ཕུ་ཀྲན་གྱིས་རཱ་ཤི་ཡ་ལ་ཡུ་རོབ་དང་ལྷན་དམག་འཁྲུག་རྒྱག་འདོད་མེད། གལ་སྲིད་ཡུ་རོབ་ཀྱིས་གློ་བུར་དུ་དམག་འཁྲུག་རྒྱག་འདོད་ན། རཱ་ཤི་ཡའི་ངོས་ནས་ད་ལྟ་རང་ཡུ་རོབ་ལྷན་དམག་འཁྲུག་རྒྱག་རྒྱུའི་གྲ་སྒྲིག་ཡོད།
•. རཱ་དམག་གིས། ཡུ་ཁུ་རན་གྱི་རྫ་པུ་རི་ཆི་ས་ཁུལ་གྱི་གཡུལ་སའི་འགོག་སྲུང་གཏོར་ཟིན་ཅེས་ཡང་བསྐྱར་བསྒྲགས་ཤིང་། ཡུལ་འདིར་གྲོང་གསེབ་ཅིག་འཕྲོག་ཟིན་པ་དང་། ད་ལྟ་གྲོང་ཁྱེར་ཆུང་ངུ་གྷུ་ལེ་ཕོ་ལེ་(Gulyaipole)ཞེས་པའི་ཕྱོགས་སུ་མདུན་བསྐྱོད་བྱ་རྒྱུའི་ལམ་ཀ་ཕྱེ་ཟིན་པ་བཤད། ཕུ་ཀྲན་གྱིས། རཱ་དམག་གིས་ཡུ་ཁུ་རན་གྱི་ཕོ་ཁི་རོ་ཝི་སི་ཀི་གྲོང་ཁྱེར་འཕྲོག་ཟིན་ཅེས་ཡང་བསྐྱར་བཤད་ཅིང་། ཁོས། འདི་ལ་ཐེ་ཚོམ་ཟ་མཁན་ཡོད་ཚེ། ང་ཚོས་རང་དབང་གསར་འགོད་པ་འགྲོ་རུ་འཇུག་ཆོག་ཅེས་བཤད།
•. ཡུ་དམག་གིས། རཱ་ཤི་ཡའི་ཨོར་ཡོལ་ས་ཁུལ་གྱི་རྡོ་སྣུམ་མཛོད་ཁང་ཞིག་དང་། ཏམ་བྷུ་ཝི་ས་ཁུལ་(Tambov)གྱི་རྡོ་སྣུམ་མཛོད་ཁང་ཞིག་ལ་གཏོར་རྒོལ་བྱས། རྡོ་ཉད་སི་ཀི་ས་ཁུལ་དུ་རཱ་དམག་གི་གནམ་སྲུང་མ་ལག་S-300V ཅིག་དང་། རིན་ཐང་ཆེ་བའི་འོད་རླབས་མ་ལག་
Niobiy-SV ཞིག་བཅས་ལ་གཏོར་རྒོལ་བྱས་ཟིན་པ་བཤད། དེ་བཞིན་ཡུ་དམག་གིས་ཡང་བསྐྱར། རཱ་ཤི་ཡ་ནས་ཡུ་རོབ་ཏུ་འཐེན་པའི་རྡོ་སྣུམ་ལྕགས་སྦུག་(Druzhba)ལ་གཏོར་རྒོལ་བྱས།
•. ཡུ་རོབ་རྒྱལ་ཁབ་ཚོས། ཁོ་ཚོའི་དངུལ་ཁང་དག་ཏུ་བཀག་ཡོད་པའི་རཱ་ཤི་ཡའི་དངུལ་སྒོར། ཨ་སྒོར་ཐེར་འབུམ་ €140 