རཱ་དམག་གིས་ཡུ་ཁུ་རན་གྱི་རྡོ་ཉད་སི་ཀི་མངའ་སྡེའི་གྲོང་བརྡལ། སི་ཝེར་སི་ཀི་(Siversk)བཅིངས་གྲོལ་བཏང་ཟིན་ཅེས་བསྒྲགས་ཟིན་པ་ལྟར། ད་ལྟ་གྲོང་བརྡལ་གལ་ཆེན་འདི་དོན་དངོས་སུ་རཱ་དམག་གིས་འཕྲོག་ཟིན་པ་གསལ་བོར་གྱུར།
•. རཱ་ཤི་ཡའི་བདེ་སྲུང་ལྷན་ཁང་གིས། རཱ་དམག་གིས་ཡུ་ཁུ་རན་གྱི་རྡོ་ཉད་སི་ཀི་མངའ་སྡེའི་གྲོང་བརྡལ། སི་ཝེར་སི་ཀི་(Siversk)བཅིངས་གྲོལ་བཏང་ཟིན་ཅེས་བསྒྲགས་ཟིན་པ་ལྟར། ད་ལྟ་གྲོང་བརྡལ་གལ་ཆེན་འདི་དོན་དངོས་སུ་རཱ་དམག་གིས་འཕྲོག་ཟིན་པ་གསལ་བོར་གྱུར། ཡུ་ཁུ་རན་གྱིས། ཕྱོགས་འདིར་དགྲ་བོར་ཤི་རྨས་ཚབས་ཆེན་བཟོས་རྗེས། རང་དམག་གི་ཚེ་སྲོག་སྐྱོབ་ཆེད་ཐབས་བྱུས་ཀྱི་ཆ་ནས་གལ་ཆེན་ཡིན་པའི་ས་ཁུལ་གཞན་ལ་དམག་མི་ཕྱིར་འཐེན་ཟིན་ཅེས་བསྒྲགས།
•. རཱ་དམག་གི་དམིགས་འབེན་རྗེས་མ་ནི། སི་ལོ་ཝེན་སི་ཀི་གྲོང་བརྡལ་(Slovyansk)ཡིན་པ་གསལ། གྲོང་བརྡལ་འདི་ནི་སི་ཝེར་སི་ཀེ་གྲོང་བརྡལ་ནས་ནུབ་ཕྱོགས་སུ་སྤྱི་ལེ་ 30 ཡས་མས་ཀྱི་མཚམས་སུ་ཡོད་པ་དང་། གྲོང་བརྡལ་འདི་དག་ནི་རྡོ་ཉད་སི་ཀི་ས་ཁུལ་གྱི་ཡུ་དམག་གི་འགོག་སྲུང་བཙན་ཤོས་དག་ཡིན་པ་གསལ། དམག་འཁྲུག་རྒྱག་མ་དགོས་པར་གྲོང་བརྡལ་འདི་དག་རཱ་ཤི་ཡར་སྤྲོད་རྒྱུ་ནི། ཕུ་ཀྲན་དང་ཨ་རིས་ཡུ་ཁུ་རན་ལ་བཏོན་པའི་ཆ་རྐྱེན་གཙོ་བོ་ཞིག་རེད།
•. ཡུ་དམག་གིས། རཱ་ཤི་ཡའི་ཏུ་ལ་ས་ཁུལ་གྱི་དམག་དོན་ཡོ་ཆས་བཟོ་གྲྭ་ཞིག་ལ་གཏོར་རྒོལ་བྱས། བཟོ་གྲྭ་འདི་ནི་ཕྱི་ལོ་ 1933 