རྒྱ་གར་འབྲེལ་མཐུད་ལྷན་ཁང་གིས། རྒྱ་གར་གྱི་ལག་འཁྱེར་ཁ་པར་བཟོ་གྲྭ་དག་ལ། ཁ་པར་ཚང་མའི་ནང་དུ་དྲྭ་རྒྱུའི་བདེ་འཇགས་དང་འབྲེལ་བའི་ཉེན་ཆས། གཞུང་གིས་བཟོས་པ་ཞིག་ངེས་པར་དུ་འཇོག་དགོས་པའི་བཀའ་བཏང་། ཐག་གཅོད་འདི་བདུན་ཕྲག་སྔོན་མར་བྱས་ཟིན་པ་ལ། བདུན་ཕྲག་འདིའི་གཟའ་ཟླ་བའི་ཉིན་ཉེན་ཆས་འདི་ཅི་ཞིག་ཡིན་པའི་གནས་ཚུལ་ཞིབ་ཕྲ་ཕྱིར་བཀྲམས་ཤིང་། བཀའ་རྒྱ་འདི་འབྱུང་འགྱུར་ཉིན་ 90 ནང་ལག་བསྟར་ཡོངས་སུ་གྲུབ་དགོས་པ་བཤད།
གཞུང་གི་འགྲེལ་བཤད་ལྟ་ན། འདི་ནི་ཁ་པར་ལོག་སྤྱོད་མི་བྱ་ཆེད་དང་། རྐུས་ཟིན་པའི་ཁ་པར་ཕྱིར་རྙེད་ཆེད། སྤྱོད་མཁན་གྱི་ངོ་བོ་ངོས་འཛིན་ཐུབ་ཆེད་ཡིན་པ་བཤད། དེ་བཞིན་ཀུ་ཤུ་དང་ལྷོ་ཀོ་རེ་ཡའི་སམ་སང་འཕྲུལ་རིགས་ཁེ་གཉེར་སོགས་ལ། རྒྱ་གར་གྱིས་གསང་བའི་ངང་འབྲེལ་བྱས་ནས་རྒྱ་གར་དུ་འཚོང་རྒྱུའི་ཁོ་ཚོའི་ཁ་པར་དག་གི་ནང་།གཞུང་གི་ཉེན་ཆས་དང་པོ་ནས་འཇོག་རྒྱུའི་སྐོར་བཤད་ཟིན་པ་རོའུ་ཀྲར་གསར་ཤོག་གིས་གནས་ཚུལ་བཀོད།
ཡིན་ན་ཡང་། གཞུང་གི་ཐག་གཅོད་འདིའི་རྒྱ་གར་སྤྱི་ཚོགས་དང་གསར་ལམ་དུ་རྩོད་པ་དང་། དགག་པ་ཤུགས་ཆེན་བྱུང་ཞིང་། ལྷག་པར་ཕྱོགས་འགལ་ཆབ་སྲིད་པ་ཚོས་དགག་པ་དྲག་པོ་བརྒྱབས་ཤིང་།
ཀུ་ཤུ་དང་སམ་སང་སོགས་ཀྱིས་ཀྱང་རྒྱ་གར་གྱི་ཐག་གཅོད་འདི་ངོས་ལེན་བྱ་འཆར་མེད་པ་སྒེར་ནས་བརྡ་སྤྲད་ཟིན་པ་གསལ། མཐར་དེ་རིང་རྒྱ་གར་འབྲེལ་མཐུད་ལྷན་ཁང་གིས། ཁོ་ཚོའི་ཐག་གཅོད་འདི་ཕྱིར་འཐེན་ཟིན་པ་རོའུ་ཀྲར་གསར་ཤོག་གིས་གནས་ཚུལ་བཀོད།
ཉེན་ཆས་གསར་བ་འདིའི་མིང་ལ་(Sanchar Saathi)ཞེས་ཟེར་ཅིང་། ཁ་པར་ཐོག་མར་ཉོས་པ་ནས་ནང་དུ་བཞག་ཟིན་པ་ཡིན་དགོས་པའི་ཉེན་ཆས་འདིས། ཁ་པར་གཏོང་རྒྱུ་དང་འཕྲིན་ཡིག་བསྐུར་རྒྱུ་ཚུན་ལ་སྟངས་འཛིན་ཐུབ་པ་མ་ཟད། ཁ་པར་ནང་གི་པར་དང་ཡིག་སྒམ། བརྙན་མིག་ཚུན་ལ་ལྟ་བརྟག་ཐུབ་པ་བཤད་ཅིང་། འདི་ནི་མི་སྒེར་གྱི་རང་དབང་ལ་རྡོག་རོལ་བཏང་བ་ཞིག་ཡིན་པའི་སྐྱོན་བརྗོད་དྲག་པོ་བྱས། རྒྱ་གར་ནི་ཁ་པར་གྱི་ཁྲོམ་ར་ཆེ་ཤོས་ཤིག་དང་ཁ་པར་སྤྱོད་མཁན་གྲངས་ཐེར་འབུམ་ 1.2 ལས་བརྒལ་ཡོད་པ་བཤད།