གཟའ་མིག་དམར་ཉིན། ཁེ་ན་ཀྲའི་སྲིད་བློན་མར་ཁི་ཀར་ནེ་རྒྱ་ནག་ཏུ་ལམ་ལ་ཆས། འདི་ནི་ཕྱི་ལོ་ 2017 ལོ་ནས་ཁེ་ན་ཀྲའི་སྲིད་བློན་ཞིག་རྒྱ་ནག་ཏུ་ཕྱིན་པ་ཐེངས་དང་པོ་དེ་འགྱུར་རྒྱུ་དང་།
གཟའ་མིག་དམར་ཉིན། ཁེ་ན་ཀྲའི་སྲིད་བློན་མར་ཁི་ཀར་ནེ་རྒྱ་ནག་ཏུ་ལམ་ལ་ཆས། འདི་ནི་ཕྱི་ལོ་ 2017 ལོ་ནས་ཁེ་ན་ཀྲའི་སྲིད་བློན་ཞིག་རྒྱ་ནག་ཏུ་ཕྱིན་པ་ཐེངས་དང་པོ་དེ་འགྱུར་རྒྱུ་དང་། ཁོ་དང་ཞེ་ཅེན་ཕིན་གཉིས་ལོ་སྔོན་མའི་ཕྱི་ཟླ་ 10 ནང་ལྷོ་ཀོ་རེ་ཡར་ཐུག སྐབས་དེར་ཁོ་རྒྱ་ནག་ཏུ་མགྲོན་འབོད་ཞུས་པར་ཡོང་རྒྱུ་ཡིན་པ་ཁས་བླངས། ཕྱི་ལོ་ 2018 ལོར་ཁེ་ན་ཀྲའི་གཞུང་གིས། རྒྱ་ནག་གི་འཕྲུལ་རིག་ཁེ་གཉེར་ཧུ་ཝེ་(华为)ཡི་སྤྱི་གཉེར་གཞོན་པ། མེན་ཝན་ཀྲུ་ཞེས་པའི་བུད་མེད་དེ་བཟུང་རྗེས། རྒྱལ་ཁབ་གཉིས་བར་གྱི་འབྲེལ་བར་ཉམ་རྒུད་ཆེན་པོ་བྱུང་།
ཡིན་ན་ཡང་། ལོ་འདིར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུ་སྲིད་སྟེགས་སུ་སླེབས་རྗེས། ཁོས་ཁེ་ན་ཀྲ་དེ་ད་ལྟ་བར་ཨ་རིའི་བདེ་སྲུང་དང་། དཔལ་འབྱོར་ལ་བརྟེན་ཡོད་པའི་རྒྱལ་ཁབ་ཅིག་ཡིན་པས། རྒྱལ་མཚམས་ཤིག་དགོས་དོན་མེད་པར། རྒྱལ་ཁབ་འདི་ཨ་རིའི་མངའ་སྡེ་ཞིག་ཏུ་བསྒྱུར་ན་ཡག་པོ་ཡོད་ཚུལ་བཤད་ཅིང་། ལྷག་པར་ཁེ་ན་ཀྲའི་ཚོང་ཟོག་སྟེང་སྒོ་ཁྲལ་ཤུགས་ཆེན་བཀལ་རྐྱེན། དཔལ་འབྱོར་དང་བདེ་སྲུང་གཉིས་ཐད་ནས། ཁེ་ན་ཀྲ་དང་ཨ་རིའི་འབྲེལ་བ་ཐག་རིང་དུ་ཕྱིན་ཅིང་། བདེ་སྲུང་དང་དཔལ་འབྱོར་གྱི་ཐད་ནས་ཁེ་ན་ཀྲས་ཡུ་རོབ་དང་། རྒྱལ་ཁབ་གཞན་དང་ལྷན་འབྲེལ་ཐག་ཉེ་རུ་གཏོང་དགོས་གྱུར།