ལོ་ནས་འགོ་བཙུགས་པ་ཞིག་ཡིན་པ་བཤད། གཞན་ཡང་རཱ་ཤི་ཡའི་སཱ་ར་ཏོ་ཝི་མངའ་སྡེའི་རྡོ་སྣུམ་བཟོ་གྲྭ་ཞིག་ལའང་གཏོར་རྒོལ་ཐེབས། བདུན་ཕྲག་སྔོན་མར། མོ་སི་ཁོར་རླངས་འཁོར་ཞིག་གི་འོག་ནས་འགད་རྫས་གས་འཐོར་གྱིས། རཱ་ཤི་ཡའི་ཆེས་མཐོའི་དམག་སྤྱི་ཞིག་བསད་ཟིན་པ་ལྟར། ཁ་སང་སླར་ཡང་ས་ཆ་འདིར་འགད་རྫས་ཤིག་གས་འཐོར་གྱིས་བདེ་སྲུང་མི་སྣ་ 2 བསད།
•. རཱ་ཤི་ཡའི་སྲིད་འཛིན་ཕུ་ཀྲན་དང་དམག་སྤྱི་ཆེན་མོ་གྷེ་ར་སེ་མོ་གཉིས་ཀྱིས། རཱ་དམག་གིས་ཡུ་ཁུ་རན་གྱི་ཀུ་པན་སི་ཀི་གྲོང་བརྡལ་འཕྲོག་ཟིན་ཅེས་བསྒྲགས་ཤིང་། གཡུལ་ས་འདིའི་དམག་སྤྱི་ཞིག་ལ་ཆེས་མཐོང་གཟེངས་རྟགས་ཀྱང་སྤྲད་ཟིན་ནའང་། གྲོང་བརྡལ་འདི་རཱ་དམག་གིས་འཛིན་མ་ཐུབ་པ། དམག་འཁྲུག་དང་འབྲེལ་བའི་གནས་ཚུལ་སྤེལ་མཁན། རཱ་ཤི་ཡ་རང་གི་གསར་འགོད་པ་ཚོས་བཤད་འགོ་བཙུགས་ཤིང་། གནས་ཚུལ་འདིའི་ཐད་རཱ་ཤི་ཡའི་མི་མང་པོས་ཁོང་ཁྲོའི་རྣམ་འགྱུར་སྟོན་པའི་ཡི་གེ་སོགས་ཕྱིར་ཐོན།
•. རཱ་ཤི་ཡའི་དམག་སྡེ་ཞིག་གི་དམག་མི་སྐོར་ཞིག་གིས་མཉམ་དུ་བརྙན་ཐུང་ཞིག་ཕྱིར་བཀྲམས། དེའི་ནང་དུ་ཁོ་ཚོས་འབྲེལ་ཡོད་དམག་སྤྱི་ལ་སྐྱོན་བརྗོད་དང་། ཁོ་ཚོའི་དམག་སྤྱིས། ཁོ་ཚོ་ཡུ་དམག་གི་འགོག་སྲུང་ཧ་ཅང་བཙན་སར་གཏོང་བཞིན་པ་དང་། འདི་ནི་ཤེས་བཞིན་དུ་རང་སྲོག་གཅོད་དུ་བཏང་བ་ཞིག་ཡིན་པ་མ་ཟད། ད་ལྟ་གཡུལ་ས་འདིར་བཏང་བའི་དམག་མིའི་གྲངས་ཕྱེ་ཀ་ལས་ཕྱིར་གསོན་པོར་ཡོང་མ་ཐུབ་པ་གྱུར་སོང་ཞེས་བཤད།
•. ཡུ་རོབ་མཉམ་འབྲེལ་གྱིས་རཱ་ཤི་ཡའི་ཚོང་ཟོག་སྟེང་ཉེས་ཆད་བཀལ་བ་ལ་མ་ལྟོས་པར། ཡུ་རོབ་ཀྱི་ཚོང་པ་དག་གིས་རཱ་ཤི་ཡ་ནས་ཉ་སོགས་མཚོ་ཟས་ཀྱི་རིགས། ཡུ་སྒོར་ས་ཡ་ €709 ཡི་རིན་ཐང་ནང་འདྲེན་བྱས་ཟིན་པའི་གནས་ཚུལ་ཐོན།
