ཧྥ་རན་སིའི་ཆེས་མཐོའི་དམག་དོན་གཟེངས་རྟགས་(Légion d’honneur)ཞེས་པ། ཡུ་ཁུ་རན་གྱི་ཆེས་མཐོའི་སྤྱི་ཁྱབ་དམག་སྤྱི་ཆེན་མོ་སར་སི་ཀེ་ལ་སྤྲད། ཁོ་ལ་དམིགས་བསལ་དམག་དོན་གྱི་གྲུབ་འབྲས་ལྡན་པ་བཤད།
•. རཱ་ཤི་ཡའི་བདེ་སྲུང་ལྷན་ཁང་གིས། རཱ་དམག་གིས་ཡུ་ཁུ་རན་གྱི་རྡོ་ཉད་སི་ཀི་ས་ཁུལ་གྱི་སི་ཝེ་ཏི་ལོ་ཡེ་(Svetloye)ཞེས་པའི་གྲོང་གསེབ་ཅིག་འཕྲོག་ཟིན་པ་བསྒྲགས། ཡུ་ཁུ་རན་གྱིས་ད་ལྟ་བར་འདིའི་ཐད་གང་ཡང་མ་བཤད།
•. ཁ་སང་ཡུ་ཁུ་རན་གྱི་དམག་དོན་གསང་བའི་ལས་ཁུངས་ཀྱིས། རཱ་ཤི་ཡའི་ལེ་པེ་སི་ཀི་མངའ་སྡེའི་ལྟེ་བའི་གྲོང་ཁྱེར་གྱི་ཐག་ཉེའི་གནམ་ཐང་ཞིག་ལ་གཏོར་རྒོལ་ཁྲོད། རཱ་ཤི་ཡའི་དེང་རབས་འཐབ་འཛིང་གཏོར་རྒོལ་གནམ་གྲུ་ Su-30 ཞིག་དང་། དེང་རབས་འཐབ་འཛིང་གཏོར་རྒོལ་གནམ་གྲུ་ Su-27 ཞིག་བཅས་གཏོར་ཟིན་པའི་གནས་ཚུལ་ཐོན། འཐབ་འཛིང་གནམ་གྲུ་འདི་གཉིས་ཀྱི་རིན་ཐང་ལ། ཨ་སྒོར་ས་ཡ་ $100 ཡས་མས་ཡིན་པ་ཚོད་རྩིས་དང་། བྱ་འགུལ་འདིའི་ཆེད་བདུན་ཕྲག་ 2 རིང་གྲ་སྒྲིག་བྱས་ཟིན་པ་བསྒྲགས།
•. མདང་དགོང་ཡུ་དམག་གིས། རཱ་ཤི་ཡའི་ཁི་ར་སི་ནོ་རྡར་ས་ཁུལ་གྱི་ཏཱ་མན་གྲུ་ཁ་(Taman Port)ཞེས་པར་གཏོར་རྒོལ་བྱས། ཡུ་དམག་གི་དམིགས་འབེན་གཙོ་བོ་ནི། གྲུ་ཁའི་ཡོ་ཆས་དག་ཡིན་པ་གསལ། ས་གནས་ཀྱི་མིས་བཤད་པ་ལྟར་ན། ཐེངས་འདིར་གྲུ་ཁ་དང་ཉེ་འཁོར་གྱི་མཚོའི་ཁ་ནས་གས་འཐོར་གྱི་སྒྲ་ཐེངས་ 10 ཡས་མས་གྲགས་ཟིན་པ་བཤད་ཅིང་། དེ་བཞིན་གྲུ་གཟིངས་ 2 ཀྱི་སྟེང་མེ་འབར་བཞིན་པའི་གནས་ཚུལ་ཐོན།
•. ད་ལྟ་བར་ནུབ་ཕྱོགས་ཀྱིས། ཡུ་ཁུ་རན་ལ་གོ་ལག་གཏོང་སའི་ལམ་ཀ་གཙོ་བོ་ནི། ཡུ་ཁུ་རན་གྱི་ནུབ་ཕྱོགས་ཁྱིམ་མཚེས་ཕོ་ལན་ཀྲི་བརྒྱུད་་ནས་གཏོང་བཞིན་པ་ལྟར། ལོ་རྗེས་མའི་ཕྱི་ཟླ་ 1 པོའི་མཇུག་ཏུ། རོ་མ་ནེ་ཡ་རྒྱལ་ཁབ་ནས་ཀྱང་། ཡུ་ཁུ་རན་ལ་ཐད་ཀར་གོ་ལག་གཏོང་སའི་སྒོ་ཆེན་ཞིག་འབྱེད་རྒྱུ་དང་། འདི་ལ་བརྟེན་ནས་ཡུ་ཁུ་རན་ལ་གཏོང་རྒྱུའི་གོ་ལག་གི་གྲངས་ལྡབ་འགྱུར་གྱིས་སྤར་ཐུབ་པ་བཤད།
