སྒྲོ་ནལ་ཁྲི་རམ་ཕུས། དམག་འཁྲུག་འདི་མཚམས་འཇོག་མི་ཐུབ་པའི་རྒྱུ་མཚན་གཙོ་བོ་ནི་ཕུ་ཀྲན་ཡིན་པ་འདོད་ཀྱི་ཡོད་པ་དང་། ཕུ་ཀྲན་གྱིས་ཡང་ཡང་མགོ་སྐོར་གཏོང་བཞིན་པར་ཁོ་ཐང་ཆད་བཞིན་པ་བཤད།
•. ཉེ་དུས་རཱ་དམག་གིས། ཡུ་ཁུ་རན་གྱི་རྒྱལ་སའི་གློག་ཁང་དག་ལ་གཏོར་རྒོལ་གྱིས། གྲོང་ཁྱེར་གྱི་ཆ་ཤས་ཆེན་པོ་ཞིག་གི་གློག་བཅད་ཟིན་པ་ལྟར། ད་ལྟ་སྡོད་ཁང་གྲངས་ 588,000 ལ་གློག་བསྐྱར་གསོ་ཐུབ་ཟིན་པ་དང་། ད་དུང་ཡང་ཁྱིམ་ཚང་ཁྲི་ 6 ཡས་མས་ལ་གློག་མེད་པར་གྱུར་ཡོད་པ་བཤད་ཅིང་། གྲོང་ཁྱེར་གྱི་ཆ་ཤས་ངེས་ཅན་ཞིག་ཏུ་གློག་བསྐྱར་གསོ་མ་ཐུབ་པ་བསྒྲགས།
•. ཁ་སང་རཱ་དམག་གིས། ཡུ་ཁུ་རན་གྱི་ནུབ་ཕྱོགས་ས་ཁུལ་ལི་ཝེ་ཝི་ལ་འཕུར་མདས་གཏོར་རྒོལ་སྐབས། ཨོར་ཤི་ནེ་ཁི་འཕུར་མདའ་སྤྱད་ཟིན་པ་ལྟར། འདིའི་རྗེས་སུ་ཡུ་ཁུ་རན་གྱིས་རྒྱལ་སྤྱིའི་བདེ་འཇགས་ལྷན་ཚོགས་ལ། ཛ་དྲག་ཚོགས་འདུ་ཚོགས་རྒྱུའི་འབོད་སྐུལ་ཞུས། དེ་བཞིན་ནུབ་ཆིངས་དང་། ཡུ་རོབ་ལའང་འདིའི་ཐད་ཚོགས་འདུ་ཚོགས་རྒྱུའི་འབོད་སྐུལ་ཞུས། ཐེངས་འདིར་ཅི་ཞིག་ལ་གཏོར་རྒོལ་ཐེབས་ཟིན་པ་མི་གསལ་ནའང་། འདི་ནི་ཡུ་ཁུ་རན་གྱིས་ཕུ་ཀྲན་གྱི་སྡོད་གནས་ལ་གཏོར་རྒོལ་བྱས་པའི་ལན་ཞིག་ཡིན་པ་རཱ་ཤི་ཡས་བསྒྲགས།
•. དབྱིན་ཇིའི་ཀྲེ་ལེ་གྷི་ར་ཧྥི་གསར་ཤོག་ལྟར་ན། ཨ་རི་དང་ཡུ་ཁུ་རན་བར་འཛུགས་སྐྲུན་དང་འབྲེལ། ཨ་སྒོར་ཐེར་འབུམ་ $800 འགྲོ་གྲོན་གཏོང་རྒྱུའི་ལས་འཆར་གྲོས་མཐུན་ཞིག་ལ་མིང་རྟགས་དགོད་རྒྱུ་ཡིན་པ་བཤད། ཡིག་ཆ་འདི་ལྟར་ན་དམག་འཁྲུག་གིས་གཏོར་ཟིན་པ་དག་བསྐྱར་གསོའི་ཆེད། འབྱུང་འགྱུར་ལོ་ 