དེ་རིང་ཏེ་ཕྱི་ལོ་ 2027 ཟླ་ 1 ཚེས་ 27 ཉིན། རྒྱ་གར་དང་ཡུ་རོབ་མཉམ་འབྲེལ་བར་གཞི་རྒྱ་ཆེ་བའི་རང་དབང་ཚོང་འབྲེལ་གྲོས་མཐུན་བཞག ཡུ་རོབ་ནས་རྒྱ་གར་ལ་ནང་འདྲེན་བྱེད་བཞིན་པའི་ཚོང་ཟོག་བརྒྱ་ཆ་ 97% མ་ཟིན་ཙམ་གྱི་སྟེང་ནས་སྒོ་ཁྲལ་བསྙུང་རྒྱུ་ཐག་བཅད།
དེ་རིང་རྒྱ་གར་དང་ཡུ་རོབ་མཉམ་འབྲེལ་བར་གཞི་རྒྱ་ཆེ་བའི་རང་དབང་ཚོང་འབྲེལ་གྲོས་མཐུན་བཞག ཡུ་རོབ་ནས་རྒྱ་གར་ལ་ནང་འདྲེན་བྱེད་བཞིན་པའི་ཚོང་ཟོག་བརྒྱ་ཆ་ 97% མ་ཟིན་ཙམ་གྱི་སྟེང་ནས་སྒོ་ཁྲལ་བསྙུང་རྒྱུ་ཐག་བཅད་ཅིང་། རང་དབང་ཚོང་འབྲེལ་གྱི་ཆིངས་ཡིག་འདི་ལ་{གྲོས་མཐུན་ཀུན་གྱི་ཨ་མ་}ཞེས་གྲགས། འདི་ནི་འདས་པའི་ལོ་ངོ་ 20 རིང་གྲོས་མོལ་ཡང་ཡང་བྱས་པའི་གྲུབ་འབྲས་སུ་གྱུར། རྒྱ་གར་དང་ཡུ་རོབ་གཉིས་ཀྱིས། རྒྱལ་སྤྱིའི་ཐོན་སྐྱེ་རིན་ཐང་ཕྱོགས་བསྡོམས་ཀྱི་བརྒྱ་ཆ་ 25% མ་ཟིན་ཙམ་བཟུང་ཡོད་པ་དང་། མི་གྲངས་ཐེར་འབུམ་ 1.9 འམ་བརྒྱ་ཆ་ 25% མ་ཟིན་ཙམ་ཞིག་བཟུང་།
ཧིན་རྡུ་སི་ཐན་དུས་བབ་ལྟར་ན། ཕྱི་ལོ་ 2023 དང་ཕྱི་ལོ་ 2024 ལ་རྒྱ་གར་དང་། ཡུ་རོབ་ཀྱི་ཚོང་འབྲེལ་རིན་ཐང་ཨ་སྒོར་ཐེར་འབུམ་ $135 ཡིན་པ་དང་། དུས་ཡུན་འདིར་ཡུ་རོབ་ནི་རྒྱ་གར་གྱི་ཚོང་གྲོགས་ཆེ་ཤོས་སུ་གྱུར་ཟིན་པ་བཤད། ཐེངས་འདིའི་གྲོས་མཐུན་ནི་རྒྱ་གར་གྱི་ཁྲོམ་རར་ཡུ་རོབ་ཀྱི་ཚོང་ཟོག་ཡོང་རྒྱུའི་སྒོ་མོ་སྟོབས་ཀྱིས་འབྱེད་པ་ཞིག་ཏུ་གྱུར་ཅིང་། འདི་ལ་བརྟེན་ནས་ལོ་རེར་ཡུ་སྒོར་ཐེར་འབུམ་ €4 བར་གྲོན་ཆུང་བྱ་ཐུབ་པ་བཤད། འདི་ནི་དོན་དངོས་སུ་ལོ་རྒྱུས་རང་བཞིན་ཅན་ཞིག་ཏུ་གྱུར། རྒྱ་གར་གྱི་སྲིད་བློན་མོ་དྷི་ཡིས། གྲོས་མཐུན་འདིས་ང་ཚོ་ཐུན་མོང་གིས་མང་གཙོ་དང་ཁྲིམས་ཀྱི་དབང་སྒྱུར་ལ་ཆོད་སེམས་འཆང་ཡོད་པ་དེ་ནུས་པ་ཆེ་རུ་གཏོང་ངེས་ཡིན་ཞེས་བསྒྲགས།
