སྒྲོ་ནལ་ཁྲི་རམ་ཕུས། ཐེངས་འདིའི་བྱ་འགུལ་ཁྲོད་ཨ་རིའི་དམག་མིར་འཆི་སྐྱོན་བྱུང་མེད་ལ། གནམ་གྲུ་གཅིག་ཀྱང་གཏོར་ཐུབ་མེད། ཐད་འཕུར་གནམ་གྲུ་ཞིག་ལ་གཏོར་སྐྱོན་ཆེན་པོ་ཞིག་ཐེབས་སོང་། ཡིན་ན་ཡང་། ང་ཚོས་བདེ་ལེགས་ངང་ཕྱིར་བླངས་ཟིན་ཅེས་བཤད།
ཁ་སང་གཟའ་སྤེན་པའི་ཉིན། ཨ་རིའི་དམག་དཔུང་གིས་ཝེ་ནེ་ཛོ་ལའི་རྒྱལ་ས། ཀཱ་ར་ཀ་སི་གྲོང་ཁྱེར་ལ་གཏོར་རྒོལ་གྱིས་དུས་ཐུང་ནང་ཝེ་ནེ་ཛོ་ལའི་དམག་དོན་བསྟི་གནས་དང་། གནམ་ཐང་། གོ་ལག་སོགས་ལ་གཏོར་རྒོལ་དྲག་པོ་བྱས་ཤིང་། སྲིད་འཛིན་སྒེར་གཅོད་པ་མཱ་རྡུ་རོ་དང་། ཁོའི་བཟའ་ཟླ་གཉིས་ཨ་རིའི་དམིགས་བསལ་དམག་སྡེ་(Delta force)
ཡིས་བཟུང་། མདང་དགོང་གནམ་གྲུ་བརྒྱུད་ད་ལྟ་ཁོ་ནེའུ་ཡོག་གྲོང་ཁྱེར་གྱི་བཀག་མཉར་ཁང་ཞིག་(MDC Brooklyn)ཏུ་བཅུག་ཡོད་པའི་མཚམས།
དུས་ཡུན་ཐུང་བའི་དམག་དོན་བྱ་འགུལ་འདིར། ཆབ་སྲིད་ཀྱི་ཆ་ནས་བསྟོད་སྨད་སྣ་ཚོགས་བྱས་ཀྱང་། དམག་དོན་གྱི་ཆ་ནས་ཧ་ཅང་ལེགས་འགྲུབ་ལྡན་པ་ཞིག་ཡིན་པ་ཐུན་མོང་གིས་ཁས་ལེན། ཨ་རིའི་དམག་སྤྱི་སྒྲེན་ཁེན་(Dan Caine)ཡིས། མཱ་རྡུ་རོ་གསོན་བཟུང་བྱེད་རྒྱུའི་དམག་དོན་བྱ་འགུལ་འདིའི་མིང་ལ། མཐའ་མའི་ཆོད་སེམས་བྱ་འགུལ་(Operation Absolute Resolve)ཞེས་འབོད་ཅིང་། བྱ་འགུལ་འདི་སྤེལ་རྒྱུར་ཟླ་བ་འགའི་རིང་གྲ་སྒྲིག་བྱས་ཟིན་པ་བསྒྲགས།
འདིའི་ཁྲོད་ཨ་རིའི་མཁའ་མཚོ་སྐམ་གསུམ་གྱི་དམག་མི་དང་། མཁའ་དབྱིངས་དཔུང་སྡེ། གསང་བའི་ལས་ཁུངས་བཅས་ཞུགས་ཡོད་པ་བསྒྲགས། ཟླ་བ་འདིའི་ཚེས་ 2 ཉིན་གྱི་མཚན་མོའི་ཝ་ཤིན་ཀྲོན་གྱི་ཆུ་ཚོད་ 10:46 (རྒྱ་གར་གྱི་ཚེས་ 3 གྱི་ཞོགས་པའི་ཆུ་ཚོད་ 9:16)སྟེང་།