དེ་ཡུ་ཁུ་རན་ལ་རོགས་སྐྱོར་ཆེད་གཏོང་རྒྱུའི་ཤུགས་ཆེན་བཞིན་པ་ལྟར། ཡུ་རོབ་མཉམ་འབྲེལ་གྱི་དབུས་དངུལ་ཁང་གིས། བསམ་ཚུལ་འདི་ཁས་ལེན་རྒྱུ་མིན་ཞེས་བཤད་ཟིན་པའི་གནས་ཚུལ་ཐོན། ལྷག་པར་དངུལ་སྒོར་ཕལ་ཆེ་བ་སྦེལ་རྗམ་གྱི་དངུལ་ཁང་དག་ཏུ་བཀག་ཡོད་རྐྱེན། འབྱུང་འགྱུར་ཁྲིམས་དང་དཔལ་འབྱོར་གྱི་ཉེན་ཁར་དོགས་ནས། འཆར་གཞི་འདི་ད་ལྟ་བར་ཁས་མ་བླངས།
•. པོ་ལི་ཀྲི་ཀོ་གསར་ཤོག་ལྟར་ན། ཨ་རིས་ནུབ་ཕྱོགས་ཀྱི་དངུལ་ཁང་དག་ཏུ་བཀག་ཡོད་པའི་རཱ་ཤི་ཡའི་དངུལ་སྒོར་དེ། རཱ་ཤི་ཡ་དང་ལྷན་གྲོས་མོལ་ཡོང་ཕྱིར་རཱ་ཤི་ཡར་སྤྲོད་འདོད་ཡོད་པའི་གནས་ཚུལ་བཀོད།ད་ལྟ་བར་རཱ་ཤི་ཡས། ཁོ་ཚོའི་དངུལ་སྒོར་དག་ཡུ་ཁུ་རན་ལ་སྤྲད་ཚེ་དེ་ནི་རྐུན་ཇག་གི་ལས་ཀ་རེད་ཅེས་ཤོད་བཞིན་པ་ལས། ཁོ་ཚོར་ཕྱིར་སྤྲོད་དགོས་པའི་ཐད་སྐད་ཆ་བཤད་མྱོང་མེད་ཀྱང་། ད་ལྟ་ཁོ་ཚོས་ཨ་རི་ལ་དངུལ་སྒོར་འདི་ཕྱིར་སྤྲོད་དགོས་ཞེས་དགོས་འདུན་དངོས་སུ་འདོན་བཞིན་པ་མ་ཟད། དངུལ་སྒོར་འདིའང་གྲོས་མོལ་གྱི་བརྗོད་གཞིའི་ཁྲོད་བཅུག་ཟིན་པ་གསལ་བོར་གྱུར།
•. ནུབ་ཆིངས་དམག་དོན་དྲུང་ཆེ་མར་ཁི་རུ་ཀྲད་ཀྱིས། ལོ་རྗེས་མ་ནས་ནུབ་ཆིངས་ཀྱིས། ཟླ་བ་རེར་ཡུ་ཁུ་རན་ལ་དམག་དོན་རོགས་སྐྱོར་ཆེད་ཨ་སྒོར་ཐེར་འབུམ་ $1 རེ་གཏོང་རྒྱུའི་འཆར་གཞི་སྒྲིག་བཞིན་པ་བཤད། དེ་དང་ལྷན་རཱ་ཤི་ཡའི་སྲིད་འཛིན་ཕུ་ཀྲན་གྱིས། ཡུ་རོབ་ཀྱི་དམིགས་ཡུལ་གཅིག་བུ་ནི། སྒྲོ་ནལ་ཁྲི་རམ་ཕུས་གྲོས་མོལ་བརྒྱུད་དམག་མཚམས་འཇོག་ཏུ་འཇུག་རྒྱུར་འགལ་རྐྱེན་བཟོ་རྒྱུ་དེ་རེད། ཡུ་རོབ་ཀྱི་དབུ་ཁྲིད་ཚོ་ནི་དམག་འཁྲུག་ལ་དགའ་མཁན་འབའ་ཞིག་ལས། ཞི་བདེའི་སྐོར་གང་ཡང་གླེང་གི་མེད་ཅེས་བཤད།
