལོ་རེར་རྡོ་སྣུ་ཏུན་ས་ཡ་ 60 རེ་འདྲེན་བཞིན་པ་གསལ། གཞན་ཡང་ཡུ་དམག་གིས་བདུན་ཕྲག་སྔོན་མར། རཱ་ཤི་ཡའི་རྡོ་སྣུམ་གྲུ་གཟིངས་ 2 ལ་གཏོར་རྒོལ་བྱས་ཟིན་པ་ལྟར། འདི་གཉིས་ལས་གཅིག་ལ་གཏོར་རྒོལ་ཐེངས་གཉིས་ཐེབས།
•. བདུན་ཕྲག་སྔོན་མར་གྲུ་གཟིངས་གསུམ་པ་ཞིག་ལ་གཏོར་རྒོལ་ཐེབས་པའི་གནས་ཚུལ་ཐོན་ནའང་། དེ་བདེན་པ་མ་ཡིན་པ་གསལ། གཞན་ཡང་རཱ་ཤི་ཡའི་རྡོ་སྣུམ་གྲུ་ཁ་ནོ་ཝོ་རོ་སེ་སི་ཀེ་སོགས་སུ་ཡང་ཡང་ཡོང་བཞིན་པ། རཱ་ཤི་ཡའི་རྡོ་སྣུམ་འདྲེན་བྱེད་གྲུ་གཟིངས་ཆེན་མོ་(M/T Mersin)
ཞེས་པའང་། མཚོ་ནག་གི་ནང་དུ་ནུབ་བཞིན་པའི་གནས་ཚུལ་ཐོན། གྲུ་གཟིངས་འདི་ཨ་ཧྥེ་རི་ཀའི་ཕྱོགས་སུ་འགྲོ་བཞིན་པ་ལ། ཉེ་དུས་ནས་མཚོ་ཐོག་ཏུ་ལྷག་ཡོད་པའི་པར་སོགས་ཕྱིར་ཐོན། འདིའི་རྒྱུ་རྐྱེན་གང་ཡིན་རེ་ཞིག་མི་གསལ།
•. ལོ་སྔོན་མའི་དུས་ཡུན་གཅིག་པ་དང་བསྡུར་ན། ད་ལོའི་ཕྱི་ཟླ་ 1 ནས་ཕྱི་ཟླ་ 9 བར་རཱ་ཤི་ཡའི་རྡོ་སྣུམ་དང་རླངས་རྫས་ཁེ་གཉེར་ཆེ་ཤོས་གཉིས་པ། རོ་སི་ནེ་ཧྥི་ཀྲི་(Rosneft)ཡི་ཚོང་ཁེ་བརྒྱ་ཆ་ 70% མར་ཆག་ཟིན་པ། རོའུ་ཀྲར་གསར་ཤོག་གིས་གནས་ཚུལ་བཀོད། ཁེ་གཉེར་འདི་ནི་ཕུ་ཀྲན་གྱིས་མུ་མཐུད་དུ་དམག་འཁྲུག་རྒྱག་ཐུབ་པའི་དཔལ་འབྱོར་གྱི་རྒྱབ་རྟེན་ཆེ་ཤོས་ཤིག་དང་། ད་ལོར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། རཱ་ཤི་ཡའི་རྡོ་སྣུམ་དང་རླངས་རྫས་ཁེ་གཉེར་ཆེ་ཤོས་ལུ་ཀོལ་(Lukoil)དང་། རོ་སི་ནེ་ཧྥི་ཀྲི་གཉིས་ཀྱི་སྟེང་ཉེས་ཆད་བཀལ་བས། རྒྱ་གར་སོགས་ཀྱི་ཁེ་གཉེར་ཤོས་ཤིག་གིས་འདི་ནས་རྡོ་སྣུམ་ཉོ་མཚམས་བཞག
