ཐེ་ཝན་གྱི་ཕྱི་སྲིད་བློན་ཆེན་གཞོན་པ། གསང་བའི་ངང་ཨེ་ཛི་རལ་དུ་ཐེངས་ 3 ལ་ཕྱིན་ཟིན་པ་དང་།ཟླ་བ་འདིའི་ནང་ཐེངས་ 2 ལ་ཕྱིན་ཟིན་པའི་གནས་ཚུལ་ཐོན།
རོའུ་ཀྲར་གསར་ཤོག་ལ་འབྲེལ་ཡོད་ལས་བྱེད་མིང་བརྗོད་འདོད་མེད་པ་འགས་གནས་ཚུལ་མཁོ་སྤྲོད་ལྟར་ན། ཐེ་ཝན་གྱི་ཕྱི་སྲིད་བློན་ཆེན་གཞོན་པ། གསང་བའི་ངང་ཨེ་ཛི་རལ་དུ་ཐེངས་ 3 ལ་ཕྱིན་ཟིན་པ་དང་།ཟླ་བ་འདིའི་ནང་ཐེངས་ 2 ལ་ཕྱིན་ཟིན་པ་བཤད། རྒྱ་ནག་གིས་ཐེ་ཝན་ལ་འཇིགས་སྐུལ་ཆེ་རུ་འགྲོ་བཞིན་པ་དང་ལྷན། ཐེ་ཝན་གྱིས་ཨེ་ཛི་རལ་ནི་མང་གཙོའི་མཐུན་གྲོགས་དང་། བདེ་སྲུང་གི་ཐད་ནས་ཨེ་ཛི་རལ་དང་ལྷན་མཉམ་ལས་བྱ་རྒྱུར་གལ་ཆེན་དུ་རྩི་བཞིན་པ་གསལ།
ལྷག་པར་ཐེ་ཝན་གྱིས་རྒྱ་ནག་གི་བཙན་འཛུལ་འགོག་ཆེད། རང་གི་མཁའ་དབྱིངས་སྲུང་སྐྱོབ་ཀྱི་ནུས་པ་ཤུགས་ཆེ་རུ་གཏོང་རྒྱུར་འབད་པ་བྱེད་བཞིན་པ་དང་། དེའི་ཆེད་ཨ་རི་ནས་གནམ་སྲུང་མ་ལག་ཉོ་བཞིན་པ་མ་ཟད། ཐེ་ཝན་རང་གིས་ཀྱང་གནམ་སྲུང་མ་ལག་བཟོ་བཞིན་པ་གསལ།
ཨེ་ཛི་རལ་གྱི་གནམ་སྲུང་མ་ལག་གྲགས་ཅན་ལྕགས་ཀྱི་སྒྲོམ་(Iron Dome)ནི། རྒྱལ་སྤྱིའི་སྟེང་གི་ནུས་པ་ཆེ་ཤོས་ཀྱི་གནམ་སྲུང་མ་ལག་ཅིག་ཡིན་པ་ལྟར། ཐེ་ཝན་གྱི་ལག་རྩལ་འདི་ཐོབ་རྒྱུར་འབད་པ་བྱེད་བཞིན་པ་གསལ། རྒྱལ་ཁབ་གཞན་དག་ཕལ་ཆེ་བ་ལྟར། ཨེ་ཛི་རལ་གྱིས་ཀྱང་ཐེ་ཝན་དེ་རང་བཙན་རྒྱལ་ཁབ་ཅིག་ཏུ་ཁས་མི་ལེན།