ཨ་རིའི་གྲོས་ཚོགས་ཀྱི་ཆོག་མཆན་སྤྲད་ཟིན་པའི་ཕྱི་རྒྱལ་རོགས་དངུལ་ཁྲོད། བོད་དང་འབྲེལ་བའི་རོགས་དངུལ་ཁྱོན་ཨ་སྒོར་ས་ཡ་ $23 སྤྲད་རྒྱུ་ཆོག་མཆན་སྤྲད།
ཨ་རིའི་ཕྱི་ཚེས་ 3 དང་རྒྱ་གར་གྱི་མདང་དགོང་། ཕྱི་ལོ་ 2026 ལོའི་ཨ་རིའི་གཞུང་གི་ལོ་འཁོར་སྔོན་རྩིས་འགྲོ་གྲོན་ལ་གྲོས་ཚོགས་ཀྱིས་ཡོངས་སུ་ཆོག་མཆན་སྤྲད་ཅིང་། སྲིད་འཛིན་སྒྲོ་ནལ་ཁྲི་རམ་ཕུས་མིང་རྟགས་ཀྱང་བཀོད་ཟིན་པས། ད་ལྟ་འདི་ཉིད་ཁྲིམས་སུ་བཅས་ཟིན་པ་ཡིན། དེ་ལྟར་ན་བདུན་ཕྲག་སྔོན་མ་ནས་ཨ་རིའི་གཞུང་སྒོ་ཕྱེ་ཀ་བརྒྱབས་ཟིན་པ་དེ་མཇུག་བསྡུས།
ཐེངས་འདིར་གྲོས་ཚོགས་ཀྱི་ཆོག་མཆན་སྤྲད་ཟིན་པའི་ཕྱི་རྒྱལ་རོགས་དངུལ་ཁྲོད། བོད་དང་འབྲེལ་བའི་རོགས་དངུལ་ཁྱོན་ཨ་སྒོར་ས་ཡ་ $23 སྤྲད་རྒྱུ་ཆོག་མཆན་སྤྲད། དེ་དག་བྱེ་བྲག་ཏུ་དབྱེས་ན། བོད་ཀྱི་རིག་གཞུང་དང་སྤྱི་ཚོགས་ཡར་རྒྱས། ཤེས་ཡོན། ཁོར་ཡུག་སྲུང་སོགས་ཀྱི་ཆེད་ལས་ཀ་བྱེད་མཁན་གྱི་གཞུང་འབྲེལ་མ་ཡིན་པའི་ཚོགས་པ་ཚོར་ཨ་སྒོར་ས་ཡ་ $10 གཏོང་ཆོག་རྒྱུ། (འདིའི་ཁྲོད་བོད་ནང་དུ་སྤྲོད་རྒྱུའི་རོགས་དངུལ་ཡང་ཚུད།)
༡ བཙན་བྱོལ་བོད་མིའི་སྤྱི་ཚོགས་ཁྲོད། བོད་ཀྱི་རིག་གཞུང་དང་སྐད་ཡིག་སྲུང་སྐྱོབ་དང་ཡར་རྒྱས། རིག་གཞུང་བྱ་འགུལ། ༢ བཙན་བྱོལ་བོད་མིའི་སྤྱི་ཚོགས་བརྟན་འཇགས་དང་ཡར་རྒྱས། ༣ དབུས་བོད་མིའི་སྒྲིག་འཛུགས། བོད་མིའི་དབུ་ཁྲིད་གསར་བ་སྐྱེད་སྲིང་བཅས་ཀྱི་ཆེད་ཨ་སྒོར་ས་ཡ་ $8 གཏོང་ཆོག་རྒྱུ།
