ཕུ་ཀྲན་གྱིས། རཱ་དམག་གིས་ཡུ་ཁུ་རན་གྱི་ཕོ་ཁི་རོ་ཝི་སི་ཀི་གྲོང་ཁྱེར་བཟུང་ཟིན་པ་བཤད་ཀྱང་། ཁ་སང་ཡུ་དམག་གིས་གྲོང་ཁྱེར་འདིའི་ནང་དུ་དར་ཆ་བཙུགས་ཤིང་། ད་དུང་ཡང་གྲོང་ཁྱེར་འདི་ཧྲིལ་བོ་རཱ་དམག་གིས་བཟུང་ཐུབ་མེད་ཅེས་བསྒྲགས།
•. རཱ་དམག་གིས། ཡུ་ཁུ་རན་གྱི་རྡོ་ཉད་སི་ཀི་ས་ཁུལ་གྱི་ཕོ་ཁི་རོ་ཝི་སི་ཀི་གྲོང་ཁྱེར་དང་། དེའི་ཉེ་འཁོར་གྱི་མེར་ནོ་ར་ཀྲི་(Myrnohrad)
ཞེས་པའི་གྲོང་བརྡལ་གཉིས་འཕྲོག་ཆེད་ཤུགས་ཆེན་འཐབ་ཅིང་། ད་ལྟ་གྲོང་དང་གྲོང་བརྡལ་འདིའི་བརྒྱ་ཆ་ཕལ་ཆེ་བ་བཟུང་ཟིན་པ་དང་།འདིར་ཡོད་པའི་ཡུ་དམག་གི་ཕྱིར་འཐེན་སའི་ལམ་ཀའང་མེ་སྒྱོགས་སོགས་ཀྱི་སྙོབས་ཚད་ནང་བཅུག་ཟིན་པ་ལྟར། ད་ལྟ་ཡུ་དམག་མེར་ནོ་ར་ཀྲིའི་ལྷོ་ཕྱོགས་ཀྱི་གྲོང་གསེབ་གཉིས་ནས་ཕྱིར་འཐེན་ཟིན་པ་བསྒྲགས།
•. ཕུ་ཀྲན་གྱིས། ཕོ་ཁི་རོ་ཝི་སི་ཀི་གྲོང་ཁྱེར་ཧྲིལ་བོ་འཕྲོག་ཟིན་པ་དང་།ཕྱོགས་འདིར་ཡུ་དམག་སྟོང་ཕྲག་མང་པོ་རཱ་དམག་གིས་བསྐོར་ཟིན་པ་ལ། ཡུ་ཁུ་རན་གྱི་དབང་འཛིན་པ་ཚོས་ཡུ་དམག་ལ་མགོ་བསྒུར་དུ་མ་བཅུག་རྐྱེན། ཡུ་དམག་ཚང་མ་བསད་རྨས་དང་གསོན་བཟུང་བྱས་ཟིན་པ་བསྒྲགས་ཟིན། ཡིན་ན་ཡང་། དེ་དང་མཐུན་པའི་བདེན་དཔང་ཚད་ལྡན་ཞིག་ད་ལྟ་བར་ཕྱིར་མ་ཐོན་ཁར། དེ་རིང་ཡུ་དམག་གིས་གྲོང་ཁྱེར་འདིའི་ནང་དུ་དར་ཆ་བཙུགས་ཤིང་། ད་དུང་ཡང་གྲོང་ཁྱེར་འདི་ཧྲིལ་བོ་རཱ་དམག་གིས་བཟུང་ཐུབ་མེད་ཅེས་བསྒྲགས།
•. ཁ་སང་ཡུ་ཁུ་རན་གྱི་འཐབ་འཛིང་གནམ་གྲུ་ Su-27 ཡི་ཁ་ལོ་བ་ཞིག་བསད། གཡུལ་སར་བསད་ཟིན་པ་བཤད་པ་ལས། རྒྱུ་རྐྱེན་གང་ཡིན་ཐད་ཞིབ་ཕྲ་ཕྱིར་མ་བསྒྲགས།
