ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་དང་། ཡུ་ཁུ་རན་གྱི་སྲིད་འཛིན་ཛེ་ལན་སི་ཀེ་གཉིས། སང་ཉིན་ས་གནས་ཀྱི་ཆུ་ཚོད་ 3:00 སྟེང་ཐུག་རྒྱུ་ཡིན་པའི་གནས་ཚུལ་ཐོན།
•. དེ་རིང་སླར་ཡང་རཱ་དམག་གིས། ཡུ་ཁུ་རན་གྱི་རྒྱལ་ས་ཁེ་ཝུ་ལ་འཕུར་མདའ་དང་། སྒྲི་རོན་གྱིས་ཚུར་རྒོལ་དྲག་པོ་བྱས་ཤིང་། འདིའི་ཁྲོད་མི་སེར་ཞིག་བསད་ཅིང་། གཞན་ཉུང་མཐར་མི་ 28 ལ་རྨས་སྐྱོན་འདྲ་མིན་བཟོས། ཐེངས་འདིར་གློག་ཁང་དང་མི་སེར་གྱི་སྡོད་གནས་ཁང་བརྩེགས་ལ་གཏོར་རྒོལ་ཐེབས་བཞིན་པའི་བརྙན་ཕྱིར་ཐོན།
•. རྒྱལ་སར་མི་འབུམ་ 6 ལ་གློག་མེད་པར་གྱུར། ཡུ་ཁུ་རན་ལྟར་ན་དེ་རིང་རཱ་དམག་གིས། སྒྲི་རོན་ 500 དང་ཧའེ་ཕེར་སོ་ནེ་ཁི་འཕུར་མདའ། ཁི་རུ་སི་འཕུར་མདའ། བྷ་ལི་སི་ཀྲི་ཁི་འཕུར་མདའ་སོགས་གྲངས་ 40 ཡས་མས་ཤིག་འཕངས་ཟིན་པ་བཤད། འདི་ནི་རཱ་དམག་གིས་ཉིན་ཞིག་ལ་རྒྱལ་སར་ཚུར་རྒོལ་བྱས་པ་གཞི་རྒྱ་ཆེ་ཤོས་ཤིག་དང་། འཕུར་མདའ་འཕངས་བ་མང་ཤོས་ཀྱི་ཉི་མ་ཞིག་ཏུ་གྱུར།
•. ཡུ་དམག་གི་ནང་དང་བླང་གིས་ཞུགས་ཡོད་པའི་རཱ་ཤི་ཡའི་དམག་སྡེའི་དམག་སྤྱི། སྒྲེ་ནེ་སི་ ཁཱ་པུ་སི་ཀྲེན་(Denis Kapustin)དང་། ཡོངས་གྲགས་སུ་ཝའེ་ཀྲི་རེག་སི་( White Rex)ཞེས་པ་གཡུལ་སར་བསད། ཁོ་ལྷོ་ཕྱོགས་ཀྱི་རྫ་པུ་རི་ཆི་ས་ཁུལ་དུ་སྒྲི་རོན་གྱིས་བསད་ཟིན་པ་བཤད། ཕྱི་ལོ་ 2023 ལོར་མི་འདིས་འགོ་འཁྲིད་པའི་རཱ་ཤི་ཡའི་མི་སེར་གྱིས་གྲུབ་པ། ཡུ་ཁུ་རན་གྱི་དམག་སྡེ་ཞིག་གིས་རཱ་ཤི་ཡའི་བྷི་ཡར་སི་ཀི་མངའ་སྡེར་ཕར་རྒོལ་བྱས་ཤིང་། དུས་དེ་ནས་བཟུང་མི་འདིའི་མིང་རྒྱལ་སྤྱིའི་གསར་ལམ་ཁག་ཏུ་ཁྱབ།
•. རཱ་དམག་གིས། ཡུ་ཁུ་རན་གྱི་ལྷོ་ཕྱོགས་མངའ་སྡེ་རྫ་པུ་རི་ཆིའི་གྲོང་བརྡལ། ཧུ་ལའེ་ཕོ་ལེ་(Huliaipole)ཞེས་པར་གློ་བུར་དུ་ཚུར་རྒོལ་གྱིས། ཡུ་དམག་གི་གཡུལ་སའི་བཀོད་འདོམ་ཁང་བཟུང་ཟིན་པ་ལྟར། ཡུ་དམག་གིས་ས་ཆ་འདི་ཕྱིར་འཕྲོག་ཆེད་ཕར་རྒོལ་ཆེན་པོ་འགོ་བཙུགས། ཐེངས་འདིར་རཱ་དམག་གི་ལག་ཏུ་ཡུ་དམག་གི་གློག་ཀླད་དང་། ཡིག་ཆ་སོགས་དམག་དོན་ཡོ་ཆས་ཕོན་ཆེན་ཤོར།