•. དམག་འཁྲུག་འགོ་བཙུགས་པ་ནས། བདེ་འཇགས་ཀྱི་ཕྱིར་རཱ་ཤི་ཡའི་སྲིད་འཛིན་ཕུ་ཀྲན་གྱིས། ས་ཆ་འདྲ་མིན་དུ་བརྙན་ལམ་བརྒྱུད་གཏམ་བཤད་བྱེད་སའི་ཁང་པ་བཟོས་ཡོད་པ་དང་། ཁང་པའི་ནང་གི་ཡོ་ཆས་དང་དབྱིབས། བརྩིགས་གྱང་གི་མཚོན་མདོག་སོགས་གཅིག་གྱུར་བཟོས་ནས། ཁོས་ནམ་རྒྱུན་ས་ཆ་གཅིག་ཏུ་གཏམ་བཤད་སྤེལ་བཞིན་པ་ལྟ་བུའི་རྣམ་པ་སྟོན་བཞིན་པ་བཤད། དཔེར་ན་ཚོགས་འདུ་མང་པོ་ཞིག་རྒྱལ་ས་མོ་སི་ཁོའི་ཐག་ཉེའི་ལས་ཁུངས། ནོ་ཝོ་ ཨོ་གྷར་ཡོ་ཝོ་(Novo-Ogaryovo)རུ་ཚོགས་བཞིན་པ་བརྙན་ལམ་ནས་བསྟན་ནའང་། དོན་དངོས་ཚོགས་ཡུལ་ནི། ས་ཆ་འདི་ནས་སྤྱི་ལེ་བརྒྱ་ཕྲག་གི་ཕ་རོལ་ཡིན་པ་བཤད།
•. ཕུ་ཀྲན་གྱི་འདུག་གནས་གཙོ་བོ་དག་རྒྱལ་ས་མོ་སི་ཁོ་དང་། གྲོང་ཁྱེར་ཆེན་པོ་སན་ ཕི་ཀྲར་སི་ བྷར་གྷི། ལྷོ་ཕྱོགས་ཀྱི་མཚོ་ནག་གི་རྒྱུད་དུ་ཡོད་པའི་སོ་ཆི། ནོ་ཝི་གྷི་རེ་ཀྲི་མངའ་སྡེར་ཡོད་པའི་ཕུ་ཀྲན་གྱི་ཁང་པ་ཝལ་རྡེ་(Valday estate)བཅས་ཡིན་པ་དང་། ཕྱི་ལོ་ 2022 ལོ་སྟེ་དམག་འཁྲུག་འགོ་བཙུགས་པ་ནས། ཁོ་རྒྱལ་སར་འདུག་རྒྱུ་ལས་ཝལ་རྡེ་རུ་མང་བ་འདུག་བཞིན་པ་བཤད་ཅིང་། ཕུ་ཀྲན་གྱིས་ཕྱིར་བཀྲམས་པའི་བརྙན་མང་པོ་ཞིག་སྔར་ནས་བཟོས་ཟིན་པ་དང་། ནང་ལོགས་ཀྱི་རྣམ་པ་གཅིག་གྱུར་ཡིན་པའི་ལས་ཁུངས་ཁ་ཤས་ཤིག་ཡོད་པ། དབྱིན་ཇིའི་ཀྲེ་ལེ་གྷི་ར་ཧྥི་གསར་ཤོག་གིས་ཞིབ་འཇུག་བརྒྱུད་གནས་ཚུལ་སྤེལ།
- ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་སྐུ་ཚབ་ཝེ་ཀྲི་ཀོ་ཧྥི་དང་། རཱ་ཤི་ཡའི་སྲིད་འཛིན་ཕུ་ཀྲན་གྱི་སྐུ་ཚབ་གཉིས་ཀྱིས། དམག་མཚམས་འཇོག་ཐབས་དང་འབྲེལ། ཡིག་ཆ་དོན་ཚན་ 28 