སྲིད་འཛིན་སྒྲོ་ནལ་ཁྲི་རམ་ཕུས་བྱ་འགུལ་འགོ་འཛུགས་རྒྱུར་ཆོག་མཆན་སྤྲད་ཟིན་པ་དང་། བྱ་འགུལ་འདིའི་ཆེད་གནམ་ཐང་ 20 ནས་གནམ་གྲུ་ 150 ཝེ་ནེ་ཛོ་ལའི་ཕྱོགས་སུ་བཏང་ཟིན་པ་བསྒྲགས།
མཱ་རྡུ་རོ་དངོས་སུ་འཛིན་མཁན་གྱི་དམག་སྡེ་ཐད་འཕུར་གནམ་གྲུ་བརྒྱུད་བཏང་ཟིན་པ་དང་། སྐམ་ཐོག་ནས་མཱ་རྡུ་རོ་ཡི་སྡོད་གནས་སུ་འཛུལ་ཅིང་། ས་གནས་ཀྱི་མཚན་མོའི་ཆུ་ཚོད་ 2:01 སྟེང་མཱ་རྡུ་རོ་དང་། ཁོའི་བཟའ་ཟླ་གཉིས་བཟུང་ཟིན་པ་བཤད། སྐམ་ཐོག་ཏུ་དངོས་སུ་འབབ་མཁན་གྱི་དམག་སྡེ་འདིར་མཁའ་དབྱིངས་ནས། འཐབ་འཛིང་གནམ་གྲུ་ F-22 དང་ F-35 ། གཞན་ཡང་གཏོར་རྒོལ་གནམ་གྲུ་ B-1 དང་སྒྲི་རོན་བཅས་ཀྱིས་སྲུང་སྐྱོབ་བྱས་ཡོད་པ་དང་། ཐེངས་འདིའི་བྱ་འགུལ་ཁྲོད་ཐད་འཕུར་གནམ་གྲུ་ཞིག་ལ་གཏོར་རྒོལ་ཐེབས་ཟིན་ནའང་། བདེ་ལེགས་ངང་ཕྱིར་འཕུར་ཐུབ་ཟིན་པ་བསྒྲགས།
🔘 གཤམ་དུ་བཀོད་པའི་གནས་ཚུལ་དག་གི་ཁྲོད། སྲིད་འཛིན་སྒྲོ་ནལ་ཁྲི་རམ་ཕུས། ཧྥོག་སི་གསར་ཁང་ལ་བཤད་པ་དང་། ཁོ་རང་གིས་དངོས་སུ་ཡོངས་ཁྱབ་གསལ་བསྒྲགས་སྐབས་བཤད་པའི་སྐད་ཆ་དག་གི་སྙིང་པོ་དག་བསྡུས་ཡོད།
སྒྲོ་ནལ་ཁྲི་རམ་ཕུས། ཐེངས་འདིའི་བྱ་འགུལ་ཁྲོད་ཨ་རིའི་དམག་མིར་འཆི་སྐྱོན་བྱུང་མེད་ལ། གནམ་གྲུ་གཅིག་ཀྱང་གཏོར་ཐུབ་མེད། ཐད་འཕུར་གནམ་གྲུ་ཞིག་ལ་གཏོར་སྐྱོན་ཆེན་པོ་ཞིག་ཐེབས་སོང་། ཡིན་ན་ཡང་། ང་ཚོས་བདེ་ལེགས་ངང་ཕྱིར་བླངས་ཟིན་ཅེས་བཤད། ནེའུ་ཡོག་དུས་བབ་ལྟར་ན། ཐེངས་འདིའི་བྱ་འགུལ་ཁྲོད་ཝེ་ནེ་ཛོ་ལའི་རྒྱལ་ནང་དུ་མི་ 40 ཡས་མས་བསད་ཟིན་པ་དང་། དེའི་ཁྲོད་མི་སེར་ཡང་ཚུད་ཡོད་པའི་གནས་ཚུལ་བཀོད། སི་ཨན་ཨན་གསར་ཁང་ལྟར་ན་ཨ་རིའི་དམག་མི་སྐོར་ཞིག་རྨས་ཟིན་པ་བཤད།