•. རཱ་ཤི་ཡ་ལ་ཡུ་རོབ་དང་ལྷན་དམག་འཁྲུག་རྒྱག་འདོད་མེད། གལ་སྲིད་ཡུ་རོབ་ཀྱིས་གློ་བུར་དུ་དམག་འཁྲུག་རྒྱག་འདོད་ན། རཱ་ཤི་ཡའི་ངོས་ནས་ད་ལྟ་རང་ཡུ་རོབ་ལྷན་དམག་འཁྲུག་རྒྱག་རྒྱུའི་གྲ་སྒྲིག་ཡོད།
སྐབས་དེར་གྲོས་མོལ་བྱེད་ས་ཞིག་སུའང་མེད་པ་འགྱུར་ངེས་ཡིན་ཞེས་བཤད། ཕུ་ཀྲན་གྱིས། རཱ་དམག་གིས་ཡུ་ཁུ་རན་གྱི་ཀུ་པན་སི་ཀི་གྲོང་བརྡལ་བཟུང་ཟིན་ཅེས་བཤད་པར། ཛེ་ལན་སི་ཀེ་ཡིས། གྲོང་བརྡལ་འདི་སྔར་བཞིན་ཡུ་དམག་གིས་བཟུང་ཡོད་ཅེས་བཤད། དེའི་ལན་དུ་ཕུ་ཀྲན་གྱིས། གལ་སྲིད་ཁྱེད་རང་སྒོར་མོ་སློང་ཆེད་འགྲུལ་བསྐྱོད་མང་པོ་བྱས་ཚེ། གཡུལ་སའི་གནས་སྟངས་དུས་ལྟར་ཤེས་རྒྱུ་ཁག་པོ་རེད་ཅེས་བཤད།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ། སྒྲི་མེ་ཀྲི་རེ་ཝི་གཉིས་ཀྱིས་བཟོས་ཟིན་པའི་ཡིག་ཆ། དོན་ཚན་ 28 ཅན་དེར་སྐྱོན་བརྗོད་མང་པོ་འཕོག་མཐར། ཨ་རི་དང་ཡུ་ཁུ་རན་གྱི་སྐུ་ཚབ་མཉམ་འཛོམས་ཀྱིས་ཡིག་ཆ་འདིར་འགྱུར་བ་བཏང་། ཁ་སང་འགྱུར་བ་བཏང་ཟིན་པའི་ཡིག་ཆ་འདི་འཁྱེར་ནས། སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་སྒྲོ་ནལ་ཁྲི་རམ་ཕུའི་བུ་མོའི་ཁྱོ་ག་གཉིས། རཱ་ཤི་ཡའི་རྒྱལ་ས་མོ་སི་ཁོར་སླེབས་ཤིང་། སྲིད་འཛིན་ཕུ་ཀྲན་དང་ཕྱི་སྲིད་ཐབས་བྱུས་པ་ཡུ་རེ་ཨུ་ཤ་ཁོ་ཝི་སོགས་དང་ལྷན་ཐུག
•. དབྱེ་ཞིབ་པ་ཚོས་སྔར་ནས་ཚོད་དཔག་ཐུབ་ཡོད་པ་ལྟར། ཐེངས་འདིར་གང་ཡང་ཐག་གཅོད་མ་ཐུབ་པ། ཕུ་ཀྲན་གྱི་ཕྱི་སྲིད་སློབ་སྟོན་པ་ཡུ་རེ་ཨུ་ཤ་ཁོ་ཝི་ཡིས་ཚོགས་འདུ་གྲོལ་མ་ཐག་བཤད། ད་དུང་ཁོས། ང་ཚོས་གང་ཞིག་གི་སྐོར་གླེང་ཟིན་པའི་སྙིང་པོ་དག་ཕྱིར་བསྒྲག་རྒྱུ་མིན། དེ་དག་ནི་གསང་བ་རེད། སུ་གཅིག་གིས་ཀྱང་དེའི་སྐོར་ཞིབ་ཕྲ་མི་ཤེས་པས་སྐད་ཆ་ཚང་མ་ཚོད་དཔག་རེད་ཅེས་བཤད། ད་དུང་ཁོས། གླེང་མོལ་འདི་ནི་གྲུབ་འབྲས་ལྡན་པ་ཞིག་དང་། བེད་སྤྱོད་ཡོད་པ་ཞིག