•. བདུན་ཕྲག་སྔོན་མར་ཡུ་ཁུ་རན་གྱི་སྲིད་འཛིན་ལས་ཁུངས་ཀྱི་ཆེས་མཐོའི་ལས་བྱེད། ཨན་རྡི་རེ་ཡེར་མག་(Yermak)གིས་ལྐོག་ཟའི་གནད་དོན་དང་འབྲེལ་དགོངས་པ་ཞུས་ཟིན་པ་ལྟར། ཛེ་ལན་སི་ཀེ་ཡིས། ཨ་རི་དང་གྲོས་མོལ་བྱེད་མཁན་གྱི་འགོ་འཁྲིད་མཁན་ཁོའི་ཚབ་ཏུ། བདེ་སྲུང་བློན་ཆེན་ཨུ་མེ་རོ་ཝི་བསྐོས་ཤིང་། ཁ་སང་ཨུ་མེ་རོ་ཝི་ཡིས་འགོ་འཁྲིད་པའི་ཡུ་ཁུ་རན་གྱི་སྐུ་ཚབ་ཚོགས་པ་ཞིག ཨ་རིའི་ཧྥི་ལོ་ར་སྒྲ་མངའ་སྡེའི་མཱ་ཡ་མེ་གྲོང་ཁྱེར་དུ་སླེབས། ཨ་རིའི་ཕྱོགས་ནས་རྒྱལ་སྲིད་དྲུང་ཆེ་མར་ཀོ་རུ་བྷེའོ་དང་། སྲིད་འཛིན་གྱི་སྐུ་ཚབ་ཝེ་ཀྲི་ཀོ་ཧྥི། སྒྲོ་ནལ་ཁྲི་རམ་ཕུའི་བུ་མོའི་ཁྱོ་ག་ཁུ་ཤེ་ནེ་བཅས་ཞུགས།
•. ཁོ་ཚོས། ཉེ་དུས་སུད་སིར་འགྱུར་བ་བཏང་ཟིན་པའི་ཡིག་ཆ་དོན་ཚན་ 28 ཅན་དེའི་སྐོར་གླེང་མོལ་བྱས་ཤིང་། གྲོས་མོལ་གྱི་རྗེས་སུ་རྒྱལ་སྲིད་དྲུང་ཆེ་མར་ཀོ་རུ་བྷེའོ་ཡིས། དམག་འཁྲུག་མཚམས་འཇོག་རྒྱུ་ཙམ་ཞིག་མ་ཡིན་པར། ང་ཚོས་ཡུ་ཁུ་རན་ལ་ཡང་བསྐྱར་ནམ་ཡང་བཙན་འཛུལ་མི་བྱ་རྒྱུ་དང་། ཡུ་ཁུ་རན་འབྱོར་ཕྱུག་གི་ལམ་དུ་བསྐྱོད་ཐུབ་པའི་ལམ་ཀ་ཞིག་འཚོལ་བཞིན་ཡོད་ཅེས་བཤད། ཡུ་ཁུ་རན་གྱི་སྐུ་ཚབ་ཀྱིས། གྲོས་མོལ་ཧ་ཅང་ཁག་པོ་བྱུང་། གྲུབ་འབྲས་དང་ཡར་རྒྱས་འདུག་ཀྱང་མུ་མཐུད་དུ་ལས་ཀ་བྱེད་དགོས་འདུག་ཅེས་བཤད། ཝེ་ཀྲི་ཀོ་ཧྥི་དང་ཁུ་ཤེ་ནེ་གཉིས་དེ་རིང་དང་། སང་ཉིན་གང་རུང་ལ་རཱ་ཤི་ཡར་འགྲོ་རྒྱུ་ཡིན་པ་གསལ། དེ་དང་ལྷན་ཛེ་ལན་སི་ཀེ་དེ་རིང་ཧྥ་རན་སིར་སླེབས།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཡུ་ཁུ་རན་ལ་དཀའ་ངལ་ཆེན་པོ་འདུག ཁོ་ཚོར་ལྐོག་ཟའི་དཀའ་ངལ་འདི་ནི་ཕན་ཐོགས་ཅན་ཞིག་མ་རེད། ཡིན་ན་ཡང་། ང་ཚོས་གྲོས་མཐུན་འཇོག་ཐུབ་པའི་གོ་སྐབས་འདུག་ཅེས་བཤད། ཝ་ཤིན་ཀྲོན་གསར་ཤོག་ལྟར་ན། དམག་འཁྲུག་མཚམས་འཇོག་ཐབས་དང་འབྲེལ། བདུན་ཕྲག་འདིར་ཨ་རིས་ཡུ་ཁུ་རན་གྱི་སྟེང་གནོན་ཤུགས་ཆེ་རུ་གཏོང་རྒྱུ་ཡིན་པ་བཤད་ཅིང་།འདི་ནི་ཏག་ཏག་ལྐོག་ཟའི་གནད་དོན་གྱི་རྐྱེན་པས། ཛེ་ལན་སི་ཀེའི་གཞུང་ཉམ་ང་བ་གྱུར་ཡོད་པ་འདི། ཨ་རིས་གོ་སྐབས་སུ་བཟུང་བ་ཞིག་ཏུ་གྱུར།
