རྒྱ་གར་གྱིས་ཡུ་རོབ་ཀྱི་རླངས་འཁོར་དག་གི་སྟེང་ནས་སྒོ་ཁྲལ་བརྒྱ་ཆ་ 40% དེ་མ་ཐག་ཕྱིར་འཐེན་རྒྱུ་དང་། བརྒྱ་ཆ་ 10% རྗེས་སུ་ཕྱིར་འཐེན་རྒྱུ་ཡིན་པ་བཤད། འདིའི་ཁྲོད་མཇར་མན་དང་ཧྥ་རན་སིའི་རླངས་འཁོར་འགའ་ཚུད།
ཡུ་རོབ་དང་རྒྱ་གར་གྱི་བར་ཚོགས་འདུ་ཐེངས་བཅུ་དྲུག་པ་དེ་བདུན་ཕྲག་འདིར་ཚོགས་བཞིན་པ་དང་། འདིའི་ཆེད་ཡུ་རོབ་མཉམ་འབྲེལ་གྱི་དབུ་ཁྲིད་ལྕམ་ཝོན་སྒྲེར་ལེ་ཡན་རྒྱ་གར་དུ་སླེབས། ཐེངས་འདིར་རྒྱ་གར་དང་ཡུ་རོབ་གཉིས་ཀྱིས། ཕན་ཚུན་གྱི་ཚོང་ཟོག་སྟེང་ནས་སྒོ་ཁྲལ་སྙུང་རྒྱུ་གྲོས་མཐུན་ཟིན་པ་དང་། ཞིབ་ཕྲའི་ནང་དོན་དག་སང་ཉིན་གཟའ་མིག་དམར་ཉིན་ཕྱིར་བསྒྲག་རྒྱུ་ཡིན་པ་གསལ།
ད་ལྟ་བར་རྒྱ་གར་གྱིས་ཡུ་རོབ་ཀྱི་རླངས་འཁོར་དག་གི་སྟེང་། སྒོ་ཁྲལ་བརྒྱ་ཆ་ 70% འགེལ་བཞིན་པ་དང་། རླངས་འཁོར་སྐོར་ཞིག་གི་སྟེང་སྒོ་ཁྲལ་བརྒྱ་ཆ 110% བཀལ་ཡོད་པ་གསལ། ཐེངས་འདིའི་གྲོས་མཐུན་འདིའི་ཁྲོད། རྒྱ་གར་གྱིས་ཡུ་རོབ་ཀྱི་རླངས་འཁོར་དག་གི་སྟེང་ནས་སྒོ་ཁྲལ་བརྒྱ་ཆ་ 40% དེ་མ་ཐག་ཕྱིར་འཐེན་རྒྱུ་དང་། བརྒྱ་ཆ་ 10% རྗེས་སུ་ཕྱིར་འཐེན་རྒྱུ་ཡིན་པ་བཤད།
ཡིན་ན་ཡང་། རླངས་འཁོར་ཚང་མའི་སྟེང་ནས་མ་ཡིན་པར། ལོ་རེར་རིན་གོང་ཡུ་སྒོར་ 15,000 ལས་མཐོ་བ་ཡིན་པའི་རླངས་འཁོར་གྲངས་འབུམ་ 2 ཡས་མས་ཡིན་པ་བཤད། རླངས་འཁོར་འདི་དག་གི་ཁྲོད་མཇར་མན་གྱི་ཧྥོལ་ཚི་ཝ་གྷེན་(Volkswagen)དང་། གཞན་ཡང་མེར་སེ་སྒྲེ་སི་(Mercedes)དང་(BMW)། ཧྥ་རན་སིའི་རེ་ནོལ་ཀྲི་(Renault)བཅས་ཚུད་ཡོད་པ་གསལ། དེ་ལྟར་ན་རླངས་འཁོར་འདི་དག་རྒྱ་གར་གྱི་ཁྲོམ་རར་རིན་གོང་ཆུང་དུ་འགྲོ་རྒྱུ། འབྲེལ་ཡོད་གནས་ཚུལ་གཞན་དག་རྗེས་སུ་དགོད་རྒྱུ།