ཐེངས་འདིར་རྒྱ་གར་གྱིས་སྒོ་ཁྲལ་བསྙུང་རྒྱུ་ཐག་བཅད་ཟིན་པའི་ཡུ་རོབ་ཀྱི་ཚོང་ཟོག་གི་དཔེ་མཚོན་འགའ་དྲངས་ན། དཔེར་ན། སྔར་ཡུ་རོབ་ཀྱི་རྒུན་ཆང་སྟེང་རྒྱ་གར་གྱིས་སྒོ་ཁྲལ་བརྒྱ་ཆ་ 150% བཀལ་ཡོད་པ་ལ་ད་ལྟ་བརྒྱ་ཆ་ 20% དང་བརྒྱ་ཆ་ 30% བར་བསྙུང་རྒྱུ། ཆང་རིགས་(whisky དང་ Rum ལྟ་བུ)ཀྱི་སྟེང་ནས། སྔར་བརྒྱ་ཆ་ 150% ཡིན་པ་ལ་ད་ལྟ་བརྒྱ་ཆ་ 40% བར་བསྙུང་རྒྱུ། ཝུ་ཆང་གི་སྟེང་དུ་སྔར་བརྒྱ་ཆ་ 110% བཀལ་ཡོད་པ་ལ་ད་ལྟ་བརྒྱ་ཆ་ 50% བར་བསྙུང་རྒྱུ། ཤིང་ཏོག་ཁུ་བའི་སྟེང་དུ་བརྒྱ་ཆ་ 55% བཀལ་ཡོད་པ་ལ་ད་ལྟ་བརྒྱ་ཆ་ 0% འགྱུར་རྒྱུ།
འགྱིག་འཐུམ་ནང་དུ་ཡོད་པའི་བག་ལེབ་དང་། སྐམ་ཐུག་པཱ་སི་ཏ། ངར་ཟས་ཅོག་ལེ་ཀྲི་སོགས་ཀྱི་སྟེང་དུ་སྔར་སྒོ་ཁྲལ་བརྒྱ་ཆ་ 50% ཡིན་པ་ལ་ད་ལྟ་བརྒྱ་ཆ་ 0% འགྱུར་རྒྱུ། ལུག་ཤའི་སྟེང་སྔར་སྒོ་ཁྲལ་བརྒྱ་ཆ་ 33% བཀལ་ཡོད་པ་ལ་ད་ལྟ་བརྒྱ་ཆ་ 0% འགྱུར་རྒྱུ། འགྱིག་འཐུམ་ནང་དུ་ཡོད་པའི་ཤ་རིགས་(Sausages ལྟ་བུ།)ལ་སྔར་བརྒྱ་ཆ་ 110% ཡིན་པ་ལ། ད་ལྟ་བརྒྱ་ཆ་ 50% བར་བསྙུང་རྒྱུ་ཐག་བཅད། དེ་ལྟར་ན་དཔེ་མཚོན་དུ་དྲངས་བའི་ཡུ་རོབ་ཀྱི་ཅ་དངོས་འདི་དག་གི་རིན་གོང་། འབྱུང་འགྱུར་རྒྱ་གར་གྱི་ཁྲོམ་རར་སྔར་ལས་རིན་གོང་ཧ་ཅང་ཆུང་དུ་འགྲོ་རྒྱུ།
ཡུ་རོབ་ཀྱི་རླངས་འཁོར་དག་གི་སྟེང་ནས་སྒོ་ཁྲལ་བརྒྱ་ཆ་ 40% དེ་མ་ཐག་ཕྱིར་འཐེན་རྒྱུ་དང་། བརྒྱ་ཆ་ 10% རྗེས་སུ་ཕྱིར་འཐེན་རྒྱུ་ཡིན་པ་བཤད། ཡིན་ན་ཡང་། རླངས་འཁོར་ཚང་མའི་སྟེང་ནས་མ་ཡིན་པར། ལོ་རེར་རིན་གོང་ཡུ་སྒོར་ 15,000 ལས་མཐོ་བ་ཡིན་པའི་རླངས་འཁོར་གྲངས་འབུམ་ 2 ཡས་མས་ཡིན་པ་བཤད་ཅིང་། རླངས་འཁོར་འདི་དག་གི་ཁྲོད་མཇར་མན་གྱི་ཧྥོལ་ཚི་ཝ་གྷེན་(Volkswagen)དང་། གཞན་ཡང་མེར་སེ་སྒྲེ་སི་(Mercedes)དང་(BMW)། ཧྥ་རན་སིའི་རེ་ནོལ་ཀྲི་(Renault)བཅས་ཚུད་ཡོད་པ་གསལ།