སྒྲོ་ནལ་ཁྲི་རམ་ཕུས། ང་ཚོས་རྒྱལ་ས་ཀཱ་ར་ཀ་སིའི་ཆ་ཤས་ཆེན་པོ་ཞིག་གི་གློག་ཐོག་མར་བཅད་ཟིན། རྒྱལ་སའི་མཁའ་དབྱིངས་ཧ་ཅང་མུན་ནག་ཆགས་སོང་། འདི་ནི་ངས་གློག་བརྙན་ཞིག་ལ་ལྟ་བཞིན་པ་ལྟ་བུ་ཞིག་རེད། མཱ་རྡུ་རོ་(སྲུང་སྐྱོབ་ཁང་གི་ནང་དུ་?)ནང་དུ་འགྲོ་ཐབས་བྱས་ཀྱང་ཐར་མ་ཐུབ། ངས་མཱ་རྡུ་རོ་ལ། ཁྱོད་ཀྱིས་མགོ་སྒུར་དགོས་ཞེས་བཤད་པ་ཡིན། ཡིན་ན་ཡང་། ཁོས་མགོ་སྒུར་རྒྱུ་མིན་ཞེས་བཤད་སོང་། མཐའ་མ་དེར་ཁོས་གྲོས་མོལ་བྱ་འདོད་འདུག སྐབས་དེར་ང་ལའང་གྲོས་མོལ་བྱ་འདོད་མི་འདུག་ཅེས་བཤད།
ཁོས་མུ་མཐུད་དུ། གནམ་གཤིས་ཀྱི་རྐྱེན་པས་ང་ཚོས་བྱ་འགུལ་འདི་སྤེལ་རྒྱུར་ཉི་མ་ 4 སྒུག་དགོས་བྱུང་ཞེས་བཤད། རྒྱལ་སྲིད་དྲུང་ཆེ་མར་ཀོ་རུ་བྷེའོ་ཡིས། གནས་ཚུལ་འདི་འདྲ་ཞིག་མི་འབྱུང་ཆེད། མཱ་རྡུ་རོ་ལ་གདམ་ཀ་གཞན་ཁ་ཤས་ཡོད་པ་རེད། ང་ཚོས་ཁོ་ལ་གང་ཡག་བྱས་པ་ཡིན། ཡིན་ན་ཡང་། ཁོས་མི་རྒོད་ཞིག་ལྟར་བྱ་རྒྱུའི་ལམ་ཀ་དེ་བདམ་པ་རེད་ཅེས་བཤད། ཨ་རིས། གལ་སྲིད་མཱ་རྡུ་རོ་ཡིས་མགོ་བསྒུར་ཚེ། ཁོ་དང་ཁོའི་ནང་མི་རཱ་ཤི་ཡ་དང་། བྷེ་ལ་རུ་སུ་གང་རུང་ལ་བདེ་འཇགས་ངང་འགྲོ་རུ་འཇུག་ཆོག་ཅེས་བཤད་ཟིན་པའི་གནས་ཚུལ་སྔར་ནས་ཐོན་ཟིན།
ད་དུང་སྒྲོ་ནལ་ཁྲི་རམ་ཕུས། འདིས་རྒྱལ་ཁབ་གཞན་དག་གིས་ང་ཚོར་བརྙས་བཅོས་བྱེད་མི་ཐུབ་པའི་བརྡ་བཏང་ཟིན་བསམས་ཡོད། ཉལ་ཐ་ལ་བརྟེན་ནས་ལོ་རེར་ང་ཚོའི་མི་འབུམ་ 3 རེའི་སྲོག་འཆོར་གྱི་ཡོད། ད་ལྟ་ནས་ང་ཚོས་རྒྱལ་ཁབ་གཞན་ལ་འདི་འདྲ་བྱ་རུ་འཇུག་རྒྱུ་མིན་ཞེས་བཤད། ཨ་རི་ལྟར་ན། ཨ་རིའི་རྒྱལ་ནང་དུ་ལྷོ་ཕྱོགས་རྒྱལ་མཚམས་ནས། ཉལ་ཐ་དང་ཁྲིམས་འགལ་སྐྱབས་བཅོལ་བ་མང་པོ་ཞིག་འཛུལ་བའི་རྒྱབ་ཏུ། ཝེ་ནེ་ཛོ་ལ་དང་ཀོ་ལིམ་བྷི་ཡ་སོགས་ཡོད་པ་འདོད།
