རཱ་ཤི་ཡའི་ཕྱི་སྲིད་བློན་ཆེན་སར་གྷེ་ལ་ཝི་རོ་ཡིས་ཞེ་ཅེན་ཕིན་ལ། གལ་སྲིད་ཐེ་ཝན་མཚོ་འགག་གི་གནས་ཚུལ་སྡུག་ཏུ་ཕྱིན་ཚེ། རཱ་ཤི་ཡ་རྒྱ་ནག་གི་ཕྱོགས་སུ་ལངས་རྒྱུ་ཡིན་ཞེས་བཤད།
གཟའ་ཟླ་བའི་ཞོགས་པ་ནས། སླར་ཡང་རྒྱ་ནག་གི་མཁའ་མཚོ་གཉིས་ཀྱི་དམག་དཔུང་ཐེ་ཝན་གྱི་ཐག་ཉེར་སྤུང་འགོ་བཙུགས་ཤིང་། སང་ཉིན་ནས་བཟུང་དམག་སྦྱོང་ཆེན་པོ་ཞིག་གི་འགོ་གཟུག་རྒྱུ་ཡིན་པ་བསྒྲགས། དེ་མ་ཐག་ཐེ་ཝན་དམག་དཔུང་གིས། གནམ་སྲུང་མ་ལག་དག་ཕྱིར་བཏོན་ཅིང་། མཚོ་ཐོག་ཏུ་གྲུ་གཟིངས་གཏོང་བ་སོགས་གཞི་རྒྱ་ཆེ་བའི་དམག་དོན་གྲ་སྒྲིག་འགོ་བཙུགས། ཐེངས་འདིར་ཐེ་ཝན་མཚོ་རྒྱུད་དུ་བཏང་བའི་རྒྱ་ནག་གི་གྲུ་གཟིངས་སོགས་ཀྱི་སྟེང་། མེས་རྒྱལ་གཅིག་གྱུར་ངེས་པར་དུ་ལེགས་པར་འགྲུབ་དགོས་པའི་བསྒྲགས་ཚིག་བཀོད།
འདི་ནི་ཉེ་དུས་ཨ་རིས་ཐེ་ཝན་ལ་འགོག་སྲུང་གོ་ལག་འཚོང་རྒྱུ་ཡིན་པ་བསྒྲགས་རྗེས་བྱུང་། དེ་དང་ལྷན་ཁ་སང་རཱ་ཤི་ཡའི་ཕྱི་སྲིད་བློན་ཆེན་སར་གྷེ་ལ་ཝི་རོ། རྒྱ་ནག་གི་རྒྱལ་ས་པེ་ཅིང་དུ་སླེབས་ཤིང་ཞེ་ཅེན་ཕིན་དང་ལྷན་ཐུག སྐབས་དེར་སར་གྷེ་ལ་ཝི་རོ་ཡིས། རཱ་ཤི་ཡའི་ངོས་ནས་ཐེ་ཝན་དེ་རྒྱ་ནག་གི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ་བསྐྱར་དུ་ངོས་འཛིན་དང་། ཐེ་ཝན་རང་བཙན་དང་འབྲེལ་བའི་བྱ་འགུལ་ཚང་མར་ངོ་རྒོལ་བྱ་རྒྱུ་ཡིན་ཞེས་བསྒྲགས།
ད་དུང་ཁོས། (ནུབ་ཕྱོགས་ཀྱིས་)ཐེ་ཝན་བེད་སྤྱོད་ཀྱིས་རྒྱ་ནག་ལ་རྒོལ་བཞིན་པ་དང་། རྒྱ་ནག་ལ་རང་གི་མངའ་ཁོངས་བདག་དབང་སྲུང་སྐྱོབ་བྱ་རྒྱུའི་ཐོབ་ཐང་ཆ་ཚང་ཡོད་པ། གལ་སྲིད་ཐེ་ཝན་མཚོ་འགག་གི་གནས་ཚུལ་སྡུག་ཏུ་ཕྱིན་ཚེ། རཱ་ཤི་ཡ་རྒྱ་ནག་གི་ཕྱོགས་སུ་ལངས་རྒྱུ་ཡིན་ཞེས་བཤད།