{དབུས་བོད་མིའི་སྒྲིག་འཛུགས་}ཀྱི་ནུས་པ་ཆེ་རུ་གཏོང་ཆེད་ཨ་སྒོར་ས་ཡ་ $5 གཏོང་ཆོག་རྒྱུ་དང་། དངུལ་སྒོར་འདི་ནས་ཨ་སྒོར་ས་ཡ་ $1,5 རྒྱལ་བལ་དུ་ཡོད་པའི་བཙན་བྱོལ་བོད་མིའི་དཔལ་འབྱོར་ཡར་རྒྱས་དང་། བཙན་བྱོལ་བོད་པའི་ཁྱིམ་ཚང་དག་གི་རྩ་བའི་དགོས་མཁོ་དག་གི་ཆེད་གཏོང་ཆོག་རྒྱུ། (འདིའི་ཁྲོད་བོད་མི་ཚོས་རང་ཁ་རང་གསོ་ཐུབ་ཆེད། ལག་རྩལ་སྦྱོང་བརྡར་སྤྲད་རྒྱུ་སོགས་ཚུད་ཡོད་པ་གསལ།)
སྒྲོ་ནལ་ཁྲི་རམ་ཕུ་སྲིད་སྟེགས་སུ་སླེབས་རྗེས། ཨ་རིའི་ཕྱི་རྒྱལ་རོགས་སྐྱོར་(USAID)གྱི་དབུས་ལས་ཁུངས་སྒོ་བརྒྱབས་ཤིང་། ལས་ཀ་མང་པོ་ཞིག་རྒྱལ་སྲིད་ལྷན་ཁང་གི་ཁོངས་སུ་ཟླ་བསྒྲིལ་བ་སོགས། འཛམ་གླིང་གང་སར་འཕྲོད་བསྟེན་དང་རང་བྱུང་གནོད་འཚེ། དབུལ་ཕུང་སོགས་ཀྱི་ཆེད་ཨ་རིས་སྤྲོད་བཞིན་པའི་རོགས་སྐྱོར་ལ་ཚད་བཀག་ཆེན་པོ་ཐེབས། ཡིན་ན་ཡང་། བོད་ཕྱི་ནང་གི་བོད་མིར་མུ་མཐུད་དུ་རོགས་སྐྱོར་སྤྲད་རྒྱུ་ཐག་བཅད་པ་འདིས། ཨ་རིའི་ཆབ་སྲིད་ཚོགས་པ་གཉིས་ཀྱི་ཁྲོད་བོད་དང་བོད་མིའི་འཐབ་རྩོད་ལ། སྔར་བཞིན་རྒྱབ་སྐྱོར་ཆེན་པོ་ཡོད་པ་སླར་ཡང་གསལ་བོར་བསྟན།
དེ་བཞིན་ཐེངས་འདིའི་ལོ་འཁོར་སྔོན་རྩིས་ཀྱི་ཁྲོད། ཨ་རིའི་རྒྱལ་སྤྱིའི་གསར་འགྱུར་(USAGM)ལ་འགྲོ་གྲོན་གཏོང་ཆོག་རྒྱུའང་ཚུད། ཐེངས་འདིར་ཨ་རིའི་རྒྱལ་སྤྱིའི་གསར་ཁང་ཆེད། ཁྱོན་ཨ་སྒོར་ས་ཡ་ $653 ཟུར་འཇོག་དང་། བྱེ་བྲག་ཏུ་སྐད་རིགས་འདྲ་མིན་ཡོད་པའི་ཨ་རིའི་རླུང་འཕྲིན་ཁང་གི་ཆེད་ཨ་སྒོར་ས་ཡ་ $199.5 དང་། སྐད་རིགས་འདྲ་མིན་ཡོད་པའི་ཨེ་ཤ་ཡ་རང་དབང་རླུང་འཕྲིན་ཁང་གི་ཆེད་ཨ་སྒོར་ས་ཡ་ $53.5 ཟུར་འཇོག་བྱ་རྒྱུ་བཅས་ཚུད་དགོས། (གསར་ཁང་དག་གི་དངུལ་སྒོར་གྱི་གྲངས་ཀ་འདི། སྔོན་རྩིས་ཚོགས་ཆུང་གི་ཆོག་མཆན་སྤྲད་ཟིན་པ་དེར་གཞིར་བཞག་ཡིན་པ་ལགས།)