🔘 འདིའི་རྗེས་སུ་ཅི་ཞིག་འབྱུང་རྒྱུ་ཡིན་ནམ།
ཝེ་ནེ་ཛོ་ལའི་ཆེས་མཐོའི་ཁྲིམས་ཁང་གིས། སྲིད་འཛིན་གཞོན་པ་ལྕམ་རྡེལ་སེ་རོ་ རྡི་རེ་གྷེ་སི་(Delsi Rodriguez)བར་བརྒལ་སྲིད་འཛིན་དུ་བསྐོས། མོས་ཡོངས་ཁྱབ་བསྒྲགས་གཏམ་ཞིག་སྤེལ། མོས། ཝེ་ནེ་ཛོ་ལའི་ཁྲིམས་མཐུན་སྲིད་འཛིན་གཅིག་བུ་ནི། ནེ་ཀོ་ལ་སི་ མཱ་རྡུ་རོ་ཡིན་པ་དང་། ཨ་རིས་ཁོ་དང་ཁོའི་བཟའ་ཟླ་གཉིས་གློད་གྲོལ་གཏོང་དགོས་ཞེས་དང་། ཝེ་ནེ་ཛོ་ལ་ནམ་ཡང་རྒྱལ་ཁབ་གཞན་གྱི་མི་སེར་སྤེལ་ཡུལ་དུ་འགྱུར་མི་སྲིད་ཅེས་བཤད། སྒྲོ་ནལ་ཁྲི་རམ་ཕུས། བུད་མེད་འདི་དང་རྒྱལ་སྲིད་དྲུང་ཆེ་མར་ཀོ་རུ་བྷེའོ་བར་ཁ་པར་བརྒྱུད་གླེང་མོལ་བྱས་ཟིན་པ་དང་། མོས་ཝེ་ནེ་ཛོ་ལ་ཡང་བསྐྱར་རླབས་ཆེན་ཞིག་ཏུ་བསྒྱུར་འདོད་འདུག་ཅེས་བཤད།
སྒྲོ་ནལ་ཁྲི་རམ་ཕུས། (དགོས་མཁོ་བྱུང་ན།?)ང་ཚོས་ཝེ་ནེ་ཛོ་ལའི་གཞུང་སྟངས་འཛིན་བྱ་རྒྱུ་ཡིན། ཝེ་ནེ་ཛོ་ལའི་རྒྱལ་ནང་ལ་ཨ་རིའི་དམག་དཔུང་དངོས་སུ་གཏོང་རྒྱུའི་གྲ་སྒྲིག་གྲུབ་ཟིན། མཱ་རྡུ་རོ་ལ་བློ་དཀར་མཁན་ཉུང་ངུ་ཞིག་ལས་མེད། གལ་སྲིད་ཁོ་ཚོས་མུ་མཐུད་དུ་མཱ་རྡུ་རོ་ལ་བློ་དཀར་རྒྱུ་ཡིན་ཟེར་ན། ཁོ་ཚོར་གནས་ཚུལ་ཧ་ཅང་ངན་པ་ཞིག་འབྱུང་ངེས་ཡིན། ངས་བསམས་ན་ཁོ་ཚོའི་མང་ཆེ་བ་འགྱུར་བ་ཐེབས་ཟིན་པ་རེད། ཝེ་ནེ་ཛོ་ལ་དང་འབྲེལ་བའི་བྱ་འགུལ་ད་དུང་མཇུག་བསྡུས་མེད། ང་ཚོས་གོམ་སྟབས་གཉིས་པ་གྲ་སྒྲིག་བྱས་ཟིན། དགོས་མཁོ་བྱུང་ན་སྔར་ལས་གཞི་རྒྱ་ཆེ་བའི་གཏོར་རྒོལ་བྱ་རྒྱུ་ཡིན་ཞེས་བཤད།