ཅན་ཞིག་བཟོས་པ་དེ་ཡུ་ཁུ་རན་དང་། ཡུ་རོབ་ཀྱིས་ཁས་མ་བླངས་པ་ལྟར། ད་ལྟ་སླར་ཡང་ཨ་རི་དང་ཡུ་ཁུ་རན་གྱི་སྐུ་ཚབ་མཉམ་འབྲེལ་གྱིས། ཡིག་ཆ་དོན་ཚན་ 20 ཅན་ཞིག་བཟོས། ཡིན་ན་ཡང་། འདིའི་ནང་དུ་རཱ་ཤི་ཡའི་དགོས་འདུན་གཙོ་བོ་དག་ཚུད་མི་འདུག་ཅེས། རཱ་ཤི་ཡས་ཁས་མ་བླངས་པ་བྷི་ལུམ་བྷར་གྷི་སྟེང་གནས་ཚུལ་བཀོད།
•. ད་ལྟ་ཡུ་དམག་གིས་བཟུང་ཡོད་པའི་ཡུ་ཁུ་རན་གྱི་རྡོ་ཉད་སི་ཀི་ས་ཁུལ་ནས། ཡུ་དམག་ཕྱིར་འཐེན་མིན་དེ་གནད་དོན་ཁག་ཤོས་སུ་གྱུར་ཡོད་པ་ལྟར། ཨ་རིས། ས་ཁུལ་འདི་དཔལ་འབྱོར་བསྟི་གནས་ཤིག་ཏུ་བསྒྱུར་རྒྱུའི་བསམ་ཚུལ་བཏོན་པར། ཛེ་ལན་སི་ཀེ་ཡིས། དཔལ་འབྱོར་བསྟི་གནས་ཤིག་ཏུ་བསྒྱུར་རྒྱུར་མོས་མཐུན་ཡོད་པའི་རྣམ་འགྱུར་བསྟན། ཡིན་ན་ཡང་ཁོས། ཆབ་སྲིད་ཀྱི་ཆ་ནས་སྔར་བཞིན་ཡུ་ཁུ་རན་གྱི་འོག་ཏུ་འཇོག་དགོས་པ་དང་། ཡུ་ཁུ་རན་གྱིས་སྤྱི་ལེ་ཅི་ཙམ་གྱི་བར་དམག་མི་ཕྱིར་འཐེན་དགོས་པ་བཞིན། རཱ་ཤི་ཡས་ཀྱང་དེ་ལྟར་དམག་མི་ཕྱིར་འཐེན་དགོས་ཞེས་བཤད། སྐད་ཆ་འདི་ཕུ་ཀྲན་གྱིས་ཁས་ལེན་རྒྱུའི་རྣམ་པ་མ་ཐོན།
•. ཟླ་བ་འདིའི་ཚེས་ 17 ཉིན། རཱ་ཤི་ཡའི་དམག་མི་ 3 ཨེ་སི་ཏོ་ནེ་ཡའི་རྒྱལ་ནང་ལ་འཛུལ་ཅིང་། དུས་ཡུན་ཐུང་ངུ་ཞིག་ཏུ་བསྡད་རྗེས་ཕྱིར་ལོག་པའི་གནས་ཚུལ་ཞིག་བྱུང་། ཁ་སང་ཨེ་སི་ཏོ་ནེ་ཡའི་ཕྱི་སྲིད་བློན་ཆེན་གྱིས། གལ་སྲིད་ཡང་བསྐྱར་འཛུལ་ཚེ་མེ་མདའ་འཕེན་རྒྱུ་ཡིན། གལ་སྲིད་རཱ་ཤི་ཡའི་གནམ་གྲུ་ནུབ་ཆིངས་ཀྱི་མཁའ་དབྱིངས་སུ་འཛུལ་ཚེ། ཐང་ལ་གཡུག་རྒྱུའི་ཉེན་ཁ་ཆེ་ཞེས་ཉེན་བརྡ་བཏང་། ད་དུང་ཁོས། གལ་སྲིད་རཱ་ཤི་ཡ་སྐད་ཆ་འདིར་ཡིད་མི་ཆེས་ན་ཚོད་ལྟ་བྱོས་ཞེས་མཐའ་ཚིག་བསྒྲགས།