བདུན་ཕྲག་སྔོན་མར་ཨ་རིའི་རྒྱལ་སྲུང་ཐབས་བྱུས་ཡིག་ཆ་གསར་བ་ཕྱིར་བཏོན་པའི་ནང་དུ། ཨ་རིས་ལྷོ་ཀོ་རེ་ཡའི་བདེ་སྲུང་ལ་རོགས་སྐྱོར་བྱ་རྒྱུ་དེ་ཚད་ཅན་དུ་བཟོ་རྒྱུ་ཡིན་པ་ཐག་བཅད་ཟིན་པ་གསལ།
བདུན་ཕྲག་སྔོན་མར་ཨ་རིའི་རྒྱལ་སྲུང་ཐབས་བྱུས་ཡིག་ཆ་གསར་བ་ཕྱིར་བཏོན་པའི་ནང་དུ། ཐབས་བྱུས་ཀྱི་ཆ་ནས་འབྱུང་འགྱུར་ཡུ་ཁུ་རན་དེ་གལ་ཆེ་ཤོས་སུ་བརྩི་རྒྱུ་མིན་པ་མ་ཟད། རྒྱ་ནག་ཀྱང་ཨ་རིའི་ཉེན་ཁ་གཙོ་བོར་ངོས་འཛིན་པའི་ཚིག་དེའང་ཕྱིར་འཐེནཟིན་ཅིང་། ཨ་རིས་གཙོ་བོ་ནུབ་ཀྱི་སྐམ་ས་དང་། རྒྱ་མཚོའི་བདེ་འཇགས་ཐད་དམིགས་པ་གཏོད་རྒྱུ་ཡིན་པ་བཀོད་ཡོད་པ་ལྟར། ཡིག་ཆ་གསར་བ་འདི་ནི་ཡུ་རོབ་དང་ཨེ་ཤ་ཡའི་ཨ་རིའི་མཐུན་གྲོགས་དག་ལ་ཉེན་བརྡ་ཞིག་དང་། རཱ་ཤི་ཡ་དང་རྒྱ་ནག་གཉིས་ལ་རྣམ་འགྱུར་ཡག་པོ་བསྟན་པོ་ཞིག་ཏུ་གྱུར།
ལྷག་པར་དུ་ཨེ་ཤ་ཡའི་ཁུལ་ནས། བྱང་ཀོ་རེ་ཡ་འགོག་རྒྱུའི་ལྕགས་ར་ངོ་མ་ནི་ལྷོ་ཀོ་རེ་ཡ་ཡིན་པ་ངོས་འཛིན་དང་། ཨ་རིས་ལྷོ་ཀོ་རེ་ཡའི་བདེ་སྲུང་ལ་རོགས་སྐྱོར་བྱ་རྒྱུ་དེ་ཚད་ཅན་དུ་བཟོ་རྒྱུ་ཡིན་པ་ཐག་བཅད་ཟིན་པ་གསལ། ཕྱི་ལོ་ 1953 ལོར་ལྷོ་བྱང་ཀོ་རེ་ཡའི་དམག་འཁྲུག་མཇུག་བསྡུས་རྗེས། ཨ་རི་དང་ལྷོ་ཀོ་རེ་ཡའི་བར་བདེ་སྲུང་མཉམ་ལས་ཀྱི་ཆིངས་ཡིག་བཞག་ཅིང་། རྒྱལ་ཁབ་གང་རུང་ལ་གཞན་གྱིས་ཚུར་རྒོལ་བྱས་ཚེ། ཕན་ཚུན་ལ་རོགས་སྐྱོར་བྱ་རྒྱུ་གྲོས་མཐུན། ད་ལྟ་ལྷོ་ཀོ་རེ་ཡར་ཨ་རིའི་དམག་མི་ 28,000 ཡོད་པ་དང་། ལྷོ་བྱང་ཀོ་རེ་ཡའི་རྒྱལ་མཚམས་ཀྱང་ཨ་རི་དང་ལྷོ་ཀོ་རེ་ཡ་མཉམ་འབྲེལ་གྱིས་སྲུང་ཡོད།