•. ཟླ་བ་འདིའི་ཚེས་ 24 ཉིན། རཱ་ཤི་ཡའི་ཤར་ཕྱོགས་ས་ཁུལ་གྱི་ཨུ་སུ་རེ་སི་ཀི་(Ussuriysk)ཞེས་པར་ཡོད་པའི་དམག་སྒར་ཞིག་ཏུ་གས་འཐོར་བྱུང་། ས་ཆ་འདི་ནི་བྱང་ཀོ་རེ་ཡ་དང་རྒྱ་ནག་གི་ས་མཚམས་དང་ཐག་ཉེ་བ་གསལ།
•. རཱ་ཤི་ཡའི་གྲོང་ཁྱེར་སན་ ཕི་ཀྲར་སི་ བྷར་གྷི་རུ་ཡེ་ཤུ་ཆོས་ཁང་ཞིག་ཏུ། ཡུ་ཁུ་རན་ལ་རྒྱབ་སྐྱོར་བྱེད་མཁན་གྱི་མི་སྐོར་ཞིག་འཛོམས་ཤིང་། ཁོ་ཚོས་སྲིད་འཛིན་ཛེ་ལན་སི་ཀེའི་བདེ་ཐང་དང་། ཡུ་དམག་གི་ཆེད་སྨོན་ལམ་འདེབས་བཞིན་པའི་སྐབས། རཱ་ཤི་ཡའི་བདེ་སྲུང་མི་སྣ་ནང་ལ་འཛུལ་ནས་དེ་དག་བཟུང་ཟིན་པའི་གནས་ཚུལ་ཐོན། དེ་དང་འབྲེལ་བརྙན་ཞིག་ཀྱང་ཕྱིར་ཐོན་ཅིང་། ཐེངས་འདིར་མི་ 70 ཡས་མས་ཤིག་བཟུང་ཟིན་པ་གསལ།
•. ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་དང་། ཡུ་ཁུ་རན་གྱི་སྲིད་འཛིན་ཛེ་ལན་སི་ཀེ་གཉིས། སང་ཉིན་ས་གནས་ཀྱི་ཆུ་ཚོད་ 3:00 སྟེང་ཐུག་རྒྱུ་ཡིན་པའི་གནས་ཚུལ་ཐོན། ནེའ་ཡོག་དུས་བབ་ལྟར་ན་སྒྲོ་ནལ་ཁྲི་རམ་ཕུས། ཐེངས་འདིར་ཐག་གཅོད་ཆེན་པོ་ཞིག་བྱ་ཐུབ་པ་སྔོན་དཔག་བྱེད་བཞིན་པ་བཤད། དེ་དང་ལྷན་སྒྲོ་ནལ་ཁྲི་རམ་ཕུས་ཡང་བསྐྱར། ངས་(རོགས་སྐྱོར་བྱ་རྒྱུར་)ཆོག་མཆན་མ་སྤྲད་ཚེ། ཡུ་ཁུ་རན་ལ་གང་ཡང་ཡོད་པ་མ་རེད། ཡུ་ཁུ་རན་ལ་ཡོད་པ་ནི་ང་རྒྱལ་ཁོ་ན་རེད་ཅེས་བཤད། སྒྲོ་ནལ་ཁྲི་རམ་ཕུ་དང་ཕུ་ཀྲན་གཉིས་ཀྱིས་ཁ་པར་བརྒྱུད་སྐད་ཆ་བཤད་རྒྱུ་ཡིན་པའི་གནས་ཚུལ་ཞིག་ཀྱང་ཐོན།
•. ཛེ་ལན་སི་ཀེ་ཡིས། ཡུ་ཁུ་རན་གྱི་བརྒལ་མི་རུང་བའི་ས་ཐིག་ནི། ད་ལྟ་རཱ་དམག་གིས་བཟུང་ཡོད་པའི་ཡུ་ཁུ་རན་གྱི་ས་ཆ། ཁྲིམས་ཐོག་ནས་རཱ་ཤི་ཡར་ནམ་ཡང་མི་སྤྲོད། ཡུ་ཁུ་རན་གྱིས་རཱ་ཤི་ཡར་ས་ཞིག་(ཡུ་དམག་གིས་བཟུང་བའི་རྡོན་པ་སི།?)སྤྲོད་རྒྱུ་མིན། རྫ་པུ་རི་ཆི་ས་ཁུལ་གྱི་ཉིང་རྡུལ་གློག་ཁང་དེ་རཱ་ཤི་ཡར་སྤྲོད་རྒྱུ་མིན་པ་དག་ཡིན། ཚོར་བ་རྣོ་བའི་གནད་དོན་གཞན་དག་གི་ཐད། ཡུ་ཁུ་རན་གྱི་མི་དམངས་ལ་སྐད་ཆ་དྲིས་རྗེས་ཐག་གཅོད་རྒྱུ་ཡིན་ཞེས་བཤད།
