སུད་སིར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་བུ་མོའི་ཁྱོ་ག་དང་། ཁོའི་དམིགས་བསལ་སྐུ་ཚབ་ཁུ་ཤི་ནེ་ཡིས། འབྱུང་འགྱུར་གྷ་ཛ་ས་ཁུལ་དུ་འཛུགས་སྐྲུན་བྱེད་ཕྱོགས་དང་འབྲེལ་བའི་འཆར་གཞི་ཞིག་ཕྱིར་བསྒྲགས།
སུད་སིར་ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུའི་བུ་མོའི་ཁྱོ་ག་དང་། ཁོའི་དམིགས་བསལ་སྐུ་ཚབ་ཁུ་ཤི་ནེ་ཡིས། འབྱུང་འགྱུར་གྷ་ཛ་ས་ཁུལ་དུ་འཛུགས་སྐྲུན་བྱེད་ཕྱོགས་དང་འབྲེལ་བའི་འཆར་གཞི་ཞིག་ཕྱིར་བསྒྲགས་ཤིང་། དེ་དང་མཐུན་པའི་འཆར་གཞིའི་པར་རིས་སོགས་བསྟན། དེའི་ཁྲོད་འབྱུང་འགྱུར་གྷ་ཛ་ས་ཁུལ་དུ་གནས་ཚུལ་བསྟི་གནས་དང་། མཚོ་འགྲམ་རྒྱས་སྤྲོ་ཁང་སོགས་འཛུགས་སྐྲུན་བྱ་རྒྱུ་བཅས་ཚུད།ཡིན་ན་ཡང་། གལ་སྲིད་ཧཱ་མ་སི་དྲག་དཔུང་གིས་གོ་ལག་ཐང་ལ་མ་བཞག་ཚེ། གོང་གི་འཆར་གཞི་འདི་དག་ལག་བསྟར་བྱེད་མི་ཐུབ་པ་བཤད།
ཁ་སང་ཡང་བསྐྱར་སྒྲོ་ནལ་ཁྲི་རམ་ཕུས། སྐྱེ་མ་ཐག་པ་ནས་ལག་ཏུ་མེ་མདའ་བཟུང་ཡོད་པའི་ཧཱ་མ་སི་དྲག་དཔུང་གིས་གོ་ལག་ཐང་ལ་མ་བཞག་ཚེ་ཁོ་ཚོ་ཡོངས་སུ་རྩ་མེད་བཟོ་རྒྱུ་ཞེས་ཉེན་བརྡ་བཏང་། ཨ་རབ་ཀྱི་གསར་ཁང་ཞིག་(Sky News Arabia)ལྟར་ན། ཁཱ་ཀྲར་དང་ཏུར་ཀེ་སོགས་ཀྱི་བར་འདུམ་བརྒྱུད། ཧཱ་མ་སི་དྲག་དཔུང་གིས་གོ་ལག་ཐང་ལ་འཇོག་རྒྱུའི་ཐད། ཨ་རི་དང་ཧཱ་མ་སིའི་བར་ཧཱ་མ་སིས་གོ་ལག་ཐང་ལ་འཇོག་རྒྱུ་དང་། ཧཱ་མ་སི་སྔར་བཞིན་ཆབ་སྲིད་ཚོགས་པ་ཞིག་གི་ངོ་བོར་གནས་ཆོག་རྒྱུ། ཧཱ་མ་སིའི་དམག་དཔོན་དག་བདེ་འཇགས་ངང་གྷ་ཛ་ས་ཁུལ་ནས་འགྲོ་རུ་འཇུག་རྒྱུའི་ཐད་གྲོས་མཐུན་ཞིག་བྱུང་ཟིན་པ་བཤད།
ཉེ་དུས་ལྷོ་རྒྱ་ནག་རྒྱ་མཚོའི་ནང་དུ་ཡོད་པའི་ཨ་རིའི་གཏོར་རྒོལ་གྲུ་གཟིངས་རུ་ཁག་(aircraft carrier Lincoln)དཀྱིལ་ཤར་གྱི་ཕྱོགས་སུ་ལམ་ལ་ཆས་ཟིན་པ་དང་། དེ་བཞིན་ཨ་རིའི་གནམ་སྲུང་མ་ལག་(THAAD)སོགས་དཀྱིལ་ཤར་དུ་གཏོང་བཞིན་པ། ཝོལ་སི་ཀྲི་རི་ཀྲི་གསར་དེབ་སྟེང་གནས་ཚུལ་བཀོད་ཟིན་པ་ལྟར། ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ད་ལྟ་ཨེ་རན་གྱི་ཕྱོགས་སུ་དམག་གྲུ་ཕོན་ཆེན་འགྲོ་བཞིན་ཡོད། ད་ལྟ་གནས་ཚུལ་གང་ཡང་འབྱུང་བཞིན་པ་མཐོང་གི་མི་འདུག ཡིན་ན་ཡང་། ང་ཚོས་ཨེ་རན་ལ་ཐག་ཉེ་ནས་ལྟ་བཞིན་ཡོད་ཅེས་བཤད།