ད་དུང་ཁོས། ཝེ་ནེ་ཛོ་ལས་ཨ་རིའི་རྡོ་སྣུམ་དང་རྒྱུ་དངོས་ཕོན་ཆེན་བརྐུས་ཟིན་ཅེས། ཨ་རིས་ཝེ་ནེ་ཛོ་ལ་ནས་རྡོ་སྣུམ་ཐོབ་ཐབས་བྱ་རྒྱུ་ཡིན་པ་གསལ་བོར་བསྟན། ཝེ་ནེ་ཛོ་ལ་ནི་འཛམ་གླིང་གི་རྡོ་སྣུམ་གཏེར་ཁ་མང་ཤོས་ཀྱི་རྒྱལ་ཁབ་ཅིག་ཡིན་པ་ལ། ཆབ་སྲིད་ལམ་ལུགས་ཀྱི་རྐྱེན་པས་སྤྱི་འབངས་ཕལ་ཆེ་བ་ཧ་ཅང་སྐྱོ་བོའི་གནས་སུ་ལྷུང་། དེ་བཞིན་ལོ་སྔོན་མར་ནོ་བྷེལ་ཞི་བདེ་གཟེངས་རྟགས་ཐོབ་མཁན། ཝེ་ནེ་ཛོ་ལའི་ཕྱོགས་འགལ་ཚོགས་པའི་དབུ་ཁྲིད། ལྕམ་མཱ་ཅ་རྡོ་ཡི་སྐོར་ལ་སྒྲོ་ནལ་ཁྲི་རམ་ཕུས། མོ་རང་བུད་མེད་ཡག་པོ་ཞིག་རེད། ཡིན་ན་ཡང་། མོ་ལ་ཝེ་ནེ་ཛོ་ལར་རྒྱབ་སྐྱོར་དང་གུས་ཞབས་མི་འདུག་ཅེས་བཤད།
སྐད་ཆ་འདིས་མི་མང་པོར་བློ་དོགས་བསླངས། སྒྲོ་ནལ་ཁྲི་རམ་ཕུའི་དམིགས་ཡུལ་ནི། ཡུལ་འདིའི་རྡོ་སྣུམ་ཡིན་པ་ལས་དོན་ལྡན་གྱི་མང་གཙོ་ཞིག་སྤེལ་རྒྱུ་དེ་མ་རེད་ཅེས་པ་དེ་རེད། ད་དུང་སྒྲོ་ནལ་ཁྲི་རམ་ཕུས། མེག་སེ་ཀོ་དང་ཀོ་ལིམ་བྷེ་ཡ། ཀུ་པ་སོགས་ལ་ཉེན་བརྡ་བཏང་། ཁོས། མེག་སེ་ཀོའི་སྲིད་འཛིན། ལྕམ་ཤན་བྷོམ་བུད་མེད་ཡག་པོ་ཞིག་ཡིན་ནའང་། མེག་སེ་ཀི་ནི་ནག་ཚོགས་ཀྱིས་བཟུང་འདུག མོ་རང་ནག་ཚོགས་ལ་ཧ་ཅང་སྐྲག་གི་འདུག་ཅེས་ང་ལ་བཤད་སོང་ཞེས་བཤད།
🔘 རྒྱལ་སྤྱིའི་རྣམ་འགྱུར།
