ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་དམིགས་བསལ་སྐུ་ཚབ་ཝེ་ཀྲི་ཀོ་ཧྥི་ཡིས། ད་ལྟ་གྷ་ཛ་ས་ཁུལ་གྱི་དམག་འཁྲུག་ལ་མེ་མཚམས་བཞག་པའི་ལས་ཀ་རིམ་པ་གཉིས་པ་དེ་འགོ་བཙུགས་ཟིན་ཅེས་བསྒྲགས་ཟིན་པ་ལྟར། སྒྲོ་ནལ་ཁྲི་རམ་ཕུས་ཀྱང་། ད་ལྟ་གྷ་ས་ཁུལ་གྱི་བར་བརྒལ་འཛིན་སྐྱོང་ལ་ལྟ་ཞིབ་བྱེད་མཁན། {ཞི་བདེ་ཚོགས་ཆུང་}ཞེས་པ་བཙུགས་ཟིན་པ་དང་། འདིའི་ཁྲོད་མི་སྣ་གང་དག་ཚུད་ཡོད་པའི་མིང་ཐོ་མགྱོགས་པོར་ཕྱིར་བསྒྲག་རྒྱུ་ཡིན་པ་བཤད།
ཐོག་མའི་གྲོས་མཐུན་ལྟར་ན། ཧཱ་མ་སི་དྲག་དཔུང་གི་ལག་ནས་གྷ་ཛ་ས་ཁུལ་གྱི་བདེ་སྲུང་དང་། འཛིན་སྐྱོང་དབང་ཆ་དེ་བླངས་རྗེས་པཱ་ལི་སི་ཐན་གྱི་མཁས་པ་དང་། ཁྲིམས་རྩོད་པ་སོགས་ཆབ་སྲིད་པ་མ་ཡིན་པའི་མི་སྐོར་ཞིག་གིས། གྷ་ཛ་ས་ཁུལ་གྱི་བར་བརྒལ་འཛིན་སྐྱོང་འགན་འཁུར་དགོས་པ་དང་། དེའི་སྒང་དུ་སྒྲོ་ནལ་ཁྲི་རམ་ཕུ་རང་གིས་འགོ་འཁྲིད་པའི་ཞི་བདེའི་ཚོགས་ཆུང་ཞེས་པ་ཞིག་འཛུགས་རྒྱུ་བྱས་ཟིན།
ད་དུང་སྒྲོ་ནལ་ཁྲི་རམ་ཕུས། ཨེ་ཇིབ་དང་ཁཱ་ཀྲར། ཏུར་ཀེ་བཅས་ཀྱི་རྒྱབ་སྐྱོར་འོག་ང་ཚོས་ཧཱ་མི་སི་དང་ལྷན། གྷ་ཛ་ས་ཁུལ་དེ་དམག་དཔུང་མེད་པའི་ས་ཆ་ཞིག་ཏུ་བསྒྱུར་རྒྱུའི་གྲོས་མཐུན་འཇོག་རྒྱུ་ཡིན་ཞེས་བཤད། ཁོས། དེའི་ཁྲོད་ཧཱ་མ་སི་དྲག་དཔུང་གིས་གོ་ལག་ཚང་མ་རྩིས་སྤྲོད་དང་། ས་འོག་འཐབ་ར་ཚང་མ་གཏོར་རྒྱུའང་ཚུད་ཡོད། ཧཱ་མ་སི་དྲག་དཔུང་གིས་རང་གི་ཁས་ལེན་དག་ད་ལྟ་ཉིད་དུ་ལག་བསྟར་བྱ་དགོས་པ་ཡིན་ལ། གོ་ལག་ཐང་ལ་འཇོག་རྒྱུར་འགོར་འགྱངས་བྱ་མི་རུང་ཞེས་བཤད།
ད་དུང་སྒྲོ་ནལ་ཁྲི་རམ་ཕུས། ངས་སྔར་བཤད་ཟིན་པ་ལྟར། ཁོ་ཚོས་ལས་ཀ་འདི་ལས་སླ་བོ་ཞིག་གི་ངང་བྱ་ཐུབ་ལ། ཁག་པོ་ཞིག་གི་ལམ་ནས་ཀྱང་བྱ་ཆོག་ཅེས། གལ་སྲིད་གོ་ལག་ཐང་ལ་མ་བཞག་ཚེ། ཡང་བསྐྱར་དམག་འཁྲུག་འགོ་གཟུག་རྒྱུའི་ཉེན་བརྡ་བཏང་། ཡིན་ན་ཡང་། ཧཱ་མ་སི་དྲག་དཔུང་གིས། ཟླ་བ་འདིའི་ནང་ཡས་མས་སུ། ཁོ་ཚོའི་དབུ་ཁྲིད་གསར་བ་འདེམས་རྒྱུར་གྲ་སྒྲིག་བྱེད་བཞིན་པའི་གནས་ཚུལ་ཐོན།