•. ད་དུང་ཁོས། ཨ་རི་དང་ཡུ་ཁུ་རན་གྱིས་བཟོས་པའི་ཡིག་ཆ་དོན་ཚན་ 20 ཅན་གྱི་ནང་དོན་བརྒྱ་ཆ་ 90% ཡི་ཐད་ད་ལྟ་གྲོས་འགྲིག་སོང་། ཡུ་ཁུ་རན་ལ་བདེ་སྲུང་ཁག་ཐེག་སྤྲོད་ཕྱོགས་དང་འབྲེལ་ཤོག་གྲངས་ 5 བཟོས་ཡོད། རག་ཟིན་ཡིག་ཆ་ལྷག་མ་དག་གྲ་སྒྲིག་གྲུབ་ཡོད། གཞན་དག་གི་སྐོར་སྒྲོ་ནལ་ཁྲི་རམ་ཕུ་དང་ལྷན་ཐད་ཀར་གྲོས་བསྡུར་བྱ་རྒྱུ་ཡིན་ཞེས་བཤད། དེ་རིང་ཛེ་ལན་སི་ཀེ་ཡིས། ཡུ་རོབ་དང་ཁེ་ན་ཀྲའི་དབུ་ཁྲིད་ཚོ་དང་ལྷན། ཁ་པར་བརྒྱུད་སྐད་ཆ་བཤད་རྒྱུ་ཡིན་པ། བྷི་ལུམ་བྷར་གྷི་སྟེང་གནས་ཚུལ་བཀོད།
•. ཨེག་སོ་སི་སྟེང་གནས་ཚུལ་བཀོད་པ་ལྟར་ན། གལ་སྲིད་ཕུ་ཀྲན་གྱིས་ཉིན་ 60 རིང་མེ་མཚམས་འཇོག་རྒྱུ་ཁས་བླངས་ཚེ། ཛེ་ལན་སི་ཀེ་ཡིས་རང་གི་འཆར་གཞི་དག་དང་འབྲེལ། ཡུ་ཁུ་རན་གྱི་མི་དམངས་ཁྲོད་བསམ་ཤོག་བསྡུ་རྒྱུ་ཡིན་པ་བཤད། དེ་བཞིན་སྒྲོ་ནལ་ཁྲི་རམ་ཕུས། འབྱུང་འགྱུར་ལོ་ 15 ཡི་རིང་ཡུ་ཁུ་རན་ལ་བདེ་སྲུང་ཁག་ཐེག་སྤྲོད་རྒྱུ་ཡིན་ཞེས་ཤོད་བཞིན་པ་དང། ཛེ་ལན་སི་ཀེ་ཡིས་དུས་ཡུན་དེ་ནི་ཐུང་དྲགས་འདུག་ཅེས་ཤོད་བཞིན་པའི་གནས་ཚུལ་ཞིག་ཀྱང་ཐོན།
•. རཱ་ཤི་ཡའི་ཕྱི་སྲིད་བློན་ཆེན་གཞོན་པས། ད་ལྟ་ཁྱབ་བཞིན་པའི་ཡིག་ཆ་དོན་ཚན་ 20 ཅན་དེ་ནི། འདས་པའི་བདུན་ཕྲག་འགའི་རིང་ཨ་རི་དང་རཱ་ཤི་ཡ་གཉིས་ཀྱིས་བཤད་པའི་སྐད་ཆ་དག་དང་ཧ་ཅང་ཁྱད་པར་འདུག་ཅེས་བཤད། རཱ་ཤི་ཡས་ད་ལྟ་བར་ཤོད་བཞིན་པ་ནི། སྒྲོ་ནལ་ཁྲི་རམ་ཕུ་དང་། ཕུ་ཀྲན་གཉིས་ཨ་རིའི་ཨ་ལ་སི་ཀ་མངའ་སྡེར་ཐུག་སྐབས་ཀྱི་སྐད་ཆ་དག་ནི་ང་ཚོས་རྩ་དོན་དུ་བཟུང་ཡོད་ལ། ང་ཚོ་དེ་ལས་ཕར་འགྱུར་རྒྱུ་མེད་ཅེས་པ་དེ་རེད། འོ་ན་ཨ་ལ་སི་ཀ་མངའ་སྡེར་ཁོ་ཚོས་སྐད་ཆ་ཅི་ཞིག་བཤད་ཟིན་པ་ཡིན་ནམ་ཞེས་པ་དེ། དོན་དངོས་ཀྱི་དྲི་བ་ཆེ་ཤོས་སུ་གྱུར།
•. ཡུ་ཁུ་རན་གྱི་དམག་དོན་གསང་བའི་ལས་ཁུངས་ཀྱི་དབུ་ཁྲིད། དམག་སྤྱི་བྷུ་རྡ་ནོ་ཝི་ཡིས། ལོ་རྗེས་མར་ཕུ་ཀྲན་གྱིས་དམག་མི་གསར་བ་འབུམ་ 4 བསྡུ་རྒྱུའི་འཆར་གཞི་འདུག་ཅེས་བཤད། ད་ལྟ་ཡུ་ཁུ་རན་དུ་རཱ་དམག་འབུམ་ 7 ཡོད་པ་རཱ་ཡུ་གཉིས་ཀྱིས་བཤད་ཅིང་། ཡུ་ཁུ་རན་ལྟར་ན། ཟླ་བ་རེར་རཱ་དམག་ཁྲི་ 3 ནས་ཁྲི་ 4 བར་ཤི་རྨས་ཐེབས་བཞིན་པ་བཤད།