ཨ་རིའི་ཁྲིམས་ལུགས་ལག་བསྟར་དང་ལྟ་ཞིབ་ལྷན་ཁང་གིས། ད་ལྟ་ནག་ཅན་ཨེབ་སི་ཀྲེན་དང་འབྲེལ་བ་ཡོད་སྲིད་པའི་ཡིག་ཆ་གྲངས་ས་ཡ་ 1 ལས་བརྒལ་བ་གསར་དུ་རག་སོང་ཞེས་བསྒྲགས།
ཟླ་བ་འདིའི་ཚེས་ 19 ཉིན་བར་ནག་ཅན་ཨེབ་སི་ཀྲེན་དང་འབྲེལ་བའི་ཡིག་ཆ་ཚང་མ་ཕྱིར་འགྲེམས་དགོས་ཞེས་ཨ་རིའི་གྲོས་ཚོགས་ཀྱིས་ཐག་བཅད་ཟིན་པ་ལྟར། ཨ་རིའི་ཁྲིམས་ལུགས་ལག་བསྟར་དང་ལྟ་ཞིབ་ལྷན་ཁང་གིས། ད་ལྟ་བར་ཡིག་ཆ་དང་པར་མང་པོ་བཀྲམས་ཟིན་དང་། ད་དུང་ཡང་ཚང་མ་ཕྱིར་མ་བཀྲམས་ཤིང་། བཀྲམས་ཟིན་པ་དག་གི་ཁྲོད་ཀྱི་མང་པོ་ཞིག་ཀྱང་། ལྟ་ཀློག་མི་ཐུབ་པ་བཟོས་པ་དེ་ཚད་ལས་བརྒལ་འདུག་ཅེས། མང་གཙོ་ཚོགས་པ་མ་ཟད་སྤྱི་མཐུན་ཚོགས་པའི་ཆབ་སྲིད་པ་ཚོའི་ཁྲོད་ཀྱི་མང་པོས་མི་འདོད་པའི་རྣམ་འགྱུར་བསྟན།
ཁ་སང་ཁྲིམས་ལུགས་ལག་བསྟར་དང་ལྟ་ཞིབ་ལྷན་ཁང་གིས། ད་ལྟ་ནག་ཅན་ཨེབ་སི་ཀྲེན་དང་འབྲེལ་བ་ཡོད་སྲིད་པའི་ཡིག་ཆ་གྲངས་ས་ཡ་ 1 ལས་བརྒལ་བ་གསར་དུ་རག་སོང་ཞེས་བསྒྲགས། ཡིན་ན་ཡང་། ཡིག་ཆ་དེ་དག་ནམ་དུས་དང་། ཚུལ་ཇི་ལྟར་གསར་དུ་ཐོབ་པའི་ཐད་ཞིབ་ཕྲ་མ་བསྒྲགས། ང་ཚོས་ཡིག་ཆ་འདི་དག་ལ་བསྐྱར་ཞིབ་དང་། གནོད་འཚེ་འོག་ཚུད་པའི་མི་དག་གི་ཐོབ་ཐང་སྦས་དགོས་པ་སོགས། ལས་ཀ་དག་ཡོངས་སུ་འགྲུབ་རྒྱུར་བདུན་ཕྲག་འགའ་འགོར་སྲིད་པ་དང་། དེའི་རྗེས་སུ་ཡིག་ཆ་ཚང་མ་ཕྱིར་འདོན་རྒྱུ་ཡིན་ཞེས་བཤད།
ཨེབ་སི་ཀྲེན་གྱི་གནོད་འཚེ་འོག་ཚུད་པའི་མི་མང་པོ་ཞིག་གི་ཐོབ་ཐང་སྦས་དགོས་པ་ནི། གྲོས་ཚོགས་ཀྱི་ཐག་གཅོད་ཡིན་ནའང་། སྦས་རྒྱུ་དེ་ཚད་ལས་བརྒལ་འདུག་ཅེས་མང་པོས་སྐྱོན་བརྗོད་བྱས་ཤིང་། ལྷག་པར་དུས་བཅད་ལྟར་ཡིག་ཆ་ཚང་མ་ཕྱིར་མ་བཏོན་པའི་ཐད་གླེང་གཞི་མང་པོ་བྱུང་།