ཨ་རིའི་ཁྲིམས་ལུགས་ལྟ་ཞིབ་དང་། ལག་བསྟར་ལྷན་ཁང་གིས། ནག་ཅན་ཨེབ་སི་ཀྲེན་དང་འབྲེལ་བའི་ཡིག་ཆ་དང་། བརྙན་པར་སྐོར་ཞིག་ཕྱིར་བཀྲམས་ཤིང་། འདིའི་ནང་དུ་སྒྲོ་ནལ་ཁྲི་རམ་ཕུ་ཨེབ་སི་ཀྲེན་གྱི་གནམ་གྲུའི་ནང་ལ་ཐེངས་བརྒྱད་འཕུར་ཟིན་པ་བཀོད།
ཨ་རིའི་གྲོས་ཚོགས་ཀྱིས་བཟོས་པའི་དུས་བཅད་ལྟར་ན། བདུན་ཕྲག་སྔོན་མའི་གཟའ་པ་སངས་ཉིན། ཨ་རིའི་ཁྲིམས་ལུགས་ལྟ་ཞིབ་དང་། ལག་བསྟར་ལྷན་ཁང་གིས། ནག་ཅན་ཨེབ་སི་ཀྲེན་དང་འབྲེལ་བའི་ཡིག་ཆ་ཚང་མ་ཕྱིར་འགྲེམས་དགོས་ཀྱང་། སྐབས་དེར་ཡིག་ཆ་དང་པར་སྐོར་ཞིག་ལས་ཕྱིར་མ་བཀྲམས་ཤིང་། བཀྲམས་ཟིན་པ་མང་པོ་ཞིག་ཀྱང་ཀློག་མི་ཐུབ་པ་མ་ཟད། སྒྲོ་ནལ་ཁྲི་རམ་ཕུ་ཡོད་པའི་པར་ཞིག་ཐོག་མར་ཕྱིར་བཀྲམས་ཤིང་། རྗེས་སུ་པར་དེ་ཕྱིར་འཐེན་དང་། དེའི་རྗེས་སུ་ཡང་བསྐྱར་བཞག་པ་སོགས། མི་རྣམས་ལ་དོགས་པ་དང་ཁོང་ཁྲོ་བསླངས།
ད་ལྟ་ཡང་བསྐྱར་ཡིག་ཆ་སྐོར་ཞིག་ཕྱིར་བཀྲམས། གསར་དུ་བཀྲམས་པ་དག་གི་ཁྲོད་དུ་ཡིག་ཆ་མ་ཟད། པར་དང་བརྙན་སོགས་ཕོན་ཆེན་ཡོད་པ་དང་། འདི་དག་ཚང་མར་ལྟ་ཞིབ་བྱ་རྒྱུར་ཆུ་ཚོད་འགའ་འགོར་རྒྱུ་ཡིན་པ་ཚོད་དཔག་བྱེད།
འདིའི་ཁྲོད་དུ་ཡོད་པའི་གློག་འཕྲིན་ཕྱི་ལོ་ 2020 ཟླ་ 1 ཚེས་ 7 ཉིན་བཏང་བ་ཞིག་ལྟར་ན། ཕྱི་ལོ་ 1993 ནས་ཕྱི་ལོ་ 1996 བར་སྒྲོ་ནལ་ཁྲི་རམ་ཕུ། ཨེབ་སི་ཀྲེན་སྒེར་གྱི་གནམ་གྲུའི་ནང་ཐེངས་ 8 ལ་འཕུར་ཟིན་པ་དང་། ཐེངས་གཅིག་སྒྲོ་ནལ་ཁྲི་རམ་ཕུ་དང་ཨེབ་སི་ཀྲེན། གཞན་ལོ་ན་ 20 ཅན་ཞིག་བཅས་གཅིག་བུ་འཕུར་བའི་གནས་ཚུལ་ཞིག་བཀོད།
དེ་དང་ལྷན་ཁྲིམས་ལུགས་ལྟ་ཞིབ་དང་ལག་བསྟར་ལྷན་ཁང་གིས། སྲིད་འཛིན་ཁྲི་རམ་ཕུ་དང་འབྲེལ་བའི་གནས་ཚུལ། ཐེངས་འདིར་ཕྱི་ལ་ཐོན་པ་ཁ་ཤས་ཤིག་བདེན་པ་མ་ཡིན་པ་དང་། གཞི་མེད་ཡིན་པས་ཡིད་གཟབ་དགོས། གནས་ཚུལ་དེ་དག་ཕྱི་ལོ་ 2020 ལོར་ཡིག་འཇོག་བྱས་པ་ཞིག་རེད་ཅེས་བསྒྲགས།