ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ད་ལྟ་ཡང་བསྐྱར་ཨ་རིའི་གཏོར་རྒོལ་གྲུ་གཟིངས་རུ་ཁག་ཅིག་ཨེ་རན་གྱི་ཕྱོགས་སུ་འགྲོ་བཞིན་པ་བཤད། ཐོག་མར་གྲོས་མོལ་གྱི་ལམ་ནས་ཨེ་རན་གྱི་དཀའ་ངལ་འདི་སེལ་རྒྱུར་ཚོད་ལྟ་བྱ་རྒྱུ་ཡིན་པ་ཁོས་བཤད།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། གྷ་ཛ་ས་ཁུལ་དུ་མེ་མཚམས་བཞག་པའི་ལས་ཀ་རིམ་པ་གཉིས་པ་དེ་འགོ་བཙུགས་ཟིན་ཅེས་བསྒྲགས་ཤིང་། ཉེ་དུས་སུད་སིར་འདི་དང་འབྲེལ་ཞི་བདེ་ལྷན་ཚོགས་ཞེས་པ་གཞུང་འབྲེལ་ངང་བཙུགས་ཟིན་པ་ལྟར། འཆར་གཞི་ལྟར་ན་གྷ་ཛ་ས་ཁུལ་དུ་བར་བརྒལ་འཛིན་སྐྱོང་ཞིག་འཛུགས་དགོས་པ་དང་། གྷ་ཛ་ས་ཁུལ་གྱི་བདེ་སྲུང་ཆེད། རྒྱལ་སྤྱིའི་དམག་དཔུང་ཞིག་གྷ་ཛ་ས་ཁུལ་དུ་འཇོག་དགོས་པ་ཡིན།
ཡིན་ན་ཡང་། ཁ་སང་ཨེ་ཛི་རལ་གྱི་སྲིད་བློན་ནེ་ཏན་ཡ་ཧུ་ཡིས། ཏུར་ཀེ་དང་ཁཱ་ཀྲར་གཉིས་ཀྱི་དམག་མི་གྷ་ཛ་ས་ཁུལ་དུ་ཡོང་དུ་འཇུག་རྒྱུ་མིན་ཞེས་བཤད། ཨེ་ཛི་རལ་གྱིས། ད་ལྟ་དགྲ་བོ་རྙིང་པ་ཚོ་གྱོན་པ་གསར་བའི་འོག་ནས། ཨེ་ཛི་རལ་གྱི་ཐག་ཉེ་བཅར་བཞིན་འདུག་ཅེས་བཤད། ཁཱ་ཀྲར་དུ་ཧཱ་མ་སི་དྲག་དཔུང་གི་གཏེ་དཔོན་དག་ཡོད་པ་དང་། ཨེ་ཛི་རལ་གྱིས། ཁཱ་ཀྲར་ནི་ཧཱ་མ་སིའི་ཆབ་སྲིད་རྟེན་གཞི་རུ་མཐོང་བཞིན་པ་གསལ།
སེ་རི་ཡའི་བྱང་ཕྱོགས་སུ་ཡོད་པའི་རཱ་ཤི་ཡའི་དམག་སྒར་ནས། དམག་མི་དང་གོ་ལག་ཕྱིར་འཐེན་བཞིན་པའི་གནས་ཚུལ་ཐོན། ཕྱི་ལོ་ 2024 ཟླ་ 12 ཚེས་ 8 ཉིན་སེ་རི་ཡའི་སྲིད་འཛིན། སྒེར་གཅོད་པ་ཨ་ས་རྡིའི་ཁྱིམ་ཚང་གི་སྲིད་དབང་མཇུག་བསྡུས་རྗེས། སེ་རི་ཡར་ཡོད་པའི་རཱ་ཤི་ཡའི་དམག་སྒར་དག་གནས་ཐུབ་མིན་ངེས་གཏན་མེད་པར་གྱུར། དེ་རིང་སེ་རི་ཡའི་བར་བརྒལ་སྲིད་འཛིན། ཨལ་ཤ་ར་རཱ་ཤི་ཡའི་རྒྱལ་ས་མོ་སི་ཁོར་འགྲོ་བཞིན་པ་དང་། ཕུ་ཀྲན་དང་ལྷན་ཐུག་རྒྱུ་ཡིན་པ་གསལ།
ཨ་རིའི་སྲིད་འཛིན་སྒྲོ་ནལ་ཁྲི་རམ་ཕུས། ད་ལྟ་ཡང་བསྐྱར་ཨ་རིའི་གཏོར་རྒོལ་གྲུ་གཟིངས་རུ་ཁག་ཅིག་ཨེ་རན་གྱི་ཕྱོགས་སུ་འགྲོ་བཞིན་པ་བཤད། ཐོག་མར་གྲོས་མོལ་གྱི་ལམ་ནས་ཨེ་རན་གྱི་དཀའ་ངལ་འདི་སེལ་རྒྱུར་ཚོད་ལྟ་བྱ་རྒྱུ་ཡིན་པ་ཁོས་བཤད། འདིའི་སྔོན་དུ་ཨ་རིའི་མཚོ་དམག་རུ་ཁག་ཅིག་དཀྱིལ་ཤར་གྱི་མཚོའི་ནང་དུ་སླེབས་ཟིན། ཨེ་རན་གྱིས། ཨ་རིས་གཟབ་མནན་བྱ་དགོས་པ་དང་། ནོར་འཁྲུལ་ཆུང་ངུ་ཞིག་གིས་དོན་རྐྱེན་ཆེན་པོ་སློང་སྲིད་པའི་ཉེན་བརྡ་བཏང་།