དེ་བཞིན་རྒྱ་གར་གྱིས། ཡུ་རོབ་ཀྱི་ཁྲོམ་རར་མ་རྐང་འཇོག་ཆོག་པའི་གཞི་རྒྱ་ཆེ་རུ་དང་། རྩིས་འཕྲུལ་དང་འབྲེལ་བའི་ཞབས་ཞུ་་མི་སྣ་མང་པོ་(IT services)གཏོང་ཐུབ་པ། རས་ཆ་དང་ཀོ་བའི་རིགས། སྨན་རྫས་དང་རིན་པོ་ཆེའི་རིགས་སོགས་ཡུ་རོབ་ཀྱི་ཁྲོམ་རར་འདྲེན་རྒྱུའི་སྒོ་མོ་འབྱེད་རྒྱུ་དང་། ཚོང་ལས་དང་འབྲེལ་བའི་ཁྲིམས་མང་པོའི་ཐད་ནས། ཡུ་རོབ་ནས་རྒྱ་གར་ལ་ཁེ་ཕན་ཆེན་པོ་ཐོབ་རྒྱུ་ཡིན་པས། འདི་ལས་རྒྱ་གར་ལ་ཐོབ་པའི་ཁེ་ཕན་ནི། ཚོང་ཟོག་གི་སྟེང་ནས་སྒོ་ཁྲལ་བཅག་པ་ལས་བརྒལ་ཡོད་པ་གསལ།
རྒྱ་གར་ནི་འཛམ་གླིང་གི་རྩིས་འཕྲུལ་ཞབས་ཞུ་བའི་གྲངས་མང་ཤོས་ཀྱི་རྒྱལ་ཁབ་ཅིག་ཡིན་པས། འབྱུང་འགྱུར་ན་གཞོན་མང་པོར་ཚད་མཐོའི་ལས་ཀ་རག་རྒྱུའི་སྒོ་མོ་ཕྱེ་ཟིན་པ་ཡིན་ལ། དེ་ལྟར་ན་འཕྲུག་རིག་དང་ནོར་སྲིད་ལམ་ལུགས། ཚོང་ལས་དང་འབྲེལ་བའི་ཁྲིམས་ཀྱི་སྲུང་སྐྱོབ་སོགས་ཐོབ་རྒྱུ་མ་ཟད། རྒྱ་གར་དུ་ཡུ་རོབ་ཀྱི་ཁེ་གཉེར་དང་བཟོ་གྲྭ་དག་གིས་མ་རྐང་འཇོག་རྒྱུ་དང་། དེ་བརྒྱུད་རྒྱ་གར་གྱི་དཔལ་འབྱོར་དང་ནོར་སྲིད། འཕྲུལ་རིགས་དེང་རབས་ཅན་དུ་འགྱུར་བའི་གོ་འགྲོས་མགྱོགས་སུ་གཏོང་ཐུབ་པ་བཅད་ཚུད།
🔘 ཕྱི་ལོ་ 1947 ལོར་རྒྱ་གར་ལ་རང་བཙན་ཐོབ་ཅིང་། སྐབས་དེར་རྒྱ་གར་གྱི་དཔལ་འབྱོར་ཧ་ཅང་སྐྱོ་ཞིང་། གནས་སྟངས་འདི་འགྱུར་བ་གཏོང་རྒྱུར་དུས་ཡུན་རིང་པོ་དགོས་པ་གྱུར་ཅིང་། དབུལ་ཕུངས་ཀྱི་གྲངས་མང་བའི་རྒྱ་གར་གྱིས། རྒྱལ་ནང་གི་སྤྱི་འབངས་ཚང་མའི་ཁེ་ཕན་དང་དགོས་མཁོ་ཆ་སྙོམས་ཀྱིས་མཁོ་སྤྲོད་ཐུབ་དགོས་པས། ཕྱེ་སྤྱི་ཚོགས་རིང་ལུགས་(གཞུང་གིས་ཚོང་ལས་ཁྲོད་ཐེ་བྱུས་ཤུགས་ཆེན་བྱེད་བཞིན་པའི་དོན།)ཀྱི་དཔལ་འབྱོར་སྲིད་བྱུས་ཤིག་བཟུང་ཞིང་། ལྷག་པར་རྒྱལ་ནང་གི་ཐོན་སྐྲུན་མཁན་སྲུང་སྐྱོབ་ཕྱིར། ཕྱི་ལོགས་ཀྱི་ཚོང་ཟོག་ནང་ལ་ཡོང་རྒྱུའི་སྒོ་མོ་ཧ་ཅང་དམ་པོར་བརྒྱབས་པས། རྒྱལ་སྤྱིའི་དཔལ་འབྱོར་རིག་པ་བ་ཚོས། རྒྱ་གར་ལ་སྒོ་ཁྲལ་གྱི་རྒྱལ་བོ་ཞེས་མིང་བཏགས།