10 ཡི་རིང་མཉམ་ལས་བྱ་རྒྱུ་དང་། ཡིག་ཆ་འདིར་ཟླ་བ་འདིའི་ཚེས་ 19 དང་ 23 བར་སུད་སིར་མིང་རྟགས་དགོད་རྒྱུ་ཡིན་པ་གསལ། འབྱུང་འགྱུར་ཡུ་ཁུ་རན་དང་ཨ་རིའི་བར་རང་དབང་ཚོང་འབྲེལ་འཛུགས་རྒྱུར། ཛེ་ལན་སི་ཀེ་ཡིས་ཨ་རིར་བསམ་ཚུལ་བཏོན་ཟིན་པ་གསལ།
•. དབྱིན་ཇིའི་ཀྲེ་ལེ་གྷི་ར་ཧྥི་གསར་ཤོག་ལྟར་ན། དོན་དངོས་སུ་སྒྲོ་ནལ་ཁྲི་རམ་ཕུས། དམག་འཁྲུག་འདི་མཚམས་འཇོག་མི་ཐུབ་པའི་རྒྱུ་མཚན་གཙོ་བོ་ནི་ཕུ་ཀྲན་ཡིན་པ་འདོད་ཀྱི་ཡོད་པ་དང་། ཕུ་ཀྲན་གྱིས་ཡང་ཡང་མགོ་སྐོར་གཏོང་བཞིན་པར་ཁོ་ཐང་ཆད་བཞིན་པ་བཤད་ཅིང་། ད་ལྟ་ཨ་རིའི་དམག་དཔུང་གིས། རཱ་ཤི་ཡའི་གྲིབ་གཟུགས་གྲུ་གཟིངས་དག་འཛིན་བཞིན་པ་དང་། གྲོས་ཚོགས་ཀྱིས་རཱ་ཤི་ཡའི་ཚོང་གྲོགས་དག་གི་སྟེང་ཉེས་ཆད་དགལ་རྒྱུར། སྒྲོ་ནལ་ཁྲི་རམ་ཕུས་རྒྱབ་སྐྱོར་བྱ་རྒྱུའི་རྣམ་འགྱུར་སྟོན་བཞིན་པའི་རྒྱུ་མཚན་འདི་ཡིན་པ་བཤད།
•. དོན་དངོས་སུ་ཕུ་ཀྲན་གྱི་དམིགས་ཡུལ་ནི། ཡུ་ཁུ་རན་གྱི་ཆ་ཤས་ཤིག་མ་ཡིན་པར། ཡུ་ཁུ་རན་ཧྲིལ་བོ་འཛིན་རྒྱུ་དེ་ཡིན་པ་སྒྲོ་ནལ་ཁྲི་རམ་ཕུ་རང་གིས་དངོས་སུ་བཤད་ཟིན་ལ། ཁོས། ཕུ་ཀྲན་གྱི་མིག་ནང་དུ་ཡུ་ཁུ་རན་ནི་ཀུ་ཤུ་ཞིག་རེད་ཅེས་བཤད་ཟིན། ཉེ་དུས་ཕོ་བྲང་དཀར་པོའི་ལས་བྱེད་དབུ་ཁྲིད། ལྕམ་སུ་སེ་ཝེ་ལེ་སི་(Susie Wiles)ཡི་སྐད་ཆ་ཡིན་པར་བཤད་པའི་ཡིག་ཆ་ཞིག་ཕྱིར་ཤོར། དེའི་ནང་དུ་མོས། ཕུ་ཀྲན་ལ་དམག་འཁྲུག་མཚམས་འཇོག་འདོད་མེད་པ། སྲིད་འཛིན་གྱིས་ཡིད་ཆེས་བྱེད་བཞིན་འདུག་ཅེས་བཀོད།