དབུས་ཨ་མེ་རི་ཀའི་རྒྱལ་ཁབ་ཨོན་རྡུ་ར་སིའི་(Honduras)སྲིད་འཛིན་འོས་བསྡུའི་ཁྲོད། རྙིང་ཞེན་ཆབ་སྲིད་ཚོགས་པའི་འོས་མི་ཨ་སི་ཧྥུ་ར་(Nasry Asfura)ཞེས་པར་རྒྱལ་ཁ་ཐོབ་ཟིན་པ་བསྒྲགས།
དབུས་ཨ་མེ་རི་ཀའི་རྒྱལ་ཁབ་ཨོན་རྡུ་ར་སིའི་(Honduras)སྲིད་འཛིན་འོས་བསྡུའི་ཁྲོད། རྙིང་ཞེན་ཆབ་སྲིད་ཚོགས་པའི་འོས་མི་ཨ་སི་ཧྥུ་ར་(Nasry Asfura)ཞེས་པར་རྒྱལ་ཁ་ཐོབ་ཟིན་པ་བསྒྲགས། ཁོའི་བསྒྲགས་གཏམ་གཙོ་བོ་དག་ནི། ཚོང་ལས་སྒེར་བ་ཅན་དུ་སྒྱུར་རྒྱུ་དང་གཞུང་གི་སྟངས་འཛིན་ཕྱིར་འཐེན། ཤེས་ཡོན་དང་བདེ་སྲུང་གཙོ་བོར་འཛིན་རྒྱུ་དེ་ཡིན་པ་བསྒྲགས།
ཕྱི་སྲིད་ཀྱི་ཐད་ནས་རྒྱ་ནག་དང་འབྲེལ་ཐག་རིང་དུ་བཏང་ནས། ཐེ་ཝན་དང་འབྲེལ་ཐག་ཉེ་རུ་གཏོང་རྒྱུ་ཡིན་པའི་བརྡ་བཏང་། རྒྱལ་ཁབ་འདིས་སྔར་ཐེ་ཝན་དེ་རྒྱལ་ཁབ་ཅིག་ཡིན་པ་ཁས་ལེན་ནའང་། རྒྱ་ནག་གི་གནོན་ཤུགས་འོག་ཕྱི་ལོ་ 2023 ལོར་ཐེ་ཝན་དང་ཕྱི་འབྲེལ་བཅད་ཅིང་། རྒྱ་ནག་དམར་ཤོག་རྒྱལ་ཁབ་དེ་གཞུང་འབྲེལ་ངང་ཁས་བླངས།
ཡིན་ན་ཡང་། ད་ལོའི་རྒྱལ་ཁབ་འདིའི་འོས་བསྡུའི་ཁྲོད་རྙིང་ཞེན་ཆབ་སྲིད་ཚོགས་པའི་འོས་མི་མ་ཟད། གུ་ཡངས་ཆབ་སྲིད་ཚོགས་པའི་འོས་མི་ནཱ་སི་ར་ལ་(Salvador Nasralla)ཡིས་ཀྱང་། རྒྱ་ནག་དང་ལྷན་འབྲེལ་བ་བཙུགས་པས་ང་ཚོར་ཁེ་ཕན་གང་ཡང་མི་འདུག དེ་ལས་ཐེ་ཝན་དང་ལྷན་ཕྱི་འབྲེལ་བཙུགས་ན་ཁེ་ཕན་ཆེ་བ་འདུག་ཅེས་བཤད།
དེའི་དོན་ནི་རྒྱ་ནག་དམར་ཤོག་རྒྱལ་ཁབ་དང་ཕྱི་འབྲེལ་བཅད་ནས། ཐེ་ཝན་དེ་རྒྱལ་ཁབ་ཅིག་ཡིན་པ་ངོས་འཛིན་བྱས་ན་ཁེ་ཕན་ཆེ་བ་འདུག་ཅེས་པ་དེ་རེད། ཐེངས་འདིར་རྒྱལ་ཁ་ཐོབ་པའི་འོས་མི་འདི་ལ། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས་ཀྱང་རྒྱབ་སྐྱོར་ཆེན་པོ་བྱེད་བཞིན་ཡོད་ལ། ཁོས། འོས་མི་འདི་ལ་རྒྱལ་ཁ་མ་ཐོབ་ཚེ་ཨ་རིས་རྒྱལ་ཁབ་འདི་ལ་རོགས་སྐྱོར་མཚམས་འཇོག་རྒྱུ་ཡིན་པའི་ཉེན་བརྡ་ཡང་བཏང་ཟིན།
སྒྲོ་ནལ་ཁྲི་རམ་ཕུས། ལྷོ་དང་དབུས་ཨ་མེ་རི་ཀ་གླིང་དུ་ཨ་རིའི་ཤུགས་རྐྱེན་རྒྱ་བསྐྱེད་བྱེད་པར། འོས་མི་འདི་ནི་ཆ་རྐྱེན་གལ་ཆེན་ཞིག་ཏུ་མཐོང་བཞིན་པ་གསལ། ད་ལྟ་ཨར་ཇི་ཀྲི་ན་དང་། ཨེལ་ས་ཝ་རྡོར་རྒྱལ་ཁབ་བཅས་རྙིང་ཞེན་ཤོག་ཁག་གམ། ཨ་རི་ལ་ཕྱོགས་མཁན་གྱི་ཆབ་སྲིད་ཤོག་ཁག་དག་གིས་བཟུང་ཟིན་པ་དང་། ལྷོ་ཨ་མེ་རི་ཀའི་རྒྱལ་ཁབ་ཅི་ལིའི་སྲིད་འཛིན་འོས་བསྡུའི་ཁྲོད་ཀྱང་། རྙིང་ཞེན་ཆབ་སྲིད་ཚོགས་པར་རྒྱལ་ཁ་ཐོབ།
འདི་དག་ནི་སྒྲོ་ནལ་ཁྲི་རམ་ཕུའི་དམིགས་ཡུལ་དག་སྒྲུབ་རྒྱུའི་ཆ་རྐྱེན་གལ་ཆེན་ཞིག་ཏུ་གྱུར། ཨ་རིའི་རྒྱལ་སྲིད་དྲུང་ཆེ་མར་ཀོ་རུ་བྷེའོ་ཡིས། རྒྱལ་ཁ་ཐོབ་ཟིན་པའི་ཨོན་རྡུ་ར་སིའི་སྲིད་འཛིན་འོས་མིར་འཚམས་འཕྲིན་བསྐུར་ཅིང་། ཨ་རིས་ཁོ་དང་ལྷན་མཉམ་ལས་བྱ་རྒྱུར་གྲ་སྒྲིག་ཡོད་ཅེས་བྲིས།