•. ཧྥ་རན་སིའི་ཆེས་མཐོའི་དམག་དོན་གཟེངས་རྟགས་(Légion d’honneur)ཞེས་པ། ཡུ་ཁུ་རན་གྱི་ཆེས་མཐོའི་སྤྱི་ཁྱབ་དམག་སྤྱི་ཆེན་མོ་སར་སི་ཀེ་ལ་སྤྲད། ཁོ་ལ་དམིགས་བསལ་དམག་དོན་གྱི་གྲུབ་འབྲས་ལྡན་པ་བཤད། དམག་སྤྱི་སར་སི་ཀེ་ནི་ཕྱི་ལོ་ 2022 ལོར་ཐོག་མར་རཱ་དམག་གིས་ཡུ་ཁུ་རན་ལ་བཙན་འཛུལ་སྐབས། རྒྱལ་ས་ཁེ་ཝུ་སྲུང་མཁན་གྱི་རྐང་འགན་འཁུར་མཁན་དེ་ཡིན་པ་དང་། ད་ལྟ་རྒྱལ་ཁབ་ཀྱི་ཆེས་མཐོ་བའི་དམག་སྤྱིར་གྱུར། ཧྥ་རན་སིའི་གཟེངས་རྟགས་འདི་ནི། ཧྥ་རན་སིའི་གོང་མ་ནཱ་ཕོ་ལི་ཡིས། ཕྱི་ལོ་ 1802 ལོར་གསར་གཏོད་བྱས་ཡིན་པ་གསལ།
•. ཡུ་རོབ་ཀྱི་དངུལ་ཁང་དག་ཏུ་བཀག་ཡོད་པའི་རཱ་ཤི་ཡའི་དངུལ་སྒོར་དག་ཡུ་ཁུ་རན་ལ་གཏོང་རྒྱུའི་ཐད། ཡུ་རོབ་ཀྱི་ཆབ་སྲིད་པ་ཚོས་ཐག་གཅོད་མ་ཐུབ་པ་ནི། རཱ་ཤི་ཡ་དང་ཨ་རི་གཉིས་ཀྱིས་གསང་བའི་ངང་གནོན་ཤུགས་སྤྲད་པ།གཅིག་བུས་མ་ཡིན་པར། ཧྥ་རན་སིའི་གཞུང་གིས་ཀྱང་། ཁོ་ཚོར་ད་ལྟ་བུ་ལོན་ཆེ་བའི་སྟེང་འབྱུང་འགྱུར་ཁྲིམས་ཐོག་ནས་དཀའ་ངལ་འབྱུང་དོགས་ཀྱིས་ལས་དོན་འདི་བཀག་ཡོད་པ་དང་། དོན་དངོས་སུ་དངུལ་སྒོར་འདི་དང་འབྲེལ་ཐག་གཅོད་མ་ཐུབ་པའི་རྒྱུ་མཚན་གཙོ་བོ་ཞིག་ནི་ཧྥ་རན་སི་ཡིན་པ་གསལ། འདི་ལ་བརྟེན་ནས་མཇར་མན་དང་ཧྥ་རན་སིའི་བར། མི་མངོན་པའི་འགལ་ཟླ་ཞིག་བྱུང་ཟིན་པའི་གནས་ཚུལ་ཐོན།
