ཀམ་བྷོ་ཀྲི་ཡ་དང་ཐེ་ལན་བར་རེ་ཞིག་མེ་མཚམས་འཇོག་རྒྱུ་ཡིན་པ་གྲོས་མཐུན། མེ་མཚམས་དེ་དེ་རིང་ཉིན་རྒྱབ་ནས་དངོས་སུ་ལག་བསྟར་འགོ་བཙུགས་ཟིན་པ་བསྒྲགས། མེ་མཚམས་འཇོག་རྒྱུ་ཁྱབ་བསྒྲགས་བྱས་རྗེས་ནས་ཕན་ཚུན་བར་གཏོར་རྒོལ་གྱི་གནས་ཚུལ་མ་བྱུང་བ་བཤད།
ལྷོ་ཤར་ཨེ་ཤ་ཡའི་རྒྱལ་ཁབ། ཐེ་ལན་དང་ཀམ་བྷོ་ཀྲི་ཡ་གཉིས་ཀྱི་བར་དུ་འདས་པའི་བདུན་ཕྲག་ 3 རིང་། ས་མཚམས་སུ་འཁྲུག་པ་ཤོར་ཅིང་ཕན་ཚུན་གྱི་རྒྱལ་ནང་ལ་གཏོར་རྒོལ་བྱས། དེ་རིང་རྒྱལ་ཁབ་གཉིས་ཀྱི་ཆེས་མཐོའི་དབུ་ཁྲིད་དག་མཉམ་འཛོམས་ཀྱིས། རེ་ཞིག་མེ་མཚམས་འཇོག་རྒྱུ་ཡིན་པ་གྲོས་མཐུན། མེ་མཚམས་དེ་དེ་རིང་ཉིན་རྒྱབ་ནས་དངོས་སུ་ལག་བསྟར་འགོ་བཙུགས་ཟིན་པ་བསྒྲགས། དེ་རིང་ཞོགས་པར་ཐེ་ལན་གྱི་མཁའ་དམག་གིས་ཀམ་བྷོ་ཀྲི་ཡའི་སྟེང་གཏོར་རྒོལ་འགའ་བྱས་པ་ལས། མེ་མཚམས་འཇོག་རྒྱུ་ཁྱབ་བསྒྲགས་བྱས་རྗེས་ནས་ཕན་ཚུན་བར་གཏོར་རྒོལ་གྱི་གནས་ཚུལ་མ་བྱུང་བ་བཤད།
ཀམ་བྷོ་ཀྲི་ཡའི་ཕྱི་སྲིད་བློན་ཆེན་ལྟར་ན། སང་ཉིན་གཟའ་ཉི་མར་རྒྱལ་ཁབ་གཉིས་ཀྱི་ཕྱི་སྲིད་བློན་ཆེན་གྱིས། རྒྱ་ནག་གི་ཕྱི་སྲིད་བློན་ཆེན་ཝང་ཡེ་དང་ལྷན་རྒྱ་ནག་ཡུ་ནན་ཞིང་ཆེན་དུ་ཐུག་རྒྱུ་དང་། ས་མཚམས་དང་འབྲེལ་བའི་གནད་དོན་ཐད་གྲོས་བྱ་རྒྱུ་ཡིན་པ་བསྒྲགས། འདས་པའི་ཉིན་ 20 ཡི་རིང་གི་འཐབ་འཁྲུག་ཁྲོད། ཉུང་མཐར་མི་ 101 བསད་ཅིང་། ས་མཚམས་ཀྱི་མི་ས་ཡ་ཕྱེད་ལྷག་གནས་གཞན་ལ་འབྲོ་དགོས་གྱུར། འདི་ནི་ད་ལོའི་ཕྱི་ཟླ་ 7 ནང་བྱུང་བའི་འཐབ་འཁྲུག་གི་རྗེས་སུ། ཡང་བསྐྱར་གདོང་ཐུག་བྱུང་བ་གཞི་རྒྱ་ཆེ་ཤོས་སུ་གྱུར།