•. དབྱིན་ཇིའི་བདུན་རེའི་གསར་ཤོག་དཔལ་འབྱོར་རིག་པ་བ་(The Economist)ལྟར་ན། དམག་འཁྲུག་འདིའི་ཁྲོད་རཱ་ཤི་ཡའི་སྐྱེས་པ་680,000 ཤི་རྨས་ཐེབས་ཟིན་པ་དང་། དེ་ནི་དམག་འཁྲུག་འགོ་མ་བཙུགས་སྔོན་གྱི་རཱ་ཤི་ཡའི་སྐྱེས་པའི་གྲངས་ཀ་སྤྱིའི་བརྒྱ་ཆ་ 1% ཡིན་པ་བཤད། ཚོད་རྩིས་གཞན་ཞིག་ལྟར་ན་ད་ལྟ་བར་རཱ་དམག་ས་ཡ་ 1.35 ཡས་མས་ཤི་རྨས་ཐེབས་ཟིན་པ་དང་། དེ་ནི་འཛམ་གླིང་འཁྲུག་ཆེན་གཉིས་པའི་སྐབས་སུ། ཨ་རིའི་དམག་མི་ཤི་རྨས་ཐེབས་པའི་གྲངས་ལས་ཀྱང་བརྒལ་ཡོད་པ་བཤད།
•. ནུབ་ཆིངས་ཀྱི་ཚོད་རྩིས་ལྟར་ན། ཉི་མ་རེར་གཡུལ་སར་རཱ་དམག་ 11,00 ཤི་རྨས་ཐེབས་བཞིན་པ་བཤད་ཅིང་། ཤི་རྨས་ཀྱི་གྲངས་ཧ་ཅང་མཐོ་ནའང་། འདས་པའི་ལོ་ངོ་ 3 གྱི་རིང་རཱ་དམག་གིས། ཡུ་ཁུ་རན་གྱི་ས་ཆའི་བརྒྱ་ཆ་ 1.45% ལས་འཛིན་མ་ཐུབ་ཅིང་། ད་ལྟ་བར་གྲོང་ཁྱེར་གཙོ་བོ་གཅིག་ཀྱང་འཛིན་མ་ཐུབ་པ་དང་། འདས་པའི་ཟླ་བ་ 18 རིང་འཐབ་ཀྱང་། ད་དུང་ཡང་ཕོ་ཁི་རོ་ཝི་སི་ཀི་གྲོང་ཁྱེར་ཡང་ཧྲིལ་བོ་འཛིན་མ་ཐུབ་པ་བཤད། ཉེ་དུས་ནས་རཱ་དམག་ལ་ཤི་རྨས་ཚབས་ཆེན་བྱུང་བའི་བརྙན་འགའ་ཡང་ཕྱིར་ཐོན།
•. ཨ་རིའི་སྲིད་འཛིན་གྱི་སྐུ་ཚབ་ཝེ་ཀྲི་ཀོ་ཧྥི་དང་། སྲིད་འཛིན་གྱི་བུ་མོའི་ཁྱོ་ག་ཁུ་ཤེ་ནེ་གཉིས་ཀྱིས། ཡུ་ཁུ་རན་གྱི་སྐུ་ཚབ་དག་དང་ལྷན་གྲོས་མོལ་བྱེད་བཞིན་པ་ལྟར། སྔར་བཞིན་མི་མཐུན་ས་གཙོ་བོ་ནི་ཡུ་དམག་རྡོན་པ་སི་ས་ཁུལ་ནས་ཕྱིར་འཐེན་མིན་དེ་ཡིན་པ་ཛེ་ལན་སི་ཀེ་ཡིས་བཤད། ཛེ་ལན་སི་ཀེ་ཡིས་ཡུ་དམག་རྡོན་པ་སི་ས་ཁུལ་ནས་ཕྱིར་འཐེན་ཚེ། འབྱུང་འགྱུར་རཱ་དམག་ལ་ཡུ་ཁུ་རན་ལ་ཚུར་རྒོལ་གསར་བ་བྱ་རྒྱུའི་ལམ་ཀ་གཏོད་པ་ལས་མེད་པ་བཤད། དེ་དང་ལྷན་ཨ་རིས་ཡུ་ཁུ་རན་ལ། ཡུ་དམག་ས་ཆ་འདི་ནས་ཕྱིར་འཐེན་རྒྱུར་གནོན་ཤུགས་སྤྲོད་བཞིན་པའི་གནས་ཚུལ་ཐོན།
•. སྲིད་འཛིན་ཛེ་ལན་སི་ཀེ་ཡིས་བྷི་ལུམ་བྷར་གྷི་ལ། ད་ལྟ་ཨ་རི་དང་རཱ་ཤི་ཡ། ཡུ་ཁུ་རན་གསུམ་གྱི་འདོད་ཚུལ་ལོགས་སུ་ཕྱིན་ཡོད་པས། གྲོས་མོལ་དེ་ཕར་འགྲོ་ས་མེད་པའི་མཚམས་སུ་སླེབས་སོང་ཞེས་བཤད། དེ་དང་ལྷན་ཕུ་ཀྲན་ལ་རྒྱ་གར་གྱི་གསར་ཤོག་(India Today)ཡིས་བཅར་འདྲི་སྐབས། ཁོས། དམིགས་བསལ་དམག་དོན་བྱ་འགུལ་(དམག་འཁྲུག)གྱི་དམིགས་ཡུལ་དེ་འགྲུབ་རྗེས། ཡུ་ཁུ་རན་གྱི་དཀའ་ངལ་དག་སེལ་སོང་བ་རེད་ཅེས་དང་། ཡུ་དམག་རཱ་ཤི་ཡའི་ས་ཁུལ་(ཁོས་རཱ་ཤི་ཡའི་ཁོངས་སུ་བཅུག་པའི་ཡུ་ཁུ་རན་གྱི་ས་ཁུལ་དག)ནས་ཕྱིར་འཐེན་དགོས་པ་རེད་ཅེས་བཤད།
•. མུ་མཐུད་དུ་ཕུ་ཀྲན་གྱིས། ཨ་རིའི་ཁེ་གཉེར་ཆེན་པོ་མང་པོས་ཕྱིར་རཱ་ཤི་ཡའི་རྒྱལ་ནང་ལ་ཡོང་རྒྱུར་སྒུག་ཡོད། ཁོ་ཚོས་དཀའ་ངལ་འདི་སེལ་རྒྱུར་སྒུག་ཡོད་ཅེས་དང་། ཨ་རིས་ད་དུང་ཡང་རཱ་ཤི་ཡའི་ཉིང་རྡུལ་རྫས་སྦྱོར་ཉོ་བཞིན་ཡོད། གལ་སྲིད་ཨ་རི་ལ་དེ་ཉོ་བའི་ཐོབ་ཐང་ཡོད་ན། རྒྱ་གར་ལ་རཱ་ཤི་ཡའི་(རྡོ་སྣུམ་)ཉོ་བའི་ཐོབ་ཐང་མེད་དོན་ཅི་རེད་ཅེས་བཤད། ཕུ་ཀྲན་གྱིས། ད་དུང་ངའི་མི་ཚེ་ལ་བསྡོམས་རྒྱག་རྒྱུ་སྔ་དྲགས་འདུག ད་དུང་ཡང་ང་ལ་བསྒྲུབ་རྒྱུ་ཁ་ཤས་ཤིག་མདུན་དུ་ལྷག་ཡོད་ཅེས་བཤད།