ཕྱི་ལོ་ 2024 ཟླ་ 12 ཚེས་ 3 ཉིན་གློ་བུར་དུ་རྒྱལ་ཡོངས་སུ་དྲག་པོའི་བཀའ་རྒྱ་བསྡམས་པ་དང་འབྲེལ། ལྷོ་ཀོ་རེ་ཡའི་ནག་ཉེས་འཛུགས་མཁན་སྐོར་ཞིག་གིས། སྲིད་འཛིན་ཟུར་བ་ཡོན་སོག་ཡོང་ལ་སྲོག་ཁྲིམས་གཅོད་རྒྱུར་ཁྲིམས་ཁང་ལ་ཞུ་ཡིག་ཕུལ།
གཟའ་མིག་དམར་ཉིན། ལྷོ་ཀོ་རེ་ཡའི་ནག་ཉེས་འཛུགས་མཁན་སྐོར་ཞིག་གིས། སྲིད་འཛིན་ཟུར་བ་ཡོན་སོག་ཡོང་ལ་སྲོག་ཁྲིམས་གཅོད་རྒྱུར་ཁྲིམས་ཁང་ལ་ཞུ་ཡིག་ཕུལ། ཕྱི་ལོ་ 2024 ཟླ་ 12 ཚེས་ 3 ཉིན་སྲིད་འཛིན་ཡོན་སོག་ཡོང་གིས། གློ་བུར་དུ་རྒྱལ་ཡོངས་སུ་དྲག་པོའི་བཀའ་རྒྱ་བསྡམས་ཤིང་། ཕྱོགས་འགལ་གྲོས་འཐུས་ཚོ་གཙོས་གྲོས་འཐུས་མང་པོ་འཛིན་ཐབས་བྱས།
ཡིན་ན་ཡང་། དེ་མ་ཐག་གྲོས་འཐུས་ཚོ་གསང་བའི་ངང་གྲོས་ཚོགས་ཁང་དུ་འཛུལ་ཅིང་། འོས་བསྡུ་བརྒྱུད་དྲག་པོའི་བཀའ་རྒྱ་དེ་ཕྱིར་བཟློགས་ཤིང་། མཐར་དྲག་པོའི་བཀའ་རྒྱ་དེའི་དུས་ཡུན་ཆུ་ཚོད་ 3 ཡས་མས་ཙམ་ཞིག་ཏུ་གྱུར། དེའི་མཇུག་འབྲས་སུ་སྲིད་འཛིན་གྲོས་ཚོགས་ཀྱིས་གནས་དབྱུང་བཏང་ཞིང་རྗེས་སུ་ཁྲིམས་བཤེར་འགོ་བཙུགས།
ཁོ་ལ་བཙུགས་པའི་ནག་ཉེས་ཁྲོད་རྒྱལ་ཁབ་ཀྱི་སྲིད་དབང་སྒེར་གཅོད་བྱ་རྒྱུ་ཚོད་ལྟ་དང་། རྒྱལ་ཁབ་ལ་བློ་ལོག་པའི་ནག་ཉེས་སོགས་ཚུད་ཅིང་། སྲིད་འཛིན་ཡོན་སོག་ཡོང་གིས་ད་དུང་ཡང་། རང་གིས་སྔར་བྱས་པ་དག་ནི་སྲིད་འཛིན་གྱི་དབང་ཆ་དང་། རྩ་ཁྲིམས་ཀྱི་རྒྱ་ལས་བརྒལ་མེད་པ་དང་། ཕྱོགས་འགལ་ཆབ་སྲིད་པ་ཚོས་རྒྱལ་ཁབ་གཡོ་འཚོང་དང་། བྱང་ཀོ་རེ་ཡ་དང་འབྲེལ་བ་བྱས་ཡོད་པ་སོགས་ཤོད་བཞིན་པའི་མཚམས། ཁྲིམས་ཁང་གི་མཐའ་མའི་ཐག་གཅོད་དེ། ཕྱི་ཟླ་ 2 ཚེས་ 19 ཉིན་བྱ་རྒྱུ་ཡིན་པ་ཚོད་དཔག་བྱེད།