ཡིན་ན་ཡང་། ཉེ་བའི་ལོ་འགའི་ནང་རྒྱ་གར་གྱི་དཔལ་འབྱོར་འཕེལ་རྒྱས་ཚད་ཧ་ཅང་མགྱོགས་ཤིང་། ཡར་ཐོན་འཕྲུལ་ཆས་བཟོ་མཁན་སོགས་སྒེར་བ་ཁེ་གཉེར་མང་པོ་ཐོན་ཅིང་། འདི་ནི་རྒྱལ་ཁབ་ཀྱི་དཔལ་འབྱོར་དང་ཁྲོམ་ར་རྒྱལ་སྤྱིའི་སྟེང་སྒོ་མོ་ཡོངས་སུ་འབྱེད་རྒྱུའི་གྲ་སྒྲིག་འགྲུབ་བཞིན་རྟགས་ཆེན་པོ་ཞིག་ཏུ་གྱུར། ལྷག་པར་རྒྱལ་སྤྱིའི་ས་ཁམས་ཆབ་སྲིད་བརྟན་ལྷིང་མིན་ཞིང་། རྙོག་ཟིང་དུ་གྱུར་ཡོད་པའི་དུས་མཚམས་སུ་དང་། ཨ་རི་དང་རྒྱ་གར་བར་ད་དུང་ཡང་ཚོང་འབྲེལ་བསྐྱར་བཅོས་ཀྱི་གྲོས་མཐུན་འཇོག་མ་ཐུབ་པའི་མཚམས་སུ་གྲོས་མཐུན་འདི་བཞག ཁ་སང་ཨ་རིའི་ནོར་སྲིད་དྲུང་ཆེ་སི་ཀོ་ཀྲི་ཡིས། ང་ཚོས་རཱ་ཤི་ཡའི་རྡོ་སྣུམ་སྟེང་སྒོ་ཁྲལ་བཀལ་ཡང་། ཡུ་རོབ་ཀྱིས་རྒྱ་གར་བརྒྱུད་ནས་རཱ་ཤི་ཡའི་རྡོ་སྣུམ་མུ་མཐུད་དུ་ཉོ་རྒྱུ་རེད་ཅེས་བཤད།
ཨ་རི་དང་རྒྱ་གར་བར་ཚོང་འབྲེལ་བསྐྱར་བཅོས་ཀྱི་གྲོས་མཐུན་འཇོག་མ་ཐུབ་པའི་རྒྱུ་མཚན་གཙོ་བོ་ནི། སྒྲོ་ནལ་ཁྲི་རམ་ཕུས་རྒྱ་གར་གྱི་ཁྲོམ་རར་ཨ་རིའི་ཞིང་ལས་ཐོན་རྫས་དག་འཚོང་རྒྱུར་འབད་པ་བྱེད་བཞིན་པ་ལ། རྒྱ་གར་གྱིས་གྲངས་ཀ་མང་བའི་རང་གི་ཞིང་པ་དག་གི་ཁེ་ཕན་དང་། ཐོན་ཟོག་སྲུང་སྐྱོབ་ཕྱིར། ད་ལྟ་བར་ཨ་རིའི་ཆ་རྐྱེན་དག་ཁས་ལེན་མ་ཐུབ་ཅིང་། དེ་བཞིན་ཐེངས་འདིར་ཡུ་རོབ་དང་རྒྱ་གར་བར་བཞག་པའི་གྲོས་མཐུན་ཁྲོད་དུའང་། རྒྱ་གར་གྱིས་སྔར་བཞིན་རང་གི་ཞིང་པ་དག་གི་ཁེ་ཕན་སྲུང་ཡོད་པ་གསལ། དེའི་དོན་ནི་ཡུ་རོབ་ཀྱི་ཞིང་ལས་ཐོན་རྫས་རྒྱ་གར་དུ་ཡོང་རྒྱུ་མུ་མཐུད་དུ་ཚད་བཀག་ཐེབས་རྒྱུ། ཐེངས་འདིའི་གྲོས་མཐུན་གྱི་ནང་དོན་ཞིབ་ཕྲའི་སྐོར་ལ་རིམ་གྱིས་ཕྱོགས་གཉིས་ཀྱིས་ལས་ཀ་བྱ་རྒྱུ་ཡིན་པ་གསལ།