རྒྱ་ནག་ཕྱི་སྲིད་ལྷན་ཁང་གིས། ང་ཚོ་གནས་ཚུལ་འདིས་ཧ་ལས་སུ་བཅུག་སོང་། ཨ་རིས་རྒྱལ་ཁབ་རང་བཙན་པ་ཞིག་དང་། དེའི་སྲིད་འཛིན་ལ་རྒོལ་བའི་སྦྱོར་བ་བརྩམས་པར་ང་ཚོས་སྐྱོན་བརྗོད་དྲག་པོ་བྱེད་བཞིན་ཡོད། ང་ཆེ་ང་བཙན་གྱི་ཨ་རིའི་བྱེད་སྟངས་འདི་ནི། རྒྱལ་སྤྱིའི་ཁྲིམས་དང་འགལ་བ་ཞིག་དང་། ཝེ་ནེ་ཛོ་ལའི་མངའ་ཁོངས་བདག་དབང་ལ་རྩིས་མེད་བཏང་བ་ཞིག་རེད། འདི་ནི་ལ་ཀྲིན་ཨ་མེ་རི་ཀ་དང་ཁཱ་རེ་བྷེ་ཡན་མཚོ་རྒྱུད་ཀྱི་ཞི་བདེ་དང་། བདེ་འཇགས་ལ་ཉེན་ཁ་ཆེན་པོ་ཞིག་རེད། ཀྲུང་གོའི་ངོས་ནས་འདི་ལ་མཐའ་གཅིག་ཏུ་ངོ་རྒོལ་བྱེད་བཞིན་ཡོད།
ང་ཚོས་ཨ་རིའི་ཕྱོགས་ནས་རྒྱལ་སྤྱིའི་ཁྲིམས་དང་། རྒྱལ་ཚོགས་ཀྱི་རྩ་དོན་བརྩི་རྒྱུ་དང་། རྒྱལ་ཁབ་གཞན་གྱི་མངའ་ཁོངས་བདག་དབང་དང་། བདེ་འཇགས་ལ་གནོད་མི་བསྐྱལ་རྒྱུར་འབོད་སྐུལ་ཞུ་བཞིན་ཡོད་ཅེས་བྲིས། འདིའི་ལན་ཨ་རིའི་གྲོས་ཚོགས་གོང་མའི་འཐུས་མི་ལིན་ཛེ་གྷི་རམ་གྱིས། རྒྱ་ནག་གི་གྲོགས་པོ་ཚོས་གལ་སྲིད་མཱ་རྡུ་རོ་དང་ལྷན་ཐུག་འདོད་ཡོད་ཚེ། ད་ལྟ་ཁོ་ལ་ཁ་བྱང་གསར་བ་ཞིག་ཡོད་པ་རེད། ཡང་བསྐྱར་ཁོ་དང་ལྷན་ཐུག་རྒྱུའི་དུས་ཚོད་བཟོ་རྒྱུ་ཧ་ཅང་ཁག་པོ་རེད། ཡིན་ན་ཡང་། ཁྱེད་ཚོར་མཚོན་ན་ཁོ་ལ་ཐུག་རྒྱུ་དེ་ཧ་ཅང་གལ་ཆེན་ཡིན་པ་ངས་ཤེས་ཡོད། ཁྱོད་ཚོའི་དམིགས་ཡུལ་འགྲུབ་པར་ཤོག་ཅེས་བྲིས།
ད་དུང་ལིན་ཛེ་གྷ་རམ་གྱིས། རྒྱ་ནག་གིས་སྒེར་གཅོད་པ་མཱ་རྡུ་རོ་ལྟ་བུ་དག་ལ་རྒྱབ་སྐྱོར་དང་། ཕུ་ཀྲན་གྱི་ལག་ནས་རྡོ་སྣུམ་ཉོས་ནས་མུ་མཐུད་དུ་དམག་འཁྲུག་རྒྱག་རྒྱུར་ནུས་པ་སྤྲོད་བཞིན་ཡོད། ཨེ་རན་གྱི་རྡོ་སྣུམ་ཉོས་ནས། ཨ་ཡ་ལ་ཏོ་ལར་རྒྱབ་སྐྱོར་བྱ་མིན་ཡང་བསྐྱར་བསམ་བློ་ཐོངས། རྒྱ་ནག་གིས་གོ་ལའི་སྟེང་གི་མི་ངན་ཚང་མ་དང་མཐུན་གྲོགས་བཟོས་ནས། རྙོག་གྲའི་མེ་ལྕེ་འབར་དུ་འཇུག་བཞིན་ཡོད། ད་ལྟ་ཁོ་ཚོ་རང་གིས་བཟོས་པའི་རྙོག་གྲ་དག་ལ་སྐྱིན་ཚབ་སྤྲོད་རྒྱུའི་དུས་ལ་བབས་འདུག་ཅེས་བྲིས།