ཐེངས་འདིར་མར་ཁི་ཀར་ནེ་རྒྱ་ནག་ཏུ་ཕྱིན་པ་འདིས། སྒྲོ་ནལ་ཁྲི་རམ་ཕུ་ལ་ཁོང་ཁྲོ་སློང་སྲིད་ཀྱང་། ཁེ་ན་ཀྲའི་ངོས་ནས་ཁེ་གྱོང་ལ་རྩིས་བརྒྱབས་ཟིན་འདུག་པ་དབྱེ་ཞིབ་ཅིག་གིས་བཤད་ཅིང་། ད་ལྟ་ཁེ་ན་ཀྲའི་རྡོ་སྣུམ་བརྒྱ་ཆ་ 90% ཨ་རིར་འཚོང་བཞིན་ནའང་། ཨ་རིས་འབྱུང་འགྱུར་ཝེ་ནེ་ཛོ་ལ་ནས་རྡོ་སྣུམ་ཉོ་ཐབས་བྱེད་བཞིན་པས། ཁེ་ན་ཀྲའི་རྡོ་སྣུམ་ཉོ་ཚད་མར་ཆག་རྒྱུ་ཡིན་པ་ཁེ་ན་ཀྲས་སྔོན་དཔག་བྱེད་བཞིན་པ་གསལ། ཕྱི་ལོ་ 2024 ལོར་ཁེ་ན་ཀྲས་རྒྱ་ནག་གི་གློག་རྫས་རླངས་འཁོར་དག་གི་སྟེང་སྒོ་ཁྲལ་བཀལ།
དེའི་ལན་དུ་ལོ་སྔོན་མའི་ཕྱི་ཟླ་ 8 ནང་རྒྱ་ནག་གིས། ཁེ་ན་ཀྲའི་ཡུངས་སྣུམ་(Canola)གྱི་སྟེང་ཞིབ་འཇུག་འགོ་བཙུགས། ཡུངས་སྣུམ་གྱི་སྟེང་རྒྱ་ནག་གིས་སྒོ་ཁྲལ་བཀལ་ཅིང་། དེས་ཁེ་ན་ཀྲའི་ཡུངས་སྣུམ་རྒྱ་ནག་ཏུ་འདྲེན་རྒྱུར་ཕལ་ཆེར་ཡོངས་སུ་བཀག་ཟིན་པ་ཞིག་ཏུ་གྱུར། འདིའི་སྔོན་དུ་ཁེ་ན་ཀྲའི་ཡུངས་སྣུམ་ཉོ་མཁན་ཆེ་ཤོས་དེ་རྒྱ་ནག་ཡིན་པ་གསལ། ཐེངས་འདིར་རྒྱལ་ཁབ་གཉིས་བར་ཐག་གཅོད་ཆེན་པོ་ཞིག་བྱ་རྒྱུར་ཚོད་དཔག་བྱེད་ཀྱི་མེད་ཀྱང་། ཚོང་འབྲེལ་གྱི་ཐད་ནས་ཕན་ཚུན་བར་ཡིད་ཆེས་སྐྲུན་རྒྱུ་དེ་དམིགས་ཡུལ་གཙོ་བོར་བཟུང་ཡོད་པ་ཚོད་དཔག་བྱེད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ཝེ་ནེ་ཛོ་ལའི་སྲིད་འཛིན་མཱ་རྡུ་རོ་འཛིན་དོན་ནི། ཐབས་བྱུས་ཀྱི་ཆ་ནས་ཨ་མེ་རི་ཀའི་གླིང་ནས་རྒྱ་ནག་དང་རཱ་ཤི་ཡ། ཨེ་རན་སོགས་ཀྱི་ནུས་པ་དང་ཤུགས་རྐྱེན་ཕྱིར་ཕུད་ཆེད་ཡིན་པ་དབྱེ་ཞིབ་པ་ཚོས་ཤོད་བཞིན་པ་ལྟར། ཁ་སང་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པས་འདིའི་ཐད། གནས་སྟངས་གང་འདྲ་ཞིག་ཏུ་གྱུར་ནའང་། ཀྲུང་གོའི་ངོས་ནས་མུ་མཐུད་དུ་ཝེ་ནེ་ཛོ་ལ་ཚུད་པའི་ལྷོ་དང་། དབུས་ཨ་མེ་རི་ཀའི་རྒྱལ་ཁབ་དག་དང་ལྷན། ཐུན་མོང་གི་ཡར་རྒྱས་ཆེད་མུ་མཐུད་དུ་མཉམ་ལས་བྱ་རྒྱུ་ཡིན་ཞེས་བཤད།