•. ཡིན་ན་ཡང་། འགག་རྩའི་གནད་དོན་དག་ནི་སྔར་བཞིན་ལྷག་ཡོད་པ་སྟེ། ཕུ་ཀྲན་གྱིས་ཁོ་ལ་རྡོན་པ་སི་ས་ཁུལ་ཧྲིལ་བོ་སྤྲོད་དགོས་པ་དང་། ཡུ་དམག་གི་གྲངས་བསྙུང་རྒྱུ། ཡུ་ཁུ་རན་ནམ་ཡང་ནུབ་ཆིངས་ནང་མི་ཞུགས་རྒྱུ་བཅས་ཀྱི་དགོས་འདུག་དག་མུ་མཐུད་དུ་འདོན་བཞིན་པ་ལ། ཡུ་ཁུ་རན་གྱིས་རང་གི་ས་ཆ་དང་བླང་གིས་ཕུ་ཀྲན་ལ་ལེགས་སྐྱེས་ལྟར་སྤྲོད་རྒྱུ་མིན་ཞེས་བཤད་ཅིང་། ཨེན་བྷི་སི་གསར་ཁང་གིས་གཡུལ་སའི་ཡུ་དམག་ལ་སྐད་ཆ་དྲིས་པར། གཡུལ་སའི་དམག་སྤྱི་ཚོས། ཞི་བདེ་འདོད་མཁན་ནི་ང་ཚོས་ལྷག་ཅིག་མེད་ཀྱང་། གཞུང་གིས་བཀའ་བབས་ཀྱང་། ང་ཚོས་རྡོན་པ་སི་ས་ཁུལ་ནས་དམག་མི་ཕྱིར་འཐེན་རྒྱུ་མིན་ཞེས་བཤད།
•. ད་དུང་དམག་མི་ཚོས། སྒྲོ་ནལ་ཁྲི་རམ་ཕུའི་འཆར་གཞི་འདི་འགོ་འདོག་རྒྱུ་དེ་རེད། ང་ཚོའི་ས་ཆ་ནི་འཚོང་རྒྱུ་ཞིག་མ་རེད་ལ་འདི་ནི་ང་ཚོའི་ས་ཆ་རེད་ཅེས་བཤད། དོན་དངོས་སུ་ད་ལྟའི་གཡུལ་སའི་གནས་སྟངས་གཞིར་བཞག་ནས་ཚོད་རྩིས་ལྟར་ན། རཱ་དམག་གིས་རྡོན་པ་སི་ས་ཁུལ་ཧྲིལ་བོ་ལེན་རྒྱུར་ད་དུང་ལོ་ 2 ཡས་མས་འགོར་རྒྱུ་ཡིན་པ། ཨ་རིའི་དམག་དོན་ཞིབ་འཇུག་ཚོགས་པ་ཞིག་གིས་བཤད། རྡོན་པ་སི་ས་ཁུལ་དུ་ཡུ་ཁུ་རན་གྱི་གྲོང་དང་གྲོང་བརྡལ་མང་པོ་ཡོད་པ་ལ། ཡུ་དམག་གི་ཤར་ལྷོའི་འགོག་སྲུང་ས་ཚུགས་བཙན་ཤོས་དག་ཡོད་པ་གསལ། དེར་བརྟེན་དོན་དངོས་སུ་ཕུ་ཀྲན་གྱིས། ད་ལྟ་གཙོ་བོ་ཨ་རིའི་དཔལ་འབྱོར་ཉེས་ཆད་དག་ཕྱིར་འཐེན་དུ་འཇུག་རྒྱུ་དེ་དམིགས་ཡུལ་དུ་བཟུང་ཡོད་པ་ཚོད་དཔག་བྱེད།