རཱ་ཤི་ཡའི་ཕྱི་སྲིད་ལྷན་ཁང་གིས། ཁྲིམས་མཐུན་གྱི་འོས་བསྡུ་བརྒྱུད་ཡོང་བ། ཝེ་ནེ་ཛོ་ལའི་སྲིད་འཛིན་མ་རྡུ་རོ་དང་ཁོའི་བཟའ་ཟླ་གཉིས་ཨ་རིས་གློད་གྲོལ་གཏོང་དགོས། ང་ཚོས་གནད་དོན་ཚང་མ་གྲོས་མོལ་གྱི་ལམ་ནས་སེལ་རྒྱུར་དམིགས་པ་གཏོང་བཞིན་ཡོད་ཅེས་བཤད། ཐེངས་འདིར་ཨེ་རན་དང་བྷེ་ལ་རུ་སོགས་ཀྱིས་ཀྱང་སྐྱོན་བརྗོད་བྱས།
གཞན་ཡང་ཡུ་རོབ་མཉམ་འབྲེལ་གྱི་དབུ་ཁྲིད་ཚོས་ཨ་རིའི་བྱ་འགུལ་འདི་ལ་སྐྱོན་བརྗོད་མ་བྱས། དབྱིན་ཇིའི་སྲིད་བློན་གྱིས་གློ་བུར་བའི་གནས་ཚུལ་འདི་ལ་ཧ་ལས་པའི་རྣམ་འགྱུར་བསྟན། ཧྥ་རན་སིའི་རྙིང་ཞེན་ཞོག་ཁག་གི་ལྕམ་མཱ་རེན་ལི་ཕན་གྱིས། མཱ་རྡུ་རོ་ཡིས་ཕྱོགས་འགལ་ཚོར་བཙན་གནོན་དང་། སྡུག་རྩུབ་ཀྱི་སྦྱོར་བ་མང་པོ་བརྩམས་ཟིན་པས་ཁོ་མི་ངན་ཞིག་ཡིན་པའི་རྒྱུ་མཚན་སྟོང་ཕྲག་ཡོད། ཡིན་ན་ཡང་། རྒྱལ་ཁབ་ཅིག་གི་མངའ་ཁོངས་བདག་དབང་ལ་མ་བརྩིས་པ་ནི། མ་འགྲིག་པ་ཞིག་དང་འདིའི་ཐད་སྐད་ཆ་བཤད་ས་ཞིག་ལྷག་མེད་ཅེས་བཤད།
ནེའུ་ཡོག་གྲོང་ཁྱེར་གྱི་སྤྱི་ཁྱབ་གསར་བ། རང་ཉིད་སྤྱི་ཚོགས་རིང་ལུགས་པ་ཞིག་ཡིན་པ་ཤོད་མཁན། ཁ་ཆེ་ན་གཞོན་མན་སྒྲ་ནེ་ཡིས། སྒྲོ་ནལ་ཁྲི་རམ་ཕུའི་བྱེད་སྟངས་འདི་ནི་ཨ་རིའི་ཁྲིམས་དང་། རྒྱལ་སྤྱིའི་ཁྲིམས་གཉིས་ཀར་འགལ་བ་ཞིག་དང་། འདིས་ནེའུ་ཡོག་གྲོང་ཁྱེར་གྱི་མི་ཚོར་ཤུགས་རྐྱེན་ཐེབས་རྒྱུ་ཡིན་པ་བཤད། ད་དུང་ཁོས། ཨ་རིས་རང་ངོས་ནས་རྒྱལ་ཁབ་གཞན་གྱི་མངའ་ཁོངས་བདག་དབང་ལ་གཏོར་རྒོལ་བྱས་པ་ནི། དམག་འཁྲུག་རྒྱག་རྒྱུར་ཁྱབ་བསྒྲགས་བྱས་པ་ཞིག་རེད་ཅེས་བཤད།