གཞི་ཡོད་པ་ཞིག་གྱུར་སོང་ཞེས་བཤད། ཐེངས་འདིར་ཁོ་ཚོས་ཆུ་ཚོད་ 5 མ་ཟིན་ཙམ་རིང་སྐད་ཆ་བཤད།
•. ཡིན་ན་ཡང་། དོན་དངོས་སུ་རཱ་ཡུ་གཉིས་ཀྱི་མི་མཐུན་ས་དག་ཅི་ཞིག་ཡིན་པ་སྔར་བཞིན་གསལ་བོར་གྱུར་ཅིང་། ཨེན་བྷི་སི་གསར་ཁང་གིས་རཱ་ཤི་ཡའི་ལས་བྱེད་ཅིག་གི་སྐད་ཆ་ལུང་འདྲེན་གྱིས་གནས་ཚུལ་བཀོད་པ་ལྟར་ན། རཱ་ཤི་ཡའི་ངོས་ནས་འདོར་རྒྱུ་མིན་པའི་རྩ་དོན་གཙོ་བོ་ 3 བཟུང་ཡོད་པ་དང་། དེ་དག་ནི། ༡ རྡོན་པ་སི་ཁུལ་ཧྲིལ་བོ་རཱ་ཤི་ཡར་ཐོབ་དགོས་པ། ༢ ཡུ་ཁུ་རན་གྱི་དམག་དཔུང་གྲངས་ཚོད་འཛིན།༣ རཱ་དམག་གིས་བཟུང་ཟིན་པའི་ས་ཆ་དག་རཱ་ཤི་ཡའི་མངའ་ཁོངས་སུ་གྱུར་ཟིན་པ། ཡུ་རོབ་དང་ཨ་རིས་ཁས་ལེན་དགོས་ཞེས་པ་དག་ཡིན་པ་གསལ།
•. སྒྲོ་ནལ་ཁྲི་རམ་ཕུའི་སྐུ་ཚབ་དག་དང་ཕུ་ཀྲན་མ་ཐུག་པའི་ཆུ་ཚོད་འགའི་སྔོན་དུ། རྒྱ་ནག་གི་ཕྱི་སྲིད་བློན་ཆེན་ཝ་ཡེ་རཱ་ཤི་ཡའི་རྒྱལ་ས་མོ་སི་ཁོར་སླེབས། རཱ་ཤི་ཡའི་ཕྱི་སྲིད་བློན་ཆེན་སར་གྷེ་ལ་ཝི་རོ་དང་། བདེ་འཇགས་ལྷན་ཁང་གི་དྲུང་ཆེ། སར་གྷེ་ཕྱོ་གོ་གཉིས་ཀྱིས་ཝང་ཡེ་ལ་ཐུག་བཞིན་པའི་བརྙན་པར་སོགས་ཕྱིར་ཐོན། སར་གྷེ་ལ་ཝི་རོ་ཡིས། ང་ཚོ་ཅི་ཙམ་ཐུག་ན་གྲུབ་འབྲས་དེ་ཙམ་འདུག་ཅེས་བཤད། རཱ་ཤི་ཡའི་ངོས་ནས་ཨ་རིའི་སྐུ་ཚབ་གལ་ཆེན་དག་དང་ལྷན་ཐུག་ཐེངས་རེར། རཱ་ཤི་ཡའི་སྐུ་ཚབ་དང་རྒྱ་ནག་གི་སྐུ་ཚབ་ཐུག་པའམ། ཡང་ན་ཕུ་ཀྲན་གྱིས་ཁ་པར་བརྒྱུད་ཞེ་ཅེན་ཕིན་ལ་སྐད་ཆ་ཤོད་པ་ནི་ཧ་ཅང་འཆར་ཅན་ཞིག་ཡིན།