•. རཱ་ཤི་ཡའི་སྲིད་འཛིན་ཕུ་ཀྲན་གྱིས། ལོ་རྗེས་མའི་རཱ་ཤི་ཡའི་གཞུང་གི་འགྲོ་གྲོན་མ་དངུལ་སྔོན་རྩིས་ལ་ཆོག་མཆན་སྤྲད། དེ་ལྟར་ན་ལོ་རྗེས་མའི་འགྲོ་གྲོན་མ་དངུལ་གྱི་གསུམ་ཆ་གཅིག་གམ། ཨ་སྒོར་ཐེར་འབུམ་ $166 དམག་དོན་དང་བདེ་སྲུང་གི་ཕྱིར་གཏོང་རྒྱུ་ཡིན་པ་བཀོད། སྤྱིའི་ཆ་ནས་ག་ལེར་རཱ་ཤི་ཡའི་དཔལ་འབྱོར་དེ་་དཀའ་ངལ་གྱི་གཏིང་དུ་གཏིང་དུ་ཏུ་ཟག་བཞིན་པ་དང་། ལྷག་པར་ཕུགས་རྒྱང་གི་ཆ་ནས་རཱ་ཤི་ཡའི་དཔལ་འབྱོར་ཉམ་རྒུད་དུ་འགྲོ་རྒྱུ་ཡིན་པ། ཆེད་མཁས་པས་ཚོད་དཔག་བྱས་ཀྱང་། ལོ་རྗེས་མར་མུ་མཐུད་དུ་ད་ལྟ་ལྟར་ཕུ་ཀྲན་གྱིས་དམག་འཁྲུག་རྒྱག་ཐུབ་པ་གསལ་བོར་གྱུར།
•. ཡུ་ཁུ་རན་གྱི་སྲིད་འཛིན་ཛེ་ལན་སི་ཀེ་ཡིས། ཡུ་ཁུ་རན་གྱི་བདེ་སྲུང་ཡིག་ཆའི་སྙིང་པོ་དག་ལ་བསྒྱུར་བཅོས་བྱ་རྒྱུ་ཡིན་པ་བསྒྲགས། ཁོས།འདིའི་ཁྲོད་དུ་རྒྱལ་སྲུང་འཆར་གཞི་དང་གཡུལ་སའི་ཉམས་མྱོང་སོགས་ཚུད་རྒྱུ་དང་། གཡུལ་སའི་དམག་གི་སྒྲིག་འཛུགས་ལ་འགྱུར་བ་གཏོང་རྒྱུ་ཡིན་པ་བཤད། ཡུ་ཁུ་རན་ནི་སྔར་ཨུ་རུ་སུ་དམར་པོའི་ཆ་ཤས་ཡིན་པས།དམག་དོན་ཡིག་ཆ་དག་ལ་ཨུ་རུ་སུའི་དམག་དོན་ལམ་ལུགས་ཀྱིས་ཤུགས་རྐྱེན་ཆེ་ཞིང་། འདི་ཉིད་བཅོས་བསྒྱུར་གྱིས་ནུབ་ཕྱོགས་ཀྱི་དམག་དོན་ལམ་ལུགས་ལྟར་བསྒྱུར་རྒྱུར་སྔར་ནས་བསམས་ཚུལ་ཤུགས་ཆེན་ཡོད་པ་གསལ།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་གཞུང་གིས། ཡུ་རོབ་ཀྱི་བདེ་སྲུང་དང་རཱ་ཤི་ཡ་དང་འབྲེལ། སྲིད་བྱུས་ལ་འགྱུར་བ་ཤུགས་ཆེན་གཏོང་བཞིན་པས། འབྱུང་འགྱུར་ཡུ་རོབ་དང་རཱ་ཤི་ཡ་ཐད་ཀར་གདོང་ཐུག་བྱུང་ཚེ། ཁོས་ཡུ་རོབ་ལ་རོགས་རམ་ཚད་གཞི་གང་འདྲ་ཞིག་བྱའམ་ཞེས་པ་དེ་དྲི་བ་ཆེན་པོ་ཞིག་ཏུ་གྱུར་ཡོད་པ་ལྟར། ད་ལྟ་ཡུ་རོབ་ཀྱིས། ཨ་རི་མེད་པའི་དམག་འཁྲུག་ཅིག་ལ་གྲ་སྒྲིག་ཆེད་སྦྱོང་བརྡར་བྱེད་བཞིན་པའི་གནས་ཚུལ་ཐོན། དེའི་དཔེ་མཚོན་ཞིག་ནི་རོ་མ་ནེ་ཡ་རྒྱལ་ཁབ་ཏུ་ཧྥ་རན་སིའི་དམག་མིས་འགོ་འཁྲིད་པའི་དམག་སྦྱོང་ཞིག་བྱེད་བཞིན་པ་དེ་གྱུར།