•. ཁ་སང་རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ། ཁེར་ སྒྲི་མེ་ཀྲི་རེ་ཝི་དང་ཨ་རིའི་སྲིད་འཛིན་གྱི་སྐུ་ཚབ་ཝེ་ཀྲི་ཀོ་ཧྥི་གཉིས། ཨ་རིའི་མཱ་ཡ་མེ་གྲོང་ཁྱེར་དུ་ཐུག་ཅིང་། དམག་འཁྲུག་མཚམས་འཇོག་རྒྱུའི་ཐད་གྲོས་བྱས། ཝེ་ཀྲི་ཀོ་ཧྥི་ཡིས། རཱ་ཤི་ཡ་ལ་དམག་འཁྲུག་འདི་མཚམས་འཇོག་རྒྱུའི་ཆོད་སེམས་བརྟན་པོ་འདུག་ཅེས། ཐེངས་འདིའི་གྲོས་མོལ་འདི་ཡག་པོ་བྱུང་ཟིན་པ་བཤད། ཡིན་ན་ཡང་། དོན་དངོས་སུ་ས་ཆ་ཕར་སྤྲོད་ཚུར་ལེན་དང་། ཡུ་ཁུ་རན་ལ་བདེ་སྲུང་ཁག་ཐེག་སྤྲོད་རྒྱུ་སོགས་ཀྱི་ཐད་ནས། གྲོས་མོལ་ལ་གྲུབ་འབྲས་གང་ཡང་ཐོན་གྱི་མེད་པའི་གནས་ཚུལ་ཐོན།
•. བདུན་ཕྲག་སྔོན་མར་ཕུ་ཀྲན་གྱིས། གལ་སྲིད་ཡུ་རོབ་ཀྱིས་རཱ་ཤི་ཡར་འདྲ་མཉམ་གྱི་བརྩི་བཀུར་བྱས་ཚེ། དམིགས་བསལ་དམག་དོན་བྱ་འགུལ་གསར་བ་(དམག་འཁྲུག་གསར་བ་ཞིག)འབྱུང་རྒྱུ་མིན་ཚུལ་བཤད་པ་དེ་ནི། ཆེས་ཉེན་ཁ་ཆེ་བའི་སྔོན་བརྡ་ཞིག་ཏུ་གྱུར་ཟིན་པ་དང་། རོའུ་ཀྲར་གསར་ཤོག་གིས་ཨ་རིའི་གསང་ལས་ཀྱི་སྐད་ཆ་ལུང་འདྲེན་གྱིས། ཕུ་ཀྲན་གྱི་དམིགས་ཡུལ་དངོས་ནི། ཡུ་ཁུ་རན་ཙམ་ཞིག་མ་ཡིན་པ་དེར་འགྱུར་བ་ཕྱིན་མི་འདུག་ཅེས་གནས་ཚུལ་བཀོད། དེ་རིང་རཱ་ཤི་ཡའི་སྲིད་འཛིན་ལས་ཁུངས་ཀྱིས། གནས་ཚུལ་འདི་ནི་དོན་དངོས་དང་མཐུན་པ་ཞིག་མ་རེད་ཅེས། བདེན་པ་ཡིན་པ་ཁས་མ་བླངས།
•. ཧྥ་རན་སིའི་སྲིད་འཛིན་མཱ་ཁི་རོན་གྱིས་དམག་དཔུང་ལ་གཏམ་བཤད་སྐབས། ཧྥ་རན་སིའི་ངོས་ནས་ཕྱི་ལོ་ 2038 བར་འཐབ་འཛིང་གནམ་གྲུ་འཁྱེར་ནུས་པའི་གྲུ་གཟིངས་གསར་བ་ཞིག་བཟོ་རྒྱུ་དང་། ལས་གཞི་འདིའི་ཆེད་ཨ་སྒོར་ཐེར་འབུམ་ $12 གཏོང་འཆར་ཡོད་པ་ལ། གྲུ་གཟིངས་གསར་བ་འདི་ཉིང་རྡུལ་གྱི་ནུས་པར་བརྟེན་རྒྱུ་དང་། འཐབ་འཛིང་གནམ་གྲུ་ 30 འཁྱེར་ཐུབ་པ་བཟོ་རྒྱུའི་དམིགས་ཡུལ་ཡོད་པ་བསྒྲགས། གྲུ་གཟིངས་གསར་བ་འདིས། སྔར་ཡོད་ཀྱི་ཧྥ་རན་སིའི་དམག་གྲུ་ཆེན་མོ་(Charles de Gaulle carrier)ཀྱི་ཚབ་བྱ་རྒྱུ་ཡིན་པ་གསལ།